L'ataque del cordobeyu pilforru

...Tienga uessa mercede por vero que vieno aquel home malu, ya con muitas ganas de facere damnu al blasson de las Astvrias, ya homes y mucheres gritanon prestamosos ya al vientu que ía malu daveres ya muita cousa vieno nos papeles de los escrividores...

Abriendo puertes...

Ciertes coses merecen un puestu nel panteón de lo bono. Por exemplu, el compromisu de xente anónimo que fai de la llingüa dalgo normal y amañoso pal so exercicu empresarial. Nun fai falta ser dioses ni, por supuesto, mártires de la causa. Trátase, cenciellamente, de ser normal. Y eso ye cosa anormal abondo, por desgracia. En menos de lo que cancia un gallu chumáu, tendremos la oficialidá afitada. Ver veremos. Demientres, xente que fai lo de la foto merez figurar nel panteón de los héroes ignotos. Sumenos, en cuentes de restar.

Qualitas liberrima

La foto del diariu EL BEBERCIO nun necesita desplicación. Podría entitulase “la mutante y la forina” pero diba dar lo mesmo como la llamar. La segunda xeneración de la monarquía hereditaria IU-era cede énte la democracia irreal de la derecha maquillada y depilada. Tempus fugit. O tempora, o mores...

Francisco Álvarez, presidente d'Asturies

Nel imaxinariu isquierdoso, el nacionalismu siempre foi daqué reaicionario. L’home tenía que baltar les barreres clasistes afitaes pola relixón y les clases dominantes. Se falaba de la llucha de clases y el trunfu del internacionalismu proletariu solidariu que diba en cata d'un centralismu democráticu. Y la cosa valió hasta que se decataron del supuestu filón de lo que se llamó “nacionalismu d’isquierdes”, cosa maravilloso que nunca nun pescancié ya que, daveres, nacionalismu y isquierdismu son términos, a priori, inmecibles. Supongo que, frente a un fácticu imposible: la universalización igualitario, yera preferible acutar una corripia territorial pa criar un paraísu comunistono, ello ye, facer xusto lo contrario de lo que se predicaba nel catecismu isquierdosu fetén, cayendo na "real-politik" que s'espeya maxistralmente nos llibros "Rebelión na corripia" o "1984" de George Orwell.

Fortunosamente, el pueblu nun ye tan babayo como presumíen los “intelestuales” del progresu hacia la nada, aquellos “nihilistes” que toreaben, y toréen tovía, de salón. Al final, como barrunté hai años, solo de lo “conservador” vien lo bono de la tierra llariego. N’Asturies, el presidente Cascos pue cagala, (errare humanun est) pero non muncho más que la mondicia socialistono y comunistono que en más de trenta años nun fixo otro qu’engordar bolsos y disfrutar privilexos burgueses. Vieyo suena, sí.

Ayer, TPA fexo un especial informativu alrodiu del nuevu presidente d’Asturies.

Supongo que pa congraciar col nuevu poder ya que, nomaos polos suciolistos, saben que-yos queda unos pocos telediarios. Mango la parte segunda.

Dicho lo cualo, punxi los vidios del reportaxe tarazaos amañosamente. Aende va la tercera

Que vos preste.

Etnocentrismu catalán

• Como munchos, pensaba qu’esti yera un pais normal, nada de paranoyes nin sitios de xente d’apriorística y duldosa estabilidá mental, como el link esti, pero non. Taba equivocáu al ver que, circulando mundu alantre, non solo los norteamericanos "wasp" discriminen al español nel territoriu estadounidense (muchos de los estaos de los USA fueron españoles y la llingua llariego yera l'español xunto coles llingues de los indios, primero de que llegaren les carretes del selvaxe home blancu británicu) sinón que, tamien, hai cierta concencia de qu'eso mesmo se fai n'España.
• Son detalles de fabaraca. En coses sencielles con conteníos ocultos. Ye como un espediente X pa Iker Jiménez y el so programa televisivo, "milenio 4". Ye como una maldición xitano, eses que te persiguin dende que naces porque un tuertu miró mal a to ma. ¿Suspicaz? ¿Babayu? Nun toi tan ciegu pa nun ver cómo "parez" qu’una quinta columna calalanera va ocupando, pasu ente pasu, estayes d’España, cosa mui evidente nos medios de comunicación, acaparaos por periodistes y falucaores d’aquelles tierres, nun movimientu que parez dicir que los únicos periodistes o comunicadores bonos son los que vienen de barcelona y más nada. Esi etnocentrismu catalaneru fai gomitivo pescanciar, a sensu contrario, la non esistencia del restu de comunidaes autónomes d'España.
• Y podía pensase que ye una tochada de mió cuando la cosa ya valió al dir caciplar nel folletu que tien la tienda sueco de muebles por montar, Ikea-España. Quería ver el catálogu on-line, y depués de calcar en "ver" mándate a una fueya n’español que, pa mio sopresa, tien maguyu ya que , masque ta n’español, cuando calques les semeyes de los catálogos unviente al catálogu en catalán. Insisto en que tas na páxina n’español porque si la quies en catalán pues elexila, pero non, una mano prieta tien acutao el link n’español pa que, por defeuto, tenga que lleer, por güevos, la versión catalana de los folletos d’Ikea. Si los quies en español, vas tener que calcar el sorrayáu “castellano”.
• ¿Va ser que ca vegada hai menos España y más cataluña?. ¿Ye eso razonable nun estáu autonómicu? Estos privilexos afalen la insolidaridá y l’egoísmu territorial. Nun siendo toos iguales ¿a qué cuentu caminar xuntos? Taifas haberemus.

Qué duro ye'l desempléu...

El llunes 20 de xunu paseaba’l perru pel Cotu de S. Nicolás, y de la que lu dexaba pacer, ocurrióseme meteme pal vieyu cuartel en que tan servicios del conceyu y del principáu, ente otros, el del serviciu asturianu de empleu, pa ver, oh dioses de la democracia, una escena chiripitifláutica: el ex-conceyal y voceres de la corripia comunistono de IU nel Aytu de Xixón, apuntándose al paru, o dalgo asemeyao, poles traces que llevaba. Vilu pelín engoladucu cola funcionaria porque, a lo qu'oyí, tenía problemes de saber cuála yera la so oficina del paru. Yera tarde, diben cerrar en media hora y dalgunos comunistonos y suciolistonos ensin cargu nin panchón acudíen, como raposos, a hores tardíegues pa que nun los vieren. “Usted no sabe con quien habla” pareciome oyer de la que miraba yo a la funcionaria con cierta sorrisa, cómo non, democrática. “Esta cara me suena” me dixi, y oyí a daquién dicir dalgo como “Churruca” o “Estrada”. Y pudi pone-y nome a la h.eta d’aquel home con cartafueyu en manu y acompañante de penes. Ye cierto que lu tenía visto, había tiempu pel Aytu en plan xérife, pero ensin pistoles nin caballu, que a lo meyor lu tenía aparcao nel parqueaderu oficial.

Solo por eso, préstame la psudodemocracia partitocrática esta. De xemes en cuando, sorpreses te da la vida. Ya lu tenemos cola tarxeta del desempléu. La cosa ye nun trabayar...

Burbuxa Inmobiliario...

Munchos son los que vienen desplicando el porqué del fostiazu económicu d'España. Entrín y non esti pais españa (gracies, fundamentalmente a los nazionalsocialistes psoeros y al gran capital apátrida y apolíticu) un collaciu fixo la torna del vidiu que vos mango. Teniendo en cuenta que ye un resume del orixinal cazurru, con el típicu humor isquierdosu y totalitariu, y que metió tiempu y trabayu de baldre pa esparder la llingua de Marirreguera, merez que-y lo mangue equí, la última corripia del inconformismu diletante psicowai, seición astur. Ars longa, vita brevis. Que vos preste esti pastu.

EL SANGRE PROPIO EN PERRES AYENES.

• Voi facer amigos. Digo.
• Coméntame una collacia qu’entrugó a ún de los funcionarios del ayuntamientu de Xixón sobre cómo taben les coses. Y el funcionariu dixo que taben acoyonaos, que, cola de xente que tienen viviendo del cuentu dende hai trenta años, y cola perda d’ayuntamientos y del gobiernu del Principáu, que nun saben ú los “colocar”, ónde los meter. Y la collacia alcordose d’un peon de de la Xunta d’Obres del Puertu, que llegó a director d’esi negociu y anda agora metíu en cargos d’úrsidos y esbardios. “¿A ú va dir esi pinín?”, entrugóme ars iocandi.
• Mas que seya vox pópuli la podrén de l’aristrocracia político, podredume que trescala tolos ámbetos de la sociedá que llamen civil (y cuido que, tamién, la militar) nun dexa de ser vergoñoso la tolerancia que s’amuesa frente a esti fecho. Parez que ye “normal” que los políticos faigan lladroniciu de les nueses perres, que mientan, roben, furten y empuerquen la meritoria llabor de ser servidor públicu. Psoe, Pp, Iu... la mesma mierda, pues sinon se beneficien del sistema, aprovéchense d'él, combalechando colos corruptos y, toos xuntos, nella refocilen y medren cualos gochos a salvu samatrín.
• Agora, nesti casu d’Asturies, los sucio-listos, anden llocos, faciéndose sangre ente ellos por ver qué cargu aguantar y cómo siguir, inmoralmente y con dudosa ética, zucando del tetu de les nueses perres, ingrates sanixueles, andancia fatal.
• Esta perda de valores nel remaneo de la cosa público ye insufrible, y lo ye tovía más cuado nun quies participar de la collecha basorial que produz esta plutocracia puzcalabre, esta partitocracia infame poblao de catavides, golfos, prescindible gandaya que fai de la política la pior espresión de la maldá humano. De la divino, yá falaremos.

Pa echar unes rises...

Esti vidiu de la plataforma por cataluña tornáronlu al asturiano de coña. Interesante reflexión, non llibre d'humor y candanga. Claro que, como tolo aparente, tamién hai más de lo que parez pues la verdá, d'esistir, ye cosa polimorfo.

Matrix, Paraísu Natural

Un collaciu punxo una breve, pero sustanciosa, reflexión nel so blog, que ya tengo ente los mios sitios más prestosos. Fala del paralelismu ente la película MATRIX y la sociedá asturiano baxo'l mandu del "faccioPSOE", que ye, tamién, otra película. Interesante reflexión que merez una visita pola llectura acertao de lo que diz y, muncho meyor, de lo que non diz. Si vos peta, visitái http://sabencianeya.blogspot.com/2011/05/interpretacion-ad-libitum-de-la-peli.html

Pilforrismu: Panem et circenses

¡Como camuden los tiempos!

Va ocho años fervollaba'l patiu asturianista con idées d'avance y ganancia, esguedayandose'l personal por algamar más y más cotes de nación. Va a ser que la cosa asturiana nun va per esos caleyos y que la realidá, amás d'inorala, hai que la caltener cuala hemorroide sabichiego. Nestes tamos y va a prestame votar en términos matemáticos, diendo a la gueta del´mínimu común múltiplu" ya que'l máximu, ye'l máximu común divisor y nun toi por dixebrar, más de lo que ya ta la cosa, el prau asturianista pues, nun hai que lo negar, hai poca pación que repartir.

Votar al menos malu, por feu que sía o gordu que caiga, va a ser lo menos malo. Ente pilforrismu sozialisto, pprismu españoliegu y asturianismu cavernicoide voi pensame lo del conceyu d'artista únicu, el del diletante. Tengo pa min que fai más quien quier que quien pué, y la fe mueve montañes. De toes formes, una vida en democracia nun da pa más de 17 votaciones y, la verdá, nun toi por perder tiempu y votos nos mesmos pilforros y pilforres del facismu asturianu, sía d'isquierdes o de dereches, que tanto monten y monten tantu.

Fascismu Islamista, martiriu Coptu

• Mientres los bienpensantes del primer mundu combalechen col facismu islámicu cola sida de la "tolerancia relixoso", los bederres islámicos asesinen a quienes nun son de la so cuerda. Nesti casu son coptos n'Exiptu, que da la casualidá de que son cristianos pero podríen ser xudíos o budhistes, daría-yos igual.
• Lo simpático ye llier cómo lo reflexen les noticies de la prensa o les telenoticies audiovisuales. Sigún elles, tolos implicaos na engarradiella son sectarios y mala xente, igualando a toos no malo, pero ignorando, arrementes y, poro, con muncha culpa, que son los facistes islámicos los que nun solo nun toleren y respeten a los cristianos (quienes sí respeten al moru) sinón que són los musulmanes los que maten a los que nun lo son.
• ¿Violencia sectaria de los coptos? Los coptos, auténtiques víctimes del facismu musulmán, son los antiguos exípcios fechos siguidores del Cristo primero de que llegara la barbarie musulmano a les tierres de los faraones y destruyera la rica cultura milenaria de los Ramsés, Tutmosis y Cleopatras, quemando palacios, iglesies y la biblioteca d'Alexandría, arrampuñando riqueza y vides de los probes exipcios. Imperialismu árabe y facismu musulmán. ¿Va a ser que naide lo ve? De fecho, la pallabra "copto" ye una deformación árabe de la pallabra orixinal que significa, "exipciu". Voltures da lleer coses como estes nun periódicu d'equí
• Fartucu toi de tantu "equidistante" y tolerancia de salón. Lo malo ye malo y nun lo fai meyor el que lo malo funda raigaños en supuestos culturalismos relixosos que nun dexen de ser nazismu y fobia pa colos que nun son de los de ellos. Con razón Hitler facía tan bones migues colos moros.
• La infamia de los tolerantes llegaría a xustificar la barbarie musulmano afirmando que ye que los coptos que se firieron coles armes de fueu de los faciosos islámicos, en realidá lo que pasó ye que los babayos coptos trompicaron coles bales que los mataron pues, probes, nun saben caminar.

¿Esclavos na Asturies del 2011?

Toi acabante lleer esti artículu sobre los nuevos esclavos económicos qu'hai n'Asturies y, la verdá, da que pensar lo que pasa mundu alantre pero, sobremanera, lo que pasa na patria del felecho, la cuala nun tá tan alloñada de la inxusticia, eso sí, paradisíaca.

Ai probe de min,

ai infelice,

apurar sielos pretendo...

VIDE: http://lavidaentrevidas.blogspot.com/2011/04/esclavos-en-las-asturias-de-oviedo-del.html

Homo consumitur sp

Val, ta bien. Somo homes coscientes y pensantes y, ésti, ye'l meyor mundu de los posibles pues, dafechu, otru nun conocemos. Polo menos, con ayuda d'esa cosciencia y pensamientu. Y too ta mui bien hasta que la esistencia humano vien a reducise, cualu ferviatu pasáu d'evaporación, a la burraya de lo económico. Asina, involucionamos d' Homo sapiens sapiens a Homo erectus gracies al aspeutu económicu del arcoxu intermediu na cadena evolutivu, l'Homo consumitur, que ye la viagra. Y xintando y bebiendo, pataca y sidra, y mercando xarrés y motos, y tamién ellectrónica de consumu-placer, y más y más coses que dicin que mueven la economía, ello ye, la pura y embrutante paradoxa cosificadora, toos vamos al traxe de maera con hipoteca pendiente y deldes que pagarán los ñetos de los ñetos. Deldes de les cuales una, l'esfarrapamientu ecolóxicu del planeta, naide podrá cobrar. Siguiendo a Einstein, d'esistir esta casa, la quinta guerra será comer o beber, lo que val dicir, malvivir. Asina que, el procesu d'esanicie de la humanidá, sigui afondando nos comportamientos y emociones humanos. Gracies a la ciencia neurótica ceu seremos neurobabayos. ¿Y cómo lo van facer?. Veamos esti cachu reportaxe:

Neurociencia, Neuropublicidá, Neuro-Sis...

Va tiempu que se fala de camudar el "modelu" productivu. Y de la "economía caltenible". Y de nueu "paradigma económicu". Cuentos y más cuentos. El motor de la perdición ye'l consumu, pero en cuentes d'ello, vese el consumu como motor de progresu. Pero si progresar ye avanzar, hai que tener claro que se pué avanzar tanto p'alantre como p'atrás. ¿A ú vamos consumiendo? Al cagüercu, cierto. Esti anunciu ye simpático. Mientres la moza gloria nel hotel el otru, nel mesmu hotel, disgustáu, golpéase y encabrona renunciando a vivir el agora PORQUE LA MOZA CONSIGUIOLO MÁS ARREGLAO. ¿Será babayu?. El mui tuntu nun se decata de que, masque pagare caro l'alcoba del hotel ¿encabronándose va a facer que-y devuelvan les perres? N'HOME NON. ¿Entós? Sal a vivir la vida y a pasalo bien nel hotel, ¡¡¡¡BABAYUUUU!!!

BASORIA CHINO

Perru en güesos, pulgues y duviesos.... Diome por dir en cata d’un auricular barato a un atroxaderu chinolandés, y atopelu por 75 céntimos: una mala copia de “Sony”, pero que furrula si curies de cantesar, con cinta pellizo, la unión de cada cable colos respeutivos casquiellos del amplificador de voz. Interesante. Y de la que pasaba per un estante atacao de chirimbolos, reparé nun montonín de máquines d’afaitar refugables. Yeren 5 unidaes por 55 centavos. Garreles y pa casa.

Pela mañana, afaitase con aquello yera morrer. Escuso dicir qu’aquello yera como tentar corase ún con un zapatu. Hasta mercromina, tuvi de poner na sotabarba. Y, claro, ye que, como diz la copla, pocu dineru, poco menéu. Pero ye que nel supermercáu MERCADONA tienen bonísimes refugables, en númberu de 10, por 80 céntimos.

Aprendí la lleción. ¿China? Chatarra, basoria barato qu’igua l’allampie de coses que tienen quienes, aparentemente, nun puén espurrir perres o intelixencia. Pues los chinos son una mala copia del know-how xaponés. Falta-yos la ética sintoísta d’éstos, sóbrado-yos la dictadura del “too val p’arriquecer” vendiendo basoria.

Nel mio calderu de basoria pararon les maquinielles d’afaitar. Deus gratia. Ya lo dixo aquél, na película LA ISLLA....

I ANDECHA MUSICAL - AUDIOS DE 1978

Mángovos l’enllaz a un blogue d’un collaciu “alteréguicu” que manga pequeños videos na rede, a mou de pingarates nel café de la vida. Nesti casu, punxo los cancios de la Primer (y pémeque, única) ANDECHA MUSICAL ASTUR, del 14 de xineru de 1978. Como documentu históricu val muncho, como calidá de grabación poco pero ello ya se diz. Amás, hai dalgún comentariu prestosu sobre la época en que se fexo la grabación. Recomendable dir a velo, y, sobremanera, oyelo.

El blogue ye PINGARATES DE SABENCIA, y los audios entamen nel númberu 1 de l'ANDECHA MUSICAL, espurriéndose hasta la entrega 12, sinón enquivoco. Que vos preste

Vieyera Planificao o el cuentu la bona pipa

AEG Electrolux. Fecho pa tirar, darréu comprar.

 Ún de los mitos de la eficiencia, de la calidá, de lo bonable, ye'l productu de manufechura alemano. Pero, claro, como tantos mitos, magar qu'hebio un tiempu qu'ello foi verdá, muncho llovió d'aquello. Agora, los alemanes, polo menos dalgunos de los sos cimeros representantes de bienes de consumu, lo que facturen ye basoria con fecha de caducidá mui evidente.

Hai seis meses tuvi de desfaceme d'una ensuchaora-centrifugaora de ropa, de la casa AEG. El motor furrulaba perbién pero la chapa yera un papel de fumar qu'enroñó mui ceo, y el plásticu que cerraba'l tubu perenriba, la zona de carga, yera una película plásticu too desfecho. La secadora yera AEG, el motor eléctricu tien la so marca, pero el cuerpu del aparatu ponía, Thomson. Cabe pensar que se trataba d'una forma más barato del orixinal, una marca "blanco" d'AEG. Desmonté la chatarra y conservé'l tambor, d'aceru inoxidable, xunto col motor. Y fui a comprar otra ensuchaora.

 Atopé una igual que la que tuvi de tirar, pero de marca AEG. Yera cuspía a la vieya. Como ésta tenía la marca AEG claramente puesto, pensé que diba ser de más calidá que la otra, la Thomson, que debía ser una copia malo y barato pa mercaos tercermundistes. Pero vaya patinazu.

 

La ensuchaora AEG ye igual de malo que la otra. Tien los plásticos superfinos, y la chapa fierro del gordor d'un cachu papel aluminiu Albal. Costó 200 l'euros y dempués de 6 meses, ya fendieron los plásticos. La máquina tien un tratu exquisito: nun hai nenos que xueguen con ella. Mángovos les fotos pa que sepais lo que ye la obsolescencia planificao, ello ye, fecho pa tirar darreu compralo. Porque, ya que'l motor ye bono, y dura más de lo que se quier, estos alemanonos atuñen na calidá de la chapa, pa qu'enferruñe más llueo, y nel gordor de los plásticos, pa que frayen, tamién, más ceo. Al final, a los seis meses, tienes de desfacete de la máquina sinón quies tirar de cinta aislante pa axurar la tapa de plásticu, y protexer los entamos de ferruñu.

¿Máquina alemano? Non, gracies. Pa eso, prefiérola chino, que ya sé que ye una mierda pero, pol preciu alemán, compro cinco, que me van dar igual, o meyor, serviciu.

Raros, Disidentes y Hetero...

Toi acabante lleer esti llibru de RAROS, DISIDENTES Y HETERODOXOS. Pa un playu, ye un placer facer alcordanza de coses qu’apaecen na memoria de los vieyos, o de les que se tienen tracamundiaes na tenyera interior, pola mor los pocos años de conocencia de cuando asocedieron. Talo me pasa cola muerte de Rambal, ún de los misterios menos misteriosos que conozo. El llibru de Pachi Poncela, al rodiu d’esti personax de Cimavilla, esclaria lo esclariable. Pa min, que la españa nacionalsindicalista guarda munchu polvu nes alfombres de la historia, nesti casu de Xixón, y que munchu poder teníen, y tienen, dalgunos gallos de la quintana que, daquella, nun réxime d’emponderamientu de la raza y la virilidá fascioso, nun pescanciaba lo muncho manflorito qu’había nos raciales enfotos imperiales. Magar el tiempu pasáu, o la prescripción delictivo, h.ode muncho el qu’un maricón d’altu copete, munchu nome o meyor fortuna, puea matar impunemente a un guaperes, pero escelente persona, como Rambal.

 Llibru pa pasalo bien y alcordase d’otros tiempos y esmolecimientos.

L'Asturianu que vien...

e Toi acabante lleer l’intresante llibru de Ramón d’Andrés, L’ASTURIANU QUE VIEN.

Interesante porque va tiempu que naguaba por una especie de “llibru d’estilu”, dalgo que punxera finxos nel camín cotidianu d’escribir la llingua. Lo meyor del llibru ye’l rigor al que mos tien avezao l’autor, esi metasentimientu de cercanía y averamientu al llector, alloñao de la falsa erudición que suel acompangar a quien, dende’l ringurrango quier afitar verdaes axiomátiques. Dafechu que lu recomiendo. Facía falta.

Amás de lo evidente...

Depués de mangar un nuevu cuentín nel blog A ESCURES LLITERARIU, un cuentu ambientáu na guerra fría y nos espíes de cartón-piedra, pues, como vos digo, fecho ello, dame un baltu en coral al ver un anunciu del istitutu asturianu de riesgos llaborales, fecho multillingue.

En Rumanu, en Chinu mandarín, moru clásicu y cazurriano. Pero n'asturianu, ren de ren.

Son coses del grandor nazionalsozialista asturiano. Quieren abelluganos, protexemos, d'esi virus corrupiu, pior que la gripe-A (la del gochu mexicanu).

Pues eso. Un propiu del llugar, tuvo a bien mangar nel anunciu cazurril la torna al asturianu, faciendo inxenioso bricolax. ¿Va ser por falta perres?

Diz un propiu del istitutu que tienen tantes que fain comides y reparten bolígrafos como cuentu risa, que les perres haii que les gastar primero d'acabar el períodu presupuestariu, que sinón, nun vienen mas. Desafuegu tienen, sí.

Son como nenos, pero coles nuestres perres.

La cara del facismu la tien pequeña, pero llarga la manu. Si esapaez la semeya son ellos: los malos malísimos nazionalsozialistos.

Escuchar. Escuchái

Veo, y lleo, a xente que se siente pelín fartuco de la vida. O que, cenciellamente, col colar de los años sientense dir “per camín contrario al restu”. Esi restu pué nomase “oveyada” ensin querer con ello minusvalorar el pertenecer a la oveyada ya que pertenecer, o non, a esi exércitu ye dalgo llícito y/o prestoso, según comeniencia personal. En realidá trátase d’afitar la posible esistencia dicotómica ente durmientes y esconsoñaos, ente oveyada y solitarios. Poro, xulgo comeniente esta dixebra pa pescanciamos.

 

LA IMPORTANCIA D'ESCUCHAR

 Parezme claro entender que vivimos nun mundu nel que nun escosa eso que se llama “información” Pero, por embargu y magar ello, tanta información hai, tantu desinformáu vivi. Diríase qu’eso que llamen “información” ye neto qu’agua de lluvia qu’esmuz pierna abaxo na ducha de la vida. ¿Por qué ye asina? Parez cenciella la rempuesta: PORQUE, ente otres coses,  LA XENTE NUN SE PERMITE ESCUCHAR.

 La xente ói, pero les más les veces nun escucha. Nada malo ye eso pues se pué vivir namái oyendo. Sicasí, cuando’l ruxíu esterior empata col allampie interior por pescanciar la esistencia propia surde esa necesidá d’escuchar. Escuchar, bramente, ye l’enfotu interior de dixebrar biltu de paya no que se oi. Pero ye cosa necesario comprender qu’aquello que calma la sede de conocer qué ye, y cómo furrula la esistencia, ye material delicao, intanxible y, sobremanera, sutil. Poro, un oyíu grebo nun captará aquello que, en sutileza, se diga. Y podría ún entrugase: ¿qué ye un oyíu grebu?

Un oyíu grebu, bastu si se prefier, ye aquél que, dafechu, nun ta a la escucha sinón al discutiniu. Aquél que namái ói y que ta, nel meyor de los casos, al, o nel, discutiniu interior. O, lo que ye lo mesmo, aquél que nun se permite escuchar. Y la pregunta que surde de sotrucu ye la siguiente: ¿Tan bono ye permitise escuchar? Sí, ye la rempuesta.

 El permitise escuchar ye bono por sigo mesmo pues abri la puerta al entamu de la sensibilización personal. Y ye que, por escuchar, naide embabaya, naide s’obliga a dalgo. Escuchando se pue percibir aquello que, de non facelo, perdería. Pero escuchar ye cosa delicao porque, como diximos, ello ta dafechu tracamundiao col discutiniu costante que se forma, nel interior del home, respeutu aquello que s’escucha. 

 Non escuchando, ello ye, nun permitiéndose sensibilizase pa cola esistencia qu’ún tien, ¿cómo se tratará la vida? La rempuesta nos llevaría pel camín de la calidá de la esistencia de nueso y a un exemplu que punxi nel mio llibru “Mann-U-Mittu”. La rempuesta ye que se trata la vida ensin sensibilidá, ensin calidá de vida.

ALTIUS, FORTIUS, CITIUS...

Mientres elles busquen lo meyor de tolos posibles, ellos esmolecen pol tamañu. Y ye que les muyeres, sigún los homes, claro, tienenlo tamién mui claro. Vamos, que muncho muncho claro. El tamañu importa. Y, sinón, mirai el vidiu que mango darréu:

 

 

Esperando que se disculpe la falta de sincronía, masque ye un cachu anunciu d'un aparatu espurreminga, la cosa tien miga. A pocu qu'ún sía observador vese que, por mui seriuca que se ponga la moza, al final hai un soterráneu biecu de groma y coña. Óise una cosa, dafechu, pero la faz de la neña diz otra. Y ye que la cosa trátase de vender. Vender una falsura a preciu de... ¿verdura? N'home, non, de verdá. Eso ye.

 

Amás, pa nun perdese per Babia, si fuera cierto eso del grandor, del gordor o del llargor, Darwin asegura qu'esa seleición fenotípica que fadríen les femes diendo en cata del machu más armáu acabaría con una polación masculino de mingues del copón. Mas, por embargu y mui a la escontra, veo a munchu pinchu esmolecer por carente, más que por abondoso. Poro, una de dos: o nun furrula la seleición "natural" o ye que eso de les preferencies tien muncho más de mitu de lo que parez.

 

Bono, val. Va a salime perende un Lamarckista a dicime que nun s'hereden eses manifestaciones fenotípiques, que lo que val son los xenes. El neodarwinismu diz otra cosa y pueque lo uno reflexe lo fondero d'un xenoma heredable. Sicasí, parez que lo importante, nun s'engañar, ye usar la ferramienta, dicin elles.

Recomiendo la llectura del llibru "El cerebru femenín" de Louann Brizendine  pa desfecer entuertos d'esti tipu. Digo del tipu de qué ye lo que quieren elles pero que, daveres, se trata de lo que quieren los homes. ¿O ye al revés?

 

Y más nada.

Cuontos dell'Veranniu

Mariqía, "Chuma", de Casumieira

 Nu'avvería muichum que dicire si fuera vox populi lla vida de Mariqía de Casumieira, "Chuma", pero num ía ansina. Poro, llos que num ll'aconozam tem de savvere que num ía, sautamenti, llo que parez a simples vistas. Ún aspera muchere formal pero atoupa 'm varracu co faldetu ia fama de bruixa. Mas tudo isto seiría para prau sinum toviere asocedíu llo de lla vaca d'Antóun.

 Aqueichi ome ía persoa formal, digamos d'aqueichos cuiraores de lla sua casa ia padremuniu, cuolu reciveira por irenza de suou padre, Antóun "de llas voiras", fichu carnale llonxaunu dell'antigu gonde Gaso'eiru, desformáu alcuniu que lli vienou de posedere lla única gasoleira de tudo vache por conceisón dell goveirnu. Lla cousa ía qu'Antóun tía úa vaca que namai paría xatus culois, úa maravía que diva perdere por mal enxitu cuondou descuvríu que llo xatu que vía aqueicha vuolta facíallo de pernas. Lloucu por aqueichu, foi em cata de queim llo aidaira mais nu'atoupou a naide co conocencia avondu para eicho. 'M reichampiu de claror lli trouxo a lla melouta que lla Chuma, mucher depois tudo, savvería aidar a lla vaca. Voi para co eicha ia dixolli, afalacando oureicha:

 - Lla tua feremosura somenti iguala co lla túa conocencia nas cousas de mucheres. Ia you teo úa, mais qu'ía em vaca. ¿Poderías aidaime? Llo enxitu veim de pernas ia vai mourreime sinom si fai daquéi. Si m'aidas, por cuartos num queidairái, dafeitu digo.

 Chuma ía pouco cumplimenteira mais num disprezava llas perras. Foi c'ome depois de garrare venti dineirus, a mitade de llos cuorenta que pidíu, llo razonavle num travachu d'enxitu.

 

Ía veridavle llo que dixere Antóun. Llo xatu vinía de pernas ia vaca sufería muichum. Num tía medios para úa cesária, cousa que num savvía si se podería fazere em vacas, ansina que lli dixo a'll ome:

 - Cuorenta dineirus nu'avasta para llo llavor pero sí para qu'elixas llo que queres guardare. Xatu ou vaca. Outra cousa ía perdere llos dous vieimes.

 Llo ome num contentou co aqueichu. Eichi dovelaría as perras si Chuma salvara tudo. Ia ainda trivlicaríallo perestosu si tudo fuere co veim. Depois de tudo saicava aqueicho veim folgadementi co llos frutos de lla vaca.

 "Sía" dixo Chuma y aceutou llo trivle de lla suma perras acondadas. Tiróu de ferviatus y depois de cuotru horas vaca y xatu tavam vivos. Ia lla hora de covrar, llo ome reculóu en llo dicho. "De trivle, nada", espetóulli, pois aqueichi travachu nu'llo meritava: llo méritu, d'avvello, ía de llas plantas, num de lla savenza de lla muchere. Y de dovelar llos cuorenta dineirus ainda menos pois tameim travachare lla vaca nu' asuntu ia avvería qu'avaluare aqueicho. Apurriríalli llos venti dineirus que faltavan ia diva veim pagada, dixo.

 Chuma num gurugutou un res. Garróu llo corón que siempres chevava a llo cintu ia co dous golpes esgargolóu llos animais. 'M veiendo aqueichu, llo ome punxo lloucu, ia ainda mais fincóu cuondu lla muchere lli dixo que guardare llos venti dineirus que lli adeldava pois co llos venti que lli diere primeiru tenía avondu para afilare llo corón qu'usare para aqueichu. Y que, depois de fexo llu coraría gratis sinón pagavalli po llo que xulgava valía lla sou vida: cuotru vacas y dous xatus. Ia sacandu lla pedra d'afilare de lla fardela, punxo a iguare llo corón.

 Mais que lloucu, llo ome pagóu tudos llos dineirus.

Ia ía que Chuma ía muicham Chuma. Muicham muchere para ome de tam pouca pallavra.

Alderique d'Andariques

Sigo, prestosu, dalgunos alderiques que veo pela rede. Normalmente s'entamen ente durmientes, y atópolos faltos del fondor esperable ente presuntos adultos qu'escuenden tres ordenadores, xente con cierta vida vivío y esperiencia vario. Grande error, pola mio parte, esperar  cosa dixebrada d'esos durmiyosos. Masque nun soi quien pa xulgar saberes y dicires de xente circustancialmente anónimo, sí veo lo difícil que ye entamar, y siguir alderiques con xente que nun tien claro conceutos básicos, que fala d'oyíes o qu'afita verdaes que crée, que solo cree, pero que nun sabe. Y ye que, eso de tener la verdá n'esclusiva ye un deporte (nun se pue dicir otra cosa cuando nun se tien otres entendederes) mui espurríu ente munchos humanos. Selo porque tamién fui d'ellos. Durmiente, digo.

 

N'otres cultures, nel curriculum académicu, hai interesantes exercicios formativos que revivin el vieyu arte de la oratoria clásico. La cultura de la "disputatio" aplicada a la mauración de la personalidá crítico ye cosa interesante na casa del home pues, animales socioculturales, ello ye, de cultivu social, comeniente ye someter a crítica sano tolos productos humanos pa poder dixebrar paya de biltu. Masque, ye evidente, que de la "disputatio" nun tien porqué surdir una verdá (normalmente solo sal l'habilidá pa tapecela o vistila d'un mou amañoso y en porgüeyu de quien defende una postura suxeta a crítica) nun lo ye menos que'l músculu que cría 'l so exerciciu ye cosa valoratible y, a vueltes, granible cuando tamién ye evidente que nel caminar del home (sacante qu'ún vaiga pel camín del anacoreta) se van a atopar pilancos que dirimir en sana discusión con otros. Nun sé cómo lo dicir ensin que los durmientes s'ofendan pero lo cierto ye que la conclusión que me produz esperimentar el viaxe per foros y corripies d'opinión ye que na rede atopo poca xente que sepa "falar", escribir lo que fala o espresalo con coherencia porque parez que na tenyera-y añera la forgaya d'una vida brutalmente dixebrada del entendimientu, vida prisionero de la tópica valero, de la comeniencia incosciente o d'opinioes ayenes que nun se metabolicen cola crítica propio.

 

Duros tiempos, estos del XXI,  pa la oratoria. Duros, pa la "disputatio" costuctivo. Duros, pa la conviviencia. Mas, si bien se camienta ¿van ser bramente duros? Cierto que'l mundu técnicu de la rede Internet, la cultura visual de xuegos virtuales y realidaes televisives, l'alienación nes relaciones interculturales y personales parez dexar amenorgáu espaciu pa la conversación fondero, la reflesión agudo y la busca de la muncha o poca verdá ínsito en toa afirmación. Cierto que la xente parez arrezquilar les intelixencies nun movimientu que, más que d'atuñáu, lo ye de babayez. Cierto que la falta de conocencia, ello ye, educación y entendederes culturales, arrequexa a la mayoría de la polación humano a la corripia de les oveyes (el famosu "silenciu de los corderinos" camín del mataderu). Too ello mui cierto, sí. Pero, por si dalgún lo quier ver en cosolancia, nun lo ye  menos que, na historia de la casa del home, siempre fueron asina les coses. Si lo espresamos en términos ecolóxicos, socialmene los humanos formamos una pirámide neto que la trófica, una pirámide na que la pastia humano decanta, n'ascensión vertical,  en "clases" sociales y éstes posen, pasu ente pasu, en grados de binomios predador-presa de progresiva eficacia y eficiencia hasta que se llega al altor, al picalín piramidal, ú reinen los grandes predadores sociales. Y nesti exemplu ye fácilmente pescanciable qu'una pirámide necesita una gran base de pininos sobre la qu'encumar unos pocos "sensatos".

 

Poro, masque presta lleer y opinar en dalgunos alderiques alrodiu la llibertá, inmi y emigrantes, la política de la cobardía acomodaticio socialisto, la intolerancia facciomusulmana, les dictadures  (bones o males sigún la tintura qu'amuesen los falucaores), la corrupción... y tantos y tantos otros temes qu'estren la rede, acabes pescanciando que too ello nun ye otra cosa que xuéu d'andariques, xuéu de formigues, d'ácaros microscópicos que s'engarren nel inmensu corpus del gran predador al que malpenes fadien. Gran predador que los tolera porque cumplen el so papel ecolóxicu na escala social na que mueven y a la que pertenecen por prisión incosciente. Esi submundu ye'l que paga los impuestos y regalíes, tributos y hipoteques; el que paga, cola perda de la curtia vida propia que tien, la bona vida que se vivi nel picalín de la pirámide. Mientres andariques, o ácaros, neto que los dos moros camín de la Meca que montaron discutiniu sobre si los perros que diben comelos yeren galgos o podencos, vivin afogaos na tópica de la opinión y la esistencia, los del picalín pigacen pacetibles.

Cuanto más altu teas, l'aire tará más nidio, pueque meyor vas ver la puesta de sol y'l finxu'l cielu espurrirá más llueñe. Too son ventaxes.

 

Ya se sabi: la mierda va p'abaxo. Y, casi siempre, flota.

Cuentos de pel Branu 2010

Dende hai un tiempu, razonablemente curtiu, per estes feches mango un cuentín n'Internet. Normalmente ye un trabayu cenciello y ensin otru enfotu que pasar el tiempu. Si con ello daquién reflesionaba al rodiu la esistencia humano, meyor que meyor. Pero esta vuelta voi rascuñar dalgo neses fondures que la ciencia diz nun ver pero que, por embargu, esmolecen a munchos magar creyan, namái dacuando, nesa relixón. Van ser pallabres de mio, cierto, pero la sabencia qu'hebia nelles, non. Tómola emprestada d'otros homes, d'otres almes, d'otros seres que, al fin, tamién soi yo. Y, tamién, vosotros.

LA FONDURA DE LA SABLERA

Nun s'enquivocar. Esto, equí y agora, fálase en fondura. Ye como les agües de los mares. Veamos.

Nesti tiempu d'estíu, les persones van a les sableres y tumben na so superficie, ello ye, permanecen per elles ensin otru enfotu que la estética del doráu que producirá'l sol sobre la piel lo cualo, en sigo mesmo, nun ye nin bono nin malo: solo un comportamientu superficial. Esti vezu nin siquier tien que concasar colo que se necesita o ye sano pues se sabi que'l sol, pal home, ye bono según la dosis de radiación que se tome, mas d'ello nun se cuida.

Sicasí, lo importante pa quien vivi nesa superficialidá ye'l tonu que garrará la piel pola esposición al sol ya que la mente fixa l'atención, como muncho, na costruición estético que tien muncho de ver col mercantilismu d'una industria de la guapura. Asina, aneciando incoscientemente nun comportamientu cuasi automáticu, esi vezu de la xente s'espeya, ente otres coses y causes, na compra de productos, ente ellos los amañosos p'algamar el tonu deseáu col menor riesgu; en mantener una piel, normalmente sano, hidratao y protexío de lo que nun se ve como una agresión sinón como un bien deseyable. Too ello, bramente, nun ye otra cosa que la vida pescanciada na superficialidá de la esistencia. Pero ¿a qué cuentu falar de superficialidá nesta consideración d'un comportamientu humanu habitual? Nun se trata de fadiar o fuñir, de menospreciar esi vezu sinón de sometelu a curtia reflesión.

La superficialidá de la que se fala equí añera na falta de consideración pa colo muncho de lo que mos arrodia nesi paisaxe braniegu que se cita. Por exemplu, pa col sol que, como muncho, se subsume nel esmolecimientu por ponemos la crema comercial que mos abellugará de la so aición y dará bon tiñe. O pa cola sable, na que espurriremos prestosos y que, como muncho, valoraráse como tumbona axeitoso o amañosu basureru en que dexar los resclavos del consumismu. Y si siguimos l'aición desendolcando'l filu de la comprendoria, veremos que la xente, na euforia de la superficialidá, calecío pola esposición al sol, se llanzará, pa enfrescar, nes agües d'una mar que, neto que la sablera o el sol, tampoco considerará.

Nun considerará esa xente que ye posible nalar y flotar na superficie de la mar gracies a munchos factores de la esistencia (tanto suxetivos como oxetivos) qu'esisten pa qu'ello seya asina. Poro, nel estrafullar, esbaticuayar o charlcoletiar d'eses agües, nel dir y venir, flotar o xugar ¿qué ye lo que se pescanciará?, ¿qué se valorará? Bramente, solo la superficialidá d'unes agües que se glorien nesi determináu intre. Y, por embargu: ¿eses agües tienen solo superficie o tan calteníes pol fondor de la mar?

Dixebremos, pues, que mentantu los dumientes vivin o mueven na superficie (consideramos les agües) de los mares nun se decaten de qu'eses espurríes superficies que glorien, y que tanta folixa y xinta dan, dafechu tan sofitaes pola fondura qu'hai embaxo d'elles  pues ¿podría haber un mar que tuviera solo superficie? Parez claro que ye'l fondor el que percontia a la superficie en cuentes de ser tolo contrario.

Valoremos, pues, esti comportamientu que nun ye otro que la desconsideración. Con ella, la xente se baña. Con ella, camina les sableres. Con ella, entiña la piel al sol. Con desconsideración. Pero ¿qué pasaría si el mar, hipotéticamente, se volviera, tamién, desconsideráu? ¿Y si lo fixera'l sol? ¿Qué sería, entós, lo importante, la consideración o la desconsideración?

N'inocencia d'espíritu y sanidá d'enfotu, xulgo qu'una de les coses más importantes de la esistencia humano ye "'el considerar". Considerar la importancia de dir, de tar, de caltener y valorar la fondura. El vivir nel fondor o dende'l fondor. Criar caún, en sigo mesmu, la introspección puesto que la fundura sal de lo que na superficie se manifiesta.

Y más nada, por agora.

æstiva tempora reflectio

De la qu'oyo, allalantrones, nel xuneteru cielu de Xixón, el runfar de máquines de guerra, camiento no paradóxico de dellos aspeutos de la esistencia. Por exemplu, si faláremos d'un sistema políticu de raigañu nepóticu, factualmente aristocráticu, con barniz formalmente socializante pero realmente dictatorial, describiríemos un sistema de gobiernu pocu acoyedor pal expoxigue de la llibertá personal y comunitario. Mas, por embargu, munchos son los que refocilen felices nesi sistema, llibres de cuidaos o pruyimientos, sinón sacando porgüeyu d'ello. Almitamos que nada ye perfeuto y, poro, too ye meyorable. Almitamos que lo meyor ye falar de lo qu'hai en cuentes de lo que podría haber, y ello non porque nun sía deseyable teorizar un mundu bono sinón porque, a estes altures de la historia humano, hai abondos mundos teóricos perfeutos por facer y nengún d'ellos operativu. Almitamos que daqué nun furrula tan bien equí, y agora. Almitamos que tanta ideoloxía anubre les entendederes; que tanta artificiosa dixebra mental nun trai otro que mala dixebra social. Qu'otru mundu ye posible. Y, claro, otra Asturies, tamién. Pero, pero, pero...

Neto qu'un pexe nun estrema ente l'agua y la so vida, asina, quien vivi o sobrevivi nun sistema del que saca porgüeyos nun ve nada malo no que cinca a los privilexos qu'algama dientru d'esi sistema. Y ello porque, nun conociendo otru, "ye normal". Poro, son los escluyíos d'un mundu los que, bramente, lu valoren, xulguen y puen, si son a ello, cuestionalu pa lu meyorar. Pero ye duro pa un pexe vivir fuera del agua magar la muncha concencia que puea tener de que l'agua na que vivi (o na que-y obliguen a vivir) nun ye tan potable como parez.

Veo qu'a la mayor parte de  xente que m'arrodia-y abasta colo que seríen, falando poéticamente, migayes de felicidá. Visto asina, forzoso ye reconocer que nun pagaría la pena desengañalos d'esa realidá remuneraora pues, sinón conocen otra cosa pa qué -y por qué- enfotar n'amosa-y la real posibilidá de vivir una meyor, y mayor, plenitú esistencial. Plantear eso llévame a una contradición interna. Contradición puesto que perbien pescancio que toa realidá personal o social tien un componente causal direuto pa cola persona que la vivi pues esa, y non otra, ye la realidá necesario pa qu'adeprenda aquello que tenga d'adeprender. Y esta causalidá -parcialmente asimilabe al conceutu de lo que se conoz como "karma" na tradición budhista- parez inevitable. Y si lo ye ¿por qué esmolecer por meyorar el mundu? La entruga, descuidái, nun ye tan inocente y la rempuesta solo la tenéis vós.

Sinceramente, almiro a quien sabi lo que quier. A quien tien les coses clares. A quien conoz, a costafecha, el camín que sigui. Almiro profundamente, por exemplu, al soldáu que garra l'arma que matará pola patria que defende, al brouker que ganará pasta marafundiando les perres d'otros, al políticu qu'arriquecerá engañando al pueblu que diz representar. Almiro lo bien fecho que ta esta obra teatru que ye'l mundu, na que caún cumple un importante papel que tien más d'hipócrita (nel sen más cabosu de la pallabra griega de la que deriva) que d'hérue. Almiro lo necesario que parez el dolor nesa obra teatru pa que munchos actores adeprendan lo inútil del papel que representen nesa vida que, bramente, nun ye la de so. Almiro tanto esti artificiu que nun puedo dicir otro que: olé los coyones de quien texó tan bon pañu. Mas, lo que nun tengo tan claro ye si el vestíu que dellos fain con él paga la pena ponelu.

Y, como siempre, la esperiencia ye personal. Nun ye por restolar.

Costante Alvarez

Mann-U-Mittu n'EL COMERCIO de Xixón

L'Editor, que pon perres y tiempu, nuna misión impagable d'esparder la llingua, lo cualo merez pública reconocencia, facilitome la entrevista con E.Carballeira. Lo irónico ye que foi pa salir n'ALITAR ASTURIES, la seición que creamos y dirixí, de baldre,  gracies al trabayu de Conceyu Bable Xixón y el compromisu d'esi gran gallegu que foi el direutor de EL COMERCIO, D. Carantoña Dubert. Y ye que son los de fuera los que, a vueltes, valoren más lo de casa d'ún. Lo dixo'l llatín: NEMO PROPHETA IN PATRIA SUA.  Mango la foto de la entrevista. Quien la quiera lleer, puede calcar na imaxe y espero que s'abra cola resolución amañoso, y si non fuera abondo, podría xubir la entrevista en textu.

Alcordances y Adioses

Ellos un día enfotaron no etenro. Fixeron lo propio. Encadarmaron no afayaízo. Y la materia muerto encarnó n'alcordances y adioses. Y cierto fue que los adioses fueron pequeños y les 'alcordances inmenses. Ye lo que trai la vida: persistencia na materia y duelgu-amor n'alma.

Presentación de la novela MANN-U-MITTU

El prósimu 14 de xunu del corriente, a les 19 hores, la editorial UNIVERSOS va a presentar n’Uviéu, na sé del Club de Prensa Asturiana  la novela “MANN-U-MITTU Lliendes de l’Asturies Primera”.  

Llunes. Bon tiempu. Sol y pación en práu. Pueque nun vaiga naide. Yo, si ta pa bigubañu, eso de dir voi pensalo despacino.

Por fin MANN-U-MITTU saldrá en llibru

Hai más de quince años d'un día de sol, un sábadu, que me vieno a la mente la plasmante y vaga idea d'una hestoria mítica de l'Asturies Primera, tan real y plausible como toles idées que se mueven nel campu de posibilidaes de la esistencia (humano o divino). D'aquella internet yera cosa esquisito, cosa de llistes de corréu (como astur-llist), mundu universitariu (grupos de news) y una web probe na que se navegaba con programes del tipu Mosaic y Nestcape. Mio enfotu foi compartir una hestoria por capitulinos cola xente asturiano semao mundu alantre. Alcuérdome de xente en Checoslovaquia, Australia, USA... y tamién estrao pela España de la crisis y corrupción socialista. En fin, coses de la vida.

 Podría espurrime más pero, por agora ya valió. Hai toa una intre-hestoria que cuntar dalgún día, notru tiempu y llugar.

 Agora, cenciellamente vos presento la portada del llibru de cuasi quinientes páxines que ye una especie de destiláu del testu orixinal Esta portada ye parte de la galerada, non la definitiva, que calteniendo la mesma idega camuda selemente la pose xabaz del paisanu.

Pa dalgunos que conozan la novela internética quiciabes la xulguen con carencies. Pa quienes nun la conozan, difícil de lleer o pescanciar.  Sicasí, el llibru naz de la hestoria internética pero nun ye igual. Hai coses nueves que despliquen meyor l'aición, fain más pescanciable el rellatu y, masque la fala ta normalizao, nun perdi frescura y enronche. ¿Podía tar meyor? Difícil, pero sí. ¿Falten coses? Dafecho ye qu'un autor nunca nun ta contentu cola obra qu'espubliza porque escribir ye nun acabar. Pero, como too na vida, ye un compromisu ente lo escelente y lo bono. A vos vos tocará xulgala pero, de xuro, que nun vos dexará indiferentes.

El trabayu de l’Asturies Primera tevo muncho de pedagóxico en cuantes a rescatar y normalizar pallabres del asturiano poco conocíes pero que tan aende pa emplegales. L’asturiano, como toles llingües, ye potencialmente tan potente como cualaquiera otra. El que’l faccio-socialismu español n’Asturies torgue la so oficialidá nun significa otra cosa que medrana y vergoña polítiques (amás d’ocupación cultural y violencia llingüístico, lo cualo nun ye bilordería). Pero l’asturiano vivi y vivirá. Como poco, neses llinies de la hestoria, eses bandes elástiques de tiempu que taquiones, bosones o positrones mueven a les sos deleres y que puen navegase cuando yes enerxía puro. Claro que, pa eso, hai que tar llibre de la puerca esistencia en que sapozamos o mos quieren sapozar los verdugos de la realidá incómodo.

 Como siempre dixi, y diré nestos medios: que vos preste. 

 Vémonos na rede.

Ganaor Acésit VI Edición RELATOS MINEROS

Ya que tamos nello, pues sí, ganemos otru premiu na variante de Testimoñu Hestóricu. Una atenrecedora hestoria minerista que-y fadrá llorar de murnia, la Peña'l Gatu de pa Blimea... Claro que, hai munches peñes del gatu mundu alantre...

NUN ME METER LA MANU EN BOLSU

Chauchesk Divís, mozu rumanu d'a cuarenta años, antigu sarxentu nel exércitu de Chauchescu, vieno a l'Asturies del Gochu Fartón en cata una vida meyor hai unos cincu años. Tiró los bolos pel aire nel atopu de les cais 17 de... cola avenía... Bono, esa na que taba tol puteríu de Xixón primero de dir pal campu fumbol de Los Fresnos, y too ello pa ganar unos cuartos con que comer caliente na Cocina Económico. Aende tuvo hasta qu'un bon día echó moza o, mas que pué tamién que fuera que la moza asturiana se-y chare per elli. Yá se sabi que lo sexual tira muncho.

Los xenes parasitarios ínsitos nel rumanu sobreviviente desde que l'emperaor Traxanu de la Roma tardoimperial ganare la Dacia a la llatinidá entamaron a furrular. Como home de tratu cordial y esquisita educancia, sé de quien-y dió agospiu en casa y ducha caliente cola que quitar la porcancia de piel y mente. La moza primera afianzó-y la compra d'una moto cola qu'algamar un trabayu como repartior de pizzes. 1.400 l'euros que salieron del amor carnal y poco más.

Topelu hai unos meses na oficina d'emplegu del Cotu de S. Nicolás. Ellí un voluntariosu orietaor llaboral, un vienres yá fuera d'hora d'atención al públicu, fíxo-y un Curriculum-Vitae pa que los chara en dellos establecimientos de comida rápido. Y más nada, que coló al pais de nacencia, la Rumanía ex-comunista, esa república qu'esporta delitu y miseria a tola Europa incauto y bienintencionao. Y vieno col so pá depués de vender la moto por 700 l'euros. En Rumanía pedíen-y 30.000 l'euros pa operar al pa del corazón y, como bon parásitu social, pescanció al intre qu'había un pais de promisión, ún en que un zapateru, cualu rei espíu, soxulga a un paisanaxe bobo y cegarato. Esi pais, la España de la tolerancia, permíte-y operar al pá nel hospital de Cagüeñes de baldre, como dixo el castrón rumanu "gratis total". Entrugáron-y en Timisoara, mui estrañaos pola xenerosidá d'España, que quien diba pagalo y elli arrepostió que naide, que n'España too eso yera gratis. Aneciaron n'entruga-ylo otra vuelta y dixo que l'Estau español... O seya, yo, tu, el vecín del quintu, la puta que vivi en segundu, Xuan el kioskeru, Esperanza, la del puestu pan, la Xacona, la que viende'l pescáu na plaza...

Esto ye la España del 2.010. Un Xineru xelón d'una selmana de ñeve. La mala fostia que se me punxo duró un tiempu, nun creyer.

Dexaime que me cague na puta que parió a la tolerancia. Yo, rumanu, fairía lo mesmo cuando un pais, ESTI PAIS, nun ye otra cosa que babayos hipnotizaos énte un televisor y la propaganda nazionalsocialista d'un zapateru remendón. ¡Colo fácil que sería invocar el criteriu de reciprocidá a la hora de prestar asistencia sanitario a tantu vivalavirxe! Nun quiero pagar impuestos pa qu'estos políticos marafundien el mio tiempu y dineru. Si quiero ganar el cielu dexaime que seya yo quien gaste los cuartos en, y no, que me pete.

Mundu magaya.

Carta a una machista (más)

Podría callar, dexar pasar: cenciellamente, atender. Mas, como nun soi perfeutu, prefiero meter la cuyar nesi compangu de la modernidá tardofranquista que fain tantes muyeres y homes requisitos, esos que llenen la boca cola pallabra "machista" depués de fartucar cola de "tolerancia". Esos que, nun sé bien cómo nin porqué, tienen vara alta, y potestes abondo, como pa dar la llicencia y alcuñu, condena y castigu, de "machista" a cuanto (y a quien) se-yos antoxa.

Estos fíos del tardofranquismu como, por exemplu, la falucaora del programa de RNE "No es un día cualquiera", son gomitivos, cafiantes, babayos. Ye que nun saben otra cosa que dicir cuando oyen dalgo "zapateramente" incorreuto. Parez qu'hai una conseña non escrita de nomar, faltar, alxetivar aquello que parez ser eso, la pallabra máxica lo diz: machista. Y parez, tamién, que namai ellos tienen esa patente de corsu.

Nun paga la pena esbillar l'ensame de políticos, falucaores bien pagos con perres públiques, "periodistos" de tertulies de tou pelax (esclario que periodistu ye'l periodista mui llistu, o seya, el poli-llicenciáu en toles rames del saber humano, ello ye, los caberos homes del Renacimientu, que son quien a falar dende cómo facer una bona tortiella pataca a les consecuencies metafísiques de la desintegración del muón) o aspirantes a modernos qu'anecien neso de calificar de "machista" a toa manifestación que parez poner a la muyer baxo sospecha d'inferioridá o usu alternativu. La mierda que caguen eses boques pinga pausao, como destilando aneya sabencia que naide nun retruca porque, ta claro, la babayada cuando masifica, amás de facese invisible, narcotiza les entendederes de lo que toca. La necesidá de facer curtia esta reflesión me llibra d'espurrir más nes munches voltures que dan estos "macarres" emocionales.

Estos fíos de la dictadura franquista, que tanto la critiquen y de la qu'arrenieguen muncho pero a la que deben, tamién, muncho; con cuatru idegues mal adeprendíes como democracia, igualdá y tolerancia, estren l'antoxana de los medios de comunicación social de basoria conceutual, hipocresía y, cimeramente, inorancia. Afortunadamente pa ellos, la xente ta aborricao abondo como pa nun decatase d'esi sutil remanamientu dignu de propaganda hitleriano. Ya se sabi, dende Nerón, que la xente, en xunto, nin piensa nin critica. Pero como esti campu ye polisémicu y polipastu, cincaré solo lo del machismu, que ye alimentu mui nutritivu. Veamos

1 Nun inoramos que la muyer tuvo un papel hestóricu solo reproductivu.

2 Que sirvió solo pa descansu de guerreru.

3 Cria de reciella.

4 Llimpieza de cacía, casa y castiellu.

PERO...

5 Eso nun tien de facemos perder la perspeutiva hestórica de lo que se xulga.

ITEM MAS...

6 Esos frutos son consecuencia del procesu hestóricu concretu y tienen de xulgase colos güeyos del momentu hestoricu en que sucedieron. El pescancialo nun obliga a compartilo. Nin siquier a ser cómpliz del procesu.

Poro, ello nun quita l'adeprender del PASÁU pa nun lo repetir, MAS, xulgalo con criterios d'ANGUAÑU, pa menosprecialo, ye como mecer la mecánica de la rueda y la palanca d'Arquímides cola mecánica cuántico de Niels Bohr o la relatividá d'Einstein. Cenciellamente, agua y aceite. Elemental, queríu Watson.

Un exemplu oyíu na emisión de RNE del domingu 13/09/2009. Cuando el cantante Manolo Escobar diz nuna canción de la década de los años 1960 "viva el vinu y les muyeres, y les roses que dan gloria a mio tierra..." duldo permuncho que toviera exerciendo el "machismu" (del que falen los modernos facistes culturales de la tolerancia) como dixo la presentaora. Nel contestu hestóricu, esa fras, como otres de la mesma mena, nada tien de machista sinón de cumplíu (bien cierto que probetayo) y homenax. Nel 2009 la cosa pue sonar ceízo pero hai que lo ver con perspeutiva hestórico. Güei, pocos lo dirían asina, o non. Depende de la llibertá de caún cómo dar un cumplíu y, dafechu, debemos respetar la llibertá de toos pues respetar les opiniones ayenes nun ye, forzosamente, compartiles.

Estos facistes culturales, que falen del machismu como daqué negativo, guardiense muncho de criticar la otra cara de la mesma moneda: el machismu femeninu o, si se prefier, el feminismu. Y lo simpático ye que son les muyeres les qu'eduquen al machista. Ye lo que tienen los hipócrites.

En realidá el machismu, como tantes otres creaciones mentales, nun esiste na realidá. Ye solo una etiqueta na que s'escuenden, o meten, comportamientos y, lo meyor, caún decide qué ye lo qu'ha metese. Asina que, si nun momentu nos fadien los xudíos, los moros, los vecinos, los del PSOE, los del PP, los de l'Asociación de la Madreña Rescamplante..., pa faltalos dicimos que son machistes. Y si lo que mos fadia ye una canción, pues que ye machista. Los facistes culturales son aventayaos alumnos del totalitarismu y saben lo que quieren: un mundu "neutru", un mundu pa ellos solos. Por supuesto, ellos son los que van mandar y decidir lo que vas pensar y dicir. Son los misioneros d'una relixón por llegalizar que quieren lliberar del machismu, a espetaperru, a la humanidá. Neto que los del "Domund", de cuando Franco, salíen a pidir perres porque queríen convertir a tolos probes negros al cristianismu.

Ellos son asina. Los "machistófobos" (o si se prefier, los feministes) son les flores de la privavera totalitario que vien a casa depués del turrón del iviernu de la dictadura. Pero duldo muncho, daveres que permuncho, que la meyora de la hestórica situación de la muyer-yos deba dalgo.

Del totalitarismu, (de tolos totalitarismos) nada bono viene.

Nin va a venir.

Ganador del III CONCURSO DE MICRORRELATOS EN ASTURIANO 'EL HORREO DEL CARBAYEDO'

La inmodestia nun ye una de les peores faltosidaes cuando vien de la mano de trabayu y enfotu. Sicasí, presta compartir, con otros, trunfos propios cuando, daveres, trátase tamien del trunfu de los otros.

Si vos presta, aende vos apurro la direición de la noticia :

Ganador del III CONCURSU DE MICRORRELATOS

IMPOSTURES

La selmana grande de Xixón truxo dos actuaciones interesantes nel mesmu día, una tres otra masque n'ubicaciones dixebraes. Falo de música, de grupos del artisteo. El primeru n'actuar en tiempu foi la trupe cubano del Buenavista Club Social. El segundu, "Celtas Cortos".

Propóngovos trescender el fechu musical pescanciao como pura folixa. Si nos movemos nesi campu, pa gustos hai llámpares y sapes, ñocles, cámbaros o esguila y caún tien la so filia, o fobia respective a ritmos, sones y canciones. Y ensin ponese ún mui trescendente, fixeme no paradóxico de que se xuncieren nel tiempu sucesivu dos espíritus, a priori, hermanos. El primeru, un grupu fíu del socialismu real, frutu d'esa inacabable, insufrible (y, poro, imposible) revolución permanente (que cantaba inocentemente na década de los 70 del siegu venti, Georges Moustakis). El segundu, un grupu sozializante, entiñao d'acracia acomodaticio, con sensibilidá que dizse social y... ¿Ta claro que nun me gusten, eim? ¿Va ser cosa de pre-xuiciu?

Los cubanos del "Club Social" que, en realidá, queríen poner "Social-ista" cantaben, na Plaza Mayor, al amor carnal, a la voluptuosidá preferiblemente tropical, a la piel moreno encorteyada por sol y espluma salmorioso. Nuna palabra, al deséu calificao como deseable mientres los vieyos del grupu tiraben de turuta añoso, saxu berrón y mandolina quexono. La muyer del grupu glayaba ellectrónicamente perriba'l baturiciu de xente escanciando sidra malo na puerta del "Galiana" y l'hotel "Asturias", moviendo calcaos cadriles con esi acamar de picardiosa por cubrir. La carne ye la carne y el deséu, llibre. La danza ente dos nun ye otra cosa qu'antoxana amatorio, escitación d'enerxía terrenal y vibración vital. Los pocos que se cuidaben de l'actuación movíense navegando una mar esteno, una mar bella que camudaba en barallos cuando les pareyes xuntaben nuna carne. Guapo, sí.

Los cazurros de Valladolid, los "Celtas Cortos" canciaben otra historia. Frente a los añosos cubanos ellos, más mozos, diben de fola escontra cantil. Énte el son suave y la cumbia o el montunu de los saudosos cubanos, los cazurros llevantaron la berría. Muncho ellectrónico, muncho volume de ruíu y glayíu. Muncho prescindible.

L'antoxana del saludu, con un "salú y anarquía" diz abondo de quien vivi, xusto, de la esistencia de lo que se combate. Los mozos repitieron cancios que yá sonaben a vieyo cuando los estrenaron cuantayá, de la que, más mozos, enxertaben no que se llamó "música celta". Fartucaron de falar de les barricaes, de facistas escorriendo a emigrantes, de lo de llevantase del sillón pa camudar un mundu malu, mui malu pero, ¡coses de la vida! non tan malu como pa nun mantelenelos na fola consumista que-yos paga les factures. Preguntes retóriques invocando a los santos de la progresía, esos que nun tiene ilesia material porque cada "progre" llévalos nesi ara perpétuu que ye'l póster del Che y la estrella de cinco puntes. ¿Qué diría el Che, y Sandino, y qué Allende, énte lo malo malísimo d'esos imperialistes que xinten nenos, primero nel Vietnam, darréu n'Irak y agora... ? Ambute demagoxa, en paxu y goxa.

Pa min ta claro que la involución ye otra forma d'evolución y estos Cortos (de vista llargo pues saben cómo vender emocionalidá pa llegar a fin de mes) involucionen hacia l'ovocitu primordial de la sopa d'Oparín. Sicasí, la gaita ellectrónico-yos suena bien y dalgún canciu de la primer época ye prestoso.

En fin, un fin de fiesta amañoso dando pilancos y pagando el "mojito" a 5 euros (más d'800 pesetes), bocata tortiella a 3 euros y, los más intelixentes, fabricando muncho botellón gracies al Carreful.

Hai qu'esclariar qu'a los Celtas Cortos metiéronlos pa la playa de Poniente, a tocar na antoxana de la zona caro y residencial. Pensando mal ¿qué otra cosa podría esperase d'un gobiernu municipal supuestamente socialista? Pues eso, meter caña a los capitalistes de primera llínia de playa. Faltaría más.

Prestosu martes d'agostu inciertu, n'añu 9 del dos mil.