Entradas
Un sabiu me dixo nun hai tanto que nun m'enxertara na realidá que ye porque, daveres, solo lo parez. Eso quier dicir non xulgar. Nun teniendo tolos datos d'un socesu, balero de xacíu ye enxuicialo. Fácil, ¿acuéi? Pues non tanto.
Mientres un sobreviviente d'una espedición de siete díes a les isles Canaries a bordo d'un "gal" (1) me pinta en gris perla delles rexes de casa pienso no paradóxico d'esti intre en que me puedo permitir un sirviente.
Tener mala concencia ye inxustificao pues el mozu ta ganando unes perres que lleva varios díes que nun gana vendiendo caxigalines pela cai y los chigres caleyando ensin consuelu de nueve de la nueche hasta les tres de la madrugada. De la que mueya'l pincel na mezclienda comenta que si equí van mal les coses per ellí ye pior pues la xente nun tien pa 
comer.
La famosa crisis que nun diba vinir, esa que de venir diba ser curtia, esa que sinón curtia diba ser pasaxero, esa que parez que nun pasa sinón que, a la escontra, parez que va quedar por un tiempín, esa crisis que, barrunten yá los más, va quedar hasta echar raigaños nos bolsos del desesperu, ye bona tema pa xulgar la realidá que m'arrodia, que la crea y recrea. Antóxaseme invitable implicame no político, lo económico y lo humano. Y el sabiu diz que non que, como muncho, solo lo atienda y dexe pasar.
Yo nun soi sabiu, poro, pueo enquivocar y nun facé-y casu. De xuro que l'home tien razón pa dicir lo que diz y que, esa razón, ye la meyor de toles razones posibles. Sé qu'hai ciencia y conciencia nes sos pallabres pero tamién se que yo inda nun toi nesi altor de sabencia que m'inmunice d'esmolecimientos propios y /o ayenos.
Nun sé aú acabaremos con esta crisis. Suponse que les crisis son cosa bono, que son válvula d'escape cuando un sistema apodrez. Sé que la catarsis ye necesario, que nun yera posible que tantu avarientu, tantu furtón, tantu lladrón, siguiera engañando, mansulino, bienes y derechos de toudiós. Pero tamién sé qu'aquél qu'entamó esta engañifa piramidal ye l'unicu que va a salir bien parao d'esti estropiciu. Y tamién sé que l'avarulia y la codicia nun pertenecen namái a una sola casta social.
Si se me pertime una llicencia lliterario, esi "mario-condismu" (2), esa posibilidá d'arriquecese
ensin crear riqueza, solo con inxeniería financiero (lo que val dicir, engañifa y estafa) espurrió como una llépara social ente tola xente que quería ser rico y poderoso, calistró per tolos estamentos sociales españoles.
Munchos collacios metieronse a especular en bolsa, a meter perres en cementu y lladriellu, a comprar productos financieros que, dafechu, nun pescanciaben pero que los "espertos" del "mio bancu" encamentaben-yos con munchu procuru y garantía. Yo entrugába-yos "¿Daveres ye'l TO bancu?". El bancu yera de Botín, o seya, el botín del robu yera manifiesto. Y asina toos, una ruina pa mayor gloria de la fuñería y l'avarulia.
Mas, conocer los síntomes nun da consolancia cuando esta llamarga en que nos movemos nun tien igua gracies a la hipocresía político pues nun hai responsables conocíos y los políticos, coles nuestres perres, salven de la fondigaña en que se metieron a bancos y caxes d'aforros. Los unos son los dueños de los partíos políticos, a los que perdonen les deldes ellectorales y los tienen coyíos polos coyones, y les otres son comederu de políticos en retiru o n'exerciciu de nepotismu.
Daveres que ye difícil non xulgar.
Dexar pasar.
Ver y non dicir.
Dicir, pero non falar.
Costante Alvarez
NOTES:
(1) Gal: nome, na fala mariñana senegaleso, d'una barca de pesca más o menos grande que se diz "patera" ente los españoles. Naquel viaxe vinieron 60 negros hasta Las Palmas de G. Canaria. Dende llueu yera un gran "gal".
(2) Mario-condismu: refiérese al exemplu que dió a la sociedá sensato un tal Mario Conde, abogáu del estáu recicláu n'especulaor, direutor d'un bancu al que casi arruina, aspirante a políticu y, finalmente, delincuente condenáu.
