Dios ye bono...

Tengo una opinión

Una campaña británico; de xente fartuco de propaganda evanxelisto, hai tiempu punxo a correr peles cais de Londinun, en pose provocativo y exerciciu de publicidá, una frase inxenioso, una cosa asina como que "pueque Dios nun esista, se feliz". Esta pose xustificativa, en llugar y tiempu determinao, garráronla pelos pelos los autonomaos "ateos" pa facer publicidá interesoso del ateísmu y ello por aciu de pancartes llantaes n'autobuses urbanos, primeramente en Barcelona. Otru día trataremos el totalitarismu catalán pero agora vaigamos con Dios, en MAYÚSCULES, por si nun se decatare tovía daquién.

Primero de too hai que s'entrugar por eso que llamen "Dios" pues si se niega, se pon en dulda, o s'afirma la esistencia de daqué forzoso ye saber qué ye, o pue ser, esi daqué. Nun conozo, prima facie, eso que dellos llamen Dios pues solo oyí opiniones qu'emponderen ciertes notes más o menos valoratibles, atributos maraviellosos y poderes prestosos y tarrecibles. Hai un gran ensame de lliteratura divino, muncha xente perdió, o ganó, el so tiempu cuntando lo que yera y ye Dios, lo que nun ye y lo que va a ser, Dios mediante. Paez que Dios nun ye una cosa material pero ye un padre y nós, mortales, los sos fíos pues la nuesa esistencia ye deldora de la so gracia y de los sos daos pa colos seres "inferiores". Dicin que ye amor, perdón, compasión... toes nobles pallabres, preciosos y precisos conceutos qu'espeyen un desideratum, un fin ayeno al puercu mundu en qu'esllamargamos los humanos. Frente a tantu acabamientu y mundicia álzase la lluz sobrecompensaora de Dios, lo bono ente lo meyor y lo meyor ente lo escelso. Poro, Dios paez una idea. Paez, platónicamente, una solombra espeyada na paré de la cueva de la inorancia en que sapoza l'home vulgar, corriente, común...

Paez, sicasí, que l'home modernu, sabiu en sabencia de datos y enciclopedia, aquél descuidao de lo moral y escasamente servior de lo ético, aquél otru home, digo, paez que nun esmolez por saber si Dios esiste o non pues, como presunta idea, depende del campu suxetivu en que se formula, y funda, la proposición.

Paez que negar a Dios, neto qu'afirmalu, nun paez cosa xuicioso cuando ello muévese nel campu de les creencies. Con independencia de la implicación cuántico de la creencia (ello ye, como factor de cocreación de la realidá pola que s'allampie vivir, cosa que solo furrula en términos de sutileza), dende'l puntu vista de la esistencia "grebo" en que vivi la inmensa mayoría, ye perfeutamente prescindible y irrelevante l'exerciciu de crítica, afirmación o negación de lo divino. Sacante pa los políticos, que viven de la engañifa y la demoscopia, la creencia personal nun amiesta un ren de verosimilitú a una afirmación o negación. Les creencies, insisto qu'en términos de lo grebo, son irrelevantes como fuente de lo que se quier nomar como "verdá". Too ye un xuéu de tautoloxíes, un balero exerciciu d'heurística estéril y prescindible.

Si Dios esiste, coles notes d'escelsitú y grandonismu que dicen que tien, nun necesita de la idea de Dios que-y mangue l'home pa definilu pues la so esistencia cai fuera de la comprensión humano. Si nun esiste, ¿pa qué cuestionase lo contrario? Al final trátase d'una escoyeta personal pues la esistencia, o non, de lo inefable solo se pué pescanciar dende la inefabilidá interior de caún. Fuera solo hai rux-rux, allorie,divilluriu y trafuelgu. Ta lo bono, lo malo, lo presente, lo ausente, l'amor, l'odiu... En resume, ta la vida pescanciao dicotónicamente como una inacabable fórmula matemático de ceros y unos, presente-ausente, si-non,... qu'espurre y espurre hacia lo infinito.

Bramente toos tienen razón. Nun hai Dios pues el Dios del que se fala nun ye otra cosa qu'una copia parcial de lo humano, una imaxe desformada dende'l puntu de vista de lo bonal (sía lo que sía lo bonal). Hai Dios porque solo la esistencia de Dios xustifica lo inxustificable (sía lo que sía eso que xustificar) y ello ye asina porque, sinón, habría qu'inventalu pa facer soportable esta invivible realidá humano.

En realidá, los términos de la negación o afirmación tan mal planteaos. Si pa los ateos (manda coyones nomase como non-Dios o sin-Dios cuando al dicir la pallabra Teo-Dios tas creando lo que niegues) pueque Dios nun esista y, poro, hai que ser feliz, quiciabes esi Dios del que falen nun ye otra cosa qu'una "supercadarma" social interesoso de porgüeyos mutuos con enfotu de poder. Una superestructura de poder. De poder. Poder.

El mensaxe diba ser "Pueque 'l poder nun esista, se feliz" Pero pa eso ya tan los "anarquistes" (nun tracamundiar colos "narcotizaos")

Costante Álvarez

En nome de los SORDO...

...digo patria, pero ¿cuála?

Y, por embargu, embargáu de señaldá, emociona baxo los alcuerdos de la tierra ausente.

Los Sordo, moriscos espulsos del paraísu andalusí, caltienen l'arguyu y la raza de ser hispano-andalusíes nun movimientu de dignidá inteleutual porque son más españoles que los españoles masque lleven espulsaos de so casa va pa cuatrocientos años por razones probes y un rei de grandor cuestionable....

Los Sordo, ex-patriaos, nun queríen dexar de ser lo que yeren y son, andalusíes, y casaron ente ellos pa guardar l'apellíu, l'alcuñu de notoriedá, d'identidá, de resistencia pa nun esborriar raza y alcuerdos na africanidá acoyeor. "Fuimos espulsaos por una...débil razón". Ye evidente que l'home que fala a la cámara de TVE, de xuro patriarca de la familia de los Sordo, de pose netamente europeo, tiez blanco y estrañamente fuera del llugar tetuaní en que fala, embalsa agua nos claros güeyos que reprimen reproche. Porque, cunta a la cámara de televisión española, que los sos antepasaos tuvieron de cruzar, de mecer, coles esclaves que teníen p'anegratar la piel, pues munchos d'ellos morrieren nel campu... Nun lo diz, pero de xuro que munchos Sordo cayeron baxo'l racismu moru de ver cristianu en piel blanco.

Si bien miro esto con perspeutiva histórico, nun pueo evitar media sorrisa amarguxo. Aquellos nobles tardorromanos, heriedes de Tartesia y de les posteriores correríes de los pueblos xermánicos que fundieron la hispania imperial, aquéllos que dexaron xenes de pelo rubio y güeyos azules na Bética barbarizao, escoyeron la conversión al islam pa fuxir de la discriminación del musulmán en forma d'impuestos y humildación, ello ye, falta de tolerancia. Aquéllos, como'l conde Casius que devieno en Qassi pa siguir mandando, forxaron y gozaron del grandor d'Al Andalus hasta que'l rei cristiano tomó Granada y la casa d'Austria firmó la espulsión morisco. Doble discriminación pero una sola pena.

La historia ye cruel remunerando asina les decisiones de los antepasaos. Porque les coses de les creencies, les de los dioses y les de les dotrines revelaes ye lo que traen, barbarie y muerte en nome de la hermandá, la lliberación y un cielu que ganar. Y ye que los Sordo nun nacieren moros, cristianos o cretinos. Ellos nacieron humanos y de fema, como toudiós. Depués vinieron les etiquetes, les filies y les fobies. Depués vieno la barbarie y la fe, too en xunto y estrao.

Si por un dios mates o muerres, amigu, tienes un gran problema.

Por favor, nun me chiscar.

Costante Álvarez

IDEALES

La medida del home son los sos ideales. La so perdición, la ideoloxía. De xuro que tamién tien idées y, cómo non, dotrina, pero ye esi borrinosu conceutu qu'implica camín de perfeción hacia un fin noble el que lu elleva perriba la mondicia y basoria emocional y material en que-y presta esllamargar.

Los "Ideales", na posguerra incivil española, yeren una marca de tabacu malo, de picadura reciclao, que permitía calecer, brevemente, a quien lo fumaba. Frente a esi caldiu fuéu en refocilu, que ye'l tabacu, son los ideales combustible de mayor altor. Pero los ideales nun se críen albentestate, nun se merquen en rastru o centru comercial: hai que los afayar dientro d'ún entrugándose por aquéllo que paga la pena facer, amar, compartir... pa meyorar la condición y calidá humanes. De tan cenciello que ye, mete miéu.

La mayor parte de la xente tien rocéa a mirase dientro. Talo diríase que nun quieren mirar a esi degorriu que paecen llevar de compañeru y que, bramente, nun lo ye porque nin ye collaciu nin demoñu. Por mangá-y un nome, aquél ye solitú y ésti, desamor. Criamos los pantasmes que mos afueguen y arreyen a esperiencies dexastroses que, producíes, fain fuerte esi desamor cristalizáo en desesperanza y acabación. Pero la realidá ye más rico que tola teoría y collacios y corninos hailos en munches manifestaciones y calidaes. No diversable del alma humano enraigona la ESPERANZA, con lletres mayúscules por si un cegaratu nun ye a velo.

L'actual crisis económica, qu'anicia nel 2006 y espampana nel 2008, ye bona oportunidá pa tracamundiar conceutos y dotrines. Toles crisis que conocí y estudié valieron pa lo mesmo y toes traxeron daqué interesante pal home. Y digo bien, pal home, non pa la Tierra y los sos serviores naturales pues pal ecosistema terrestre los homes somos alieníxenes, malura corrupio y destructivo. La crisis de la que falo nun ye nada orixinal na so sustancia porque descansa na mesma naturaleza humano. Si miramos p'atrás daqué paecío se vivió cuando 'l llamáu Imperiu Romano colapsó económicamente. Siempre ye lo mesmo: egoísmu y fuñería, y estos biltos siempre rinden la mesma collecha: probitú y desigualdá. La diferencia ente les crisis siempre ye la mesma: el gráu tenolóxicu de la dómina pero los resultaos son, tamién, iguales porque un esclavu d'hai 2.000 años nun taba meyor (o, quiciabes, sí) qu'un esclavu (perdón, quinxi dicir trabayaor) por cuenta propia o ayena d'anguaño.

L'home repite los mesmos erros una y otra vuelta porque, parezme, nun mira dientro de sigo pa esmucir d'esa suerte d'esclavitú etno-xenético que parez afogalu. Nun lo facemos meyor que cuando adorábemos al ríu Nilo, navegábemos en barcos de "totora" pel imensu océanu Pacíficu o nos matábemos na llanada d' Olduwai.

Agora, igual que siempres, solo somos porque consumimos. Sé que ye murnio descubrilo, pero asina ye. Siempres consumimos. Consumimos ideoloxía, creencies, relixones... nun importa el nome que-y demos a eses "idées", a esa "comida" que, dende FUERA, adoptamos como solución, único y verdadero, pa tener una esistencia feliz. Y agora l'adobiu d'esa comida llámase "teunoloxía de la información", "llibre-comerciu", "globalización"...

Como vemos, conceutos toos "ex-trínsecos". Trátase de vivir FUERA de casa cuando ye dientro ú tenemos la foguera que mos calecerá güesos y espíritu. ¿Quién, pudiendo, fadría llumeral albentestate pa calecer n'ivernada teniendo dientro la so casa bon llar y fornu? Dende llueu, naide "normal". Mas, lo "normal", hai tiempu que nun lo ye na casa del home.

Poro, seyamos "anormales". Vaigamos en cata los ideales que lliberarán de la sufrencia al planeta y al home, como el so arrendatariu. Fundamos nel interior de caún p'atopar aquello que, evidente, ye.

Bones Navidaes, si ello significa daqué pa daquién.

Costante Álvarez

Aforrando Miseries

Anden (dalgunos) funcionarios del Principéu esmolecíos por nun tener esti añu la tradicional xinta de navidá que se facía'l vienres qu'antecedía a la fiesta de la (aproximao) muerte del iviernu. Esti añu la cosa yera dar exemplu, dixeron los políticos, pues consacaba mui mal la crisis económico cola folixa de los trabayaores de l'alministración autonómico. Ta bien.

Cuando 'l yá xubiláu Juan Morales, "co-equipier" del programa de RNE "No es un día cualquiera" tuvo la feliz idea de mangar nel portal internético d'esi programa la frase que dicin que dixo'l filósofu griegu ISÓCRATES de xuro que nun sabía 'l gran favor que facía a munchos que, diciendo lo mesmu qu'aquél gran gallu de la quintana inteleutual (espero) nun teníen la verba afayaízo pa espresalo. En realidá Isócrates pronostica la muerte de la democracia y esclaria les causes d'ello.

Yo, que nun tengo les lluces d'aquél, acordio col pronósticu y tengo l'atrevencia d'amestar otra: la hipocresía. Cierto qu'ella pue considerase como pecáu "minor" pero atopo que, mire a ú mire, ye la hipocresía'l sangre de la democracia. Y mesmo que la babayez, que cuando universaliza invisibiliza, asina alcuentro a la hipocresía y a los hipócrites perfeutamente ausentes, prima facie, de la sociedá. Y, por embargu, ye aquélla, y son éstos, los que mueven los filos del poder y los sos malfadiaos daos.

Cuando trabayaba nel Serviciu Públicu d''Emplegu del Principáu, una paisanina, que llaboraba como cocinera con contratos puntuales, daba gracies a les comíes de fin de navidá del Principéu pues, gracies a ella, el restaurante La Campana, ente otros, contratábala unes selmanes enantes d'elles pa preparar el convite. Los políticos, AGORA, cuando ven les oreyes del "llubu" del non-consumu, afalen a la xente pa comprar, mercar, gastar porque, claro, ello mueve'l rabil de la gran rueda económico.

L'Alministración ye un ente gastaor, nun cría riqueza solo la distribúi. Te quita les perres y, nel meyor de los casos, inviérteles o gástales en serviciu públicu. Pa min ta nidio que'l gastar l'Alministración unes poques perres nuna comida (más bien probe, curtia y manifiestamente meyorable) ye una forma de devolver a la sociedá parte de la plata que primero arrampuña n'impuestos, tases y precios públicos, y too ello en forma de salariu de cocineres, camareros y el comeniente beneficiu industrial del empresariu. Pero la hipocresía ye la hipocresía.

En realidá les males llingües (nun tengo dulda dala de que son les meyores llingües) dicin que'l curtiu aforru de nun facer eses comides nun ye otra cosa que dirixir eses perres a pagar los dineros del plus d'ALTU CARGU que-y dan a direutores xenerales y demás gandaya político de l'Alministración del Principéu que, polo visto, quexaron porque ciertos funcionarios, pola mor del pagu de lo que se llama "carrera profesional" (cosa que vien de lo que los políticos espeyaron na llei que s'entitula "Estatutu Básicu del Emplegáu Públicu") ganaben más qu'ellos. Probinos.

Un funcionariu, por parásitu que paeza, tiróse años preparando una oposición, presentándose a ella y aprobando. Cualquier ciudadanu pué presentase si tien ganes y enfotu. Esa persona tuvo d'enfrentase con otros ciudadanos y, en base a esfuerzu y méritu personal, ganar el puestu de trabayu. Por embargu, un direutor xeneral, un conseyeru, en resume, un políticu que remana un cargu de confianza, nun algama'l puestu de trabayu por méritu o capacidá y, muncho menos, n'igualdá d'oportunidaes. Ta aende por amigu, cliente o mafiosu, vaiga usté a saber, dependiendo del partíu políticu (que son, mayormente, sociedaes mercantiles clientelares nada democrátiques) que lu encuma al puestu.

En fin, Isócrates fala del fin de la democracia por causes tan válides entóncenes como agora pero pa min que ye la hipocresía'l sangre que. perdiéndose n'hemorraxa, lleva a la democracia al cagüercu. Y, sinón, al tiempu.

Costante Álvarez

CAUSÁLITAS

Causalidá, causalidá. Tienes el nome crudo del préstamu llatino. Acútesmos de contino, per dayuri, enantes, agora y, de xuro, mañana. Los inorantes camúdente'l nome. Los matemáticos imaxinen elegantes comprendories que t'igualen n'ecuaciones de muncha enxundia. Muncho y bono fais. Muncho amueses y pocos te pescancien. Naide nun atalante esa filera de socesos que desafueguen nel fechu que marca, dirixe, decide... Naide t'espera mas tu a toos alguardes.

Un exemplu de lo máxico.

Una persona cesa n'altu cargu. El subordináu inmediatu propón una comida y un regalu de dispidía. El regalu ye a escote, d'igualitariu repartu oneroso pero ello nun me parez xusto: nun gana lo mesmo l'aprendiz que'l xestor de riesgos. Siempre me pareció inxusto eso de repartise a iguales partes les cargues financieres pa regalos, fartures y otres cosadielles de raigañu social pues, si perres son razones nun toos tienen les mesmes a la hora de cotizar en sociedá.

Fecha la propuesta, y metíu nesi intre tontu que toos podemos tener d'avezu, digo que sí, que cunten comigo pa eso del regalu pero que de la comida de dispidida, ren de ren, que nun toi pa dixerir hipocresía. Y en casa siéntome mal por descubrime tan faltu d'autonomía pues, ¿daveres querría compartir la carga d'un regalu a un perfeuto desconocío que triplica'l sueldu de la mayor parte de los subordinaos? ¿Acasu, como políticu, nun va yá bien pago destinao notru puestu perfeutamente prescindible y a costa del contribuyente? Decido falar col inmediatu subordináu del cesáu pa dicir que non, que nun pongo un céntimu, que nin lu conocí nin lu traté y que l'amor ye cosa del roce y a esi puntu nin lu rocé nin lu golí.... más o menos. Asina qu'empobino pa "la ñocla" -l'alcuñu del puestu de trabayu del cesáu- y, ¡oh sorpresa! ¿A quién m'atopo a soles nel ascensor camín del llugar del trabayu?

Sí, asina foi: al mesmísimu cesáu. Intercambéu pallabres educaes y formales y lu dexo saludando a los antiguos subalternos. Yo voi pal despachu del subordináu inmediatu y, primero de falar con él, suena un teléfonu y oyo cómo fala con otru diciendo que'l regalu, una placa de despidida, va salir por unos .2 euros a escote pericote. Y reflexono: ¿paga la pena quedar como la gocha antona por dos euros?

La causalidá quinxo poneme nel camín que me permite quedar como un dios menor, guardame d'enemistaes y cumplir, como una oveya más, nesti suqueru que facemos de la vida. Nun tuvi d'abrir la boca pa dicir al encargau de la folixa "aende te dexo los dos euros".

Puedes, pero nun debes, dir escontra lo causal. Si lo fais, hai que pagar un preciu. Tu elixes.

Costante Álvares

Sem Negral

SENEGAL, mon amour

Pap, negru de la negritú sah.ariano, prietu neto que'l carbón que train los reis magos a los nenos revolvicos, que vio partir cayucos camín de zapaterolandia y aportar noticies , a mamplén, de collacios afogaos na salmoria primordial, nun pescancia les causes de la cosa. La cosa llámase tar equí, n'Europa, viviendo la velea de ser refugáu pola antigua metrópoli, Francia, y perseguíu por querer vivir el sueñu francíu del tolerante Mr. Zapatero.

Msousa ye aldega mariñano y atiesta, per entemedies de pocos kilómetros, con Mauritania, la tierra de los "mauros", vg, los prietos. Non mui alló vivin los artesanos de la madera que fain tambores y chalanes. Y, mayor d'edá, tuvo l'encamienttu del pá, del xefe de la tribu de seyes muyeres y munchos hermanos. "Has dir a Europa a por perres, que tu vales muncho..." dixo l'inorante autor de los sos díes, que nun sabe de la vida muncho más que foder pa facer fíos que lu mantengan na fe musulmano. Foyar y foyar. Lo malo pa Pap ye tar estudiao, falar un francés de "restaurant" y gastar modos d'educación europeo. Por embargo, los collacios que llegaron son membrudos, bigardios, bruecos, gallonos, xente bravén que nun respeta a naide y a nada porque la vida ye duro, xente que fuxe, garra, cueye, roba, furta, merca, vende...mata si cuadra. Asina que conoz al xefe de toles mantes d'Asturies, el primer castrón d'una llarga riestra de cabrones qu'espurre hasta les mesmes sableres de Dakhar. Y Pap ta fartu. Fartu de Francia y, agora, fartu de Zapatero y la so fácil verba.

Ellí la xente diz que too ye aportar a España que, en llegando, van poder trabayar, facese ricos y voltiar al pueblu nun Renault apinao de perres y tarecos del primer mundu, esi que parez el paraísu de muhammad, pero na porcona Tierra. Asina que garró la visa y tuvo de colar pa Francia, como turista, pa trabayar y mandar perres a la tribu del paterfamilia fornicaor . Pero la Francia de Nicolás Sarkozy anguaño nun ye amable. La Europa de la especulación bursátil, los bonos-basoria y la gripe nun lo ye pa colos vieyos súbditos coloniales. Poro, garró Pap el tren pa la España tolerante vía Barcelona. Y de Barcelona a Asturies na dilixencia que "Renfe-Grandes Llínies" llama "expreso". El collaciu de Pap, que lleva n'Asturies seyes años nunca nun foi deteníu pola policía. Vieno en cayucu. Por embargu élli, que vien bien portáu, formal, con pasaporte y educáu, cayó na rede policial nel vagón de lliteres: duru destín el del formal.

Ensin papeles nun pue trabayar. Y como nun manda perres, en casa llámenlu vagu y enxencle de decisión y raigaños. Pero élli ve otra cosa. Daqué mui otro del paraísu que ven, esllumaos pola publicidá de la televisión per parabólica nel polvoréu pueblu que lu vio nacer. Curiosa esta cárcele ensin copera. Nun hai rexes pero afuega igual que la otra.

Yo nun lu invité a vinir a esta casa pero ayeri compartimos un platu garbanzos, pataques con pescao y una xarra d'agua (élli, musulmano, que yo tiré de frizzante Lambrusco) mientres la borrína esborriaba´l contornu d'un Xixón adivinable allalantrones. Cuando lu despidí díxe-ylo claro: acabes matricular na universidá de la vida: de xuro qu'esti cursu qu'elexisti ye mui duro pero, sicasí, los frutos van ser de lo meyor. El mio francés ye mui malo pero al muzu prestó-y la cosadiella

Costante Álvarez

¿Vivi vida bono?

Pues diba en cata couses y atoupei esto http://www.scribd.com/doc/7401827/Vivi-una-bona-Vida

¿Autonomía Universitario o Impunidá?

¿Autonomía Universitario o Impunidá?

Ye curioso qu’una camada parásitos universitarios (nesti casu de la facultá filoloxía uvieína) invoquen el mitu de la autonomía uiversitaria pa tapar la vergoña de sufrir el reproche social polos sos propios comportamientos corporativos, gremiales y endogámicos. La cosa nun va, daveres, de si l’asturiano sí o l’asturiano non, sinon, meyor, de lluches de poder, zunes y enfotos personales, basoria pasional arreyao a nomadía personal y egoísmos idólatres. La cosa va de lo que ye, una llobada que, diciendo sirvir a la sociedá que bien la alimenta, anda a les sos deleres ayena a la sociedá.

Va tiempu, y nello acordio con Francisco Sosa Wagner nel so llibru (editorial Thomson-Civitas), que les universidaes (públiques) españoles nun son otra cosa qu’un ñeru de relaciones clientelares, corrupción y nepotismu, too ello, faltaría más, financiao con perres públiques. La d’Uviéu nun ye cosa diferente. Abasta con mirar quiénes corten el bacalláu, les castes familiares que dominen departamentos enteros, privilexos y regalíes que gocien inútiles presuntos investigaores, eméritos y demás gandaya docente y/o funcionarial. Daveres que podríemos prescindir de toa esa mierda, esa nomenklatura, esi sistema arcaizante d’indefensión. La pretendida autonomía universitaria ye un mitu que sirve a escuros intereses de naturaleza, cómo non, económica.

La tópica diz que la universidá ye un comederu. Nun voi yo dicir que non. Pero lo que nun diz la tópica ye que ye, tamién, llúriga de castronos, desafogaos y reaicionarios, españo-llistos, españo-chales y filofaciosos. Solo queden comunistonos de bocuca, isquierdosos de pose PSOEra y poca independencia de mente.

Depués de producir ellos, digo esos parásitos, l’españíu interesosu del status-quo del asturiano colo que s’anició la rempuesta social, surden voces lloramicoses de la facultá de filoloxía esmoleciendo pol “ataque a la autonomía universitaria”. Pero, daveres, la cosa nun se trata d’eso, porque lo qu’esos desafogaos invoquen ye otru conceutu en cuentes d’autonomía: impunidá. Pescánciese impunidiá nel sen de “irresponsabilidá.”, ello ye, nun tener de dar cuentes a naide cuando esi naide ye la sociedá que-ys paga y (llaceriosamente) permíte caltener el privilexu de siguir viviendo na corripia esquisito de la escelencia. A lo que parez, l’autonomía fadría que ciertos comportamientos, decisiones y fechos salgan de baldre pa quienes dicin tar baxo’l paragües universtariu. Y a la hora d’invocala toos, bonos y malos, se xunten nel mesmu enfotu defensor: tan importante y productivo ye l’inventu.

Lleo prestoso cómo un tal Fernández de Castro llora en desconsolancia, cualu escagaleráu, el ser oxetu d’amenaces escontra la so persona. Ignoro si ello ye verdá puesto que trátase d’afirmación de parte, que diría un peritu en lleis. Pero nun tien desperdiciu l’afirmación que soliña, en negrina, el periódicu que, piadosu, acueye la so pena, (El Comercio, 4/7/2008): “los ataques asturtzales contra mi....”. Una másima enerxético diz que ún recueye lo que sema, qu’atopamos en camín aquello que merecemos, que los semeyantes atráense mútuamente. Seyendo cierto, ¿acaso un asturchale nun diría n’atopu d’un españochale? La noticia diz que’l puntu diz que lo de les supuestes amenaces nun va salir de baldre a quie/quienes les fixeren. Entrúgome, inocente, ¿quién mos amparará d’actitúes como les del supuestu ofendíu?

Ye curioso cuan raudo ciertos verdugos de la llingua y cultura asturianes camuden la piel de llobu en corderu. Primero cuspien pal cielu y, darréu facelo, quexen de que’l propiu gargaxu-yos caiga en focicu. La dinámica de los victimarios ye esa la de dar pena per un lláu y, per otru, tener garrao a la víctima pel pescuezu, nun vaiga ser que fale abondo.

Nel fondo víctima y verdugu necesítense. Españolonos y asturianistonos son cares de la mesma moneda: la intolerancia.

El Cazaor de Cordobeyos

Dir al A ESCURES LLITERARIU http://aescures-llitera.blogspot.com/2008/06/el-cazaor-de-cordobeyos.html

ACQUA RUGIA

Dir a http://aescures-llitera.blogspot.com/

Campaña de Renta 2007

Dicía una canción canciada en blanco y negro....

...Yo sí. Yo sí Yo sí como pataques...

A estes altures de la vida, lo que val dicir de la conocencia, puedo maxinar un mundu ensin Dios. Cuando faigo esta reflesión énte simplayos, fainme la gracieta d'aplaudir coles oreyes lo cualo, como númberu de circu, ye mui meritorio. Ellos nun saben que lo son y, poro, nun hai tacha dalguna que face-yos. Yo, que tamién soi simplayu, por pura solidaridá tendría de guardame de xulgar a otros simplayos mas, reconózovoslo, reflesionar alrodiu ciertos aspeutos del simplayismu ye mui tentador.

La pose ye la siguiente: al facer la declaración de la renta pal pagu del impuestu correspondiente surde la (falsa) dicotomía sobre ú mangar la cruz d'asignación tributaria. Refiérome a lo d'apurrir el 0.7% de la mio cuota tributario a la Ilesia Católico o a los borrinosos y (pa min) cuestionables, "fines sociales". Sé que l'estáu del bientar yá me mete la manu en bolsiellu abondo, arrampuñándome perres y tiempu, pa pagase regalíes y privilexos de políticos corruptos, altos funcionarios desafogaos y exércitos d'ocupación que van pola vida d'humanitarios n'Afganistán y otros llares. Sé que lo de "fines sociales" nun tien otru cuentu que'l de querer faceme partícipe (una puta engañifa más) d'una supuesta real participación del ciudadanu na distribución de les perres que mos furten de la nómina mensual o de la retención y pagu a cuenta cuando cobra un trabayaor autónomu. Los famosos "fines sociales" daveres que nun esisten (pues l'estáu atiende a tolos fines que-y pruye cola masa dinerario de les oveyes y nel montu que-y peta sigún los presupuetos xenerales del estáu) pero ye comeniente invocalos pa enfrentase con esi degorriu tan corrupiu, malu malísimu, que ye la Ilesia Católico.

Pero ya tien la Ilesia defensores abondo como pa meteme yo con ello. Lo interesante pa min ye decatame, otra vuelta, de la evidente adicción patolóxico, de ciertos simplayos, a eso que dellos llamen "anticlericalismu" o "laicismu". Son les coses del poder: fadien los pilancos de quien nun piensa como el que manda. H.ode, y muncho, qu'hebia voces disidentes del pensamientu únicu, sí, esi, el que pon nel supuestu laicismu la quintaesencia de lo bonal o bondoso. Pero lo simpático, pensando nesos hipócrites, (los más d'ellos fíos del facismu que curiose de que Franco morriera tranquilu na cama, o de la intolerancia comunistono qu'esfarrapó la democracia n'Hungría, Checoslovaquia o Cuba), esos moxarratos educaos en seminarios y colexos relixosos y de pagu, ye qu'escaecen interesosos el fecho de que foi la tradición cristiano la que cuchó en terrén pal pensamientu tolerante y civilista. La dialéctica del fueru internu-fueru esternu, la llibertá de concencia y el respetu al otru por ser el to hermanu, ello ye, igual que tu, son los finxos de tolos derechos humanos que desendolcaron y costitucionalizaron nel mundu ocidental.

(Un descansín: usando de la presuncion d'esquisitez y buenismu que tienen esos que s'etiqueten isquierda, darréu sáquenme lo de los cures malos malísimos, la inorancia, la discriminación de la muyer, la mariconería del cleru, la paidofilia, les guerres de relixón, la venta de bules, les sotanes.... Ufff, estos progres tan tochos como siempre y, pa malura, fieden a naftalina y sacristía ceízo)

Ye curioso ver cómo supuestos tolerantes (de curtiu recorríu, hai que dicilo too) son perpoco tolerantes colo que xulguen indigno de tolerancia porque, cualos dioses menores, ellos sabin y deciden lo que merez, o non, esi engüentu de "fierabrás" que ye la tolerancia. Y ye que, dafechu, eso de la tolerancia ta bien cuando lo qu'hai que tolerar ye lo tuyo o lo que t'interesa, non lo de los otros. La cosa, nel fondu, ye xustificase na escelencia y l'asepticidad presunto de quien nun obedez a obiespu, nesti casu, de Roma.

Llibres d'un Dios pueque omnipresente, al que nun se-y escaparía un res, que tolo vería y t'esperará pa pidite cuentes, la cosa de gobernase y gobernar va muncho meyor. Elexir un ente abstrautu, Dios, como aniciu de lo malo, del miéu, o el tremor "esentialis" o, si se prefier, a los sirviores d'esi Dios, ye forma probetayo d'escaecer (interesosamente) la propia responsabilidá y los principios ético-morales que deberíen gobernamos como humanos.

Supongo que a quien-y fadia Dios necesita más un Dios que naide ya que quien niega almite implicitamente la esistencia de lo negao. Ye'l circulu babayu del creyente y del atéu (el creyente nel non-Dios).

Como nun sé si esiste Dios (nos términos humanos), como dixi arriba, nun me cuesta trabayu maxinar un mundu ensin Dios. Dicho lo cualo, digo tamién que faiseme mui cuesto el nun creer que toos nós seamos Dios.

Costante Álvarez

PD. Prestaríame pola vida que la Ilesia Católico y l'Estáu fixeren un estudiu seriu, rigurosu, sobre lo que l'Estáu aforra gracies a la "caridá" y "compasión" (bien digo: con-pasión) de los cristianos qu'exercen de cristianos. Cuantificao ello, una fuelga de la Ilesia nos medios asistenciales diba ser d'infarto pa la sociedá. La ventaxa (pírrico) de los hipócrites ye que puén acomodase al mediu relativizando moral y ética. Por embargu, el que ye relixosu tien clares obligaciones y servidumes: esto ye un pasar.

Y, como como pataques, vo mangar la cruz pa la Ilesia. La Católico, s'entiende.

Presta tocá-los tolanos

al poder.

Y a los sabios y doctores

que me roben

por placer....

Ventinueve güelpes en costazu...¡¡29!!

SELMANA DE LES LLETRES ASTURIANES 2008

Debo dicilo mas, ¿cómo lo dicir? La pose ye la siguiente: hai qu'entrugase si paga la pena, si la verdá bramente llibera, si la indiferencia da, o non, esa estraña sosiega frutu de puntual y comeniente encarabecimientu de neurona. ¿Cómo lo dicir? Fácil: digámoslo con palabres.

Baxé del cercaníes a les siete y diez de la tardi cola muyer y el vieyu Antón, barba y cabellu ablancuxao, p'atopame col agua de mayu y la clamida de xente pola oficialidá d'ésto, sí, digo bien, ésto, l'ensame pallabres funcionales que críen espírtu, nación y pación d'una tribu humano arrequexao ente sablera y cumal. Y lo más prestoso foi conocese desconocíu énte aquel cardume d'húmedes banderes, asturines y pancartes, cartelos y propaganda. Cares nueves. Sangre anovao. Futuru encarnáu n'esperanza y, tamién, sirviores del pasáu aneyo que, testeronos vivin en mozos cuerpos pa desgracia d'aquel futuru.

Trenta años nun son nada. O venti. O quinci. El tiempu depende de la esperiencia personal. Los años nun alforxen en celebru. El camín que nunca nun s'andevo nun pesa na güesame. Tanta poesía pa descubrir cómo les mesmes zunes repítense una y otra vuelta. Pero, perriba la miseria inmediato, la gayola mediato redimía l'intre supremu de la pública confesión de fé y esperanza nel futuru granible qu'alguarda al combatiente armáu de roses y razones, felechu y flor que, cuala estatua estalinista, mira al llonxanu finxu'l cielu y sigui camín. Sigui, con despreciu de dolor propiu y propia sufrencia. Mitos varoniles y aquéllos otros d'amazóniques guardianes de lo femenino, tributario de Marte. Sollertes columnes, hidrófugos sofitos, pegollos imperiales en primordiu xerminal. Amor n'humor y fantasía. Toos xuntos, d'enriba a baxo, la cai Uría.

Siempre sobrarán razones. Hai tantes como tiestes pa les maxinar. Y namái el sabiu sabi selo cuando escueyes aquélles que s'abasten a sigo mesmes. Razones pa la esperanza. Y pa la llucha si cuadra. Pal respetu y l'auxiliu. Y pa la reconocencia de la ciencia de lo falsamente imposible.

Los venti minutos baxo la lluvia valieron pa sentime inda más vivu. Sentir que tres estes pallabres calteníes n'ellectrones cimblayonos hai más pallabres, más aliendu, y más gargüelos que pronuncien estes pallabres, qu'alienden esi aliendu que cristalicen la pallabra en mundu real. El mundu la la llingua asturiana que, momentáneamente, sobrevivi arrequexada ente falampernios de grandeza amorosamente curiaos por vieyos ciudadanos inorantes d'embullos del mundo y los sos pecaos, de política de salón y de dictadores del facismu socialista y español. Pa min son los santos sabios, vieyos resclavos qu'acolumbrar dende barcu que flunde, tremoses áscuares de potencia irredento, formientu n'espera de masa por yeldar, pértigues sollertes a dimir l'arbole de la bayura, l'alicornia de la normalidá social d'un pueblu grande qu'inda nun lo descubrió.

El camín dica 'l teatru Campuamor foi camín de cantares. Terapia de grupu. Albancia por nacer. Y prestome ambute. Sí. Prestome.

PD. Igual qu'hai sieglos, un nenín de teta ufría, inocente, periódicu comunistono. Otros, cartafueyos de sociedaes polítiques de repetición cronolóxico. Porque la estupidez repítese incansable y cada xeneración parez necesitar la mesma metralla pa decatase de lo ilusorio, lo invisible, lo prescindible. Nestos atopos de xente florien les asociaciones polítiques en cata la solución final, el buenismu humanisto, l'internacionalismu proletarizante... la babayura n'estáu prístino. La inocencia, a la llarga, culpable.

Costante Álvarez

Unos vidios del YouTube....

actu nel Teatru Campuamor: http://uk.youtube.com/watch?v=vlQ_Z2rTgOw

Manifestación http://uk.youtube.com/watch?v=EmOOf7AvKzk

¿Quien saca porgüeyu?

Mui cómodu nesti requexu de la nada, gloriando les ventaxes d'una sociedá apellidada democrático, bien alimentáu, meyor istruíu. Privilexáu de dones y daos, amores y arumes, saberes y dicires. Enfarxopetáu de sobeya disculpable, (aquélla que t'acute no irracional de la comparanza y el xuiciu), miro la pantalla d'un llonxanu televisor catódicu. Que me trai semexes d'inxusticia. De fame gollono. Incómodes entrugues, inda por facese o encarnar n'aliendu dormiyoso.

Ye velea inarreblagable aquello que t'amuesen los otros. Los otros falaxes que dicin de lo inxusto. Los otros quexumes, que xuxurien rocea. Esta empresa, que llamo humanidá, paga pocos dividendos en felicidá. Poco, y malo, si ye que cuadra pagalos.

Y, por embargo, l'aciar collecha del dolor, la muerte y el desenfrenu espuxiga y espuxiga, xorrez perdayuri, apina los copinos d'interesosos mercaderes. ¿Quién, o qué, garra provecho d'ello? ¿Qué prestosu o infame fín sigui esta inatalantable traxicomedia de lo humano?

Sí. Persé que la llépara del poder enancha la malura de la que vivin éstos y aquéllos. Sí. Persé que'l miéu nun dexa d'espurrir nes mentes del home asustáu por otros de la so castra. Pero sabelo ¿tendría de dame sosiega? ¿Mios nueches o díes tendríen de ser más llevaderos? Pueque la depresión estético xuegue bien, y sía comeniente, na casa de románticos tardíos, humanistes remolíos pola natura primixenio del zoo-politikón o vividores de lo fondamente prescindible. Hai munchos "pueques", munchos "alomeyores", munchos "quiciabis". Tantes rempuestes como boques que les pronuncien. Tanta enerxía negro como pozos nos que sapozar o furacos nos que se meter pa fuxir d'esta feúra y balduernu.

Tien d'haber una razón pa que un chinu, por exemplu, sufra cárcele en casa propia por atrevese a pensar xebrao d'una dictadura socializante y humanista, pague la bala que lu asesina o cuche la erma tierra tibetano. Dalguna razón va a caltener la muerte n'españíu de fuegu, metralla y bofu. Tendrá d'habela nel nalar inerme del calabre entullíu de negru ablancuxáu pola sal y pol sol d'un mar d'insufrible fríu azul. Que desplique les fondes engurries de piel ensucho y sable en sangre d'abandonaos en desiertos y sableres. Mientres l'atopo, esa razón digo, sigo plasmando.

Al final, si ye que'l celebru furrula normal, yes tu frente al mundiu. Solu. Espíu. Ceo t'abelluguen del fríu y la fame. Te formen. Te firmen. T'etiqueten. El cuñu del esclavu na frente. Yes cosa, propiedá, inversión, delda. Y se cuiden de llamate llibre. D'emponderate, si sigues la sienda de los pocos sabientes que nel mundu fueren. Al final, d'orixinal, pases a fotocopia.

Como compensación, unos cuantos s'encarguen de solmenar a eso que dellos nomen "Sistema". D'encarar molinos quixoteños con poco más que carne de cañón. De glayar cualos glayos a ramplíu. Rinchen concencies. Semen cementerios.

¿Por qué hai tanta xente que quier facer llibre a los otros? ¿Por qué hai tantos criadores de cielos ena Tierra? ¿Por qué hai tanta ilusión en facer mundos meyores estermiando el meyor mundu que ye esti? El únicu que tenemos.

Barrunto que tien de ser francamente insoportable, invivible, un mundu presuntamente inperfeutu si formes parte d'una élite con poder fáctico que sabe, por revelación divino o racionalismu humano, lo que ye comeniente pa tolos otros. Si tienes esi poder, solu o en comandita, tien de ser irresistible el metese a criar un orde social, una relixón, una psicosis, una revelación, una tribu, una nación... Nesos términos, solo se pué facer bien diciendo y forzando el caminar de los otros pa contra esa comeniencia lliberaora, esi enfotu paradigmáticu de xusticia, d'axiomáticu igualitarismu, de tienra fraternidá, d'uniforme socialismu, de xenético humanismu, de reveláu islamismu de pueblu elexíu...

Mas, por embargu, perdayuri oyo murniu quexume, españíos metálicos, llamentos aforfugaos y, tamién, l'atavientar de calabres apodrentando na homedanza de la viesca, o ensuchando baxo' l sol de la sablera. Homes, dondos, vistíos de victimarios, (pue que con gorreta, galones y arma d'estampación mediantes) matando a otros homes, tamién dondos, que parecen nun querer vivir esi enfotu paradigmáticu de xusticia, d'axiomáticu igualitarismu, de tienra fraternidá, d'uniforme socialismu, de xenético humanismu de reveláu islamismu, de pueblu elexíu...

Tantu dolor ¿a quién (o qué), alimenta?

Costante Alvarez

Feminis-MAO TSE TUNG

Pa la China maoísta la igualdá yera cosa cimero; poro, virtú revolucionario que caltener a costafecha. El modelu igualitario esborrió ‘l xéneru. De homes y muyeres pasóse en China a esistir namái hermanos y hermanes. Ta claro que les relaciones sexuales entamaron a ser, mutans mutandi, incestuoses. Toa una xeneración chinoso anda güei amalada sexualmente. Fortunosamente, y como mui bien s’espeyó nel programa de TVE1 “Documentos TV”, la mocedá “chinorro” recupera los pasaos vicios que fain la vida agradable de vivir, fodiendo duramente, zucando mingues, domingues y paxaretes; dando y tomando pel culu; atechando de lluvies doraes y fartucando en coprofaxa. Interesante. http://www-org.rtve.es/misery.shtml?go=eacaa4148f48af89730076a6669df2169fcb5b71e1aa29da6b3326aee96788b1551b8f66d76f22a0851b6e803d32457f

Una china añosa alcordábase del tiempu del llibru bermeyono de Mao, aquella versión del catecismu de cuando Franco, el de Ripalda, y cómo diben toos iguales, col mesmu sayón, gorreta o boina y corte pelu. Toos de pantalón de loneta, grebo y militar, y alpargata si ye que les había. Nada de foyar, cosa reaicionario. Vida y cuerpos pa la revolución. (vide www.eltartalo.com/blogchina/el-traje-mao) Y nesto taba cuando me dicin d’una empresa de la órbita de la salú que desixe a les empleaes (esclario que falo de les moces, más que nada por aquello de la “gayosidá”) dir con faldes. Y, claro, los neo-maoístes (ello ye, muyeros y muyeres) al oyer eso de que les muyeres tovieren de poner faldetu empobinaron pal monte “mediático”, arromendando (queriéndolo o non) a aquella llarga marcha de los afamiaos comunistonos de Mao que diben en cata esbarrumbar el réxime chinu nacionalista que finaría, muerte y miseria mediantes, abellugao en Formosa (ui, quinxi dicir Taiguán). ¿A ú se vio eso de que les muyeres lleven falda, hom? Pura discriminación, aseguraben dende un requexu d’un telediariu de los mass-media.

vide http://www.lavozdegalicia.es/sociedad/2008/03/27/0003_6681762.htm

Barruunto que ciertos sectores d’eso que dizse progresía, cosa bastardo, xabaz y puro, prediquen un igualitarismu de xéneru de la mesma traza que’l maoísto. Pero cuido que, tamién, lo fain comulgando cola mesma hipocresía qu’emplegaba’l tuexu “Gran Leader” que, obligando a la uniformidá de prendes y vida de súbditos (que non ciudadanos) n’ayunu sexual y sensual, por embargu pretendía conservase mozu y guapu tirándose a toa china virxe que se-y antoxaba y mandaba traer. El feminismu militante, esi revexón facista-sexual que tanto presta a los isquierdosos, taría percontento, pergayolero y perprestoso na gran cárcele que foi la china maoísto. Igual qu’aquél Gran Castrón, “líderos” y “líderas” del feminismu alimenten burdeles y visiegos sitios d’urxente desafuegu emocional. Pero ye que los “ellos-es” son asina. D’hipócrites, digo. Como so curtiu d’entendederes necesito una desplicación. Si el machismu ye malo ¿por qué nun va a selo el feminismu? Amo a les muyeres. Me gusten, meyor, con faldes. ¿Va a ser cosa de desviación sexual? Amiguinos ¡puxa les “caenes”!

Costante Alvarez

Vildu y dixebráu ¡cela m'a peur!

Taba na torre marfileño na qu’avezo posar, alendando del duru llabor de la vida cotidiano, cuando oyo llamentos de vildos separtaos, matrimonios dixebraos por falta ciñu y otres coses. “¡Coño!” dixi, Baxé cuidosu tirando de parapente (lo malo de tar na mio torre marfileño ye que nun tien pasera pa baxar) y atopeme con esto: http://noticias.juridicas.com/articulos/40-Derecho%20Laboral/200802-014541147147.html.

Agora entiendo lo de la sensibilidá de la isquierda. L'humanismu marxisto. Y, tamién cómo non, el que muncha xente que se crée y diz éticamente superior, tienga 'l corazón a la isquierda pero, pero, pero... la cartera a la derecha.

Cabrois estos suzialistos. Terrible comprobar que con D. Francisco Franco Bahamonde, d'alcuñu "Pachu Forquetu", dictaor y asesín, la proteición social y asistencial del trabayaor yera meyor. (ente otres coses, al so réxime se debe la Seguridá Social, ¡Coses veredes!)

LAURA NUN TA, LAURA COLÓ...

Esta mañana sorprendiome un nuevu cartelu na paré de plástico que, de frente, me dixebra de la cabina del conductor del convoi ferroso. Ellí, apegada baxo un cientu cartelos amortizaos, Laura Glez, bermellona toa, sorríe pidiéndome ‘l votu pa izquierda xunida. Dizme la moza, con muncha poesía y sorrillosa que tranquilu, que con ella vo dir seguru, que na siguiente (supongo que curva) xire a la izquierda.

Esto ye como lo de los arbeyos, que si nun van al platu de mozos van de vieyos y como ta de moda el tránsitu, la seguridá vial, los muertos en caleyes, caleyines y caleyones nun hai nada meyor que xirar a la izquierda. La moza, entrada n’años, cuidase de mirar a la izquierda. Sicasí, esti cartelu del que falo ta xebrao de otru que manguen los bermeyonos del sitiu http://www.izquierdaxunida.com/ast/diptico_IU_a_la_izquierda.pdf, aú aparez cabo'l molacín Gaspar. Molacín, y non miento, del PSOE, el partíu que dicin ye ‘l comederu común digooooo, la casa común, eso ye, común, el peselbre amistosu de la izquierda española. Nada como remanar el presupuestu xeneral del estáu pa comprar y vender voluntaes y recalificaciones inmobiliaries porque, ya se sabi, la izquierda ye probe y vaca más gorda nun entra en práu.

Nun conozo a la moza, poro, analizo el cartelu. Xulgo que la publicidá nun reflexa lo que ye la sociedá sinón que quier potenciar lo que, en primordiu, amuesa la patina baxo la puerta que s’abri por vientos de cambéu y desenfrenu. Esi cartelu del tren (insisto en que ye diferente al que mango enriba) la pinta enclinada a la derecha y mirando a la izqierda, dibuxando una Z n'ensame con títulu y el pié de fotu. Lluz peñáu de concu y perendengues breves de llandio aspeuto. Les engurries marquen esa cara de brava moza en trabayu burocráticu, enarcando una boca malpenes pintada con un carmín conteníu. Baxando pescuezu de colgaxos añosos, la desabotonada rebeca esplaya coqueta apertura a, tamién, contenía pose picardiosa.

Ah, la mayor edá. Ah, la vieyera. Gloriosa estación de cuerpu y mente. Feliz ameste d’esperiencia y esbarrumbe. Fin de viaxe. Entamu d’otros munchos...

Presta esto de la publi ellectoral. Ye otra clás de xóu: el de los durmiyosos.Y como ocurrencia d'última hora estos collacios esconsoñaos fain un xueu cola publi de los cartelos del supermercáu de la quincalla electrónico, MediaMark, y ponen un "nun somos tontos". Val, hom, val.

Pero me lo parecen

SUPERVIVENCIA Y INMUTABILIDA ESPERIENCIAL

LES COSTANTES DE SUPERVIVENCIA Y INMUTABILIDA ESPERIENCIAL

Como toos, neto que culu tamién tengo una opinión sobre el sentíu de la vida. Y una teoría sobre lo que, dafechu, ye la esistencia. Pero ye difícil desplicalo ensin acudir a la masuñada historia del home pues, yá se sabi, caún de los caciques féxola al so petite cuando-y cuadró.

Cuantísima allá, ello yera un planeta con un ensame antropoides con curiosa masa celebral. Curiosa abondo como p’asitiar nella el misteriosu dáu de la intelixencia creativo. Asina qu’una castra d’aquéllos, por causes del destín y la bona alimentación,, algamó l’umbral del yo. Perdía la inocencia animal, el camín de la esistencia humano devino costana imparable.

En realidá aquellos monos siguin ente nosotros. De fecho, esos monos somos toos nós. Nada camudó, sacante la eficiencia en causar dolor y sufrencia al otru o a nós mesmos. Agora tenemos muncha téunica, muncho maxín encarnao en máquines, programes binarios que cuerren lloquera carrera en procesadores d’información, de bits con o sin bugs. Almacenamos información como antanu alforxábase comida pa enfrentar malures y pelones. La esperiencia vital siempres ye la mesma y la costante de la vida humano solo tien un nome: superviviencia.

La evolución biolóxico, desplicao bárbaramente por Darwin dientro les sos entendederes (anguaño xulgaes como curties) foi modulada pola cultural. Asina espuxigaron ciencia y conciencia. Pero les esperiencies primeres, y primordiales, siguin siendo les mesmes. Les necesidaes, tamién. Aquello que mos fai humanos sigui caltenío polos mesmos principios, les mesmes zunes, emociones y sentimientos. La verdá ye que, daveres, los humanos somos previsibles.

Nel film “Contautu” de Carl Sagan, cuando Eli encara al supuestu estraterrestre depués de viaxar universu alantre, ésti describe bien ciertos aspeutos de la naturaleza humana como especie.

Nel film “Matrix” la visión destructiva del home, como corrupiu virus de la Tierra, tamién ye acertao. Toes estes imáxenes y opiniones nun fain otro que describir lo que somos dende que, monos, andávemos pela sabana africano espíos y afamiaos.

Decatase de la costante vital que supón la supervivencia inclúi el facelo tamién d’esa inmutabilidá arreyao a la esperiencia de los individuos, xeneración tres xeneración. Diríase que, con independencia de la téunica, la bayura o non de medios y capitales, la riqueza o probeza en términos económicos, l’home repite los mesmos esquemes, les mesmes lleciones y collecha los mesmos frutos dómina tres dómina.

Un exemplu: la falta de viviendes tres la guerra (in)civil española truxo la embalagadura de persones en pisos, el subarriendo de pisos yá subarrendaos. La posguerra foi miseria y probeza ensin cuentu nesto de la vivienda. Anguaño, sesenta años depues la vivienda sigui siendo un oxetu de deséu imposible pa muncha xente que vese obligao a vivir compartiendo pisos y torgando una vida plena. Con independencia de los años pasaos, les circunstancies polítiques o el preciu de la gasolína, la esperiencia d’impotencia, la necesidá de superación, la dixestión d’emociones y pesares ye la mesma a ún y otru lláu de la hestoria.

Un alma me dixo que la cosa diba de pasar pola vida ensin someter nin dexase someter. En resume: de nun perder la integridá personal. El superar esa preba ye’l nuesu destíny el de tipu decoráu en que actuemos va a ser lo de menos.

El monín, que valió pa entamar esta universidá que ye la vida, sigui con nós.

Gratia Dei.

Costante Álvarez

AMISTÁ

Depués d’años d’años ocurrióseme saludar a un collaciu apurriendo-y un mensaxe a una direición que nun sabía si inda taba correuto o operativo. Los años train munches coses, ente elles, l’esbarrumbe d’axendes y tópicos. Pa mio sorpresa recibí contestación y datos. Datos doliosos de carnes en igua y güesos francíos por inxeniu mecánicu. El mensax trescalaba un ciertu aire de muerte incompleto cabo la gayola del re-atopu virtual. Forzoso esclariar que nun conozo personalmente a esti collaciu y, por embargu, como talu lu tengo. Son les coses de la rede.

Nun tiempu qu’agora parez llonxanu, n’Astur-List y en soc.culture.asturies, un mozu (pa min tola xente ye mozo) quinxo siguimi na aventura de desndolcar la mio primer novela y, amás, creo que tamién la primer cibernovela n’asturiano. Solo supi d’élli por correos ellectrónicos y contestaciones nos filos que s’entamaben darréu tener mangao el capítulu correspodiente de la espurría historia d’una Asturies máxica, esperable y daqué espantible. Y un bon día, coses del enfotu, sorprendiome esti amigu con un sitiu internéticu ú aviare aquella novela que diba faciendo por entregues y ensin decatame d’ello, pasín ente pasu, porque l’enfotu primero d’aquella llabor nun yera la criación lliterario, senso strictu, (eso ye evidente en cuanto se lleen los primeros capítulos) sinón l’esconxurar un degorriu personal que me furaba les coraes por nun ser cuidosu y nun tener bien medio l’enemigu qu’encarare en foru. D’aquella velea, ciertamente, surdieron los personaxes pero tamién gracies a la ispiración qu’afayé na novela “Los xintaores de calabres” de Michael Crichton. Y güei, aquél desconocíu collaciu que tanto esmoleció poles “Lliendes de l’Asturies Primera” vienme a cuntar lo bono d’atopame y lo malo d’una caida de moto, tando nun xuasús de palmala pola mor d’ello.

Separtándome migayín d’esto vo facer una reflexión. Cuando se conocen les razones de la esistencia (pue sonar pelín presuntuoso) queda poco pa la sorpresa. Conocer les llendes de la vida, les razones d’embullos, dolores, penes y gayoles… lo relativo de lo absoluto y lo importante de lo inatalantable… en resume, el sabelo (cabruño nello) date una perspeutiva bárbaro y una sosiega d’alma que nun conoz otra igual permítiéndote relativizar tiempu y espacios. Como dixo ésti collaciu hai años, “vaca más gorda nun entra en práu” y ello ye mui cierto nesti contestu. Agora que pueo mirar el pasáu con güeyos de futuru xulgo indulxentemente el camín caleyao. Pero solo xulgo de papu sanu. Yo, como toos, como Aedrics, Wanics, Vulina, Sairina y tolos otros personaxes de l’aventura imposible, tamién tengo guíes, mayestros pero, sobremanera, servidumes. Como ellos, encarnaos o non, sufro ‘l destierru de tar na Tierra, l’afoguín de respirar aires viciaos, la esmolición de tratar besties d’humana apariencia, la cansera de repetir la mesma escena, una y otra vuelta, ensin esperar siquier el curtiu aplausu d’un públicu abducíu y dormiyosu. Y como ellos, doi les gracies por esistir equí y agora, por exercer la oportunidá del autodermin personal, en resume, por vivir en llibertá la esclavitú elexío. Doi les gracies a quienes m’ayodaron, a los que lo fixeron con tenrura y muncho más a quienes usaron de la violencia pues muncho de lo enlleno namai s’aprecia dende lo valero. Y apurriendo gracies y más gracies aporto a esti collaciu ensin rostru.

Espero atopalu dalguna vegada. Y que, tamién, atope ‘l sentíu de la vida. Aquella película de los Monty Python ye mui prestoso.

Talante

22-11-2007

SOBERBIOSOS

La “dómina” del presidente Aznar pueque mos truxera un ciertu intentu d’aggiormanentu na autoestima española pero, coses del poder, nin lo supo vender nin desapegase del síndrome autista qu’amala a cuantos cain nes garres del poder políticu añeráu nel palaciu de La Moncloa.

Siguiendo’l mesmu camín qu’aquél que denomen “facista” los neofacistes amazcaraos de facistes (pero bermeyonos, con banderes y modos totalitarios) el presidente Rodríguez, con esi aquél del bon cazurru-cazurru, refocila na soberbia de querer facer de los españoles xente cabalmente bonal. Franco mos quería imperiales, católicos y decentes. Rodríguez quier emponer otra cosa, la tolerancia y, superando al caudiellu gallegu, el tal Pachu Forquetu que cito, tamién otres virtúes: les teologales y les humanistes y les “bon-rollitoiste”... Arrodiáu de ministros pánfilos, babayos, soberbiosos y cientístes el camarote de los hemanos Marx nun pué tar meyor acorrompinao de "goods vibrations". Mas el síndrome autista sigui amalando a los mandamases españolos y Rodríguez quier disimulalo con esa hipocritez típica de quien se sabi superior (éticamente, claro) al otru.

Lo malo d’esti perdonavides, esti tolerante solo-de-lo-bono (o sía, de lo que yo camiento y digo, nun vaigas a pasate, nenín) ye que parez el perfeutu fíu que toa má quinxere tener, el meyor xenru, el meyor güelu.... En seyendo tan perfeutu, ¿cómo-y ñegar, siquier, el saludu? Mas, como tolos hipócrites políticos, ye más grande la peana que’l santu y, poro, l’analís más indulxente nun pué desfilar l’auténtica naturaleza (corrupia) del personaxe.

Duros tiempos estos. Pasemos de querer ser collacios del emperaor a ser enemigos (eso sí, progres y esquisitos) del imperialismu del emperaor (solo de boquina porque, nel fondu, ¡tan tan bones les hamburgueses del emperaor!). Duros porque d’aquello d’Aznar pasemos, sangre mediante y apedreamientos al gritu d’"aseisinos los del PP", al "buenismu" del café pa toos... pa tolos que nun sían del PP. Ye la tolerancia de los muertos.... de risa.

Pero si falamos de tolerancia y paz, daveres que nunca nun ví tanta tolerancia como nun campusantu. Eso sí que lo ye, y non lo que vendi esti Rodríguez que, por cierto ¿daquién sabi si trabayó por un salariu del mundu real con patrón y contratu precariu o por cuenta propio enantes de zucar del tetu presupuestariu? Como bon parásitu o sanixuela, sospecho que nun se-y conoz méritu dalgún pa ello, pa ser lo que ye, sacante cierta habilidá pa esguilar nel escalafón de parásitos y xente-bien que trai esta nueva democrácia orgánico (remedu franquista) que son eses empreses del votu y la corrupción llamaes partíos políticos "mayoritarios". Democracia, democracia ¿por qué tienes les patines tan curties, tanto como les mentires?

Lo dicho. Mientres los de La Moncloa mos envelenen con ideoloxía, xubilen col "trabayu" de 4 años n'escañu d’aristocracia partitocrática y vivin refocilando en privilexos y regalíes varies, el restu de mortales pena, paga y pidi, inútilmente, que mos dexen en paz y, tamién, de robamos metiéndonos les manes en bolsu sin permisu. Sobremanera, que dexen de robar.

Costante Álvarez.

PODER, DUCE AMARGUEZA MORTAL

21-11-2007

PODER, PODER. SIEMPRE Y MÁS...

Freud afitó lo sexual como motor del ánima (humana) pero cuido que, como yá dixi notra ocasión, ye otra cosa el motor d’esta especie animal, cruce ente lo dañible y lo prescindible.

La quintaesencia del ánima, esi elementu misteriosu que camuda plombu n’oru, curiosa sostancia, incoloro, ingoloro, incomible, intocable.. ¿insensible?.. nun ye la cosa sexual sinon el poder. Por redución, si se quier al absurdu, ye eso, poder, el poder en sensu latu. Too surde d’él y too vuelvi a él. Quien nun lu tien, lu allampia con prestura y en tristura, y quien lu alforxa, lu alministra atuñón, desconfiáu y sollerte pa evitar la perda.

Si ún camenta nesto, en realidá son les relaciones de poder, l’ausencia o presencia d’eso que los xuristes llamamos “imperium”, la posibilidá d’alministrar premios o castigos que van modular el comportamientu del otru (neto que lo del perru de Paulov) lo qu’amala, corrompe y “encáncana”, lo que trai perres, nomadía y miseria, l’éxitu y el fracasu, nivela les clases o les gradúa en pasera que va d’infiernu a párnasu, d’esclavu a siñor.

Los humanos acompasámonos al baltu del poder. De quiénes lu tienen, de quienes lu exercen, o lu sufren, o lu tarrecen... Piensa en cualuquier problema, personal o social, nun va importar el tiempu, el llugar, la cultura, la llingua, la economía que too reconduzse, reduzse, y concentra neso, nes manifestaciones del poder y de los sos molacinos.

El sueñu ácrata tien muncho de valoratible y inda más d’imposible daos los finxos nos qu’afita el sistema humano na so sobrevivencia. Nesti espolazaderu en que sapozamos y enmierdamos (por activa o por pasiva) parez una necesidá exercer y sufrir les dixebraes manifestaciones del poder. La potestas, l' imperium, l’antoxu soberanu...

Siéntate y alienda fondo. Pieslla los güeyos. Calma la mente. Si fais esto y entames a atendete, pero a atendete daveres, vas a ver la comedia del mundu, la llobada en tránsitu y la oveyada n’estociniu. Vas oyer el llantu d’esti mundu, el dolíu d’almes y música d’acabación. Nun importa que sías auditidivu, visual o sinestésicu pues per toles canales de conocimientu de lo esterior va a aportate el gran duelgu del mundu, ello ye, l’aciar collecha de l’andancia del PODER.

Y, por embargu, de magar lo duro de la esperiencia cotidiano, de contino renaz y renueva l’allegria de la vida, la gayola del ser espresándose nesta dura escuela, nesta imprescindible universidá que ye’la Tierra, tierra de promisión pa los escolinos que son les almes.

Que somos nós.

Costante Álvarez

GRÁNDOLA

16.11.2007

Grándola ¿úla?

Vilo.

Cabo 'l pasu a nivel, el tren de los Caminhos de Ferro do Norte movía llento, zarapicando, de la qu' esbrexaba trabayero sobre maliguaos carrilos afincaos en travieses de carbayu añoso. La máquina de gasóleu arrastraba vagones de tercera con della xente axitando banderes pertueses y otres, solo bermeyes. Esi 27 d’abril l’aire traía l’arume indefinible de llibertá mecío con esencies d’espigues en primordiu y arumes primerizos de florines de cuduxos, xesteres, xinestes y carquexes por españar.

Y vi puertes manuelines, a mármole carexo, abiertes de par en par en palacios (de Sintra y los sos alrodios), valeros de yeguada y servidume. Y el domingu, en Santa Apolonia, un mar bermeyu d’esperances al vientu saludaba la llibertá. Sobraben les armes énte los claveles revolucionarios.

El rescamplíu aquél, enfotos de xusticia y dotrina social y llista... ¿úlos? ¿Qué foi d’ello? De la nuechi al día la lluz daña mas, al tiempu, aveza, esmana y mui llueo (primero de pensalo) escampa la boriada que tolo mueve, mueya o podrigaña pa camudar... Pa camudar en nada.

¿Quién habita agora Grándola? ¿Quién camina pa la villa moreno, tierra de fraternidá?

Va tiempu que nun oyo firmes y acompasaes pisaes escuédigues sobre camín cascayero.

Suena Afonso nel mp3, cierto, pero nun ye lo mesmo.

Costante Álvarez.

LLIBRU 3 D'EL GARRAPIELLU"

16-11-2007

PRESENTACIÓN DEL VOLUME 3

DE CUENTOS DE LA TERTULIA CULTURAL

"EL GARRAPIELLU"

Ayeri tuvi na llibrería "ALBORÁ" de Xixón pa la presentación del llibru recopilatoriu de los premios de la Tertulia Cultural “El Garrapiellu”. Tratábase del númberu 3, que recueye los premios dende l’añu 2003 al 2006. Tenía de tar porque, grandonismu mediante y sinceridá toa, soi ún de los premiaos, el primeru de toos por ser el del añu más vieyo.

Tuvi notros alcuentros d’esti calter y, tamién, d’El Garrapiellu lliterario mas reconozo qu’ésti foi el que más me prestó. Ún de diente encambrioláu diría que por ser de los premiaos pero non, n’home non, puesto que l’intre gozosu del premio (de cosiderase asina) vieno na cafetería d’El Café Xixón, allá alantrones del tiempu pasáu, nun fríu mes del 2003 cola entrega del (curtiu, pa qué lo negar) cheque n’€uros y el reconocimientu de la presidenta de la Tertulia.

Ayeri prestome porque taba l’impagable y polifacéticu criador de sigo mesmo y de la irrealidá cromático, Ánxel Nava. Esti nenu vistíu d’home, n’amor platónicu con mascota amortayada (y quiciabes alter-egu), la silente Mariquina la Galana, siempres que lu sentí (de sentimientu, non d’oyíu) tuvo l’aquél de plasmame cola so gayola de vivir. Almiro a esti creativu y xulgo que pena en sitiu xeográficu inxusto: notru pais taría encumáu nel particular Párnasu Nacional.

En fin, arrodiáu de xente, los más d’ellos conocíos, glorié de les pallabres del presentaor Chema Vega (peñáu a un estilu “siux” comedíu o de “marine” en prudente retirada), del editor del llibru (VTP) y del, anecio otra vuelta, impagable y xenial Ánxel Nava qu’espurrió, grande y agradablemente, na desplicación de les ilustraciones a pluma que fexo (parez que nello tamién ayudó Mariquina la Galana) y qu’acompanguen a los cuentos.

Nava fexo de desintenebraor de los arcanos, claves y “grafo-glifos” que mangare en cada retratu, neses auténtiques ventanes espirituales a les qu’asomar primero de llier el cuentu. Ventanes qu’abrin antoxana al conceutu y paisaxe del rellatu.

Y más nada. Taben los de siempre. Los necesarios. Los voluntarios de la llevadera esclavitú de la llingua. Los bonos. Los meyorables.

Toos yeren y, pémeque tamién, yeren toos.

Costante Álvarez

HIPNOSIS DIARIO

07.11.2007

Hipnosis diario

Parte de la hipnosis diario consiste na audicion, visión y asunción d’una mesma opinión, normalmente ayeno, qu’acaba sintiéndose como propio. Opinión gomitao polos medios de comunicación y piñerao por confesaes adscripciones ideolóxiques que busquen saldar cuentes pendientes o afitar privilexos. En realidá siento que na sociedá hai una llinia argumental de baxu perfil, un rux-rux seliquino que, perdayuri, lo calistra too, que tolo endientra, mueya y cubre. Trátase d’un enfotu implícitu, gaseosu, borrinosu, inconfesable mas operativu, qu’usa les artes de les baxes emociones pa l’algame de fines tamién baxos pero mui útiles pa quien los procura. Ye como una salmodia baxino, un canciu cafiante y repetitivu, un ruíu subaudible que, polo continuu que ye, parez esapaicer del mundu real pero que tá aende, desplegando plenos poderes hipnóticos sobre la sociedá durmiyoso.

Va tiempu que conceutos como el de solidaridá, el de bientar, el d’humanismu, amor, compasión y munchos otros más, conceutos qu’espresen sentimientos qu’espeyen en nobles emociones, nun formen bramente parte (sacante l’usu hipnóticu ideoloxizáu) del noble exerciciu de la xestión de la “res publica”. Tantu tiempu como el que media ente la dixebra d’algunos antropoides del grupu de monos homínidos y la criación de megapolis tertiomilenioristes. Podríemos aldericar sobre si aquéllos conceutos yeren dafechu operativos nos primeros homínidos pero prefiero pensar que, d’aquella, la vida emocional del home, polo cenciello y harmónico pa cola naturaleza, yera más sano y llibre (y nun falo de resucitar la tesis del noble selvaxe).

En fin, la imaxe del monu de la película “2001 una odisea del espaciu” arrevexando pal cielu, de refundiu, el güesu que valió pa machucar a otru monu, fai rescamplar (y si nun “e vero, e bene trovato”), esi supuestu momentu de la conquista del poder personal del home pa sobre los otros, poder esplicitao en violencia pa col otru miembru del clan. D’aende p’alantre, tola costrución humano sofita nel algame, usu y abusu de la droga del “poder” entendío colos axetivos social y, posteriormente, político. La importancia d’esa droga, d’esi velenu, ye tanto que podríemos, por reducionismu tachable d’absurdu, calificar tolo humano como llucha pol poder. Evidentemente equí menciono “poder” non como fuercia interior y, poro, personal, d’autodetermín, sinón como mecanismu de manipulación, remanéu y sometimientu del otru.

Darwin intuyó como mecanismu evolutivu de la vida la sobreviviencia del más fuerte que depués matízase con conceutos d’adautación, de meyor plasticidá al mediu natural y otros téunolóxicos como son los factores xenéticos de biodiversidá. Nel home, a esi mecanismu evolutivu sumaríase el de la llucha pol poder, la sobrevivencia del más arteru, el más castrono, el meyor adautáu a la violencia que naz del usu y abusu del poder, dientru de la tribu, la castra o clan. Esta evolución de raigañu etolóxico, esti factor llamáu por dellos “darwinismu social” ye mui evidente y, como dixi al entamu, calistralo too, trescala esencies, sentimientos y anicia baxes emociones, empuerca alma y espíritu humanos.

Nun vo calificalo de bono o malo. Cenciellamente esto que camento ye un resultáu indeseyable, un parásitu que zuca enerxíes que, emplegaes notres fasteres del ser humano, podríen producir sociedaes humanes más sólides dende’l puntu vista de la sanidá integral del home consigo mesmu y pa cola relación cola naturaleza, pa cola vivencia en plenu respetu del ecosistema y, en resume, d’un progresu planetario no bramente esencial a la vida.

Poro ye que ríome toles mañanes oyendo la radio (cada vegada óyola menos) o lliendo los diarios (a estes altures yá solo los gratuitos). La historia repítese. Parecíos paisaxes y, siempres, el mesmu paisanaxe. Los mesmos movimientos d’egoísmu y violencia. Los mesmos escenarios sociales de dolor, sufrencia, sometimientu, en resume, de quienes tienen poder (pocos), lo gocien y exercen y de quienes (los más) lo sufren.

Viendo los pantasmes del pasáu encarnando una y otra vuelta en siempres nuevos “nerones” amburadores, “atiles” esfarrapaores o “hitleres” cazatalentos parez que la sociedá nun ta dispuesto a salir d’eses hipnosis tanto extra como autosómiques que la determinen y esclavicen. Esi, como dixi, rux-rux qu’aliena. Eso que los inteleutuales llamen babayamente “sociedá civil” podría dicise que ye más una “brañada servil”. Mientres “evoluciónase” no teunolóxico la sostancia de lo social ye siempres lo mesmo. Poro, incumplimos la llei non escrito de pasar pol mundiu ensin someter (a otros) nin dexamos someter.

Con cierta perspeutiva reconozo que pal resultáu de la obra de la vida (que d’eso trátase, d’adeprender actuando nel fantásticu teatru d’ésta) ye bono la diversidá d’añedíos posibles al alimenticiu platu cotidianu d’eso que llamemos vivir. Pero cuido que por mui bono que sía un manxar, inda’l más pinchu farturcará de comelu a diariu.

Y equí el comentariu prescindible ayeno a lo universal. Nesti tiempu y nesti pais, da lo mesmo que los partíos políticos PSOE o PP anden en griesca o impostura. En realidá dambos, los dos y tolos que fain el coru d’adoradores col envís de ser lo que son ellos pero con otros nomes y notros llugares, anden en cata de lo mesmo: poder. Nesti casu, amás del fácticu el poder de remanar les perres qu’arrampuñen a la brañada durmiyoso, (eso que llamen pueblu) presuntamente necesitada de pastores qu’empobinen la indefensa oveyada. Y pa que nun se decate la sociedá alienao, hipnotizao, usen de la ideoloxía y les emociones. Críen inesistencies diferencies y usen valero discursu acorrompinao de gas durmiyante, guerracivilismu, progresía, republicanismu, monarquismu, laicismu, nación..... Y cuidense, abondo, de mencionar que de lo que se trata ye de controlar la pación. Exercer poder.

Costante Álvarez

ENA ARRIBADA VI....

22.09.2007

De carángana, bilordios, mermures y pescardos ----------------------------------------------------------------------------------------------------------------------------------------- Esta vuelta nun fui más sé que pescardos y coru d’adoratrices yeren los mesmos. Sí. Les mesmes cares, de fondes engurries, a pelo canu o tintu, con aburrición pa fartucar, de güeyos vidriosos por tiempu coagauláo, con pose de pesu en pisu esboligoso y con esi aquél de mineral de fierro por flundir. Taben toos, xuntos. Silentes. Sedentes. Sedentarios. En brañada. En movimientu planetariu cara un sol que calecía l’alma cuantayá enfrescada por fríos cachones de la vida. Sedentes, si, y secañosos. Secañosos n’esperances. L’Arribada quinxo traer l’oquín fresquino de xenerosa mar océana, mas truxo salmoria esterilizante ciescando a presentes ausentes de sigo mesmo. Truxo la solitú d’abondancia esperao, la sobra de deos pa cuntar quiénes, pa cuntar cuántos, pa cuntar quieros. Nos intres fotocopiaos sobre sigo mesmo cualos copi-paste d’una aplicación güindous imperfeuto espurrieron nuna selmana señardosa d’otros tiempos, otros arumes y edades, otra dómina domóticamente menos dueña de dones, duelgos y dolíos de dones y de doñes disciplentes n’audición incompleta d’un presente gafu y tarrecible con raigaños “odiatibles”. Duros tiempos de mala vida. Como siempre, mala vida de bona rialidá pa tolos que nun quieren ser hérues de la so vida. Como vieno, coló callandino l’arribada d’oquín por arumar. Costante Álvarez.

L'ARRIBADA '07

18.09.2007 Mundu Perfeutibilis

Daveres yera atenrecedor (que non tarrecedor) ver y oyer la ponencia na mesa de la sidra. N’Arribada sonó la señardá d’aquellos amos del primordiu revolvicu asturianista, güei atoxigaos de gota, canes y poques ganes. Oyer echar la culpa a la nomenklatura sozialista, a la FeSeA y a la camada fíos de puta de políticos del 68 que hoi estren, nepotica y clientelarmente l’universu involutivu asturianu dami rebelguinos si lo diz ún que parez tan parte del problema que critica como lo son aquellos otros gafientos que cita en desesperu.

Quiciabes na llamuerga en que sapozamos tengamos toos daqué de culpa. Quiciabes tolos umbeligos sían reondos y, pa sorpresa de toos, esi famosu enemigu tenga una cara más amiga de lo que parez. Asina que mientres ún defendía la sidra como fonte lliteraria, infancia en Somió con güela sidrera y mocedá consumío en vieyera gotoso; otru penaba de los tiempos de trabayu na conseyería comunistono y xusticiero; otru, de les vieyes hestories en chigres de per Carreñu, La Villa y Xixón; Gonzali aburría y el más muzu agua traía, paiciome velos a toos, a toos en xunto y colación, naquelles fiestes de la Cultura que se facíen nel branu xixonés de la transición na carbayera del Tragamón, cabo Cagüeñes, referviendo idées revolucionaries al son d’un Vitor Manuel recién conversu al euroComunismu.... Aquellos panfletos d’una xunta de directores de cine asturianos que diben recuperar la memoria hestórica d’una Asturies dixebriega de cuando Gonzalo Peláiz, y Doña Urraca l’asturiana, y Pelayu el non-vasallu...

Nesi intre. Nesi puntu de la vida, l’Arribada algamó l’altor que m’esperaba. Trenta años nun son nada y muncho menos nel asturianismu de polvu y sidra vieyo. Trenta años de quexes. Trenta, d’esperimentos valeros y otros tanto,s col so I.V.A correspondiente, de desenfotu.

Una pena que nun se decate esta xente de que la fuerza d’esos que critiquen (y a los que yo nun vo defender) nun ta nuna maldición atávico del pueblu asturianu domáu por suevos o romanos, non. Ye más bien la falta de xacíu desinteresoso. Digamos de sentíu común no xeneroso pa colos proyeutos integradores. Un pasáu de derrota que se repite cada vuelta menos doliosamente porque, hai que lo dicir ya qu’ellos non lo dixeron, la sidra, de la qu’empeora, adurmi ciencia y conciencia de lo urxente y lo necesario, de lo asturianista, de lo asturianero, de l’Asturia-nada.

Prestosu esti día 17 de l’Arribada.... a nengún sitiu

Costante Álvarez