Entradas
Comentarios
El prósimu 14 de xunu del corriente, a les 19 hores, la editorial UNIVERSOS va a presentar n’Uviéu, na sé del Club de Prensa Asturiana la novela “MANN-U-MITTU Lliendes de l’Asturies Primera”.
Llunes. Bon tiempu. Sol y pación en práu. Pueque nun vaiga naide. Yo, si ta pa bigubañu, eso de dir voi pensalo despacino.
Hai más de quince años d'un día de sol, un sábadu, que me vieno a la mente la plasmante y vaga idea d'una hestoria mítica de l'Asturies Primera, tan real y plausible como toles idées que se mueven nel campu de posibilidaes de la esistencia (humano o divino). D'aquella internet yera cosa esquisito, cosa de llistes de corréu (como astur-llist), mundu universitariu (grupos de news) y una web probe na que se navegaba con programes del tipu Mosaic y Nestcape. Mio enfotu foi compartir una hestoria por capitulinos cola xente asturiano semao mundu alantre. Alcuérdome de xente en Checoslovaquia, Australia, USA... y tamién estrao pela España de la crisis y corrupción socialista. En fin, coses de la vida.
Pa dalgunos que conozan la novela internética quiciabes la xulguen con carencies. Pa quienes nun la conozan, difícil de lleer o pescanciar. Sicasí, el llibru naz de la hestoria internética pero nun ye igual. Hai coses nueves que despliquen meyor l'aición, fain más pescanciable el rellatu y, masque la fala ta normalizao, nun perdi frescura y enronche. ¿Podía tar meyor? Difícil, pero sí. ¿Falten coses? Dafecho ye qu'un autor nunca nun ta contentu cola obra qu'espubliza porque escribir ye nun acabar. Pero, como too na vida, ye un compromisu ente lo escelente y lo bono. A vos vos tocará xulgala pero, de xuro, que nun vos dexará indiferentes.
El trabayu de l’Asturies Primera tevo muncho de pedagóxico en cuantes a rescatar y normalizar pallabres del asturiano poco conocíes pero que tan aende pa emplegales. L’asturiano, como toles llingües, ye potencialmente tan potente como cualaquiera otra. El que’l faccio-socialismu español n’Asturies torgue la so oficialidá nun significa otra cosa que medrana y vergoña polítiques (amás d’ocupación cultural y violencia llingüístico, lo cualo nun ye bilordería). Pero l’asturiano vivi y vivirá. Como poco, neses llinies de la hestoria, eses bandes elástiques de tiempu que taquiones, bosones o positrones mueven a les sos deleres y que puen navegase cuando yes enerxía puro. Claro que, pa eso, hai que tar llibre de la puerca esistencia en que sapozamos o mos quieren sapozar los verdugos de la realidá incómodo.
Ya que tamos nello, pues sí, ganemos otru premiu na variante de Testimoñu Hestóricu. Una atenrecedora hestoria minerista que-y fadrá llorar de murnia, la Peña'l Gatu de pa Blimea... Claro que, hai munches peñes del gatu mundu alantre...
Chauchesk Divís, mozu rumanu d'a cuarenta años, antigu sarxentu nel exércitu de Chauchescu, vieno a l'Asturies del Gochu Fartón en cata una vida meyor hai unos cincu años. Tiró los bolos pel aire nel atopu de les cais 17 de... cola avenía... Bono, esa na que taba tol puteríu de Xixón primero de dir pal campu fumbol de Los Fresnos, y too ello pa ganar unos cuartos con que comer caliente na Cocina Económico. Aende tuvo hasta qu'un bon día echó moza o, mas que pué tamién que fuera que la moza asturiana se-y chare per elli. Yá se sabi que lo sexual tira muncho.
Los xenes parasitarios ínsitos nel rumanu sobreviviente desde que l'emperaor Traxanu de la Roma tardoimperial ganare la Dacia a la llatinidá entamaron a furrular. Como home de tratu cordial y esquisita educancia, sé de quien-y dió agospiu en casa y ducha caliente cola que quitar la porcancia de piel y mente. La moza primera afianzó-y la compra d'una moto cola qu'algamar un trabayu como repartior de pizzes. 1.400 l'euros que salieron del amor carnal y poco más.
Topelu hai unos meses na oficina d'emplegu del Cotu de S. Nicolás. Ellí un voluntariosu orietaor llaboral, un vienres yá fuera d'hora d'atención al públicu, fíxo-y un Curriculum-Vitae pa que los chara en dellos establecimientos de comida rápido. Y más nada, que coló al pais de nacencia, la Rumanía ex-comunista, esa república qu'esporta delitu y miseria a tola Europa incauto y bienintencionao. Y vieno col so pá depués de vender la moto por 700 l'euros. En Rumanía pedíen-y 30.000 l'euros pa operar al pa del corazón y, como bon parásitu social, pescanció al intre qu'había un pais de promisión, ún en que un zapateru, cualu rei espíu, soxulga a un paisanaxe bobo y cegarato. Esi pais, la España de la tolerancia, permíte-y operar al pá nel hospital de Cagüeñes de baldre, como dixo el castrón rumanu "gratis total". Entrugáron-y en Timisoara, mui estrañaos pola xenerosidá d'España, que quien diba pagalo y elli arrepostió que naide, que n'España too eso yera gratis. Aneciaron n'entruga-ylo otra vuelta y dixo que l'Estau español... O seya, yo, tu, el vecín del quintu, la puta que vivi en segundu, Xuan el kioskeru, Esperanza, la del puestu pan, la Xacona, la que viende'l pescáu na plaza...
Esto ye la España del 2.010. Un Xineru xelón d'una selmana de ñeve. La mala fostia que se me punxo duró un tiempu, nun creyer.
Dexaime que me cague na puta que parió a la tolerancia. Yo, rumanu, fairía lo mesmo cuando un pais, ESTI PAIS, nun ye otra cosa que babayos hipnotizaos énte un televisor y la propaganda nazionalsocialista d'un zapateru remendón. ¡Colo fácil que sería invocar el criteriu de reciprocidá a la hora de prestar asistencia sanitario a tantu vivalavirxe! Nun quiero pagar impuestos pa qu'estos políticos marafundien el mio tiempu y dineru. Si quiero ganar el cielu dexaime que seya yo quien gaste los cuartos en, y no, que me pete.
Mundu magaya.
Podría callar, dexar pasar: cenciellamente, atender. Mas, como nun soi perfeutu, prefiero meter la cuyar nesi compangu de la modernidá tardofranquista que fain tantes muyeres y homes requisitos, esos que llenen la boca cola pallabra "machista" depués de fartucar cola de "tolerancia". Esos que, nun sé bien cómo nin porqué, tienen vara alta, y potestes abondo, como pa dar la llicencia y alcuñu, condena y castigu, de "machista" a cuanto (y a quien) se-yos antoxa.
Estos fíos del tardofranquismu como, por exemplu, la falucaora del programa de RNE "No es un día cualquiera", son gomitivos, cafiantes, babayos. Ye que nun saben otra cosa que dicir cuando oyen dalgo "zapateramente" incorreuto. Parez qu'hai una conseña non escrita de nomar, faltar, alxetivar aquello que parez ser eso, la pallabra máxica lo diz: machista. Y parez, tamién, que namai ellos tienen esa patente de corsu.
Nun paga la pena esbillar l'ensame de políticos, falucaores bien pagos con perres públiques, "periodistos" de tertulies de tou pelax (esclario que periodistu ye'l periodista mui llistu, o seya, el poli-llicenciáu en toles rames del saber humano, ello ye, los caberos homes del Renacimientu, que son quien a falar dende cómo facer una bona tortiella pataca a les consecuencies metafísiques de la desintegración del muón) o aspirantes a modernos qu'anecien neso de calificar de "machista" a toa manifestación que parez poner a la muyer baxo sospecha d'inferioridá o usu alternativu. La mierda que caguen eses boques pinga pausao, como destilando aneya sabencia que naide nun retruca porque, ta claro, la babayada cuando masifica, amás de facese invisible, narcotiza les entendederes de lo que toca. La necesidá de facer curtia esta reflesión me llibra d'espurrir más nes munches voltures que dan estos "macarres" emocionales.
Estos fíos de la dictadura franquista, que tanto la critiquen y de la qu'arrenieguen muncho pero a la que deben, tamién, muncho; con cuatru idegues mal adeprendíes como democracia, igualdá y tolerancia, estren l'antoxana de los medios de comunicación social de basoria conceutual, hipocresía y, cimeramente, inorancia. Afortunadamente pa ellos, la xente ta aborricao abondo como pa nun decatase d'esi sutil remanamientu dignu de propaganda hitleriano. Ya se sabi, dende Nerón, que la xente, en xunto, nin piensa nin critica. Pero como esti campu ye polisémicu y polipastu, cincaré solo lo del machismu, que ye alimentu mui nutritivu. Veamos
1 Nun inoramos que la muyer tuvo un papel hestóricu solo reproductivu.
2 Que sirvió solo pa descansu de guerreru.
3 Cria de reciella.
4 Llimpieza de cacía, casa y castiellu.
PERO...
5 Eso nun tien de facemos perder la perspeutiva hestórica de lo que se xulga.
ITEM MAS...
6 Esos frutos son consecuencia del procesu hestóricu concretu y tienen de xulgase colos güeyos del momentu hestoricu en que sucedieron. El pescancialo nun obliga a compartilo. Nin siquier a ser cómpliz del procesu.
Poro, ello nun quita l'adeprender del PASÁU pa nun lo repetir, MAS, xulgalo con criterios d'ANGUAÑU, pa menosprecialo, ye como mecer la mecánica de la rueda y la palanca d'Arquímides cola mecánica cuántico de Niels Bohr o la relatividá d'Einstein. Cenciellamente, agua y aceite. Elemental, queríu Watson.
Un exemplu oyíu na emisión de RNE del domingu 13/09/2009. Cuando el cantante Manolo Escobar diz nuna canción de la década de los años 1960 "viva el vinu y les muyeres, y les roses que dan gloria a mio tierra..." duldo permuncho que toviera exerciendo el "machismu" (del que falen los modernos facistes culturales de la tolerancia) como dixo la presentaora. Nel contestu hestóricu, esa fras, como otres de la mesma mena, nada tien de machista sinón de cumplíu (bien cierto que probetayo) y homenax. Nel 2009 la cosa pue sonar ceízo pero hai que lo ver con perspeutiva hestórico. Güei, pocos lo dirían asina, o non. Depende de la llibertá de caún cómo dar un cumplíu y, dafechu, debemos respetar la llibertá de toos pues respetar les opiniones ayenes nun ye, forzosamente, compartiles.
Estos facistes culturales, que falen del machismu como daqué negativo, guardiense muncho de criticar la otra cara de la mesma moneda: el machismu femeninu o, si se prefier, el feminismu. Y lo simpático ye que son les muyeres les qu'eduquen al machista. Ye lo que tienen los hipócrites.
En realidá el machismu, como tantes otres creaciones mentales, nun esiste na realidá. Ye solo una etiqueta na que s'escuenden, o meten, comportamientos y, lo meyor, caún decide qué ye lo qu'ha metese. Asina que, si nun momentu nos fadien los xudíos, los moros, los vecinos, los del PSOE, los del PP, los de l'Asociación de la Madreña Rescamplante..., pa faltalos dicimos que son machistes. Y si lo que mos fadia ye una canción, pues que ye machista. Los facistes culturales son aventayaos alumnos del totalitarismu y saben lo que quieren: un mundu "neutru", un mundu pa ellos solos. Por supuesto, ellos son los que van mandar y decidir lo que vas pensar y dicir. Son los misioneros d'una relixón por llegalizar que quieren lliberar del machismu, a espetaperru, a la humanidá. Neto que los del "Domund", de cuando Franco, salíen a pidir perres porque queríen convertir a tolos probes negros al cristianismu.
Ellos son asina. Los "machistófobos" (o si se prefier, los feministes) son les flores de la privavera totalitario que vien a casa depués del turrón del iviernu de la dictadura. Pero duldo muncho, daveres que permuncho, que la meyora de la hestórica situación de la muyer-yos deba dalgo.
Del totalitarismu, (de tolos totalitarismos) nada bono viene.
Nin va a venir.
La inmodestia nun ye una de les peores faltosidaes cuando vien de la mano de trabayu y enfotu. Sicasí, presta compartir, con otros, trunfos propios cuando, daveres, trátase tamien del trunfu de los otros.Si vos presta, aende vos apurro la direición de la noticia :
La selmana grande de Xixón truxo dos actuaciones interesantes nel mesmu día, una tres otra masque n'ubicaciones dixebraes. Falo de música, de grupos del artisteo. El primeru n'actuar en tiempu foi la trupe cubano del Buenavista Club Social. El segundu, "Celtas Cortos".
Propóngovos trescender el fechu musical pescanciao como pura folixa. Si nos movemos nesi campu, pa gustos hai llámpares y sapes, ñocles, cámbaros o esguila y caún tien la so filia, o fobia respective a ritmos, sones y canciones. Y ensin ponese ún mui trescendente, fixeme no paradóxico de que se xuncieren nel tiempu sucesivu dos espíritus, a priori, hermanos. El primeru, un grupu fíu del socialismu real, frutu d'esa inacabable, insufrible (y, poro, imposible) revolución permanente (que cantaba inocentemente na década de los 70 del siegu venti, Georges Moustakis). El segundu, un grupu sozializante, entiñao d'acracia acomodaticio, con sensibilidá que dizse social y... ¿Ta claro que nun me gusten, eim? ¿Va ser cosa de pre-xuiciu?
Los cubanos del "Club Social" que, en realidá, queríen poner "Social-ista" cantaben, na Plaza Mayor, al amor carnal, a la voluptuosidá preferiblemente tropical, a la piel moreno encorteyada por sol y espluma salmorioso. Nuna palabra, al deséu calificao como deseable mientres los vieyos del grupu tiraben de turuta añoso, saxu berrón y mandolina quexono. La muyer del grupu glayaba ellectrónicamente perriba'l baturiciu de xente escanciando sidra malo na puerta del "Galiana" y l'hotel "Asturias", moviendo calcaos cadriles con esi acamar de picardiosa por cubrir. La carne ye la carne y el deséu, llibre. La danza ente dos nun ye otra cosa qu'antoxana amatorio, escitación d'enerxía terrenal y vibración vital. Los pocos que se cuidaben de l'actuación movíense navegando una mar esteno, una mar bella que camudaba en barallos cuando les pareyes xuntaben nuna carne. Guapo, sí.
Los cazurros de Valladolid, los "Celtas Cortos" canciaben otra historia. Frente a los añosos cubanos ellos, más mozos, diben de fola escontra cantil. Énte el son suave y la cumbia o el montunu de los saudosos cubanos, los cazurros llevantaron la berría. Muncho ellectrónico, muncho volume de ruíu y glayíu. Muncho prescindible.
L'antoxana del saludu, con un "salú y anarquía" diz abondo de quien vivi, xusto, de la esistencia de lo que se combate. Los mozos repitieron cancios que yá sonaben a vieyo cuando los estrenaron cuantayá, de la que, más mozos, enxertaben no que se llamó "música celta". Fartucaron de falar de les barricaes, de facistas escorriendo a emigrantes, de lo de llevantase del sillón pa camudar un mundu malu, mui malu pero, ¡coses de la vida! non tan malu como pa nun mantelenelos na fola consumista que-yos paga les factures. Preguntes retóriques invocando a los santos de la progresía, esos que nun tiene ilesia material porque cada "progre" llévalos nesi ara perpétuu que ye'l póster del Che y la estrella de cinco puntes. ¿Qué diría el Che, y Sandino, y qué Allende, énte lo malo malísimo d'esos imperialistes que xinten nenos, primero nel Vietnam, darréu n'Irak y agora... ? Ambute demagoxa, en paxu y goxa.
Pa min ta claro que la involución ye otra forma d'evolución y estos Cortos (de vista llargo pues saben cómo vender emocionalidá pa llegar a fin de mes) involucionen hacia l'ovocitu primordial de la sopa d'Oparín. Sicasí, la gaita ellectrónico-yos suena bien y dalgún canciu de la primer época ye prestoso.
En fin, un fin de fiesta amañoso dando pilancos y pagando el "mojito" a 5 euros (más d'800 pesetes), bocata tortiella a 3 euros y, los más intelixentes, fabricando muncho botellón gracies al Carreful.
Hai qu'esclariar qu'a los Celtas Cortos metiéronlos pa la playa de Poniente, a tocar na antoxana de la zona caro y residencial. Pensando mal ¿qué otra cosa podría esperase d'un gobiernu municipal supuestamente socialista? Pues eso, meter caña a los capitalistes de primera llínia de playa. Faltaría más.
Prestosu martes d'agostu inciertu, n'añu 9 del dos mil.
L'ESPECTÁCULU SIGUI...
Parte de la esperiencia d'anguaño, ente seres simplayos que nun saben que lo son (pues son durmientes) ya la incapacidá personal d'enfrentar aquéllo que, emocionalmente, nun saben (o nun quieren, siquier dende la incosciencia) remanar. Siendo durmientes ye normal actuar asina. Esto, pa min evidente, trai una infantilización social mui comeniente a los poderes fácticos.
1.- LA MUERTE D'UN FUMBOLISTA.
Oyo pola radio qu'un fumbolista muerre mientres l'equipu, faciendo caxa (ello ye, ufriendo espectáculu p'alforxar cuartos por esa actuación) viaxa pel estranxeru. Darréu esa muerte l'equipu suspende la xira, cola pa casa y los estamentos oficiales d'esi deporte, y los parásitos-políticos d'esa estaya alministrativo, declaren llutu oficial y folixa vario. "Sniffff", faltaría acutar.
Podría camentase, de mano, que l'actitú de suspender l'actividá económico-llaboral tien un aquello de sentimientu profundu, de comprensión énte lo inevitable y lo pasaxero de la esistencia. Pensaríase n'homes fechos y derechos compunxíos, (por supuesto, bien pagos) galdíos pol dolor de la perspeutiva d'una ausencia perpetuo. Podría ser, pero non. En realidá ye una amuesa más de la infantilización social.
Notros tiempos, notres profesiones más dignes, o, cenciellamente, ente xente adulto como l'actor que perdi a un ser queríu, el payasu que perdi un amor pa siempres na fría ausencia o l'anónimu ciudadanu que tien de siguir camín solu, la vida sigui y sabe que l'espectáculu tien de continuar. El meyor homenaxe que se fai al ausente ye la normalidá, la llucha cotidiano y el respetu espeyao na continuidá de la esperiencia. Por embargu los nenos, los infantiles, los emocionales irracionales usen el mesmu sucesu pa desconeutar de la realidá, cuando non pa aprovechase d'ella faciendo duviellos mentales.
Ún espera que l'adultéz sía el resultáu natural del camín de maduración, ello ye, d'entendimientu de lo que, bramente, ye la esistencia humano. Quiciabes ye muncho esperar cuando la sociedá humano, gracies a factores ideolóxicos dominantes y a la so debilidá mental, cultivao arrementes por dirixentes sociales, nun ye otra cosa qu'una gran guardería de nenos de tolos tamaños.
Ún de los grandes paradigmes remanaores ye la (cuasi forzosa y subliminar) infantilización del individuu que, espolletando n'edá biolóxico, permanez infante (y, poro, dependiente, a lo menos, emocional) tola vida. Eso desplica la falta de responsabilidá qu'amuesa la mayor parte de la xente cola que topamos dayuri. Ye sintomático que naide nun sía responsable, o que se refugue el pagu de consecuencies resultáu de los actos que se fain. Tratau como nenu, l'adultu infantilizáu fuxe d'una mayoría d'edá y s'abelluga na corripia materna del estáu, del sistema, que lu protexe a cambéu del tienru y freñetible sometimientu infantil acríticu.
2.- XINTAR RICO RICO
La fala ye potente preséu de configuración mental. Yes munches coses pero nun va ser la menos importante la de cómo fales, la de lo que dicis; la de lo que óis y repites. L'animal humano, como especie gregario, necesita formar (o, polo menos, sentise) parte d'una brañada. El pertenecer a una reciella o a una manada ye estratexa evolutivo que da grandes beneficios na sobrevivencia de la especie y nel home ello parez vinir d'un pasáu de presa más que de predador. En cualisqueir casu, con independencia de la xustificación etolóxico del comportamientu brañeril, la permanencia na corripia social depende de la mimetización conductual del individuu pa col restu d'animales. Poro, la repetición de comportamientos y, ente ellos, el de la fala o la forma de la fala. Y la fala, como productu inteleutual, nun solo espeya la fonte de la que vien sinón que, por rellación biunívoco, tamién la configura.
Ferramienta d'infantilización social ye l'usu n'abusu de los diminutivos. Y ye mui evidente na fala del fogón. Nos programes de radio y televisión ye alloriante contemplar a xente arrecho y correcho falar como neninos cuando dicin de cantidaes, de cuánto echar o non echar, de lo que cuidase y, a mayores, del nome de lo que s'emplega nel llar. Estos animales, bípedos e implumes, dicinlo too en diminutivu infantil como si falasen pa retrasaos mentales o pa xente cuidoso, fácil d'axorizar, d'enllerciar. La cocina de los "mass-media" ye un universu de desinencies que pretenden familiariedá pero qu'amuesen, ñidiamente, una infantilización social alloriante. Personalmente fartuco oyendo nomes y alxetivos terminaos n'inos, n'itos, n'icos. Ye como si, repito, los doctos espertos, falando pa subnormales o incapaces, quinxeren facilitar la llabor pescanciaora del discente tratándolu como menor d'edá. El resume, la comprendoria, ye'l siguiente: tratándote como minusválidu, eso ye lo que te fain.
Toa programación entama pol llinguax. Una ciencia, o una de les sos especialidaes, nun ye otra cosa qu'una modalidá llingüístico funcional que describe procesos y procedimientos y ye evidente que lo que describe'l mundu te costrui'l mundu. El retu d'un "cegaratu" visual nun ye'l nun tener güeyos funcionales (que tamién lo ye) sinón el de que la pallabra describa fielmente'l mundu que tien de criar nel maxín.
La infantilización social ye, como diximos, una ferramienta controlaora más al serviciu de los malos. Porque, hai que lo dicir, vivimos ente xente mui malo (poca, pero mui importante nel sen de poderoso) que necesita de la muncha bona xente. Y la necesita en términos que se pescanciaríen mui bien emplegando conceutos de la termodinámica. Pero esi ye un tema pa otra xornada.
Nada más prestoso al alma qu'oyer al muzu "intelestual" (y istitucioanal) falar de lo mozo. Tan prestoso foi que cayí de culu al oyer a ún d'esos borócrates del Conseyu de la Mocedá Españolo falar de la "proletarización" de los universitarios. Ya se sabi (y bien lo dixo Aristóteles) que los mozos d'anguaño nun tienen igua polo faltosos que son pa colos vieyos y xente mayoruco, que nun respeten a naide, que falten como pocos y desprecien cuanto ignoren. Rescamplante descripción aristotélico d'hai... ¡trenta sieglos!
Sigún el doctu, agora parez que los mozos universitarios, la mayoría célibes pola cuenta de tar (cuasi) tol día etilizaos, son "proletarios", condergaos a la probeza al salir d'una istitución masificao que da munchos que ganen mui poco. Nun m'estrañaría gota: estudiar, lo que se diz estudiar, nun parez que lo faigan asina que pueque sía porque se dediquen a tener "prole", o sea, fíos y más fíos, ente botellón y botellón. Atenreceor diagnósticu de la universidá española convertío nuna gran guardería d'inadautaos.
Como yá pasé'l sarapicu de la mocedá, peño canes y tomo "Desenfriol-D" pa la gripe-A (la gripe de los gochos mexicanos, cosa dixebrao de los mexicanos que son gochos) aplaudo coles oreyes a los xóvenes lleones del "Nesquick" y del Neo-ColaCao con febra, qu'alguarden formales, na antoxana, a formar parte de la mafia político estamental. Nun me dicir que lo de la "proletarización" de la xente universitario nun ye mérito abondo pa metese nel PSOE. La verdá ye qu'esi muzu ya me daba ñicios de lo "progre" cuando tuñó pa escontra un reportaxe que falaba de los mozos, espublizao na "bicha" que ye'l periódicu ABC. El reportaxe facía una dixebra ente mozos bonos y mozos malos cosa imperdonable ya que, cono se sabi, tolos mozos son anxélicos sigún la progresía. Son anxélicos hasta que dexen de selo, claro.
Cuando un malfadiáu oyente del alderique siñaló, en turnu d'entrugues, lo inútil de qu'hebia un ente "burrocráticu" como ye esi Conceyu de la Mocedá Españolo, a otru de los conferenciantes faltó-y tiempu pa ponelu pingando, insinuando que nuna "democracia" aquello que dicía yera propio de... Nun lo dixo, pero taba claro que'l "progre" y democráticu humanu taba poniéndolu nesi infiernu virtual del facismu, o del franquismu, o del infiernu llaicista que ye lo relixoso conceutualizao como lo retrograu. ¡Cuanto muncho me presta'l totalitarismu progre! Porque ye que a los progres, o sía, a los isquierdosos, ensecuti se-yos vé esi filo-facismu irredentu que lleven nes coraes, esi allampiar por una sociedá sano-sano, igualitario a machamartiellu, tolerante-polos-mios-santos-güevos. Ah, los nenos. Siempre tan nenos.
Darréu vieno esi movimientu desvalorizaor qu'empleguen los píos, o sía, los "puros". Sí, ho, esos que yá sabin qué ye lo meyor pa ti ensin preguntate si tas, o non, d'alcuerdu. Van y llamen "facista" al otru, que tien de ser cosa serio porque a dellos parez que-yos sienta mui, pero que mui, mui, mal. Ye lo que tien ser servior del progresismu, que te dan carné alxudicaor de facista y quedes tan panchu sabiendo que salves al mundu d'una cosa, repito, mui malo. Claro que, si bien te fixes, la intolerancia, nesti casu hacia el facismu, nun ye otra cosa qu'otra clas de totalitarismu, unu más que perpetúa lo que persigue ya que nada aporta, sacante el "progresu": el progresu de los que se meten nes empreses partitocrátiques que críen esa burocracia político, que'espuxiga y espuxiga, a costa de sacate les perres vía impuestos.
Porque, ya se sabi, los progresistes progresen muncho. Facismu, marxismu, comunismu, guapismu... tolos totalitarismos son lo mesmo: alienación. La engañifa, ta claro, entama na propia indefinición del términu "progresu" y nel usu interesoso de lo bono y lo malo, de la conceutalización del otru como enemigu, como cosa currupio y indeseable. La engañifa ta nel opiu qu'alministra'l políticu istitucionalizáu al pueblu como forma de remanar la riqueza de la sociedá en porgüeyu propiu y del sistema que lu caltién.
Echo de menos los díes (¿improbables?) de vinu y roses. Aquéllos que dicin qu'hebio ente'l Tigris y l'Eufrates, los de la fueya de parra y l'alendar del Creador sobro boldre informe. Aquéllos que'l monu de Darwin punxo en mitu y llienda.
D'aquella toos yeremos bonos, sacante la serpiente, claro.
Nuna reciente conferencia que dí (y que, por cierto, pagáronme bien) nel alderique que s’entamó a la fin de la mesma salió l’asuntu de les envidies y rensíes ente profesionales. Esi ye un tema prestoso de tratar porque duldo permuncho que cualisquier autor, creativu o inventor de la realidá nun tea encarao esi tipu d’amor bastardu que cristaliza n’odiu y tristura.
Ye mui cierto qu’un paisaxe necesita piedres. Y necesita manches, y suelu de tou tipu de calidá, y tamién material biodegradable que cuche los frutos de la vida. Cualquier milagru necesita, primero, el de la vida y ésta nada ye ensin un bon suelu, lo que val dicir, bonos antecedentes del consecuente. Poro, cuando dellos quexen de sufrir envidies ayenes, en realidá lo que fain ye nun ver tola foto d’esi intre vital pues, tres cada envidiosu hai un suelu xeneroso sobre’l que llevantase, un almirador secretu, un amante insatisfechu que necesita del envidiáu pa sentise completu.
L’envidiosu, y aquél que t’odia, en realidá ta celosu de la to esistencia. Quiérete d’una manera especial. Pué querete muertu o baldáu, a lo meyor maliguáu pol estrapayamientu d’un tranvía con trole bifásico, igual pue querete estocináu en manes d’un sarracenu domingueru d’esos que van en moto y gasten muncha colonia de D. Algodón. Pero ye que, con independencia del “como”, esi personaxe, l’envidiaor, QUIÉRETE.
Nun lo pué evitar y quiérete. Quiérete con tal enfotu, con esmolición tala que s’encarga de dicítelo a toles hores, en tolos díes de la so amante vida, y failo siempre que cuadra, siempre que pase pel to sitiu, nun importa cuánto lloñe vivas en términos físicos o inteleutuales, en términos virtuales o reales.
Yo dixi na conferencia que tamién tengo un d’esos amantes secretos que s’encarga de dicíme lo muncho que valgo de xemes en cuando. Elli-ella ye asina, discretu y profesional. Usa l’alcuñu orixinal de “Anónimo” pero siempre vien a veme, fiel como les mios perrines. Y, como elles, llámbeme incondicionalmente. Ye un amor puru, que nun alguarda correspondencia nin afalagamientu. Y, además, tien mui bon humor y parez mui lleíu, tantu que s’encarga de dicimelo en llingua estranxero, con carauteres chinescos y muncha gracia. Tienro, ciertamente.
Cuando’l mio profesor de derechu penal, parte especial, (amás de miembru de l’Audiencia Provincial d’Uviéu) describía la prostitución preguntábase, retóricu, que qué yera relevantemente más dignu d’almiración, si aquélles que proporcionaben felicidá (por aquel tiempu lo de la homosexualidá nun yera cosa habitual de falar) o quienes dedicaben la vida a facer la infelicidá de los otros. Resalvando lo polisémico de la pallabra felicidá, ciertamente l’envidiosu, el rensiosu y toos aquellos que te quieren, sí, que te quieren mal que muertu, nun merecen otra cosa qu’almiración. Lo que-yos pasa ye que ellos nun saben lo necesarios que son pa que, como suelu o basoria biodegradable que son, l’egu del envidiáu xorreza fuerte y piqueru.
A títulu d’exemplu, una carta del mio anónimu envidiosu va d’esta traza:
Ya se sabi: la gloria, como los perros, tien les sos propie pulgues. Ellos, los envidiosos son la sal del mundu. Pueque que, tamién, del somundu.
Un sabiu me dixo nun hai tanto que nun m'enxertara na realidá que ye porque, daveres, solo lo parez. Eso quier dicir non xulgar. Nun teniendo tolos datos d'un socesu, balero de xacíu ye enxuicialo. Fácil, ¿acuéi? Pues non tanto.
Mientres un sobreviviente d'una espedición de siete díes a les isles Canaries a bordo d'un "gal" (1) me pinta en gris perla delles rexes de casa pienso no paradóxico d'esti intre en que me puedo permitir un sirviente.
Tener mala concencia ye inxustificao pues el mozu ta ganando unes perres que lleva varios díes que nun gana vendiendo caxigalines pela cai y los chigres caleyando ensin consuelu de nueve de la nueche hasta les tres de la madrugada. De la que mueya'l pincel na mezclienda comenta que si equí van mal les coses per ellí ye pior pues la xente nun tien pa 
comer.
La famosa crisis que nun diba vinir, esa que de venir diba ser curtia, esa que sinón curtia diba ser pasaxero, esa que parez que nun pasa sinón que, a la escontra, parez que va quedar por un tiempín, esa crisis que, barrunten yá los más, va quedar hasta echar raigaños nos bolsos del desesperu, ye bona tema pa xulgar la realidá que m'arrodia, que la crea y recrea. Antóxaseme invitable implicame no político, lo económico y lo humano. Y el sabiu diz que non que, como muncho, solo lo atienda y dexe pasar.
Yo nun soi sabiu, poro, pueo enquivocar y nun facé-y casu. De xuro que l'home tien razón pa dicir lo que diz y que, esa razón, ye la meyor de toles razones posibles. Sé qu'hai ciencia y conciencia nes sos pallabres pero tamién se que yo inda nun toi nesi altor de sabencia que m'inmunice d'esmolecimientos propios y /o ayenos.
Nun sé aú acabaremos con esta crisis. Suponse que les crisis son cosa bono, que son válvula d'escape cuando un sistema apodrez. Sé que la catarsis ye necesario, que nun yera posible que tantu avarientu, tantu furtón, tantu lladrón, siguiera engañando, mansulino, bienes y derechos de toudiós. Pero tamién sé qu'aquél qu'entamó esta engañifa piramidal ye l'unicu que va a salir bien parao d'esti estropiciu. Y tamién sé que l'avarulia y la codicia nun pertenecen namái a una sola casta social.
Si se me pertime una llicencia lliterario, esi "mario-condismu" (2), esa posibilidá d'arriquecese
ensin crear riqueza, solo con inxeniería financiero (lo que val dicir, engañifa y estafa) espurrió como una llépara social ente tola xente que quería ser rico y poderoso, calistró per tolos estamentos sociales españoles.
Munchos collacios metieronse a especular en bolsa, a meter perres en cementu y lladriellu, a comprar productos financieros que, dafechu, nun pescanciaben pero que los "espertos" del "mio bancu" encamentaben-yos con munchu procuru y garantía. Yo entrugába-yos "¿Daveres ye'l TO bancu?". El bancu yera de Botín, o seya, el botín del robu yera manifiesto. Y asina toos, una ruina pa mayor gloria de la fuñería y l'avarulia.
Mas, conocer los síntomes nun da consolancia cuando esta llamarga en que nos movemos nun tien igua gracies a la hipocresía político pues nun hai responsables conocíos y los políticos, coles nuestres perres, salven de la fondigaña en que se metieron a bancos y caxes d'aforros. Los unos son los dueños de los partíos políticos, a los que perdonen les deldes ellectorales y los tienen coyíos polos coyones, y les otres son comederu de políticos en retiru o n'exerciciu de nepotismu.
Daveres que ye difícil non xulgar.
Dexar pasar.
Ver y non dicir.
Dicir, pero non falar.
Costante Alvarez
NOTES:
(1) Gal: nome, na fala mariñana senegaleso, d'una barca de pesca más o menos grande que se diz "patera" ente los españoles. Naquel viaxe vinieron 60 negros hasta Las Palmas de G. Canaria. Dende llueu yera un gran "gal".
(2) Mario-condismu: refiérese al exemplu que dió a la sociedá sensato un tal Mario Conde, abogáu del estáu recicláu n'especulaor, direutor d'un bancu al que casi arruina, aspirante a políticu y, finalmente, delincuente condenáu.
Sé qu'esistíen. Víalos nos movientes (1) y nun me yeren especialmente tarrecibles. Inda nos fiestos (2) salíemos, guah.es d'aquella, a pidir por ellos, en cata de perres pa coles qu'aperiar bonos fines, ente otros, krishtianalos (3).
Ye lo que trai rellacionase con maracianos. De mano pacíficos hasta qu'un día ves nos movientes lo muncho malo que son, que si violen a les tos muyeres, que si la tienen más grande que la de nueso, que si les muyeres atochecen en cuantes que follen con ellos, que si atropen tolos puestos de trabayu... Too barata lliteratura y cosadielles que, pa qué lo negar. furrulen perbién ente la xente simplayo.
Lo cierto ye que nunca nun me fadiaren. Nunca nun los tratare, sacante a M-boix, ún d'ellos, pero krishtianizáu de nacencia por vinir de la colonia que la Patria tien naquél llugar. Nunca cuidé d'ellos. Nunca pensé n'atopalos en mio casa. Nunca, hasta qu'estos tiempos de dibilluriu y trafuelgu que vivo aportaron a la societas (4). Dicin que ye la fame, la falta futuru nesi planeta ermu d'agua. Dicin muncho, ente otres coses, qu'hai traficantes que vienden-yos un futuru fácil na nuesa casa y ellos, claro, créenlo como prubinos que son. La verdá ye qu'ha tenese valor pa xubir a eses naves gravitatories de teunoloxía barato y pocos medios. Valor pa pagar por una plaza nesos cagüercos esnalantes, esos traxes de madera fechos a martiellazos y poco más.
Sía como sía, la cosa ye qu'agora los maracianos viven en barriu. Vivin xunto con otra muncha xente estelar. Vineron pa quedar, y naide nun los invitó. Y nesto taba cuando conocí a Bab'l. Un maracianu señorín, d'esos de casa rico si por talo se tien poder comer casi tolos díes. Bona educación na escuela colonial. Trabayáu al serviciu del colonu terrestre, pueque de bona vida mas, ¿quién pue dicir lo que ye eso? Conocilu porque una moza, amiga d'una amiga y que conocía a un amigu col que quedemos pa fornicar, me lu presentó. Aquélla diba a casar col maracianu, un asuntu de permisos de residencia terrestre o eso paiciome oyer. Una basoria, creéime, la hipocresía d'importar mano d'obra barato pa que'l sistema económicu de nueso pueda siguir produciendo a bon preciu mientres la condición d'esclavu aumenta ente la raza humano alienada pol consumismu y la inmigración, ente otra, de los maracianos.
Si ye que pue dicise que los maracianos son persones to de dicir que Bab'l ye bona persona. Y cuando me cuntó la hestoria de cómo aterrizó na Patria, dexome ablucáu porque nun vieno de maguyu nes chalanes espaciales, como fain toos ellos, sinón en turbostélar (5), eso sí, con billete de segundu gráu. Prindolu la policía en cuantes asomó la piel naranxa pel departamentu-restaurante del inxeniu viaxante, pero ya nun podíen facer ná. A ver, esclariemos que ná en términos d'humanismu pues notres circunstancies, y notros tresportes, podríen tenelu esquitáu, eyectáu dafechu al espaciu, ensin munchu problema. 
Depués d'indentificalu na estación de policía, cola tarxeta d'espulsión insertao na vidaya derecha, dexáronlu colar cola alvertencia de que la orde d'internamientu tardaría unos meses y que, poro, nun tendría de metese en problemes si nun quería acabar na colonia carcelario de la Lluna. ¡Vaya gallu esti Bab'l! De tener coyones diría que tendríen de ser cuadraos y bien grandes.
El mui castrón aferrose a una moza necesitao de cariño y sexu. Eso siempre convién. Convién a toos y nespecial a les moces de la Tierra que, en franca minoría reproductivo por cuenta de tantu manfloritu xenéticu, nun son a poder satisfacer la necesidá primera de sentise completes vaxinalmente. Pa eso los maracianos yeren bona comida. Tratelu un tiempu. Yera bon trabayaor y, ya lo dixi, meyor persona. Automáticamente, coses de les etiquetes, tolos maracianos qu'entamé a ver pasaron a gozar d'un estatus asemeyáu al de Bab'l. Pero non, nun tolos maracianos yeren Bab'l.
Hai unes selmanes vieno per casa un amigu de Bab'l. Wam'm, qu'esi ye'l so nome de maracianu probe, tien otra hestoria que cuntar y de xuro que nun vos la cuntará porque visti miéu y come dolor. Esti ye un superviviente. Ná de turbostélar o lasercaril (6). Esti ye de los de chalana (o meyor dicir, chatarra) espacial. Pasó diez meses terrestres a bordo d'una nave desahuciao, técnicamente falando, conociendo toles llúrigues espaciales que los radares estelares de defensa terrestre refuguen fondigonar porque naide, en sanu xuiciu mental, se metería nelles. Vio morrer a muchos collacios y tuvo de comer a munchos d'ellos pa sobrevivir hasta aportar a la Tierra. L'aciar frutu del viaxe ye un güeyu ensucho y fondes ferides per tol cuerpu qu'amuesen quién evito cayer na cazuela del desesperu y la sobrevivencia.
Xúrovos qu'a min los maracianos nun m'importen. Podríen dir toos a tomar pel culu yá. Pero conocer la esperiencia del probe Wam'm púnxome en corazón compasión. Con esti home, pues por un igual lu tengo, diría al mesmu abisu infernal que vende Krishtian, y a elli solu tendría elexío pa lluchar pola propia vida a comuñes. Porque esos güeyos medio ensuchos (quiciabes de tantu lloru) y esa rocea, qu'atapa dignidá ensin medida, son medalles que pocos algamarán na puta esistencia universal. Pues de la xente que fue al infiernu y volvió quiero yo tener amigos.
NOTES (1) movientes = películes ellectróniques d'ampliu consumu
(2) fiestos = ciertos díes de folixa relixoso
(3) Krishtian = algoritmu moral cristalizáu en paradigma eticidante.
(4) societas = cadarma social en que desendolca la humanidá
(5) turbostélar = tresporte automatizáu d'entidaes biolóxiques
(6) lasercaril = tresporte discrecional multimaterial
Costante Álvarez
Más o menos
Anden revolvicos per Irán. N'asturiano ye difícil facer el chiste porque'l nome imposible diba ser "Dirán" y vaiga sabese aú dirán o lo que van dicir. En fin, la hestoria d'esi cachu asiáticu que s'esplayó na canal de TVE conocíu como "La 2" amuesa, una vuelta más, que lo que fai humano al humano nun ye, sátamente, la intelixencia.
Frente al tiranu, el xá de nome Mohammad Reza Pahlevi. (copia teunolóxico del gran Ciro I), el desesperu del pueblu vio na relixón, y nos sos molacinos, la única solución amestante de les sinerxies de la llucha por eso que se noma llibertá. L'alternativa al sofitu ocidental qu'encontiaba al tiranu, encarnao pol imperialismu de los Estaos Xuníos de Norteamerica, yera la igualmente imperialista Xunión Soviética. La tercera vía (y non precisamente Tomista) resultaba ser de collecha nacional: l'islamismu chiíta. Sicasí, maticemos que los de "nacional" ye discutible: l'islamismu ye otra clás d'imperialismu alienante qu'espurrió ente pueblos probes, soxulgaos por imperialismos más vieyos o menos comenientes. Pero bono, de toes toes, dende la ciudá iraní, que dicin santa. de Qom, el sátrapa Mohammad Reza Pahlevi. recibió la fatwa del clero chiíta y dende l'esiliu parisinu, Khomeini punxo la pica en Flandes. Mas, lo que ye la vida, baltáu el tiranu ¿daveres vieno lo meyor?
Guerres y más guerres, aliñaes con petróliu y gas, la República Islámica d'Irán nun resulta un cachu del cielu (islámicu) na Tierra. Too exerciciu de poder ye servidume, cierto, y más cuando son los homes los que lu exercen, lleven toga, traxe talar o armes. Lo simpático ye que los fíos d'aquellos que naguaben pola llibertá, los heriedes de los que morrieron como cuentu risa nes llamargues salmorioses de la raya con Irak n’Abadán, son los que, nes cais, places y caleyes pidin anguaño, a glayíu de martiriu, decencia elleutoral. Probes ¿pensaben que porque tan nuna república islámico y, poro, intrísecamente bono y xusto por cumplir (dalgunes) mandes del profeta, los que gobiernen nella son santos y decentes? Munchu pidin.
Güei, como antanu col tiranu, los mesmos castronos colos mesmos métodos de tiranu. Da igual qu'agora sían "guardianes de la revolución" en cuentes del antiguu serviciu secretu del xá, la SAVAK. Da lo mesmo que manden cures en cuentes de políticos. De fecho, too ye lo mesmo porque la única relixón que manda nel coral del humano por cepillar ye siempre la mesma: l'exerciciu del poder. O, si se prefier, los santos coyones del marqués.
Los grandes homes nun mos dexen. Bramente, somos nós los que, escaeciendo, sapozámoslos nel tenebríu de Kronos. Y, d'aende, nun los sacará naide que nun sía otros homes más cuidosos de l'alcordanza d'aquéllos que, d'aquella grandes, col tiempu espurren n'imensos.
Mas, mentantu aporta esi intre venturosu del redescubrimientu de la obra fecho, lo cierto ye que la memoria del ausente nun dexa d'amenorgar baxo lluvia de povisa y indiferencia insensible. Porque, a la llarga, ye la insensibilidá, cristalizao en normalidá, lo que "te" muerre y lo que "te" mata.
En llucha pola sobrevivencia de lo que foi tan los resclavos d'una vida material que yá nun lo ye. Esos ñicios de quien coló pa otros espacios, quiciabes más xenerosos pero, dafechu, diferentes. Falo de la caxa marrono de la brúxula ausente. De la broca esfelpeyada n'espera d'un afuracaor tan ausente como les ganes d'usalu. D'esos zapatos del cuarenta y ún que naide nun va volver poner. Eses madreñes. Esa ferramienta. Esi rotulaor gastao qu'ensuchó nel tiempu d'ausencia y rindió baxo'l firme pulsu del costructor, del chapista, del vendedor de seguros...
Falo d'esos papeles yá mariellos, cola so lletra, que recuerden datos y feches y encargos y encamiento. Lletra que fala d'un caráuter, d'un corazón arrechu, d'un enfotu. Y surde la entruga que trai salmoria a los güeyos del qu'escribe y mares a los de quienes lu trataron. ¿Ú andes, amiguín?
Lo malo ye que nun solo coló l'anima del ausente. Coló tamién la so enerxía espeyada na gracia de la vida que lu arrodiaba. Les coses que lu acoyeron tamién noten l'ausencia y paecen allampiar pola presencia de quien les ponía en vida, en trabayu, en puxu. En cuentes d'ello hai silenciu. Silenciu y rampiña. Falten coses, amiguín, falten coses que, en xunto, nun valen lo que valía la to presencia. Falta esi valtu de capitán, de gallu de la quintana, de xefe en comandita. Esta visita a la to obra, barrunto que la mio cabera, amósame más tristura que davezu. Too esbarrumba. Too apigaza.
Espero que cuando la otra rueda del carru venza, la carga d'aquéllo que fuisti nun venza, tamién, lo bono de lo que dexasti.
Esti "martini" añosu nun m'afuega la pena.
Costante
Hai xente qu'alguarda redentores, señales en cielu y Tierra, camudamientos espectaculares que se traduzan en baturiciu, divilluriu, en suma, xaréu que dea anuncia al pasu d'un nuevu estáu, situación o espeutativa. Paez qu'aquello que tien d'esconsoñar, de xorrascar mentes o vezos na xente común tien de venir a toquíu de bullimientu y, por embargu, nun ye esta la norma de les coses. Los pasos evolutivos son continos, modosos y musguinos. Hai unes poques señales, discretes, y ye'l saber veles lo que fai qu'heba xente que paeza privilexao, enterao o máxico. Son les coses pequeñes les primeres n'amosar lo amosable; n'amosar el cambéu y l'entamu la costana, empruno o non. Ye la viesca bayuroso emprimando n'humilde biltu. Un exemplu val pa velo.
Por, amás de lo macroeconómico, noté la famosa crisis encarnando nel mundu real hai unos dos años, cuando xubió cinco céntimos el preciu d'un pastel saláu llamáu "napolitana" n'Alimerka. Noté que se fixo más duro cuando, ensin xubir el preciu de la mesma, pola recesión y la falta perres (estanflación), amenorgó dafechu la cantidá de relleno nes empanadielles de bonitu del mesmu supermercáu. ¡Lo que tovieremos aforrao si Alan Greenspan toviere dío a mercar empanadielles de bonito al Alimerka! Sorprendente sí que paez.
Otru exemplu tuntu. Sabemos qu'hai la falta de seguridá nes cais pero yo notélo hai muncho tiempu, na fervollante transición de los 80, un bon día en que me decaté de que los camiones repartidores de bebides refrescantes diben entoldaos dafechu. Al entamu de los años 80, pagándome la carrera de biolóxiques, trabayaba pelos branos de mancebu, ayudante de conductor-repartidor de KAS. D'aquella tovía esistía la fábrica de bebides SABECO en Porceyu y recorrí bona parte del aria central de la tierra del felechu. Aquellos camiones Ebro, de tusiente motor diésel "Perkins" y matrícula de Vitoria, diben apinaos de caxes de botellinos ensin más proteición qu'un par de cadenes pa evitar que pudiera valtar la pila caxes pol zapicar del viaxe del camión. Yera fácil garrar un botellín pero naide nun lo facía. D'aquella. Col tiempu, los robos debieron dir in crescendo porque un bon día fixéme en qu'apaecíen tolos camiones con faldones, como los percheros que monta y remana el "picaor del toru de lidia", pa evitar qu'arrampuñaren los botellinos.
Descontando al probe profesional, con puestu fixu na puerta del supermercáu o la ilesia (por cierto, la carrapotá gandaya rumano d'orixe xitano que copa anguaño'l mercáu de la caridá supón una competencia deslleal pal probe llariegu) hai que fixase nos ñicios pa descubrir cómo la probeza "vergoñante" espurre ente la clase medio.
Mientres los políticos siguen robándomos, calteniendo los sos privilexos de neoaristocracia por aciu la propaganda y l'encismamientu d'unos ciudadanos escontra los otros (ye lo que trai la basoria de la ideoloxía) grandes capes de la sociedá enfilen pa la prieta furaca de la probeza y el deseperu. Mientres la televisión (el gran hermanu orwelliano) y los SMS atochecen al personal con espeyos de collores, riqueza rápido gastando los cuartos en númberos telefónicos o concursos dignos de circu romanu, los durmientes enfilen la furaca de l'alienación.
Pero too ye tan insensible. Tan sele.
"Matrix", la matriz, la velea en forma de película mayestra de los hermanos Wachowski, habita ente nos dende hai tiempu mas nun son les máquines les que mos caten el celebru y la enerxía hasta estrincamos, non. Ye la babayada humano la que, espurriendo per dayuri, amás d'ello, invisibiliza la violencia en que vivimos. Y naide nun se decata de los ñicios.
Costante Álvarez
L'exerciciu del poder ye prestoso. Prestoso hasta que te decates de les conscuencies porque, evidente ye, lo uno trai lo otro. Si el poder ye político, pues salvar d'ello autoengañándote con aquello de que gobernar ye elexir. Sicasí, convién tener claro que'l famosu principiu democrático nun inclúi una supuesta impunidá democrático.
Hai un tiempu que tengo contautu con dalgunos negros senegaleses, los más d'ellos patéricos, a los que miro y trato de pescanciar. Tantu dolor, tanta distancia, tanta sufrencia... Como too na vida, depende del individuu el ser a estrincar les entendederes p'algamar la personal razón que subxaz na decisión de colar de casa enfrentando fame, fríu y muerte. Pero ensin querer xulgar motivos personales, nun me cai embaxo que toos me digan que vinieron porque-yos dixeron que Zapatero yera l'amigu de los negros. Bono, eso y porque, perres mediante, el serviciu mafiosu de tresporte furrula perbién nuna ex-colonia na que los negros ricos habiten castiellos franceses y los probes, munchos más, claro, cultiven les tierres del neocolonu francés y sirven les meses de los blancos nel Club Med aistiao en paradisíaca sablera senegaleso.
Supongo que Zapatero nun pué ser racista. Neto que nun lo son los patronos, los empresarios y la xente de ringu-rangu o con mandu en plaza que necesiten mano d'obra barato que module el preciu del trabayu. Como aventayáu molacín del gran poder fácticu, la nomenklatura-bancario a la que-y da les nuestres perres, tien de poner nel mercáu del trabayu material nuevo que baxe'l preciu de la unidá d'esfuerzu, arriqueciendo con ello la plusvalía del amu. Pero lo irónico ye la cantidá de muerte que produz tantu talante Zapateril en forma de tantu calabre de negru entullíu y en remueyo de salmoria atlántico, pelleyos curtíos en sal marino, desmielinizaos y con güesame rescamplante, que cuchen la gran alfombra de plancton, esa pálida sopa primixenio que soñó un día'l científicu soviéticu Oparín pa desplicar l'entamu de la vida nesti planeta de la inxusticia. 
Gracies al talante zapateril, xorra y krill gocien d'estupenda carne africano p'alimentar a merluces y caballes de Pescanova, por exemplu. Tanta muerte. Tanta sal. Tantu sol.
Gracies, Zapatitos: siempre quinxi conocer a un negru ensin salir de casa. Esto d'arrecostinar tantu muertu por obra y gracia del talante debe ser l'orixe de que-y ablancuxen yá les vidayes. Eso o que les ñeves del tiempu vienen piadoses a desfilar la negritú d'alma d'esti curiosu personax del voluntarismu gagá.
Tanta muerte. Tanta sal. Tantu sol
Tengo una opinión
Una campaña británico; de xente fartuco de propaganda evanxelisto, hai tiempu punxo a correr peles cais de Londinun, en pose provocativo y exerciciu de publicidá, una frase inxenioso, una cosa asina como que "pueque Dios nun esista, se feliz". Esta pose xustificativa, en llugar y tiempu determinao, garráronla pelos pelos los autonomaos "ateos" pa facer publicidá interesoso del ateísmu y ello por aciu de pancartes llantaes n'autobuses urbanos, primeramente en Barcelona. Otru día trataremos el totalitarismu catalán pero agora vaigamos con Dios, en MAYÚSCULES, por si nun se decatare tovía daquién.
Primero de too hai que s'entrugar por eso que llamen "Dios" pues si se niega, se pon en dulda, o s'afirma la esistencia de daqué forzoso ye saber qué ye, o pue ser, esi daqué. Nun conozo, prima facie, eso que dellos llamen Dios pues solo oyí opiniones qu'emponderen ciertes notes más o menos valoratibles, atributos maraviellosos y poderes prestosos y tarrecibles. Hai un gran ensame de lliteratura divino, muncha xente perdió, o ganó, el so tiempu cuntando lo que yera y ye Dios, lo que nun ye y lo que va a ser, Dios mediante. Paez que Dios nun ye una cosa material pero ye un padre y nós, mortales, los sos fíos pues la nuesa esistencia ye deldora de la so gracia y de los sos daos pa colos seres "inferiores". Dicin que ye amor, perdón, compasión... toes nobles pallabres, preciosos y precisos conceutos qu'espeyen un desideratum, un fin ayeno al puercu mundu en qu'esllamargamos los humanos. Frente a tantu acabamientu y mundicia álzase la lluz sobrecompensaora de Dios, lo bono ente lo meyor y lo meyor ente lo escelso. Poro, Dios paez una idea. Paez, platónicamente, una solombra espeyada na paré de la cueva de la inorancia en que sapoza l'home vulgar, corriente, común...
Paez, sicasí, que l'home modernu, sabiu en sabencia de datos y enciclopedia, aquél descuidao de lo moral y escasamente servior de lo ético, aquél otru home, digo, paez que nun esmolez por saber si Dios esiste o non pues, como presunta idea, depende del campu suxetivu en que se formula, y funda, la proposición.
Paez que negar a Dios, neto qu'afirmalu, nun paez cosa xuicioso cuando ello muévese nel campu de les creencies. Con independencia de la implicación cuántico de la creencia (ello ye, como factor de cocreación de la realidá pola que s'allampie vivir, cosa que solo furrula en términos de sutileza), dende'l puntu vista de la esistencia "grebo" en que vivi la inmensa mayoría, ye perfeutamente prescindible y irrelevante l'exerciciu de crítica, afirmación o negación de lo divino. Sacante pa los políticos, que viven de la engañifa y la demoscopia, la creencia personal nun amiesta un ren de verosimilitú a una afirmación o negación. Les creencies, insisto qu'en términos de lo grebo, son irrelevantes como fuente de lo que se quier nomar como "verdá". Too ye un xuéu de tautoloxíes, un balero exerciciu d'heurística estéril y prescindible.
Si Dios esiste, coles notes d'escelsitú y grandonismu que dicen que tien, nun necesita de la idea de Dios que-y mangue l'home pa definilu pues la so esistencia cai fuera de la comprensión humano. Si nun esiste, ¿pa qué cuestionase lo contrario? Al final trátase d'una escoyeta personal pues la esistencia, o non, de lo inefable solo se pué pescanciar dende la inefabilidá interior de caún. Fuera solo hai rux-rux, allorie,divilluriu y trafuelgu. Ta lo bono, lo malo, lo presente, lo ausente, l'amor, l'odiu... En resume, ta la vida pescanciao dicotónicamente como una inacabable fórmula matemático de ceros y unos, presente-ausente, si-non,... qu'espurre y espurre hacia lo infinito.
Bramente toos tienen razón. Nun hai Dios pues el Dios del que se fala nun ye otra cosa qu'una copia parcial de lo humano, una imaxe desformada dende'l puntu de vista de lo bonal (sía lo que sía lo bonal). Hai Dios porque solo la esistencia de Dios xustifica lo inxustificable (sía lo que sía eso que xustificar) y ello ye asina porque, sinón, habría qu'inventalu pa facer soportable esta invivible realidá humano.
En realidá, los términos de la negación o afirmación tan mal planteaos. Si pa los ateos (manda coyones nomase como non-Dios o sin-Dios cuando al dicir la pallabra Teo-Dios tas creando lo que niegues) pueque Dios nun esista y, poro, hai que ser feliz, quiciabes esi Dios del que falen nun ye otra cosa qu'una "supercadarma" social interesoso de porgüeyos mutuos con enfotu de poder. Una superestructura de poder. De poder. Poder.
El mensaxe diba ser "Pueque 'l poder nun esista, se feliz" Pero pa eso ya tan los "anarquistes" (nun tracamundiar colos "narcotizaos")
Costante Álvarez
...digo patria, pero ¿cuála? Y, por embargu, embargáu de señaldá, emociona baxo los alcuerdos de la tierra ausente. Los Sordo, moriscos espulsos del paraísu andalusí, caltienen l'arguyu y la raza de ser hispano-andalusíes nun movimientu de dignidá inteleutual porque son más españoles que los españoles masque lleven espulsaos de so casa va pa cuatrocientos años por razones probes y un rei de grandor cuestionable....
Los Sordo, ex-patriaos, nun queríen dexar de ser lo que yeren y son, andalusíes, y casaron ente ellos pa guardar l'apellíu, l'alcuñu de notoriedá, d'identidá, de resistencia pa nun esborriar raza y alcuerdos na africanidá acoyeor. "Fuimos espulsaos por una...débil razón". Ye evidente que l'home que fala a la cámara de TVE, de xuro patriarca de la familia de los Sordo, de pose netamente europeo, tiez blanco y estrañamente fuera del llugar tetuaní en que fala, embalsa agua nos claros güeyos que reprimen reproche. Porque, cunta a la cámara de televisión española, que los sos antepasaos tuvieron de cruzar, de mecer, coles esclaves que teníen p'anegratar la piel, pues munchos d'ellos morrieren nel campu... Nun lo diz, pero de xuro que munchos Sordo cayeron baxo'l racismu moru de ver cristianu en piel blanco.
Si bien miro esto con perspeutiva histórico, nun pueo evitar media sorrisa amarguxo. Aquellos nobles tardorromanos, heriedes de Tartesia y de les posteriores correríes de los pueblos xermánicos que fundieron la hispania imperial, aquéllos que dexaron xenes de pelo rubio y güeyos azules na Bética barbarizao, escoyeron la conversión al islam pa fuxir de la discriminación del musulmán en forma d'impuestos y humildación, ello ye, falta de tolerancia. Aquéllos, como'l conde Casius que devieno en Qassi pa siguir mandando, forxaron y gozaron del grandor d'Al Andalus hasta que'l rei cristiano tomó Granada y la casa d'Austria firmó la espulsión morisco. Doble discriminación pero una sola pena.
La historia ye cruel remunerando asina les decisiones de los antepasaos. Porque les coses de les creencies, les de los dioses y les de les dotrines revelaes ye lo que traen, barbarie y muerte en nome de la hermandá, la lliberación y un cielu que ganar. Y ye que los Sordo nun nacieren moros, cristianos o cretinos. Ellos nacieron humanos y de fema, como toudiós. Depués vinieron les etiquetes, les filies y les fobies. Depués vieno la barbarie y la fe, too en xunto y estrao. Si por un dios mates o muerres, amigu, tienes un gran problema. Por favor, nun me chiscar. Costante Álvarez
La medida del home son los sos ideales. La so perdición, la ideoloxía. De xuro que tamién tien idées y, cómo non, dotrina, pero ye esi borrinosu conceutu qu'implica camín de perfeción hacia un fin noble el que lu elleva perriba la mondicia y basoria emocional y material en que-y presta esllamargar.
Los "Ideales", na posguerra incivil española, yeren una marca de tabacu malo, de picadura reciclao, que permitía calecer, brevemente, a quien lo fumaba. Frente a esi caldiu fuéu en refocilu, que ye'l tabacu, son los ideales combustible de mayor altor. Pero los ideales nun se críen albentestate, nun se merquen en rastru o centru comercial: hai que los afayar dientro d'ún entrugándose por aquéllo que paga la pena facer, amar, compartir... pa meyorar la condición y calidá humanes. De tan cenciello que ye, mete miéu.
La mayor parte de la xente tien rocéa a mirase dientro. Talo diríase que nun quieren mirar a esi degorriu que paecen llevar de compañeru y que, bramente, nun lo ye porque nin ye collaciu nin demoñu. Por mangá-y un nome, aquél ye solitú y ésti, desamor. Criamos los pantasmes que mos afueguen y arreyen a esperiencies dexastroses que, producíes, fain fuerte esi desamor cristalizáo en desesperanza y acabación. Pero la realidá ye más rico que tola teoría y collacios y corninos hailos en munches manifestaciones y calidaes. No diversable del alma humano enraigona la ESPERANZA, con lletres mayúscules por si un cegaratu nun ye a velo.
L'actual crisis económica, qu'anicia nel 2006 y espampana nel 2008, ye bona oportunidá pa tracamundiar conceutos y dotrines. Toles crisis que conocí y estudié valieron pa lo mesmo y toes traxeron daqué interesante pal home. Y digo bien, pal home, non pa la Tierra y los sos serviores naturales pues pal ecosistema terrestre los homes somos alieníxenes, malura corrupio y destructivo. La crisis de la que falo nun ye nada orixinal na so sustancia porque descansa na mesma naturaleza humano. Si miramos p'atrás daqué paecío se vivió cuando 'l llamáu Imperiu Romano colapsó económicamente. Siempre ye lo mesmo: egoísmu y fuñería, y estos biltos siempre rinden la mesma collecha: probitú y desigualdá. La diferencia ente les crisis siempre ye la mesma: el gráu tenolóxicu de la dómina pero los resultaos son, tamién, iguales porque un esclavu d'hai 2.000 años nun taba meyor (o, quiciabes, sí) qu'un esclavu (perdón, quinxi dicir trabayaor) por cuenta propia o ayena d'anguaño.
L'home repite los mesmos erros una y otra vuelta porque, parezme, nun mira dientro de sigo pa esmucir d'esa suerte d'esclavitú etno-xenético que parez afogalu. Nun lo facemos meyor que cuando adorábemos al ríu Nilo, navegábemos en barcos de "totora" pel imensu océanu Pacíficu o nos matábemos na llanada d' Olduwai.
Agora, igual que siempres, solo somos porque consumimos. Sé que ye murnio descubrilo, pero asina ye. Siempres consumimos. Consumimos ideoloxía, creencies, relixones... nun importa el nome que-y demos a eses "idées", a esa "comida" que, dende FUERA, adoptamos como solución, único y verdadero, pa tener una esistencia feliz. Y agora l'adobiu d'esa comida llámase "teunoloxía de la información", "llibre-comerciu", "globalización"...
Como vemos, conceutos toos "ex-trínsecos". Trátase de vivir FUERA de casa cuando ye dientro ú tenemos la foguera que mos calecerá güesos y espíritu. ¿Quién, pudiendo, fadría llumeral albentestate pa calecer n'ivernada teniendo dientro la so casa bon llar y fornu? Dende llueu, naide "normal". Mas, lo "normal", hai tiempu que nun lo ye na casa del home.
Poro, seyamos "anormales". Vaigamos en cata los ideales que lliberarán de la sufrencia al planeta y al home, como el so arrendatariu. Fundamos nel interior de caún p'atopar aquello que, evidente, ye.
Bones Navidaes, si ello significa daqué pa daquién.
Costante Álvarez
Anden (dalgunos) funcionarios del Principéu esmolecíos por nun tener esti añu la tradicional xinta de navidá que se facía'l vienres qu'antecedía a la fiesta de la (aproximao) muerte del iviernu. Esti añu la cosa yera dar exemplu, dixeron los políticos, pues consacaba mui mal la crisis económico cola folixa de los trabayaores de l'alministración autonómico. Ta bien.
Cuando 'l yá xubiláu Juan Morales, "co-equipier" del programa de RNE "No es un día cualquiera" tuvo la feliz idea de mangar nel portal internético d'esi programa la frase que dicin que dixo'l filósofu griegu ISÓCRATES de xuro que nun sabía 'l gran favor que facía a munchos que, diciendo lo mesmu qu'aquél gran gallu de la quintana inteleutual (espero) nun teníen la verba afayaízo pa espresalo. En realidá Isócrates pronostica la muerte de la democracia y esclaria les causes d'ello.
Yo, que nun tengo les lluces d'aquél, acordio col pronósticu y tengo l'atrevencia d'amestar otra: la hipocresía. Cierto qu'ella pue considerase como pecáu "minor" pero atopo que, mire a ú mire, ye la hipocresía'l sangre de la democracia. Y mesmo que la babayez, que cuando universaliza invisibiliza, asina alcuentro a la hipocresía y a los hipócrites perfeutamente ausentes, prima facie, de la sociedá. Y, por embargu, ye aquélla, y son éstos, los que mueven los filos del poder y los sos malfadiaos daos.
Cuando trabayaba nel Serviciu Públicu d''Emplegu del Principáu, una paisanina, que llaboraba como cocinera con contratos puntuales, daba gracies a les comíes de fin de navidá del Principéu pues, gracies a ella, el restaurante La Campana, ente otros, contratábala unes selmanes enantes d'elles pa preparar el convite. Los políticos, AGORA, cuando ven les oreyes del "llubu" del non-consumu, afalen a la xente pa comprar, mercar, gastar porque, claro, ello mueve'l rabil de la gran rueda económico.
L'Alministración ye un ente gastaor, nun cría riqueza solo la distribúi. Te quita les perres y, nel meyor de los casos, inviérteles o gástales en serviciu públicu. Pa min ta nidio que'l gastar l'Alministración unes poques perres nuna comida (más bien probe, curtia y manifiestamente meyorable) ye una forma de devolver a la sociedá parte de la plata que primero arrampuña n'impuestos, tases y precios públicos, y too ello en forma de salariu de cocineres, camareros y el comeniente beneficiu industrial del empresariu. Pero la hipocresía ye la hipocresía.
En realidá les males llingües (nun tengo dulda dala de que son les meyores llingües) dicin que'l curtiu aforru de nun facer eses comides nun ye otra cosa que dirixir eses perres a pagar los dineros del plus d'ALTU CARGU que-y dan a direutores xenerales y demás gandaya político de l'Alministración del Principéu que, polo visto, quexaron porque ciertos funcionarios, pola mor del pagu de lo que se llama "carrera profesional" (cosa que vien de lo que los políticos espeyaron na llei que s'entitula "Estatutu Básicu del Emplegáu Públicu") ganaben más qu'ellos. Probinos.
Un funcionariu, por parásitu que paeza, tiróse años preparando una oposición, presentándose a ella y aprobando. Cualquier ciudadanu pué presentase si tien ganes y enfotu. Esa persona tuvo d'enfrentase con otros ciudadanos y, en base a esfuerzu y méritu personal, ganar el puestu de trabayu. Por embargu, un direutor xeneral, un conseyeru, en resume, un políticu que remana un cargu de confianza, nun algama'l puestu de trabayu por méritu o capacidá y, muncho menos, n'igualdá d'oportunidaes. Ta aende por amigu, cliente o mafiosu, vaiga usté a saber, dependiendo del partíu políticu (que son, mayormente, sociedaes mercantiles clientelares nada democrátiques) que lu encuma al puestu.
En fin, Isócrates fala del fin de la democracia por causes tan válides entóncenes como agora pero pa min que ye la hipocresía'l sangre que. perdiéndose n'hemorraxa, lleva a la democracia al cagüercu. Y, sinón, al tiempu.
Costante Álvarez
Causalidá, causalidá. Tienes el nome crudo del préstamu llatino. Acútesmos de contino, per dayuri, enantes, agora y, de xuro, mañana. Los inorantes camúdente'l nome. Los matemáticos imaxinen elegantes comprendories que t'igualen n'ecuaciones de muncha enxundia. Muncho y bono fais. Muncho amueses y pocos te pescancien. Naide nun atalante esa filera de socesos que desafueguen nel fechu que marca, dirixe, decide... Naide t'espera mas tu a toos alguardes.
Un exemplu de lo máxico.
Una persona cesa n'altu cargu. El subordináu inmediatu propón una comida y un regalu de dispidía. El regalu ye a escote, d'igualitariu repartu oneroso pero ello nun me parez xusto: nun gana lo mesmo l'aprendiz que'l xestor de riesgos. Siempre me pareció inxusto eso de repartise a iguales partes les cargues financieres pa regalos, fartures y otres cosadielles de raigañu social pues, si perres son razones nun toos tienen les mesmes a la hora de cotizar en sociedá.
Fecha la propuesta, y metíu nesi intre tontu que toos podemos tener d'avezu, digo que sí, que cunten comigo pa eso del regalu pero que de la comida de dispidida, ren de ren, que nun toi pa dixerir hipocresía. Y en casa siéntome mal por descubrime tan faltu d'autonomía pues, ¿daveres querría compartir la carga d'un regalu a un perfeuto desconocío que triplica'l sueldu de la mayor parte de los subordinaos? ¿Acasu, como políticu, nun va yá bien pago destinao notru puestu perfeutamente prescindible y a costa del contribuyente? Decido falar col inmediatu subordináu del cesáu pa dicir que non, que nun pongo un céntimu, que nin lu conocí nin lu traté y que l'amor ye cosa del roce y a esi puntu nin lu rocé nin lu golí.... más o menos. Asina qu'empobino pa "la ñocla" -l'alcuñu del puestu de trabayu del cesáu- y, ¡oh sorpresa! ¿A quién m'atopo a soles nel ascensor camín del llugar del trabayu?
Sí, asina foi: al mesmísimu cesáu. Intercambéu pallabres educaes y formales y lu dexo saludando a los antiguos subalternos. Yo voi pal despachu del subordináu inmediatu y, primero de falar con él, suena un teléfonu y oyo cómo fala con otru diciendo que'l regalu, una placa de despidida, va salir por unos .2 euros a escote pericote. Y reflexono: ¿paga la pena quedar como la gocha antona por dos euros?
La causalidá quinxo poneme nel camín que me permite quedar como un dios menor, guardame d'enemistaes y cumplir, como una oveya más, nesti suqueru que facemos de la vida. Nun tuvi d'abrir la boca pa dicir al encargau de la folixa "aende te dexo los dos euros".
Puedes, pero nun debes, dir escontra lo causal. Si lo fais, hai que pagar un preciu. Tu elixes.
Costante Álvares
Pap, negru de la negritú sah.ariano, prietu neto que'l carbón que train los reis magos a los nenos revolvicos, que vio partir cayucos camín de zapaterolandia y aportar noticies , a mamplén, de collacios afogaos na salmoria primordial, nun pescancia les causes de la cosa. La cosa llámase tar equí, n'Europa, viviendo la velea de ser refugáu pola antigua metrópoli, Francia, y perseguíu por querer vivir el sueñu francíu del tolerante Mr. Zapatero.
Msousa ye aldega mariñano y atiesta, per entemedies de pocos kilómetros, con Mauritania, la tierra de los "mauros", vg, los prietos. Non mui alló vivin los artesanos de la madera que fain tambores y chalanes. Y, mayor d'edá, tuvo l'encamienttu del pá, del xefe de la tribu de seyes muyeres y munchos hermanos. "Has dir a Europa a por perres, que tu vales muncho..." dixo l'inorante autor de los sos díes, que nun sabe de la vida muncho más que foder pa facer fíos que lu mantengan na fe musulmano. Foyar y foyar. Lo malo pa Pap ye tar estudiao, falar un francés de "restaurant" y gastar modos d'educación europeo. Por embargo, los collacios que llegaron son membrudos, bigardios, bruecos, gallonos, xente bravén que nun respeta a naide y a nada porque la vida ye duro, xente que fuxe, garra, cueye, roba, furta, merca, vende...mata si cuadra. Asina que conoz al xefe de toles mantes d'Asturies, el primer castrón d'una llarga riestra de cabrones qu'espurre hasta les mesmes sableres de Dakhar. Y Pap ta fartu. Fartu de Francia y, agora, fartu de Zapatero y la so fácil verba.
Ellí la xente diz que too ye aportar a España que, en llegando, van poder trabayar, facese ricos y voltiar al pueblu nun Renault apinao de perres y tarecos del primer mundu, esi que parez el paraísu de muhammad, pero na porcona Tierra. Asina que garró la visa y tuvo de colar pa Francia, como turista, pa trabayar y mandar perres a la tribu del paterfamilia fornicaor . Pero la Francia de Nicolás Sarkozy anguaño nun ye amable. La Europa de la especulación bursátil, los bonos-basoria y la gripe nun lo ye pa colos vieyos súbditos coloniales. Poro, garró Pap el tren pa la España tolerante vía Barcelona. Y de Barcelona a Asturies na dilixencia que "Renfe-Grandes Llínies" llama "expreso". El collaciu de Pap, que lleva n'Asturies seyes años nunca nun foi deteníu pola policía. Vieno en cayucu. Por embargu élli, que vien bien portáu, formal, con pasaporte y educáu, cayó na rede policial nel vagón de lliteres: duru destín el del formal.
Ensin papeles nun pue trabayar. Y como nun manda perres, en casa llámenlu vagu y enxencle de decisión y raigaños. Pero élli ve otra cosa. Daqué mui otro del paraísu que ven, esllumaos pola publicidá de la televisión per parabólica nel polvoréu pueblu que lu vio nacer. Curiosa esta cárcele ensin copera. Nun hai rexes pero afuega igual que la otra.
Yo nun lu invité a vinir a esta casa pero ayeri compartimos un platu garbanzos, pataques con pescao y una xarra d'agua (élli, musulmano, que yo tiré de frizzante Lambrusco) mientres la borrína esborriaba´l contornu d'un Xixón adivinable allalantrones. Cuando lu despidí díxe-ylo claro: acabes matricular na universidá de la vida: de xuro qu'esti cursu qu'elexisti ye mui duro pero, sicasí, los frutos van ser de lo meyor. El mio francés ye mui malo pero al muzu prestó-y la cosadiella
Costante Álvarez
Pues diba en cata couses y atoupei esto
http://www.scribd.com/doc/7401827/Vivi-una-bona-Vida
Ye curioso qu’una camada parásitos universitarios (nesti casu de la facultá filoloxía uvieína) invoquen el mitu de la autonomía uiversitaria pa tapar la vergoña de sufrir el reproche social polos sos propios comportamientos corporativos, gremiales y endogámicos. La cosa nun va, daveres, de si l’asturiano sí o l’asturiano non, sinon, meyor, de lluches de poder, zunes y enfotos personales, basoria pasional arreyao a nomadía personal y egoísmos idólatres. La cosa va de lo que ye, una llobada que, diciendo sirvir a la sociedá que bien la alimenta, anda a les sos deleres ayena a la sociedá.
Va tiempu, y nello acordio con Francisco Sosa Wagner nel so llibru (editorial Thomson-Civitas), que les universidaes (públiques) españoles nun son otra cosa qu’un ñeru de relaciones clientelares, corrupción y nepotismu, too ello, faltaría más, financiao con perres públiques. La d’Uviéu nun ye cosa diferente. Abasta con mirar quiénes corten el bacalláu, les castes familiares que dominen departamentos enteros, privilexos y regalíes que gocien inútiles presuntos investigaores, eméritos y demás gandaya docente y/o funcionarial. Daveres que podríemos prescindir de toa esa mierda, esa nomenklatura, esi sistema arcaizante d’indefensión. La pretendida autonomía universitaria ye un mitu que sirve a escuros intereses de naturaleza, cómo non, económica.
La tópica diz que la universidá ye un comederu. Nun voi yo dicir que non. Pero lo que nun diz la tópica ye que ye, tamién, llúriga de castronos, desafogaos y reaicionarios, españo-llistos, españo-chales y filofaciosos. Solo queden comunistonos de bocuca, isquierdosos de pose PSOEra y poca independencia de mente.
Depués de producir ellos, digo esos parásitos, l’españíu interesosu del status-quo del asturiano colo que s’anició la rempuesta social, surden voces lloramicoses de la facultá de filoloxía esmoleciendo pol “ataque a la autonomía universitaria”. Pero, daveres, la cosa nun se trata d’eso, porque lo qu’esos desafogaos invoquen ye otru conceutu en cuentes d’autonomía: impunidá. Pescánciese impunidiá nel sen de “irresponsabilidá.”, ello ye, nun tener de dar cuentes a naide cuando esi naide ye la sociedá que-ys paga y (llaceriosamente) permíte caltener el privilexu de siguir viviendo na corripia esquisito de la escelencia. A lo que parez, l’autonomía fadría que ciertos comportamientos, decisiones y fechos salgan de baldre pa quienes dicin tar baxo’l paragües universtariu. Y a la hora d’invocala toos, bonos y malos, se xunten nel mesmu enfotu defensor: tan importante y productivo ye l’inventu.
Lleo prestoso cómo un tal Fernández de Castro llora en desconsolancia, cualu escagaleráu, el ser oxetu d’amenaces escontra la so persona. Ignoro si ello ye verdá puesto que trátase d’afirmación de parte, que diría un peritu en lleis. Pero nun tien desperdiciu l’afirmación que soliña, en negrina, el periódicu que, piadosu, acueye la so pena, (El Comercio, 4/7/2008): “los ataques asturtzales contra mi....”. Una másima enerxético diz que ún recueye lo que sema, qu’atopamos en camín aquello que merecemos, que los semeyantes atráense mútuamente. Seyendo cierto, ¿acaso un asturchale nun diría n’atopu d’un españochale? La noticia diz que’l puntu diz que lo de les supuestes amenaces nun va salir de baldre a quie/quienes les fixeren. Entrúgome, inocente, ¿quién mos amparará d’actitúes como les del supuestu ofendíu?
Ye curioso cuan raudo ciertos verdugos de la llingua y cultura asturianes camuden la piel de llobu en corderu. Primero cuspien pal cielu y, darréu facelo, quexen de que’l propiu gargaxu-yos caiga en focicu. La dinámica de los victimarios ye esa la de dar pena per un lláu y, per otru, tener garrao a la víctima pel pescuezu, nun vaiga ser que fale abondo.
Nel fondo víctima y verdugu necesítense. Españolonos y asturianistonos son cares de la mesma moneda: la intolerancia.
 |
| Provided by website-hit-counters.com site. |
