Xente qu'anda perequí :-)

jueves, noviembre 08, 2007

HIPNOSIS DIARIO

07.11.2007

Hipnosis diario

Parte de la hipnosis diario consiste na audicion, visión y asunción d’una mesma opinión, normalmente ayeno, qu’acaba sintiéndose como propio. Opinión gomitao polos medios de comunicación y piñerao por confesaes adscripciones ideolóxiques que busquen saldar cuentes pendientes o afitar privilexos. En realidá siento que na sociedá hai una llinia argumental de baxu perfil, un rux-rux seliquino que, perdayuri, lo calistra too, que tolo endientra, mueya y cubre. Trátase d’un enfotu implícitu, gaseosu, borrinosu, inconfesable mas operativu, qu’usa les artes de les baxes emociones pa l’algame de fines tamién baxos pero mui útiles pa quien los procura. Ye como una salmodia baxino, un canciu cafiante y repetitivu, un ruíu subaudible que, polo continuu que ye, parez esapaicer del mundu real pero que tá aende, desplegando plenos poderes hipnóticos sobre la sociedá durmiyoso.

Va tiempu que conceutos como el de solidaridá, el de bientar, el d’humanismu, amor, compasión y munchos otros más, conceutos qu’espresen sentimientos qu’espeyen en nobles emociones, nun formen bramente parte (sacante l’usu hipnóticu ideoloxizáu) del noble exerciciu de la xestión de la “res publica”. Tantu tiempu como el que media ente la dixebra d’algunos antropoides del grupu de monos homínidos y la criación de megapolis tertiomilenioristes. Podríemos aldericar sobre si aquéllos conceutos yeren dafechu operativos nos primeros homínidos pero prefiero pensar que, d’aquella, la vida emocional del home, polo cenciello y harmónico pa cola naturaleza, yera más sano y llibre (y nun falo de resucitar la tesis del noble selvaxe).

En fin, la imaxe del monu de la película “2001 una odisea del espaciu” arrevexando pal cielu, de refundiu, el güesu que valió pa machucar a otru monu, fai rescamplar (y si nun “e vero, e bene trovato”), esi supuestu momentu de la conquista del poder personal del home pa sobre los otros, poder esplicitao en violencia pa col otru miembru del clan. D’aende p’alantre, tola costrución humano sofita nel algame, usu y abusu de la droga del “poder” entendío colos axetivos social y, posteriormente, político. La importancia d’esa droga, d’esi velenu, ye tanto que podríemos, por reducionismu tachable d’absurdu, calificar tolo humano como llucha pol poder. Evidentemente equí menciono “poder” non como fuercia interior y, poro, personal, d’autodetermín, sinón como mecanismu de manipulación, remanéu y sometimientu del otru.

Darwin intuyó como mecanismu evolutivu de la vida la sobreviviencia del más fuerte que depués matízase con conceutos d’adautación, de meyor plasticidá al mediu natural y otros téunolóxicos como son los factores xenéticos de biodiversidá. Nel home, a esi mecanismu evolutivu sumaríase el de la llucha pol poder, la sobrevivencia del más arteru, el más castrono, el meyor adautáu a la violencia que naz del usu y abusu del poder, dientru de la tribu, la castra o clan. Esta evolución de raigañu etolóxico, esti factor llamáu por dellos “darwinismu social” ye mui evidente y, como dixi al entamu, calistralo too, trescala esencies, sentimientos y anicia baxes emociones, empuerca alma y espíritu humanos.

Nun vo calificalo de bono o malo. Cenciellamente esto que camento ye un resultáu indeseyable, un parásitu que zuca enerxíes que, emplegaes notres fasteres del ser humano, podríen producir sociedaes humanes más sólides dende’l puntu vista de la sanidá integral del home consigo mesmu y pa cola relación cola naturaleza, pa cola vivencia en plenu respetu del ecosistema y, en resume, d’un progresu planetario no bramente esencial a la vida.

Poro ye que ríome toles mañanes oyendo la radio (cada vegada óyola menos) o lliendo los diarios (a estes altures yá solo los gratuitos). La historia repítese. Parecíos paisaxes y, siempres, el mesmu paisanaxe. Los mesmos movimientos d’egoísmu y violencia. Los mesmos escenarios sociales de dolor, sufrencia, sometimientu, en resume, de quienes tienen poder (pocos), lo gocien y exercen y de quienes (los más) lo sufren.

Viendo los pantasmes del pasáu encarnando una y otra vuelta en siempres nuevos “nerones” amburadores, “atiles” esfarrapaores o “hitleres” cazatalentos parez que la sociedá nun ta dispuesto a salir d’eses hipnosis tanto extra como autosómiques que la determinen y esclavicen. Esi, como dixi, rux-rux qu’aliena. Eso que los inteleutuales llamen babayamente “sociedá civil” podría dicise que ye más una “brañada servil”. Mientres “evoluciónase” no teunolóxico la sostancia de lo social ye siempres lo mesmo. Poro, incumplimos la llei non escrito de pasar pol mundiu ensin someter (a otros) nin dexamos someter.

Con cierta perspeutiva reconozo que pal resultáu de la obra de la vida (que d’eso trátase, d’adeprender actuando nel fantásticu teatru d’ésta) ye bono la diversidá d’añedíos posibles al alimenticiu platu cotidianu d’eso que llamemos vivir. Pero cuido que por mui bono que sía un manxar, inda’l más pinchu farturcará de comelu a diariu.

Y equí el comentariu prescindible ayeno a lo universal. Nesti tiempu y nesti pais, da lo mesmo que los partíos políticos PSOE o PP anden en griesca o impostura. En realidá dambos, los dos y tolos que fain el coru d’adoradores col envís de ser lo que son ellos pero con otros nomes y notros llugares, anden en cata de lo mesmo: poder. Nesti casu, amás del fácticu el poder de remanar les perres qu’arrampuñen a la brañada durmiyoso, (eso que llamen pueblu) presuntamente necesitada de pastores qu’empobinen la indefensa oveyada. Y pa que nun se decate la sociedá alienao, hipnotizao, usen de la ideoloxía y les emociones. Críen inesistencies diferencies y usen valero discursu acorrompinao de gas durmiyante, guerracivilismu, progresía, republicanismu, monarquismu, laicismu, nación..... Y cuidense, abondo, de mencionar que de lo que se trata ye de controlar la pación. Exercer poder.

Costante Álvarez

ENA ARRIBADA VI....

22.09.2007

De carángana, bilordios, mermures y pescardos ----------------------------------------------------------------------------------------------------------------------------------------- Esta vuelta nun fui más sé que pescardos y coru d’adoratrices yeren los mesmos. Sí. Les mesmes cares, de fondes engurries, a pelo canu o tintu, con aburrición pa fartucar, de güeyos vidriosos por tiempu coagauláo, con pose de pesu en pisu esboligoso y con esi aquél de mineral de fierro por flundir. Taben toos, xuntos. Silentes. Sedentes. Sedentarios. En brañada. En movimientu planetariu cara un sol que calecía l’alma cuantayá enfrescada por fríos cachones de la vida. Sedentes, si, y secañosos. Secañosos n’esperances. L’Arribada quinxo traer l’oquín fresquino de xenerosa mar océana, mas truxo salmoria esterilizante ciescando a presentes ausentes de sigo mesmo. Truxo la solitú d’abondancia esperao, la sobra de deos pa cuntar quiénes, pa cuntar cuántos, pa cuntar quieros. Nos intres fotocopiaos sobre sigo mesmo cualos copi-paste d’una aplicación güindous imperfeuto espurrieron nuna selmana señardosa d’otros tiempos, otros arumes y edades, otra dómina domóticamente menos dueña de dones, duelgos y dolíos de dones y de doñes disciplentes n’audición incompleta d’un presente gafu y tarrecible con raigaños “odiatibles”. Duros tiempos de mala vida. Como siempre, mala vida de bona rialidá pa tolos que nun quieren ser hérues de la so vida. Como vieno, coló callandino l’arribada d’oquín por arumar. Costante Álvarez.

L'ARRIBADA '07

18.09.2007 Mundu Perfeutibilis

Daveres yera atenrecedor (que non tarrecedor) ver y oyer la ponencia na mesa de la sidra. N’Arribada sonó la señardá d’aquellos amos del primordiu revolvicu asturianista, güei atoxigaos de gota, canes y poques ganes. Oyer echar la culpa a la nomenklatura sozialista, a la FeSeA y a la camada fíos de puta de políticos del 68 que hoi estren, nepotica y clientelarmente l’universu involutivu asturianu dami rebelguinos si lo diz ún que parez tan parte del problema que critica como lo son aquellos otros gafientos que cita en desesperu.

Quiciabes na llamuerga en que sapozamos tengamos toos daqué de culpa. Quiciabes tolos umbeligos sían reondos y, pa sorpresa de toos, esi famosu enemigu tenga una cara más amiga de lo que parez. Asina que mientres ún defendía la sidra como fonte lliteraria, infancia en Somió con güela sidrera y mocedá consumío en vieyera gotoso; otru penaba de los tiempos de trabayu na conseyería comunistono y xusticiero; otru, de les vieyes hestories en chigres de per Carreñu, La Villa y Xixón; Gonzali aburría y el más muzu agua traía, paiciome velos a toos, a toos en xunto y colación, naquelles fiestes de la Cultura que se facíen nel branu xixonés de la transición na carbayera del Tragamón, cabo Cagüeñes, referviendo idées revolucionaries al son d’un Vitor Manuel recién conversu al euroComunismu.... Aquellos panfletos d’una xunta de directores de cine asturianos que diben recuperar la memoria hestórica d’una Asturies dixebriega de cuando Gonzalo Peláiz, y Doña Urraca l’asturiana, y Pelayu el non-vasallu...

Nesi intre. Nesi puntu de la vida, l’Arribada algamó l’altor que m’esperaba. Trenta años nun son nada y muncho menos nel asturianismu de polvu y sidra vieyo. Trenta años de quexes. Trenta, d’esperimentos valeros y otros tanto,s col so I.V.A correspondiente, de desenfotu.

Una pena que nun se decate esta xente de que la fuerza d’esos que critiquen (y a los que yo nun vo defender) nun ta nuna maldición atávico del pueblu asturianu domáu por suevos o romanos, non. Ye más bien la falta de xacíu desinteresoso. Digamos de sentíu común no xeneroso pa colos proyeutos integradores. Un pasáu de derrota que se repite cada vuelta menos doliosamente porque, hai que lo dicir ya qu’ellos non lo dixeron, la sidra, de la qu’empeora, adurmi ciencia y conciencia de lo urxente y lo necesario, de lo asturianista, de lo asturianero, de l’Asturia-nada.

Prestosu esti día 17 de l’Arribada.... a nengún sitiu

Costante Álvarez

ENTRUGA

14.09.2007

Acaben les vacaciones y sigui la xente enfotao con cazurros radikales y babayaes de politica-fictio. Prueba de que la estupidez masificao ye inmune a Mr Propper... Ye lo qu'hai. Sicasí acabo alcordame que... ... ...Mio muyer entrugábame na nueche d’hai unes feches el porqué de tar señardosa por nun pertenecer, agora, a una asociación d’esporpolle espiritual de la que foi miembru. Quería que-y diese dalguna opinión que complementase a la yá que tenía. La cosa yera que’l mensaxe d’aquella xente inda-y resonaba, a diferencia de lo que fixeren otros mensaxes y otres esperiencies peles que pasare dende hai bien de tiempu. En realidá tolos mensaxes son unu y toos esos “unu” son diferentes. Ye una paradoxa y una realidá (por supuesto, pa min) que se desplica bien si caltenemos que la diversidá nun ye otra cosa que la espresión de la unidá afayandose a la necesidá-realidá nacíes de la unidá. Sabemos (o tendría de sabese) qu’ ún y ún ye ún.ún Los sentimientos y les emociones son cosa puramente animal y, poro, cinquen a lo humano pescanciao nel sen puramente material. Nesi aspeutu de la complexa personalidá humano la esmolición (de mio muyer) por nun tar en determináu llugar tien que ver más colo emotivo que col mensaxe. Poro, hai que partir de la conciencia de la emoción y desandar el camín qu’aquélla desfila. Nesti casu xulgué que la cosa podría dir pol sentimientu de perda de familia qu’esperimentaría mio muyer al quedar hai poco sin pá y asistir al descensu imparable de la costana de la vida que sufre so má. El decatase de que’l formientu, el yeldu que fexo d’un ensame xente (hermanos y parentela cercano) una familia tá escosando llévala a un entamu d’ incertidume que necesita ser espayao. Cuando enanties conociere otres realidaes, otros puntos de vista y esperiencies, el desamparu potencial non esistía y, poro, la implicación gragario de pertenecer a un ensame xente con mesmos esmolecimientos y enfotos (remiella de familia) nun esistía y los mensaxes, masque bonos, esvariaren. L’animalidá humano tien muncho de gregario y d’ello ñaz abondo del ésitu adaptativu homínidu. Poro, son tan importantes les relaciones emocionales implicaes en conceutos de socialización y pertenencia grupal. Pero siendo esto cierto, nun lo ye menos el fechu de que, bramente, siempre vamos tar solos énte lo sostancial de la esistencia. El raigañu de la esperiencia humano siempre ye individual, egóico, unixénito. Tou cola del yo y vuelvi al yo y, nesi camín, tan los otros arriqueciendo la esperiencia gnoseolóxico colo positivo y lo negativo de la socialización. Lo positivo y lo negativo que nun son coses xebraes, insisto, pues pertenecen a un mesmu campu esperiencial. Esto empata col fin caberu de la esistencia humano y tien que ver, tamién muncho, cola repetición d’esistencies últimes qu’ultimen la cabera esistencia. Hábil (ye un dicir( xuéu de palabres que diz más de lo que parez. En fin, comprendo que ye difícil aceptar que dende l’entamu de la vida a la so acabación tou esi camín (penes y/o gayoles) nun ye otra cosa que’l desendolcu d’un compromisu o contratu previu a la esistencia del yo humanu. Y ye difícil aceptalo porque ello implica cierta dosis d’introspección, meditación y creencia, pequeña dosis de fe que, dafechamente, concasa mal cola ciencia que ye, nun tengo dulda dala, otra clase de fe pero con meyor y mayor propaganda. Aceptar aquella premisa, axiomáticamente, podría facemos entamar a columbrar el verdaderu sentíu de la vida, polo menos, nel nivel personal. Costante Alvarez

UN BIEYU

28.08.2007

Ye un cuentu con munchu kuentu

"Un bieyu “dicíu” tibetanu (ke de xurum ía falsum) diz ke ye imposivle andar al sol y nun pisar la solombra. Poro, como na nobelona de Jemingüai, nun entrugues por kién voltien les campánules, ke lo fain por ún mesmu, vovín.

Ista polémica de bran de d’Humbertín, la Lola y la non-sé-kién más, parez k’eskonsoñó l’espurríu pigazu agostiegu y enkumóu a una perfeuta desconocía al cume del párnasu manieristou-modernistou d’un Rubén Daríu tuexu por recién kasoriu col plus de polinizar en braña somedana. Vono, pueke’l comentariu nun fuera acertao no tocante a lo personal pero Humberto, ke ye bon escribidor, nesi trabayu n’hespañol pa mi ye evidente ke-y esnidió la “sacamelética mandúrrica apucingui” opinión, forzoso reconocer, ke nun tien naide porké compartir con mió.

Siqasí, lo vono de los filos que pinguen de los dicíos foreros ía la presunción de ke la (supuesta) crítica a la “dómina virginalis” ta, o toviere, fecha por una muyera. Isto empata col dichu tópicu de ke nun hai pior enemigu d’una muyer k’otra muyer. Un asertu interpretábile como machismu femenín ke, d’otru lláu y mientres nun me lo demuestren notru sen, ye mui, pero ke mui ciertu. Asín ke la moza d’Humbertu solo pudo essere faltata por otra moza ke, darréu essere acusata, cai nos alxetivos típicos de muyera de mala vida, mala concencia, arte y cencia... Too mui propio de la inkisitio.

Pero como diz el dicíu aforísticu, les pulgues van col perru. Ello ye, con mio. Bale. Almito polbo como animal de compaña. Pos vien"

ROSA

24.08.2007

ROSA Como davezu, paso pente un cardume xente con cara enfocicáo, durmiyoso o ausente. Como la viaxera que pon RENFE esta vuelta ye la piqueña sé que vo socializar. Unos minutos depués apruz del prietu horizón d’agostiegu agostu el convoi. Y siéntome énte una moza cromatizada toa en tonos rosa. Al intre vienome la semeya de la cabera sesión d’Eurovisión pa Yugoeslavia nun añu que nun recuerdo. Naquel certame, como digo el caberu pa convulsa Yugoslavia, camín del esanicie, ésta presentaba al eventu musical una canción simplayo, como poques, en boca d’una mocina a lo Marilyn Monroe pero toa, toa, a vestimenta rosa. La cosa incluyía na coreografía el típicu auto americanu tamién, cómo non, en rosa. El veteranu presentaor festivaleru, José Luis Uribarri esclamó “¡Nesta moza too ye rosa!”. Non duldo que, picaradiosu, pensó nel suave rosa d’un coín llambión o entullíes tetines amazcaraes por falsa vergoña de rosada virxinal. Y ye que siempre noto cierta tensión sexual cuando enfrento a una moza. Ramunet, el collaciu represaliáu por una fía de Fidel Castro, aburriome la nueche del 14 d’agostu col poder femenín no tocante a les relaciones sexuales. Ensin dulda una guerra perdío pal home dende l’entamu los tiempos pues ye evidente que la muyer ye’l factor limitante en toa relación afectivo de tipo heterosexual (forzosa acotación dao les munches banderes del arcu la vieya que veo esnalar al vientu libertín). En fin, que la melguera, y silenciosa, collacia de viaxe posó en Llamaquique col normal aire ausente y/o murniu, quiero pensar que poles supuestes inconveniencies d’estes hores de l’alborecía. Yo, tamién como davezu, sorreí prestoso por ver un nuevu día, l’unicu de la mio vida sobre’l que tengo verdaderu puxu y control. Non duldo que’l restu xente que me vea a eses hores piense que toi atochecíu pero esi va ser el so problema (de tenelu). Yo, cuando poso en trabayu, voi bárbaro. Costante Álvarez

AEQUALITAS

20.07.2007

Un afortunáu anunciu de xuéu de mesa punxo de moda el que s’aceutara al pulpu como animal de compaña. Pero ta claro que naide va a tenelu como talu na vida real sino, meyor con patatines o a la gallega, como sabrosu alimentu. Pues lo de la igualdá home-muyer, creéime, va por esi camín. Anguaño s’impón un pensamientu únicu al respective, un nuevu paradigma que dixebra, aparentemente, dos mundos escluyentes. Pero, masque convenga a monxarratos y/o comunistonos (la mesma brañada) digo que non. Que non ye asina o, polo menos, non como mos lo quieren facer ver. La vida merez vivise pola diversidá. Diversidá biolóxico. Diversidá social. Mesmo ideolóxico. Ye, xusto, lo diversable lo que fai soportable una vida na Tierra. Esi marcu esperiencial, apurriendo variedá de biotopos, nichos ecolóxicos, grupos étnicos y clases de tortiella de pataca, por exemplu, permite desenvolver les habilidaes personales que caún trai codificao en xenoma y nel mediu etolóxicu al qu’aporta. Curioso. Home y muyer, macho y fema, güevu y pataca.... cumplen dixebraes funciones. Train destinos diferentes al empar que complementarios. Asina ye y asina va a ser. D’esta incontestable realidá síguense los, tamién, diferentes papeles que s’actúen na obra de teatru que ye la vida. Mas esta evidente verdá vese enlluxío por artificios “intelestuales” vistíos de “modelnidá” y “progresía”, too ello (escuso dicilo) de mui poca sesera. La igualdá ye un conceutu gaseoso, neto que la democracia, y permite xugar con un ciertu grau d’indefinición. Pa los demagogos ye un material bárbaro. Pa los tontos con aspiraciones a títulu, “insoslayable”. Respecto al sexu, ta claro que la muyer ye diferente al home y viceversa. Respecto a la mente, idem de idem. La vida vese diferente dende los dos sexos. Les reaiciones son, al empar que complementaries, diferentes. La maternidá marca una gran diferencia. Siendo esto verdá, ¿xustificaríase una discriminación, ello ye, un tratu non-igualitariu, ente home y muyer? Supongo que cuando ún naz coxu tien, polo menos, dos caminos: ún, arrenegar de la coxera y tratando d’igualo por aciu la ortopedia o, dos, aceutala, viviendo con ella pues va a ser un aspeutu más de la personalidá físico. Nel primer casu el coxu siempre va sentise incompletu, dependiente, inxustamente tratáu pola vida y discrimináu pues siempre va vese A-normal. Por embargu, nel segundu, el coxu va vese normal, mas diferente, con una dificultá añedío que nun-y entorgará la so propia autoestima y consideración como ser humanamente completu. Nesti razonamientu, atopo que muncha xente sustitúi la pallabra “coxu” por muyer y que ésta frecuentemente por presión social, adopta el puntu de vista del primer casu. Pero nun hai desigualdá en tou tratu desigual. Parezme que solo hai porgüeyos n’afitar un sentimientu de desigualdá por cuenta diferencies meramente naturales. Sé que debería matizar esto muncho más, pero el curtiu espaciu y la falta tiempu me lo torguen agora. Los sacerdotes del igualitarismu, los siguiores de la guaxa y la mona, los (malos) bienpensantes y los politi-correutos (y correutores) nun me lo van entender. Pero eso ye cuestión de la so propia ceguera, non de la de mio. Parezme. En cualquier casu, si daquién retrucara con ganes d’intercambiar puntos de vista, podríemos espurrí-la tema. Costante Alvarez

CUENTOS DE PEL BRANU 2007

19.07.2007

Procuro mangar un cuentiquín tolos branos. Aende va ún. Que vos preste. Cuentos de pel branu. 2007 ----------------------------------------

EL VIEYU SABIU

Yera d’aquella un home vieyu y sabiu. Vieyu porque yá facía tiempu que peñaba ñeve, y sabiu porque teníase por feliz poseedor de rempuestes a esperables entrugues. Y nesta iguadura taba l’home, asina pagáu de la so ciencia y poca sobeya, cuando un bon día nun quixo llevantar del catre. “Ya valió”, díxose con voz sele de la que desalendaba. Aquel aire espulsu talo paició sali-y del alma. Como había tiempu y tiempu que nun cuntaba’l tiempu nun sabía satamente cuántu tiempu de vida esfrutare. Y como viviere vida abondo nun yera a sátamente tolos fechos de la vida vivío. Tampoco fue a calcular la sabencia atiñazao na engurriada cabeza de grave pose. “Yá valió” repitio y dispúsose a dexase llevar polo que fuere que-y pudiere pasar. Entrín y non aportaba aquello que nun sabía qué podría ser, pela mente entamó a desenvolvese-y la vida y los sos frutos. Vio la infancia, l’adolescencia; vio la meyor y la pior edá, la inocencia, la concencia y conocencia. Mayestros, adivinos, muyeres y caminos. Munchos caminos y caleyes, y xornaes de pesar, gayola y desesperu. Nun xuasús atopose de vuelta na cama, encoyíu pol fríu tarazante d’un xunetu indecisu. Al cuntar colos baltos del corazón decatose de que nun pasare muncho tiempu na evocación. “Toa una vida nun parez muncho visto asina. Tantu tiempu vivío y en tan pocos baltos medío... Daqué escaezo y nun sé cualo” noxó consigo por cayer na cuenta del pocu pesu de tantu presuntu posu. “Pueque la vida namai sía esto, dir de la nada a l’olvidu”, razonó. Y un güelpe na puerta sacolu d’estos camientos. Dende había unes feches, cuando morría la tardi y yá taba en pulgueru, daquién vinía a picar na puerta. Y pa esi tiempu de dir chucar, de palmiar veles, el vieyu sabiu nun facía casu d’ello. “Yá volverá mañana”, y acuruxaba baxo sábana y mantes de llana grebo. Sabei, amiguinos, que’l vieyu sabiu sigui inda na cama. Tovía podríeis velu si enfiláreis pa Caborniu de les Careses, na Parroquia d’Ules, y entrugáreis pol vieyu sabiu. Naide sabi la edá que tien y tovía quexa de que-y piquen na puerta cuando nun son hores. El vieyu sabiu sigui remembrando la vida vivío, lo bono y malo de les colleches de tiempu que fexo. Y sigui noxentu porque barrunta que daqué se-y escaez cuando fai l’enésimu resume d’una espurría vida de serviciu y trabayu. Yo, que nun soi tan vieyu nin tan sabiu puedo dicívoslo. Ye que’l vieyu sabiu ye inmortal y nun lo sabi. Tolos díes pasa la carabiella pela puerta. Pica pa poder entrar, pues respeta les ñeves y la sabencia d’esi home y, como nun-y abri y tien munchu trabayu pa facer, cola pa volver al día siguiente. Y asina pasen los díes, selmanes, meses... Amás de poesía, ¿milagru?, entrugareisvos. Non. Cenciellamente que l’home sabiu escaeció, d’ente los recuerdos, la natural estación de l’acabación. Namái recuerda la vida y, como deberíemos saber, solo muerren aquellos que creen (y por tanto, críen) na muerte. Costante Alvarez

Y, TAMIÉN, POR GÜEVOS...

17.07.2007

Y tamién diba por güevos.... ...Y siguió esti asturianista d’IU falándome de la desmovilización de la xente, de lo poco que se podía facer cuando nin participaba nin s’esperaba que lo fuera facer. Acordié con élli que ye cierto que somos mui cómodos pero, claro, ¿cómo inorar, tamién, los mecanismos de control políticu y social? Ún de los meyores inventos de control social dende la criación de toa mena de portalgos, tases y impuestos pol cacique de turnu foi l’accesibilidá del “común” a la istitución del créditu con garantía “real” y nun falo de la prenda ensin desplazamiento, que tamién lo ye. Cuando, ente culín y culín, comento col collaciu d’IU que nel trabayu dalgunos de los mios compañeros, masque encabronaos col xefe, nin siquier maxinen faltar un día al trabayu y muncho menos enfrentase a los posibles abusos del patrónU porque, ente otres coses (y non la menos importante) nun lleguen a fin de mes, toi afitando que parte de la desmovilización social vien xusto d’aende, de la estensión, del espurrimientu de la hipoteca inmobiliario que camuda en fáctica y real hipoteca sobre la vida de la familia. ¿Quién podría caltener una güelga que tarace, siquier, una selmana de salariu cuando munchos son los que, a eso del quintu día del mes, yá tán afogaos por deldes y pagos de toa condición, orixe y consumo. Gracies a la “democratización” del accesu a la “proprietas” la perda de ciertes llibertaes ye evidente. Lo que llamamos especulación en realidá, ye otra forma de control. Sí, hom, val, Cierto que se fala de la función social de la propiedá y toes eses gaites garantistes costitucionales pero, daveres, la propiedá nun ye otra cosa qu’una navaya de doble filu: una necesidá social y una cadena. Necesidá porque hai poca oferta. Poca oferta porque hai muncha demanda y pocu suelu urbanizable. Pocu suelu porque los depositarios de la voluntá del pueblu quieren financiase los sos privilexos con esi suelu, ente otres coses. Y tamién cadena porque t’arreya a un sitiu y una cosa. Una cadena que condena a trenta años, como media, a “matrimoniu” forzoso col usureru legal de turnu. Usureru que t’atornica al tipu llegal del dineru (+ Euribor) pero que nun te paga los intereses que debería por emplegar el to curtiu aforru n’empréstitos a tipu d’escándalu. Asina que nes movilizaciones solo vemos a guah.etes ociosos, fíos de la progresía más hipócrita, o a futuros desemplegaos que yá nun tienen nada que perder porque sabin que una condena a tiempu ciertu en cuantes queden en paru. El resto de la brañada, nós, el pueblu, sobrevivimos. Lo que llama esti asturianista desmovilización nun ye otra cosa que dar les boquiaes al sol d’un infiernu mui real.... Costante Álvarez

DIBA POR PAN...

16.07.2007 Cuntábame un asturianista desembarcáu n’IU que lo del nacionalismu (asturianu) yera un espeyismu. Que bona xente dexose caltriar osmóticamente por idées importaes, acidanes y ayenes. Home, paiciome daqué desaxerao. Cierto que lo de idées ayenes, acidanes y importaes nun dexa de ser daqué cosa predicable de too pues tolo que sabemos, ya inda lo que maxinamos, suel fundir raigaños n’esperiencies y conocencies ayenes mecío too con considerances personales. Y, amás, lo importante daveres ye lo que la xente piensa y actúa. La “ordinary people” pasa de nacionalismu asturianu, y si me pinches, tamién de beibol y de l’asturianía entendío como degorriu dixebriego. La xente ye asína: una oveya imperfeuto.

Nun me cuesta gota creer que si el franquismu toviere-y echao güevos al asuntu de la democrácia inorgánico taríen agora nel poder democráticu de la nación si vese obligaos a pasar pola famosa “transición” y el P$O€. Porque la xente ye asina: quier, perriba de too, seguridá. Quierla xurídica, claro, pero tamién personal y social. Vamos, que lo d’izquierdes y dereches cai como que mui alló del mundu real. Conozo a xente de dereches que-y saquen un cuerpu de ventaxa al mas bermeyón de PCUS hestóricu y, paradóxico, isquierdosos que en cuantes rascuñes un migayu te canten el cara al sol o te reciten el Mein Kampf en versión habanero. Too pura pose y cuentu pa engañar a los nenos-homes con síndrome “Piterpán”, babayos que vivin un sieglu venti ún con idées emprestaes del diecinueve (sieglu).

Porgüeyos, amiguín. Trátase d’eso. Repartir el panchón de forma amañoso abondo como pa que nun te queden namai que migayes o corteya mauriento. Dicho lo cualo fainme reir bien esos que vienen a pidime un votu de confianza pa nun sé qué guapa sociedá asturiano y sozializante, de muncho igualitarismu y poca tortiella pataca.

Reconozo, sicasí, que fain falta soñadores pa que’l mundiu “evolucione”, Pero primero de too habría de sabese lo que significa eso pa caún. Sospecho que pa dellos esa evolución involuciona a la cueva de Platón ensin Platón nin fueu.

Costante Alvarez

ABLAYANTE

16.07.2007

Ablayante

Ablayante. Eso ye. Camines pel filu l'escobiu vital. A ún lláu un sotanviu. Al otru, lo valero. Y esi filu ye tan estrencho qu'eches les coraes pela boca en caminándolu. Ellos dicin: "¡entaína!". Tu pienses: "yá valió".

Lleguesti hasta equí porque yera lo esperable. Lo previsible. Lo posible. Lo estocásticamente impecable. Pero non. Nun fue que la escoyeta fuera imposible. Cenciellamente que les víes del tren son paraleles y tu fuisti per elles neto que vagoneta baxando cuestiquina. Dexástite llevar.

Dícinte que la vida nun ye solo eso. Quieren más coses. Nagüen produición. Y son cafiantes en repetilo. sí. sonlo como ellos solos. Siempre en comparances. Siempre concasando grupos homoxéneos d'entes carbonados y otres gaites.. Llogros y vitories d’unos y otros.. Que si la nomadía y la gloria....

Agora pienses que, quiciabes nun tuvieres d'esverdiar tan aína al elexir aquella moza. Pero eso agora ¿de qué val?. La vagoneta sigui 'l cuestibayu y tu vas nella ensin muncho control.

Y eses manes de señoritu. Eses meanes, nin.. Mírales. Son de repolitu. ¿Cuándo sudaron pola paga? Con perspeutiva puen dicir que te lo punxeron fácil. Pero qué van saber ellos. Nun puén metese en to alma. Nes tos esmoliciones Ellos nun ven la sufrencia de nun tener raigaños ayundes. De pasar pela vida con poco puxu y munchos sueños.

Por eso esi filu que transites ye tan estrenchu. Tan peligrosu. Tan lliberaor.

---------

Costante Alvarez

ELLA DIZ

06.07.2007Publicar entrada

Ella diz “confío en tol mundu”. Y eso, porqué lo negar, parez razonable. Pero les coses dicin otra cosa. Ella tá n’enxitu. Les obres de la casa fueron un dexastre y anda a pleitos col costructor. El peritu del informe que tien de presentar al xulgáu ye un pirabán. L’abogáu que contratare, un manta y, pa enriba, llevó dos bolses de ropa a la tintorería pa llimpiar y dícin-y agora qu’ente la ropa que llevare nun tá una cara cazadora del maríu qu’ella sabi que punxo nuna de les bolses. Esta clienta de mio muyer parez que tien daqué cosa qu’adeprender amás d’enritar, noxar muncho y chase al monte con una recortada. Mio muyer plasmaba al ver que nun yera a coordinar l’asuntu xurídicu d’esta clienta col restu d’asuntos que tinía con ella. Too parecía salir, misteriosamente, mal. Depués d’un mes de dar vueltes tres del seguru de responsabilidá civil, el de cobertura xurídico, l’abogáu, el xulgáu, el procurador y el peritu, mio muyer entrugóse si la cosa nun yera que la moza en cuestión tendría daqué cosa qu’adeprender amás de metese nun pleitu col costructor y la tintorería. Entrugó-y el porqué de nun controlar la obra de remocique que contratare na casa. Igualmente, el porqué de nun pedir el recibu de ropa entregao na tintorería. El porqué de nun entrugar primero sobre un bon peritu. El de non molestar en investigar a quién contrataba como abogáu... La rempuesta foi qu’ella, la clienta, siempres confiaba en tol mundu. Bona rempuesta, sí. Ella confiaba nel mundu. Suelo falar de lo comeniente de confiar na vida. Nel mundu. Y faigolo con una perspeutiva que non inclúi esti tipu de confianza ciego que, bramente, nun ye nel mundu, sinón en ciertes y determinaes persones del mundu. La xente suel tracamundiámelo. Confiar nel mundu nun ye renunciar a cualquier tipu de control personal y/o social. Ello ye, nun significa el nun responsabilizase polos propios actos y actitúes. Cuando se confía nel mundu en realidá se fai otra cosa: una operación inversora de sana enerxía personal nuna cuenta corriente costituía por un arquetipu plenamente funcional. Trátase de nun privase d’espectatives personales y/o sociales por cuenta pre-xuicios o interpretaciones apriorístiques. Trátase de saber, por comprensión, que toa manifestación del mundu esterior qu’apareza na vida d’ún siempres trai un retu, una lleción, una moralexa o cualaquiera otra circustancia que va ser, tamién siempres, motivu de xorrecimientu personal. Nun importa lo dolioso o gayolero del socesu, lo aparentemente aleatorio o consecuente. Too tien un propósitu y too cumple esi fin desconocíu pa nós. Pero esta confiaza, que naz de la conocencia y la sinceridá con unu mesmu, nada tien de ver cola incosciencia acomodaticio (o circunstancialmente comeniente) que trai la abdicación de la nuessa responsabilidá frente al mundu y frenta a nós mesmos. Confiar nel mundu nun inclui el dexase engañar, manipular o reducise a espectaor pasivu de la esistencia propia o de l’ayena. Quien asina actúa recueye mui graves y reales consecuencies en forma de disturbios físicos y mentales. Quien renuncia a esi control, a esa responsablilidá, acaba repitiendo los erros hasta fartucar. Y, creeime, la medida de muncha xente ye abondo insondable. Enforma como pa merecer vivir solo una vida. Poro, la clienta de la que vos falé al entamu repetía un esquema circular del que solo pudo colar cuando decatose de que nun podía renunciar a controlar ciertos aspeutos de la so vida cola sida de confiar nos otros o neso que llamamos mundu. Veremos cómo acaba ‘l pleitu. Costante Alvarez.

PREXUICIOS

20.06.2007

Que la mentira tien curties les pates ye cosa bien cierto. Pero, con selo, nun dexa ún de plasmár cuando eso que llamo “l’universu” encárgase de facételo rescamplante. La esperiencia foi la cellebración de los 25 años de graduación como biólogu. Depués d’esquerir dayures la comisión organizaor en cata la xente escabarriao tres tantos años de vida, tuvi l’alcuentru con ún de los mozos que cuantayá nun tratare. Cuntámonos la vida, obra y milagros y, como pa costeame la segunda carrera trabayé nun kiosku, xulgándo ello de baxo valir pa un llicenciáu en bioloxía, comenté que lo fixere “nun comerciu” y el muzu, de papu sanu, espetóme un “¿pero nun lo ficisti nun kiosku?”. Daveres que nun mentía, comerciu yera, pero nun vo negar que nun yera tola verda... Pasaron los díes y tovía toi dándo-y vueltes del porqué avergoñé d’un trabayu tan bonu o malu como cualquier otru. Lo cierto ye que ún nunca nun ta llibre dafechu de prexuicios. El saber cómo furrula la vida, los fines y medios d’ún, y too eso que conforma la esperiencia vital, frecuentemente nun t’aforra atopate en trebeyu grande y/o enriedosu. Los prexuicios son retos. Hai qu’arreblagalos con entendimientu y compasión. Sinón, añerarán en alma cual cáncanu torgándote la cabal comprensión de lo bono de la vida. Costante Alvarez

LIBERTAS SUPREMA LEX

11.06.2007

“Libertas suprema lex esto” -------------------------------------------------------------------- Ye frecuente que me lleáis esta frase llatino que me presta pola vida. Arromendando a ún d’aquellos “decenviri” (puéque míticos) que fixeren la llei de les doce tables, (orixe y gloria del derechu consuetudinariu romanu que cristalizaría no que güei llamamos civil) ordeno a la llibertá como finxu cimeru del home. Pero ye curioso esto de la llibertá. Munchos enllenen la boca d’ella y encabronen escontra dictadures y otres istituciones polítiques que, presuntamente, esclavicen al home. Ya nun hai (tanta) xente como antanu. Xente, aquélla, que podía dar la vida propia pola llibertá de los otros, pero queden babayos que se manifiesten muncho, y ruxen inda más, y fain esparabanes milenta pa escontra la guerra en llonxanos sitios; pa escontra fame d’africanos sitios, y d’enceses sableres de la mauretania clásico o de selves amazóniques sapozando n’oru prieto y sangre roxo d’inditos espulsos del paraísu verdoliego. Ciertamente hai muncha poesía nesos movimientos de noble enfotu y presumible raigañu humanisto. Pero, pero, pero.... ¿Nun ye más cierto que vese meyor el paisaxe dende llueñe? ¡Qué guapo rispir pola llibertá de los otros tres pancartes, cartelos, ONG-“he.tes” y otros antroxos narcotizantes. Ven lo malo del mundu pero non el raigañu del mal pues el tueru que caltien la gran solombra de la ramascaya d’esi árbol de la inxusticia tá enforma prósimo. Sí. Nun ha dise mui llueñe pa ver ú entama esi “mal”. En términos hipócrites, muncho d’ési tá en nós. Cuando Eric Fromm espublizó aquel llibru entituláu “Miéu a la llibertá” cuido que nun se decató de que l’home, en realidá, nun tien miéu a ésta sinón a “descubrise” como ser non-llibre. Poro ye que la llibertá interprétase como daqué esterno al home, como situación oxetivo consistente n’exercer un garrapiellu derechos ensin torga nin pilancu. Pero si la llibertá forma parte de la sostancia del home ye, precisamente, porque funde los raigaños nel so propiu ser. Lo otro, la esternalización interesosa d’esa llibertá, ye un espeyu, una consecuencia, una engañifa “política”, un porgüeyu social cultiváu por quienes necesiten exercer control sobre vides y padremuños ayenos. Eso, y non otro, ye lo tarrecible de la llibertá: el descubrise ún mesmu esclavu d’una engañifa que vende, precisamente, llibertá y, cabo d’ello, un subproductu que llamen democracia. Más esto llevaríame a otra tópica. Prefiero quedame na casa interior. Aquellos que más ruxen pola llibertá de los pueblos, pola falta manifestación d’ésta na cultura o notres estayes del conocimientu humano, frecuentemente (por nun dicir nunca) nun se miren nel espeyu del yo-presente. Si lo fixeren veríense bien esclavos d’ideoloxíes o relixones (cuando non de porgüeyos inconfesables) que solo apurren xustificaciones pa narcotizar una situación personal desconocía. Mientres iguamos la casa del vecín (cosa mui d’agracecer) nun sabemos cómo tenemos la nuestra. Viviendo p’afuera sobrevivimos adientro. Nestos términos, nunca nun acabará la inxusticia. Nunca nun habrá llibertá abondo. Y, claro, siempre seremos necesarios pa rispir pola falta llibertá..... de los otros. ¿Nunca nun vos entrugasteis por qué, siempre, algamamos na vida cantidaes industriales de lo que nun queremos, de lo qu’arrenegamos, de lo que, en resume, mos fai infelices? A pesar de tantu puñu en altu, tanta manu llevantada, tanta sangre sementao, el mundu d’anguaño nun ye meyor que’l d’antanu. Cierto qu’agora mátase más, mátase meyor, mátase más rápido... Cierto que somos munchos más pero ¿somos más felices? Y ye que, como ‘l culu, toos tenemos una idea de lo que ye la llibertá y lo que facer por ella. Pero creyendo sabelo escaecemos que solo una persona que sabi y vivi la llibertá interior realizará la llibertá esterior. Si tas amaláu pola rensía, la envidia, l’odiu, el sectarismu... si yes un ensame contradiciones interiores lluchar pola llibertá de los otros ye una forma más d’establecer y emponer otra tiranía a los otros: la de les tos carencies. Costante Alvarez

RARU, RARU, RARU....

08.06.2007 DE TIEMPOS Y POESÍA

Nestos tiempos de relativismu éticu, de dineru razonablemente fácil y d’otres munches coses que xulgo nun paga la pena recordar quiero reflesionar sobre la confianza del home na vida mesma. Falo (o quiero facelo) dende un puntu vista abstrauto y pasablemente aséptico. D’un tiempu p’acá nun veo confianza nos güeyos de xente que cruzo na cai. La confianza na vida sustitúise pola confianza NES COSES de la vida. Parez un pleonasmu, per non. Les coses son eso, coses, medios y non fines. La confianza NA vida nun parez tener utilidá práctico mas, por embargo, ye poderosu motor d’esperanza y realización personales. Si aceptamos la premisa de que too se relaciona nel universu y que ye cierto l’efeutu mariposa como representación alegórico de la concatenación de causes qu’eliminen el conceutu de casualidá, la confianza na vida ye un potente catalizador pa l’algame de felicidá y llogru humanos. Pero nun veo esa allegría nos güeyos de muncha xente. Veo, eso sí, l’espeyu orgánicu d’emociones, les más les veces tarrecibles, gobernando cuerpos de moñecos que baillen al son d’una música que nun elixeron. Persé que trátase d’una vieya historia, la de la esclavitú del home pol home o, meyor, del home pol poder entendíu en sen ampliu.. Poro, ausente la confianza na vida del home, ésti malpenes estrémase d’un oxetu, d’una almañosa alfaya que remanen otros homes que sí saben lo que quieren y cuidense de qu’otroslo sepian pues ¿daveres pensáis que ye casualidá que menos del 5% de la humanidá caltenga el 90% de la riqueza del planeta? Quiciabes tendríemos de definir lo que pescanciamos por riqueza y lo que, bramenti, debería considerase como talo pero eso llevaríamos la reflesión per otros caminos. Lo que m’interesa ye espeyar que, por cuenta esa carencia que cito tamos énte un mar de des-confianza qu’espurre nel mediu social como mancha d’aceite ceizo trayendo, a la casa del home,.los indeseables frutos del miéu y la manipulación. Nun hai tantu que, nenu, confiaba plenamente na vida. Incondicionalmente. Por exemplu, nos Reis Magos o nel murín Pérez, sabiendo qu’un regalu vendría siempre, incluso por diente cayíu. Confiaba de papu sanu na vida y la vida respondíame cola mesma sana moneda. Nun me cuestionaba los caminos polos que vendríen allegríes o penes, el bien o el mal, créditos o deldes. Cenciellamente confiaba y, maravillosamente, el puzzle de la vida componíase amañoso, concasando le pieces p’amosame la belleza y la responsabilidá. Cuando crecí perdí la inocencia y la confianza. La filosofía de los porgüeyos arrequexó a aquélla otra. La programación que se fixo foi mui potente: la xente ye malo, la sociedá ye malo, nada ye gratis, ensin trabayu nun hai recompensa, too cuesta, hai que lo ganar con sudu, dispara primero que te tiren, perres manden... Na radio oyía un canciu que dicía: “La vida toa son clemencies, nun te vaigas enfallar, y si nun vas el primeru darréu vante a arreblagar. Esmana, nin, esconsoña, la tierra, l’aire, y la mar son de xente reguileto que sabi coroniellar. Xunta l’esfuerzu y l’aforru: naide ayuda si nun das y como nun espabiles van dir dexándote atrás. Vamos, collaciu, da-y duru si na vida quies trunfar fuxan méndigos y probes, nun conozas caridá...” Por supuesto, la confianza na vida nun ye pose babayo de contemplación empastranao. Tampoco complicáu mecanismu d’artificiu mental o disciplina castrense. Ye daqué cosa tan fácil qu’asusta. Confiar na vida ye SABER, pero daveres, interiormente y con lletra grande, que tolo que te venga, lo que te traiga ‘l decurrir temporal, SIEMPRE tien un bon propósitu, un determináu fin que mui bien podemos desconocer pero que nun va ser menos real no bonal. Con esos sucesos felices, doliosos, frustrantes, tarrecibles... con too ello y con más, algamaremos los materiales colos que costruir eso que llamamos “el yo”. Si non confiamos na vida, la viviremos como un infiernu, un llugar de destierru, un papel de función de teatru nel que’l personaxe que representamos y, poro, “vivimos” moverase pel escenariu al petite de pures emociones animales y ensin el nuesu control. Eso nun ye vivir, ye sobrevivir. Les consultes de psicólogos, psiquiatres y otros terapeutes de lo espiritual tan enllenes de xente ayeno a sigo mesmo. Nun confiando na vida bucamos aseguramos un futuru tan inesistente como el (falsu) presente que se pretende vivir. Poro, al llevantamos pola mañana nun atopamos razones poles que sorreir y damos los bonos díes énte l’espeyu al empar qu’agradecemos la nueva oportunidá de vivir, plenamente y en presente, el día que ñaz irrepetible, xenuinu y desafiante. Abasamos los piés hasta la cafetera, tomamos el desayunu, aseámonos y mangámonos l’armadura que xulgamos comeniente pa protexemos na llucha diario qu’entamamos, pa defendemos o p’ atacar, de la qu’afogamos en problemes irreales vivíos como ingrientos sables a puntu atravesamos. Nestos términos, poca xente se decata del potencial de la confianza na vida. De lo real y funcional de les lleis universales que gobiernen la esistencia. De lo eficiente de los mecanismos que solo unos pocos conocen porque se molestaron en entregase a la vida ensin condiciones. De papu sanu. Con confianza. Con fe. Nun sé cuales lleciones traeis a la vuesa vida p’adeprender, pero sí sé qu’ente elles nun tenéis porqué doctoravos en dolor, en tristura, precariedá o probeza. O pueque sí. Too depende de lo (muncho o poco) que confiéis na vida. Costante Alvarez.

BIÓLOGU D'A 25

04.06.2007

Cabu d’años, venticincu

=======================

¿Vistis, dacuando, una fola

frañer toa engafentada

el banzáu que la separta

de la tierra que-y namora?

Asina ye la XI, camarada.

Vida primero y más nada.

El vienres tuvi l’allegría de volveme inda más mozo de lo que yá soi. La XI promoción de biólogos aconceyamos na facultá del Cristu pa gloriar del tiempu y los collacios, ausentes y presentes, en risión d’esi tiempu humanamente inhumano qu’afara l’alma del más pinchu en cuantes que lu dexes. Un cuartu de sieglu nun ye tanto como pa facete olvidar les cares d’aquellos guah.es de biolóxiques (vida abierto y porvenír inmensu) en cata d’un llugar baxo’l sol de la vida y la esperanza de los años de la transición, allá al final de la década de los 70. Y foi curioso ver cómo los gueyos d’ellos yeren los mesmos que recuerdo. Cómo los modos y maneres, quiciabes dulcificaos pola esperiencia, tamién los mesmos. Cómo, baxo les capes de rimel y collorín d’elles, o los afeites d’ellos, el nenu revolvicu que xubía al Naranco en cata flores o clasificaba bichos p’amestar a la coleción, sigui vivu.

Pueque les ñeves del tiempu albaren d’algunes vidayes. Que fixeren l’apriorísticu camín de la vida esboligoso o traicionero. Qu’aquel trunfu esperáu de la vida inda s’espere. Pueque too aquello polo que fuimos a vivir nun fuera otro qu’una (piadosa) engañifa pero equí tamos, toos unos, presentes y ausentes, en testimuñu de vida y vida recreada.

La (mala) fama d’estes reuniones ye merecío. Yo tarrecía xunime con aquellos que, depués venticinco años, xulgaba perfeutos desconocíos fuera de la tópica. Pero’l milagru ocurrió.

Ye daqué cosa qu’agradezo de la mio carrera de biólogu. La falta corporativismu. La llaneza. La normalidá. Cuido que cuando la promoción correspondiente de Derechu me llame pa la reunión de los venticinco nun voi dir. Esos son otru mundu. Nun m’interesen les medalles y lo muncho grande del currículu personal en cata la gloria, siempre efímero. Nunca escaeceré que, primero de too, soi biólogu, ello ye, un interesáu pola vida enantes que de la guerra nel diferendo, la llucha de trinchera procesal o l’enzancu xudicial.

Y muncho d’ello adéldolo a estos mozos de la XI. La promoción infatigable que sigui, mundu alantre, cuala fola namorada de la tierra.

Costante Alvarez

CUMPLEAÑOS

31.05.2007

Aprovechando que’l conveniu reconozme díes particulares, garré ún pal cumpleaños. Nací (emplegando’l verbu cabalmente como transitivu) a les 8 la mañana y propunxome la muyer recibir un masaxe metamórficu a eses hores. Ye evidente que nun diba llegar a tiempu al tayu así que dicho y fecho. El día de nacencia de ún ye bien misterioso, si abres les entendederes y el terapéuta que te fai el masaxe ye competente. La cosa ye que nesi intre rememores el fin del vínculu orgánico cola má y l’aniciu de l’autonomía aeróbico. Ye entóncenes cuando entama a desendolcar l’articuláu del contratu que traes pa la vida y yá nun hai reculu posible. Si tienes la suerte de tener un terapéuta sensible y competente algames cierta información que te va confortar. Y la información inclui espurrir l’entendimientu de ciertos sucesos que na vida cotidiano nun tienen fácil desplicación. Cierto que pués enanchar eses entendederes a güelpes d’esperiencia vital pero cuido que ye meyor, y menos estresante, facelo cómodo nun diván, cama o sillón. Por exemplu, siempre fui mui severu pa con mio má por contemplar abondo a mio hermanu piqueñu. Facíaseme empruno pescanciar el porqué toleraba los munchos problemes que-y daba, desdexos, rebexíos y aventonos. Yo-y dicía que nun podía vivir la vida de los fíos, que tenía que dexar que la vida lu posare, que lu acallantare a base d’esperiencies y sucesos que, masque doliosos, ensiñaben más qu’un llibru abiertu o los milenta conseyos que-y daba de continu y que-y esvariaben como agua de lluvia. Mio má escuchábame, cierto, pero siguía a la llabor atapando furacos económicos y recibiendo, masque nunca me lo dixo esplícito, cierta violencia físico y psicolóxico del pequeñu dictator. Cuando los hermanos, fartos, dexemos de lláu al piqueñu, mio má siguió aneciando nesi llabor que, víase claramente, nun diva valir pa “rexeneralu” social o familiarmente. Ausente agora mio má, el menor sigui pel mesmu camín y non duldo que lo que tanto-y encamenté a l’autora de los mios díes yera melecina amayoso. Mas agora, pescancio la razón de ser de mio má pa cola oveya negro del suqueru. Solo l’amor d’una má tien fuerza abondo como pa facer ausente lo que de sigo rescampla per dayures. Ella sabía perbien lo que yo-y dicía, y que la melecina que-y recetaba pa mio hermanu yera razonable y afayaízo pero, ¿cómo superar l’amor incondicional d’una má pal so fíu pequeñu, el más necesitáu de comprensión, el más esgarrapetáu de nós? Si dalguna vez tuvi de buscar un exemplu d’amor incondicional, un amor de duración illimitao y puro como agua cristalino, nun ncecesité acudir a relixón rebelao dalguno, a filosofía antropolóxico o secta humanisto. Nun tuvi de faceme ‘l llistu o dir en cata d’otru argumentariu que nun fuere l’exemplu de mio má. Teníalu en casa y tardé en decatame d’ello. Camín del mediu sieglu, tovía toi en delda con esi amor qu’inda nun alcontré tan concentráu, puru y sanu notru sitiu que nun fuera abellugáu en cuellu de mio má. Costante Alvarez

CUENTU FUTURIBLE

29.05.2007 Pídinme que valore les pasaes elleciones autonómiques. Bono, ya fíxi ello, sucintamente, y de forma anónimo pues nun ye cosa empapizar al personal. Pero yá que me lo demanden de papu sanu, voi facelo en términos de tiempu. La forma más fácil de saber cuánto cuesten les coses, amás del so valor intrínsecu o por comparanza con otres d’asemeyada naturaleza, ye reduciles a dineru. Los cuartos son elementu universal de cambéu y permiten el comerciu, tamién universal, gracies a coeficientes correctores de valoración sigún datos más o menos oxetivizables. Pa valorar el tracamundiu en que sapoza ‘l nacionalismu astur, (otra vuelta tres unes elleciones) xulgo amañoso acudir al tiempu como sofitu valoraor nel componente dinámicu y económicu d’esi movimientu. Curtia reflesión ensin pretensión aparente.

Nuna realidá imaxinario, nuna dimensión na que 1 añu val por 4 de la Tierra, el puntu de partía ye’l d’un cliente que quier mercar unes cuantes unidáes de nacionalismu asturianu (naci-ast), rica fruta mui vitamisoso. El tenderu diz-y que tiénlo n’esistencies pero que’l productu agora ta fuera de temporada y qu’ha esperar un tiempu pa que maureza y tea más sabroso. El cliente entruga que pa cuándo. El tenderu barrunta que pa la primavera siguiente, ello ye, falta un añu d’esa realidá pa maurecer dafechu. El cliente conforma y lleva plátanos, ricos en potasiu.

Al añu siguiente el mencionáu cliente vuelvi entrugar poles unidáes de naci-ast. El tenderu va pal güertu, pues nesa realidá la fruta vien direuto d’esi sitiu al consumior vía tenderu solícitu, y vuelvi aturuxáu. Inda nun maureciere la fruta. Tien unes unidáes, sí, pero piqueñes y de pocu sabor. Sicasí, el cliente cómprales y axunta a ello un kilu plátanos quedando en pasar la primavera que vien.

Al otru añu el mesmu cliente vuelvi, cola muyer, y pidi un par de kilos de naci-ast. El tenderu, atristayáu, respuende-y que tien esi añu perdío tola collecha de la rica fruta. Un estrañu sarapicu vexetal fai que se desfaiga en munchos gayatos con perda de sabor y calidá comercial. Merca un kilu plátanos y marcha cola muyer reburdiando pola perda de tiempu pa mercar esa fruta tan delicao. Al cabu l’añu, vuelvi ‘l paisanu, solu, p’atopase cole mesmes pues, masque haila, ye bien ruino. Lleva otru kilu plátanos.

Otru añu mediante, el mesmu paisanu, emburriando una xarretuca pa nenos con guah.ina de meses, pidi la fruta adevecío p’alcontrase colo mesmo qu’antano. Pero como’l paisanu allampia por ella yá que de muzu prebó fruta parecío notra tierra, anecia por comé-les del pais en cuentes de les d’otru sitiu. Lleva un kilu plátanos y promete volver pa la prósima primavera.

Cuando pasó ‘l tiempu convenío, un sábadu y de paséu con muyer y guah.a, el cliente aporta a la frutería y vuelvi pidir la esótica fruta pola que salinga. Esta vuelta, el tenderu ufiérta-y un kilu plátanos esóticos, del trópicu tropical pues, mintiendo, informa que l’arbol del naci-ast morrió-y pela seronda tou estrincáu por un parásitu, una arañina, un paparraxu que-y zucó savia y vida. Doliose’l cliente y llevó los plátanos esóticos. La muyer engurniose col maríu por aneciar tantu por aquella basoria de fruta, desconocío pa ella. Cincu años y inda nun la probare. Sin dulda, tratábase d’una zuna que’l maríu tenía pa dexala dacuando en casa y dir correla pela primavera....

El tenderu comprendió que yera negociu ruinosu querer vender aquella fruta de fama esquisito pero que nun-y daba más que pa tener de disculpase énte ciertos clientes pues la fruta pasaba de verriondo a remustio ensin muncha muera. Tovía tenía l’arbol mas, namái ,que pa dar poca solombra... Pueque’l tenderu nun se decatare de que debía tener tratao l’ árbole en cuantes vió la enfermedá que-y reducía la fruta a gayatos. Non lo fixere y l’arañina acabó cola calidá, probe, de lo qu’inda daba. Demientres, na otra realidá paralelo, na Tierra, na patria del felechu, pasaren VENTI años.

Si la vida medio del humanu estímase en 90 años ello representa 18 oportunidaes pa votar cada 4 pa una mesma categoría ellectoral, calculándolo mui simplificao. Ello ye, un nacionalista-asturianista d’alrodio los cuartenta, como media, va tener pólvora y paciencia abondo como pa 8 votaciones, de la mesma clás, primero de morrer.

Vistes asina les coses, la xente nacional-listo tien de tener claro que solo los fíos mui mayorinos y, de xuro los ñetos, verán una cosa parecío a aquello polo qu’enagüen agora. Claro que la cosa d’esi futur va paicese más a un plátanu esóticu qu’a la rica fruta vitaminoso, la famosa naci-ast, la mazana “cobdiciada” polos soñadores d’anguaño. En términos de tiempu, el nacionalismu asturianu ye una ruina. Mercancía averiao. Sacante los inmortales, naide nes cabales siguiría puxando por ello. Too esto dicho en términos d’anguaño. Coles previsiones que dá una realidá testerono y repetitivo de dixebra y egoismu. Pero ye qu’hai xente pa too.

Costante Alvarez

YO MESMU

28.05.2007

CIERTAMENTE PENOSO

Esto de les elecciones ( mayu del 2007) autonómiques, pero ye lo qu'hai: poques lluces y muncha llingua. Trenta años y esti ye'l gráu d'entendederes del personal naciona-listo. En cuantes sales a la cai y fuxes d'esti mundu virtual en que ún pue llegar a creése les mentires propies y les ayenes ves que la xente pué vivir perfeutamente ensin la política (aunque ésta yos afecte) y si puén vivir ensin ella muncho más van prescindir de partiducos y partidinos y babayaes d'asociación de xente mui convencío de coses mui importantes y mui trescendentes y mui roxones o de gran altor intelestual pero, too ello, perfeutamente prescindible y inútil pa la gran parte de los mortales. El fecho ye que la xente "pasa" de la llingua, "pasa" d'aventures prosoviétiques y de toa esa gandaya de xente que nun ye siquier a reise nuna puta foto del periódicu cuando tienen que vender un productu, nesti casu el del partíu que va a les ellecciones. Esta tochez, esta falta de perspeutiva de quienes se siente cola obligación de redimir a los demás de les penes d'un infiernu que se-yos antoxa insoportable, ye la que lleva a bona xente a metese en saraos y chiringuitos que namái valen pa fundir perres, ganar enemigos y charrar en chats, foros y chigres. Ye lo qu'hai. Y ye una pena que tantu votu "convencíu", que sueltu nun val pa ná, nun converxa nuna formación política unitaria incluso al preciu de la xenerosidá gratuita. Pero nel camín del sacerdociu de caún de los naciona-listos asturianos hai una llibretina onde s'apunta, cuidosamente, tolos agravios, tolos llevantos, toles zancadielles, toles ofenses qu'espera'l noviciu naciona-listu cobrar un día, cuando tenga poder, muncho poder, pa dicir entóncenes "mira, cabrón, yo téngola más grande, más gorda, más meyor...". Asina que guardando esta mercancía, faltos de prudente olvidu y xenerosu perdón, los átomos d'eso que quier llamase nacionalismu asturianu repélense una y otra vuelta. Imposible cimentar daqué cosa granible con tantu enfermu. Ye lo qu’hai. Y nun se dacaten (porque nun quieren) de que venden marcancía averiao

RAMUNET BAXA AL ABISU

28/05/2007

Ramunet en cuartón (alcuñu piadosu)

Sorprendiome oyer la voz de Ramunet al otru lláu del teléfonu. Dende la comisaría de Vallecas informábame de que diben llevalu al cuartón. Cuntome l’asuntu y nun pudi afogar una gargayada que debió soná-y a conderga anticipao.

Cuando hai unos meses vieno a Asturies a dar una conferencia, esti collaciu de Madríd traía de baranda una xinetera cubana. Non, nun me refiero a una llóndriga, la versión asturiana del castellano “gineta”, pues ello empataría col bestalismu. Falo, meyor, de la persona que monta a ciertos animales cuadrúpedos, concreto, les más les veces, equinos. Recién casáu, abastome el vela pa qu’esi sestu sentíu que toos tenemos me punxera en guardia. Una gacela pequeña pero rebeza, un cuerpu de muyer con celebru de KGB. Alvertí-ylo. Aquella moza nun me daba bones vibrancies pero l’amor, diz el poeta, atochez al home. Ún, de casi los cincuenta ¿qué podría esperar de carne femenino fresco y entullío d’alrodio los venti? Cosa maraviosa l’amor humano.

Díxe-ylo a les clares pero la neurona, la única que parez tenemos los homes, teníala asitiao yá na bragueta. Y la moza lo sabía. “Encoñáu”, comenté-y a mio muyer de la que díbemos a la sala de la conferencia.

“Gracies” –coña mediante- a la “mona” del gobiernu, a la “guaxa” playa y a tou esi ensame muyeres neo-machistes que s’encargaron d’afitar una llexislación escontra l’home emparándose nel datu oxetivu de la violencia pasional (que ye d’eso de lo que se trata y non de violencia machista o escontra la muyer) ésti, anguañu, tá colocáu claramente n’indefensión énte los tribunales y la sociedá al tar invertío la carga de la preba en favor de la muyer y establecese la presunción de culpabilidá del home arreblagando penriba ‘l principiu constitucional de la presunción d’inocencia. ¿Cómo-y despliques esto a un collaciu sanu, normal y formal que tá nel cuartón de la Policía Nacional en Vallecas acusáu de violencia sexual y que nun sabe el porqué d’ello?

La intelixencia femenino, mui perriba de la del home, cristalizó na cubana cuando, matrimoniu mediante y pagu carnal, consiguió la tarxeta de residencia n’España. Bastó-y un día namás pa echalu de casa y cuando Ramunet quinxo entrar otra vez pa pedí-y desplicación llamó al 112 acusándolu de violencia “de xéneru”. Supongo que de “xéneru bobu” pues púnxose-y esa cara al collaciu Ramunet cuandu lu llevaron, engrilletáu, a la comisaría vallecano.

Díxe-ylo claro: “Ramunet, val más pagar por follar que que te follen pola paga, la casa y los guah.es, si ye cosa”. Pero dalgunos homes, mononeurales y de pensamientu en poya, tovía créen na sinceridá de la carne freso con furaca d’arume manín (o mozo culu magrebí si esi por ello pruyes) cuando yá te pinguen les carnes y peñes les canes de la mayor edá.

Dicíamelo una collacia, oficial nuna notaría d’Uviéu, que taba fartuca d’espedientes notariales nos que sudamericanes ensin escrúpulos viníen pa prostituise por papelos engañando a incautos asturianos. Claro que, si bien se piensa, ¿quién diz qu’hai engañu? Ye una transación comercial bufo: carne por papelos. Nun m’estraña que la fiscalía investigue toos esos matrimonios. Por cierto, la oficial me dicía qu’eso nun pasaba con matrimonios de ruses y polaques.

Ramunet ta faciendo bona la sentencia que diz que l’home adeprende per dos caminos: por entendederes o por dolor. Nun quinxo faceme casu y agora duelse del engañu y la circunstancial cárcele. Y del gastu d’abogáu de Legálitas. Y de poder perder la casa y les perres de les cuentes corrientes que la esposa, de xuro, va llevantá-y divorciu mediante.

Llueñe toi, Ramunet, pa defendete. Espero que´l colega que lo va facer méta-y mano duramente a esa pilforrona que, de toes formes, nun fai otro que beneficiase de la llexislación hipócrita que les machistes tienen preparao pa perseguimos. A los mozos.

Costante Alvarez

UFANU MANDES CALLAR

25.05.2007

Ufanu

Ufanu mandes callar,

y en cazurru, ¡¡ cómo non!!

Meyor qu’a otros copiar

dá-y con gracia ‘l to melón.

Califiques, mui prestosu

a otros pa faer gracieta,

remémbresme a un dios menor

esgolifando bragueta.

Como anónimu que yes,

nin tienes nome nin pose,

y cuido, pa to desgracia,

que nu’ abondes en coyones....

Que te preste, babarón,

que'n babieques tas metíu,

si pa tí yo fuera “friki”

tu, aventáu y salíu..

BURRINA

Veo a la mio burrina ...

...pacer el práu y glorio nello. La menacia d’estinción de la especia va tiempu que pasó y préstame sabelo pues, como animal de compaña, ye escelente. Amás d’aforrame tiempu, al nun tener de tar tanto al gadañu, dame delles lleciones prestoses de comportamientu, amosándome lo intelixente y, poro, lo inxustu de la comparanza colo testerono y inorante. Y, de pasu, fai que me decate de la maravía de la vida.

Viéndola a la xera traigome a la mente l’entamu de la condición burrístico ¿Cuándo entama la so naturaleza? Como biólogu sé razonablemente bien tolo que cinca a la ontoxénesis, los previos pasos de meiosis, gametos y tol camín hormonal que va regular l’añeramientu del embrión y el so entamu como ser independiente de la má. Pero ye que el saber cómo se fai, digamos mecánicamente un burru, non desplica la so naturaleza, digamos tamién, espiritualmente burrístico. Va tiempu que conozo de la gran llaguna d’inorancia de la ciencia nel campu de la desplicación del orixe de la vida. Hai muncha, bayurosa, a veces daveres inatalantable, información del cómo ye l’esporpolle de la célula eu y procarióta, la cadarma fina, los orgánulos, la matriz, de Golgi y compaña... Sábense les rutes metabóliques, sábese de l’aición d’enzimes y coencimes, del acople entrópicu de reaiciones y la maravía del relox de la vida que marca la duración de la célula eucariótico per aciu l’amenorgamientu teloméricu de dellos cromosomes. Ye como estripallar un automóvil aportando al menor de los engranaxes, a la más piquiñina tuerca. Lo malo ye que si axuntamos toles pieces del coche nel so orde lóxicu y eficiente, podremos arrancalu y conducilu mientres que por más qu’axuntemos los componentes bioquímicos d’una célula nun vamos tener más allá d’un sacu membranosu valero, inútil tanto funcional como aparente. La inxeniosa teoría del científicu soviéticu Oparín, que formuló l’aniciu de la vida nuna hipotética sopa d’elementos químicos sometía a radiaciones, calor, descarges llétriques y presión, too ello n’ausencia d’osíxenu, y les prebes d’Oró et al. que, neses teóriques condiciones reproducíes en llaboratoriu, algamó complexos carbonaos tales como aldehídos, bases pirimidíniques y dalguna otra cosa, nun son más que palos de ciegu que posponen la desplicación d’esi hipotéticu, estrañu y estraordinariu “quintu” elementu alquímicu que fadría “vivo” lo que de sigo ye “muerto” neto que camudaría plombu n’oru.

Esta constatación ye incómodo pa la ciencia y, puesto que nun algama solución a cómo ye qu’un ensame d’elementos inertes entamen a tener eso que se conoz como “vida”, cenciellamente lo inora. Y tovía ye más incómodo cuando ún de los suyos, de los académicos, del grupu bruxos con carné de ciencia y llicencia pa matar garra ‘l camín heterodoxu en cata una desplicación. Too esto, por ver a la mio burrina paceme ‘l práu.

Cuando al fin descubres el cómo (por supuesto al marxe de la ciencia-ciencia) tou entama tener sentíu y nun puedes facer otra cosa qu’emponderar la obra del criador. Esto dellos nun lo llamen ciencia, ta claro, pero ye un asuntu d’opiniones. Ñego la mayor d’alxudicar el monopoliu de la opinión sensato a quien se diz científicu porque un papelín alministrativu lo diga A min diéronmelu pero nun so tan soberbiosu pa considerame con esi monopoliu. La ciencia, en sentíu ampliu, ye cosa anterior al home, quien solo desenvolvió el conceutu. Los fechos “científicos”, el “background”, son preesistentes al home y la so industria. El mundu nun esiste poque lu definamos. Húbolo primero del home. Hailo. Va siguir habiéndolo ensin nós.

Por cierto. Inda nun descubrí porqué a la burrina présten-y tantu les fueyes del desmayu y el lloréu. Tiénmelos masacraos.

Costante Alvarez

LLIBRE, LLIBRE, QUIERO SER...

12.05.2007

Maliqi Poutou...

...Decidiose a garrar les riendes de so vida.

Taba fartu de llevantase dacuando (más de lo esperable) con boca ensucho y piel moyáo en sudu. D’esconsoñar de la velea de vese dáu pel culu, (cosa que lu enraxonaba), por Muhammah, un profeta que llamaba “putu” a toes hores y en toles sos manifestaciones, el gran “putu-mensaxeru” d’unes creencies absurdes coles que nun quería saber nada. El gran “putu-cabrón” por obligar a les vieyes, igualmente cabrones, a castrar a les nenes por nun sabía bien qué profunda razón de santidá.

Taba cansáu de falar (mal) francés porque yera la llingua fino de la ciudá y la “puta-fala” vehicular d’aquella cultura qu’emburriaba a los sos collacios a morrer camín d’Uropa. En viendo, o meyor dicir barruntando, que tolos sos males diben parar dexando de ser musulmán y finu afrancesáu (pa los sos adientros se dicía “putu-musulmán” y “putu-fransuá”) foi pa la mezquita de Qim-al-ram y solmenó-y un par d’ hosties al que taba glayando al altu la lleva la hora de la oración. Cuspió en direición a la Meca y se cagó n’Alá (mierda) con toles ganes, tou lloqueru por echar fuera de sigo aquella mecigaya de basoria y faladures de camelleros (pensolo pero, en realidá, nunca nun viere ún d’ellos) que-y entorgaben ser llibre.

Nun sabía lo que yera eso de “ser llibre” pero tendría de ser bárbaro porque nun falaben d’otra cosa en Radio France International. Baxó del turrexón dexando al puntu más ablucáu que feríu y empobinó a lo qu’equí sería equí la casa conceyu. Un puntu, al que conocía de velu a putes clandestines, sorrió-y dietrás una puerca ventanina, toa esgonciada, regalu de la vieya alministración colonial gala. Pidió-y seriu que-y camudare el “nom” y el “surnom” nos papeles, que taba fartu velos mal, que tenía de ponelos al dreches y qu’esto y l’otro y la puta que lu parió. El puntu debía tener el día torcíu pero Maliqi teníalo inda mas, asina que sacó un navayón y apuntándo-y al gargüelu pidió-ylo con más encantu. La cosa furruló y el paisanu traxo un llibracu de pastes de pelleya marrono y fueyes blanquiñoses. Cacipló nél y apaició un rexistru que falaba de Maliqi Poutou y otres coses. “Pon Maliki Putu o te raxo dafechu y, darréu, me tiro a tola to parentela, pola gloria de mio má y el putu-profeta”.

El “fonctionaire”, na llingua “patuá” de Malikuistán, fíxolo aína, nun blizcar, tirando d’un rayíu (polo zucao) y naranxa bolígrafu “bic” de punta fina, regalu d’una antigua misión cultural francesa de cuando De Gaulle gritare aquello de “¡¡Vive le Quebec livre!! en Mont-Reale. Esgarabatió el famosu “Maliki Putu” que-y demandare y amosó-ylo tou escagaleráu pues foi evidente ‘l fedor de la foria qu’entamól a facer inalendable‘l caldiu aire de la estancia. Presto-y permuncho aquello a Maliki y mirando fixo al puntu dixo-y “una y non más, “putu-fonsionieg”, lo cualo sentó mui mal al puntu que taba enaguando por dir quitase la mierda d’enriba. Y cuando salió de la “munisipalité”, el flamante Maliki, apóstata y negrata auténticu, perdón, auténtiku, topose cola gandaya musulmano que diba en cata, perdón, kata d’él pa matalu a pedraes por eso, por apóstata y mal musulmán.

Maliki viose comprometíu, perdón, komprometíu naquella situación pues la navayona diba-y valir poco y muncho menos el querer matalos a besos. Reculó pa la “munisipalité” pa ver si podía escapar pola parte d’atrás, pero ellí topó la única puerta que-y lo permitiría, que yera la del escusadoriu, trancada pol puntu del rexistru que taba bien prestosu quitándose sayón y mierda. Como la vocinglada engrandaba, Maliki, puru negrata neto que puru cacáu, perdón, kakáu, de Lind al 99% de llibertá personal y autodetermín konsecuente, mangó-y talu patadón a la puerta cartonera que la fixo españar de los roños que l’amparaben pa facer la función que s’espera d’una puerta. De más ta dicir que’l puntu escapó pol ventanu, espíu y porcono, y que ‘l mesmu camín siguió Maliki enmerdandándose tou, kon esti camientu, perdón, kamientu proféticu de la qu’arreblagaba perriba ‘l funcionariu escacharráu y en suelu: “ser ún mesmu ye una mierda”. Bon entamu pa una vida de llibre y soberanu ser humanu, sin dios nin profeta nin la puta que parió al profeta y a tolos sos amigos, konocíos y siguiores.

Prometiose Maliki nun parar naquél enfotu lliberaor que lu atoxigaba y qu’entullía-y el pechu de gloria y razón, hasta francer les kadenes del barriu, del pueblu, de la nación, del continente, perdón, kontinente negrato porque, dixo pa sigo, “eso d’Africa, perdón, Afrika, ye kosa de los blancos, perdón, blankos...”

Vilu esapaicer p’aú les palmeres datileres pero me consta, perdón, konsta, que lu volveremos ver. Perdón, oyer. Perdón, lleer. Kostante Al-Wares

LOS 100 MIL

12.05.2007

¿Hai 10.000 persones que quieran facer oficial la llingua?

Tengo un par de noticies que dar. La bona ye que la estupidez humano ye un viciu, cierto, pero esencialmente subsanable y, lo meyor de too, nun tien plazu pa igualo. Nun tienes 10 díes o 15, un mes; nun hai plazos alministrativos nin mélicamente prescriptivos. Pa arreglalo, plasmai, tienes tola vida, lo cualo yá ye una ventaxa. La mala ya la diré.

La concencia del pasu del tiempu solo vien cuando eches los güeyos sobre feches. Acabo tener de char una mirada al decretu 9/2003 del Presidente del Principéu y, coime, depués les eleiciones de mayu del 2003 la gocha Antona repartiendo conseyeríes ente los amigos de pación. Ya pasaren 4 años y nada camudó, sacante que cierta xente, ensin oficiu nin beneficiu apriorísticu, yá saben lo que ye tener poder y cobrar, mui guapo, por esi poder.

Cain los años y nun ye qu’ello sía especialmente esmolgante, Ye natural. Igual qu’agora dellos dicin que “ye posible”. Ye natural que los mozos sían llocos y los vieyos conservaores. Hai que conservar la dentame. La salú, que yá nun sobren enerxíes. La pelleya, que ya nun encarnen tan guapo les feríes. Les perres, que la curva de la campana de Gauss diz que va p’abaxo. Ye normal que los vieyos “vean” meyor masque los sos güeyos necesiten gafes o que dalguna catarata en primordiu menacie con enturbiar la vista de lo “real”. Ye normal que la fola, depués d’escachonar escontra la escollera, recule esbilitao topando coles nueves foles que, toes saliberes, encaren con enfotu el banzáu humano de “lo establecío”. Ye normal caltener la esperanza de que, col decurrir del tiempu, les dures piedres de la escollera argayarán abondo como pa que daqué camude. Ye normal la estinción del dinosauriu. Mas, tanta “normalidá”, a estes altures de la vida, m’empapapiza.

Los inmortales (asina llamo a los mozacos que se xueguen la vida na motoleta y, per saltum, a quienes de la vida sabin poco por curtia esperiencia) siguin escachonando escontra la escollera repitiendo el mesmu movimientu reflexu. Asina que, nel dique, sigo viendo la mesma agua cayer n’espluma inútil y orbayu salón. Con perspeutiva, sé qu’ellos tamién vendrán al dique a ver otres foles, con otros güeyos y otra sabencia. Sé que decataranse sero d’ello y qu’ello ye parte del aprendizax. Mas esi aprendizax inclúi la posibilidá d’adelantalo. Nun hai porqué repetir los mesmos esquemes de derrota a non ser que, el facelo, traiga dalgún tipu satisfación, polo menos, masoquista. Se puede ganar perspeutiva xubiendo a un monti en cuentes sapozar nel valle de les llamentaciones. Pero los inmortales namái oyen lo que quieren oyer. Son inmortales.

Poro, la guera ye inmortal. El dolor. La envidia. La llercia. La coruxía. Los pecaos capitales, los rexonales y autonómicos. La miseria. La esclavitú de nuéu aspeutu. La política-fición. L’afición del Sporting. En resume: tou un movimientu xiratorio n’espiral espansivo que repitiría, tou, esáutamente igual sinón fuera porque esiste la salsa de la ciencia y los sos sirviores. Dicho lo cual, nun me lleva xera pescanciar el fecho de que nesti foru (como notros munchos, nun se crea) hebia tanta estupidez de nuéu cuñu y tantu sensatu de vieya sabencia. En realidá, aquel canciu de “Papá cuéntame otra vez” del cantor Ismael Serrano nun ye otra cosa que l’aggiornamentu del cuentu de “Les mil y una nueches” porque, mutans mutandi, camudando nomes y axetivos, siempre vas tar énte lo mesmo. Quien prefiere ser cabeza de ratón a cola de lleón. Quien se considera superior al otru. Quien tien la verdá de la bona. Quien quier lliberar a los otros de nun se sabi qué cosa ensin cuntar con esos otros. Quien, en suma, considérase orixinal abondo como pa repetir, incosciente, la mesma estupidez de pas, gelos, bisagüelos¨... hasta llegar al monu espíu recién baxáu del árbol de Somiéu, pongo por casu, que non por Ponga. Guai.

Polo que veo, les eleiciones tan otra vuelta equí. Y la estupidez, ya presente, agora rescampla. Siendo yo el primeru de los estúpidos teo mala defensa, cierto, pero yá s’encarguen otros de faceme de menos. Trenta años colo del bable pa siguir oyendo les mesmes babayaes. Trenta años dende lo del CNA pa ver a los mesmos y a los fíos de los mesmos, tan bobos como los mesmos. En sin dulda la cosa furrula. La espiral sigui xirando. Les foles escachonen igual. La espluma sigui enfrescando ‘l dique de los cabrones, nesta dómina los de la gocha Antona. Les cabeces de ratón siguin siendo de ratón y el lleon sigui comiendo, ente otres coses, a ratones. Esa ye la mala noticia. La estupidez parez nun tener igua, nesti casu, na casa de los inmortales.

Como toi de pesca esti sábadu, como enguade pa macizar a los tiburonucos de turnu, dicir que yo vo votar a PAS-URAS. Pa min la curva de la distribución Normal (0,1) cai y tiende al infinitu. Y, daveres, nun esperando nada bono de los políticos, nun me presta siguir el xuegu de los inmortales. Va tiempu que lu xugué y lu perdí.

Costante Alvarez.

(UNA) INTERPRETACIÓN DEL FUTURU

07.05.2007

FUTURIBLES

Entrúgame una moza pola interpretación del futuru. Ye normal que en relaxaciones o, más frecuentemente, en meditaciones, ciertos individuos tengan revelaciones d’un hipotéticu futuru como reflexu funcional de cierta capacidá premonitorio residual que tolos humanos podemos añerar. Esto solo ye cosa misterioso pa quien lo ñega pero barrunto que va ser cosa normal d’equí a un tiempu. Les capacidaes celebrales humanes necesiten más tiempu pa desendolcar que les, digamos, puramente físiques, pues necesiten concasar con un planu enerxéticu superior. Pero esto merez otru tema, dixebráu dafechu del que planteábame la mocina. Porque élla falábame de lo que podemos arrevelar, y dicimos, del futuru previsible; de cómo lu describimos y los fallos que cometemos cuando, algamáu, nun concasa, nin pol forru, colo predicho por gurús y demás gandaya al usu.

La tema suscitose en viendo la película “Solaris”, d’Andréi Tarkovskiy, basada na novela homónimo d’ Stanislav Lem. Una clásica, cabo “2001 una odisea”.

El tema d’un futuru previsible ye prestoso al empar que curioso. Toos queremos adivinar cómo va a ser y puxamos por conocelo, siquier parcialmente, en base a lo único que se tien a manu: el presente. Ye fácil decatase de que con esta blima mala banastra se fai. Fuera de la condición premonitorio, el futuru ye daqué cosa incierto, escasamente previsible y, por definición, inalgamable. Tanto como ‘l pasáu, ta fuera de la esperiencia humano directo pues solo ye productu de la realidá material na que desendolcamos como condición arreyada al tipu de tiempu que (piscolóxicamente o non) se vivi. Ye’l tiempu “cronolóxico” o relativu. El componente temporal ye necesario nos sistemes “materiales” en cuanto poséen dimensiones mensurables dientru la matriz espaciu-temporal. Pero una cosa ye lo que ye y otra cómo anticipa la mente humano aquello que’l decurrir del fluxu temporal va (o pué) traer.

Les bones películes añoses que traten el futuru del home, neto que dalgunes publicaciones de los años 70, dicíen lo que diba ser l’añu 2000 con una seriedá plasmante. Alcuerdome de ver los fantásticos coches marca Ford que nel 2000 diben esnalar col gabitu de minimotores ñucleares llevando al ama de casa a mercar al “supermarket” con tol aspeutu y condicionamientu del ama de casa de la década de los 70 pues, sorprendentemente, la muyer diba de mesma traza y forma que l’amantísima esposa y má d’esos años. En “Solaris”, la estación espacial asitiada nel “océanu” d’esi planeta, recuerda una bocamina con muncha lluz fría y parés estraes de primitivos osciloscópios y muncha, muncha, pintura realista. Nel futuru de “2001” la muyer sigui siendo servil y floreru, ausente per dayures. Cosa, too ello “normal” pues ¿cómo imaxinar y, amás, atrevese a describir un futuru cuando siquier nun se tienen les pallabres, tamién futures, que lu describiríen cabalmente?

Poro ye que’l futuru que l’home imaxina (y que, a la llarga, quier forxar) nun ye más qu’una nueva versión del presente. Gracies al desendolcu teunolóxico, agora imaxinar el futuru reduzse a amestar al presente más y meyor téunica pero la semeya del futuru parezse siempre, sospechosa y infelizmente, al “imperfeutu” presente que lu cucha.

Describir un futuru razonable, o creíble, debería tamién adelantar el paradigma de lo social. Amestar cartón piedra de rescamplantes collores, cables lluminosos y voces d’ordenadores piquiñinos, con muncha realidá virtual y pocu cerebru nos caxellos humanos nun parez otra cosa que l’exerciciu creativu d’ún xueu de PlayStation o Nintendo. Nesi sen, lo bono de “Solaris” ye anticipar un futuru humanu poniendo énfasis nel propiu devenir moral del home, nes necesidaes y productos de la so propia psique, tolo cualo fai eo productu intemporal, irrelevante ‘l decoráu y les infantiles alfayes teunolóxiques (bien probres pa la dómina) que la novela y la película amuesen pa facer creíble esi futuru. A la escontra, “2001” pérdise en xuguetes y maquetes preciosistes arramplando al home la batuta del so propiu destín en “beneficiu” d’un supuestu ente superior qu’apurre negros finxos pel espaciu que semen la vida y intelixencia con enfotu inesplicable.

Desconfío por sistema de los sirviores de la relixón de lo futuro. Salvo que sían dioses menores (cosa que duldo muncho nesti intre), lo que traten de vendeme ye otra versión del presente, puéque dulzaplayo o más prestoso porque afalagarán baxos istintos y altes carencies. Por exemplu, una Asturies anticipada asina ye meyor que quede pa prau. Camudar una gocha por otra dexa igual de puerco la corripia. Quiciabes fuere meyor esbarrumbar la corripia pa que nun hebia ónde meté-los gochos.

Costante Alvarez

UNA Y OTRA VEZ...

29.04.2007 Oyo quexar xente alrodiu del salariu de los políticos. Fainlo por cuenta, y al calíu, de la comparecencia del Sr. Rajoy, (líder del PP, partíu conservador español) nun programa televisivu en que nun dixo lo que ganaba énte la entruga d’una pensionista que confesó ingresar por esi conceutu unos 300 €bros. La xente encabrona, de pasu, pola confesión d’ésti home “a posteriori”, (sinceridá mediante) na qu’afita percibir un salariu mensual d’8.000 €bros, cosa que nun reconoció, cuando la entruga, por vergoña al oyer lo que la pensionista cobraba. Oyer esti quexume xeneralizáu respective la desporporción ente lo que ganen los “nuesos” representantes políticos y el común de los mortales que, al fin, ye quie caltién (y sufre) el sistema económicu qu’alimenta a la bestia ye, pa min, vieya música. Llevo oyéndola va, polo menos, cinco mil años. Y si me punxera requisitu, dende l’entamu los tiempos. Y munchos más podríen decatase d’ello (de lo repetitivo del canciu) si miraren más allá de lo evidente. Una curtia reflexión ye comeniente (bona rima). Frente a Heráclitu y la so teoría del logos y la imposibilidá de bañase dos veces nel mesmu ríu, opongo la de la sustancial inmutabilidá de la condición y, poro, de la sociedá, humano durmiente. L’aparente realidá camudadora de los tiempos, lo transitorio o impermanente (Budha dixit) de la vida pescanciada en términos como economía, poder, ciencia, descubrimientos etc, concasa mal cola evidente repetición, testerono y cafiante, de comportamientos y vezos, de soluciones y problemes que configuren lo que llamamos “realidá social” pues, daveres, todo ye lo mesmo dende la caverna de Platón o del neandertal. Namái camuda la tramoya, repíntase l’escenariu, engranda o amenorga l’elencu d’actores, xube’l preciu de la butaca o del panchón pero la obra de teatru ye la mesma: interminable, divertía, horroroso, cruel, penible, lloroso... La condición gregario de la especie humano desixe xefes, caciques o gallos quintaneros cabo intermediarios de munchos dioses y diosecinos, too ello caltenío pola imensa masa oveyo que tien derecho a pensar primero na hipoteca, na xarré de dos tiros, na motocicleta de 1000 cc, nel circu o la comida diario. Nun toos (solo aparentemente) podemos nacer en families clientelares riques y poderoses, o na estirpe real, na fidalguía o noble condición. Esta pirámide social (que nun ye precisamente la de Kelsen), con unos pocos enriba y otros munchos embaxo, ye la mesma dende que, monos y nada guapos, baxemos del árbol. Poro, distribuyíu asina el mundu social, (lo que permite sucesivamente arriquese ún nel tiempu absolutu con múltiples esperiencies frutu de los diversos papeles actuaos na obra de teatru de la/les vida/es) pescánciase perbién el que too sía lo mesmo y que l’encabronamientu frente a la inxusticia sía crónico y recidivante na casa del home. Agora, anguaño, la obra de teatru tien munchos más collores, más estrebeyos teunolóxicos, más realidá virtual escasamente virtuoso, más comunicación qu’incomunica, más soníu pa sordos, más (y meyor) esclavitú. Esapaicieron les cadenes reales camudaes poles virtuales. Agora, el cacique nun visti piel de lleón o d’osu, pero marca la dixebra d’status con caru diseñu francés y/o zapatu italianu de manufechura d’esclavu chinu. El conde ya nun desixe ‘ l derechu de pernada porque te fodia (bien xodíu) vía salariu, conveniu coleutivu, estatutu de función pública y otres alfayes amañoses pa pisate la cabeza de la que te mete manu en bolsu o bragueta. Agora ‘ l Rei Sol sigui allumando na cume del poder al amparu de l’axencia tributaria de turnu y, como non, l’exércitu y la banca, la depositaria, tamién, de los cuartos del Rei. Agora viaxamos más rápido p’aportar, como siempre, a nengún lláu verdaderamente provechosu pal alma. Siguimos caleyando ‘l camín del burrín arreyáu a noria que xube l’agua que’l burru non bebi. Mas, como dixo aquél presocráticu, sigui siendo l’home la midía de too y el resto, daveres, son forgaxes. Too ye lo mesmo y Heráclito nun lo vio bien. Quedose colo evidente neto que l’invidente que, pa la so desgracia ciegu, desconoz el paisaxe pel que pasa. Y asina pasa la vida de los durmientes, repitiendo lo mesmo hasta que’l cuerpu calla... Ye bono nun tar cómodo na piel social qu’ún vivi. Ello invita a rascala y pueque col tiempu una piel nuevo te faiga más llevadero la obra de teatru. Costante Alvarez

SARAXEVU 1995

05.05.2007 Col envís de cellebrar el día del llibru asturianu nel “marcu incomparable” de la Selmana de les Lletres Asturianes”, apurrovos esti trabayucu, un orixinal que teo pingando en casa, pa ver si el foru gana daqué cosa n’altor chiripitifláuticu. Gracies pel vuesu tiempu ----------------------------------------------------------------------------------------------- I “La hora de la fiesta va entamar ceo”, camentó pa sigo Ivek.

El día vinía buxo y, baxo febles rayos de bengales y bales trazadores, l’agua tovía tinía l’aquello de facer rescamplar los railos espetaos nel asfaltu de la llínia 4.

Nun tuvo d’esperar muncho. Los triñíos de la única campana de la católica S. Petrus sonaron ocho veces, darréu siguíos pol agracecimientu de morteros patrióticos del cachu barriu musulmán lliberao de l’andancia serbio nun había tanto. Sabía porqué sonaben. Cuestión de vezu y encerrillamientu. Y sabía quién yera ‘l campaneru. “Un bon home. Bonu y neciu como élli solu”. Gustába-y retriñir les campanes, cosa que nunca nun dexó de facer dende que lu conocía y agora, guerra mediante, muerte y dolíu, siguía a ello testerono y cafiante cola única qu’inda respetaren los bombardeos. “Bon católicu y meyor campaneru” camentó pa sigo, amestando un “Oxalá la guerra lu respete” que sonó a disculpa. Mas, en cuantes que se vió nestos camientos, ximielgó enérxicu la cabeza pa dimir aquellos inútiles pensamientos. Pronto vendría la caza. Adivinaba, tres parapetos y banzaos de sacos terreros, el movimientu de la presa, xente anónimo en cata la comida diario, el pan y la sal colos que caltener l’animu ente la basoria vital en qu’enllamuergaba Saraxevu aquel iviernu d’añu inciertu. Y sabía el porqué de tar ellí. Lo importante de matar a aquella merucada, menos que la nada, que col so aliendu calteníen a los que masacraben a los de so nes borrinoses fronteres de los suyos, dignos fíos del altísimu, mártires pola mor del llocu Milosevic y los xabaces serbios, soberbiosos y castronos.

Dexó de lláu aquellos camientos que nun-y valíen más que para encabronar y facé-y fallar el tiru de puru noxu. Nun pagaba la pena recordalo agora. Agora yera’l tiempu de la guerra. De matar y que nun te mataren. Y dio gracies por tar en sitiu tan prestosu, na primera fila butaques, de protagonista, pa ver y, lo meyor de too, facer, la película de la venganza y la xusticia. “Serbiu muertu, serbiu en paz” díxose apertando los dientes de la que la mirilla telescópico fondigaba pente muries renegríes y esbarrumbaes, ventanes ausentes, puertes esgonciaes y esboligosu asfaltu con aceres tintes d’escombriu, povisa y sangre.

Miró ‘l relox impaciente. Les 8 y 10 y tovía naide nun tentare cruzar pa la cai de la panadería. “¡Vamos, vamos!” gritó divertíu a lo baxino “¡Qu’enfría ‘l panchón!” Y sorrió. Fíxolo con ganes cuando adivinó, en cuentes de ver, el costazu de daquién que, agachicáu, a carrenderes ziszageaba ‘l camín de la panadería al inciertu abellugu los sacos terreros y calabres amburaos d’autos y maquinaria. Movíase neto que trancafiláu creyendo facer lo meyor pa evitar la muerte. “”¡Eso ye de mió!” dixo pensando en Lemjs Aco, el collaciu de caza que tiraba dende l’edificu del antigu bar “Miljacka” y $que yá-y ganaba por diez pieces a ocho esa selmana. Rápidu y felín, empató’l güeyu derechu cola negra goma silicona de la mirilla del G22.

La llebre yera llista, sí, y sabía lo que facer pa nun ganar plombu. Eso “ va facer más noble la caza”, dixo complacíu, y, de toes toes, tenía tiempu ambute y sitios amañosos onde la garrar. La pieza taba fuera del algame de Lemjs y ello dio-y desafuegu. Les fugaces apariciones del bultu negru siguieron per un cachu cuando arreblagaba escombrios y estorvises. Diba rápido. “Nun yera una vieya escagalerada, non” camentó pol remangu qu’amosaba pa safar de puntos n’abertal. Pero sabía qu’a venti metros más alantre diba atopar con un enzancu que l’allancaría abondo como pa permití-y fixar la diana. Pela nueche los morteros castigaren la zona y, na guardia de la una, vió cómo esbarrumbaba un cachu muria de lo que fuere un primer pisu. Un clarión de lluna dexó-y ver que parte de la escumbriada perpasaba la llinia de sacos terreros. Perfeuto. Siendo ‘l primer castrón que diba per esi camín, esperaba que nun fuera embayar la calada. Y asina foi.

Afincó bien l’indiz pa escontra’l gatíu y caltuvo la respiración. Tensó tol cuerpu apertando l’arma de mou que’ella y élli fueran una sola cosa. Desalendó. Engrandada la neñina’l güeyu pola escura de la mirilla vio bárbaro’l refocilu metafóricu d’un bultu negru ente cascayu y fierro moyao. Quiciabes la única oportunidá de cobrar la pieza yera esa. Y un secu españíu sacolu de la hipnótica visión de la presa a puntu esmucir de la diana. La llebre esapaició rápido. Nun vio nubecina de fallu. “Otru serbiu en paz” dixo pa sigo y a rollicones retirose de la furaca pa municionar y apuntase’l tantu ganáu sobre la esconchada y amburada parea d’un puercu domitoriu infantil, agora de velées. Oyer l’avisu desesperáu de”¡¡Pazite, Snajper!!” prestó-y pola vida.

II

Al pocu, un blindáu de la IFOR estacionó énte ‘l llugar de lo abatío pa dar protección a quienes pasaben perende. Mala suerte. Nun podía dexar que lu triangularen. Había que colar aína. Metió na funda l’arma depués d’abellugar bien la óptica. Despacino abasóse hasta ‘l pasiellu y ellí, acuruxáu pa non descubrise, enfiló la puerta la escalera. Pela furaca d’un morterazu pasó al edificiu colindante y subió una altura pa ganar perspeutiva sobre’l sitiu. Sintió la tentación de mangar el llugar de tiru no que foi una guapa balconada pero yera abondo sospechoso. Prefirió asitiar tres la neta furaca d’un impactu de fusil pesáu. Yera un llugar privilexáu pa ver lo que pasaba na zona del disparu que fexere y dába-y bon amparu masque llimitare ‘l campu d’aición horizontal. Sintió disparos. Nun yeren pa él. Retirose de la furaca. Preparó l’arma y tumbó pámpana enriba. Fixose nel esqueletu de la llámpara de techu. De cristales de collores, pol pingaxu que quedaba. Tuvo de ser guapa. ¿A quién allumaría aquella incandescente? Necesitaba char un pigazu. Aprovechó que la cosa nun taba pa bromes. Relaxó y garrando les caches del revolver que nunca nun dexaba, preparose a echar una costalada.

III

Les tres la tardi y yá daba anuncia la nueche. Nun mundu irreal les coses guarden ciertu orde. Pero nel real hai que correr cuando hai polo que lo facer. Por exemplu, cuando pasen el bloquéu los pocos víveres que quedaben pa la población. Poro, nunca nun se sabía cuándo o a ú empobinar en cata lo necesario pa la sobreviviencia. Eso facía ‘l trabayu del francotirador más llevadero. Cabo interminables hores d’aburrición vinía, de sotrucu, la gayola de tirar y competir. ¿Hai mayor gloria que sirvir a la patria y pasalo bien? Ivek sorrió. Pueque la llúriga nun fuera cómodo siempres pero siempres tinía bones vistes.

La cosa taba posao. Pocu negociu. Poca xente. Tiráu en suelu, mirando pal techu, brazos cruzaos mullendo ‘l pochacu y pates espurríes y cruzaes, la vida nun-y parecía tan malo. Solo facía un trabayu: aquello pa lo que lu entrenaren na vieya Jugoslovenska narodna armija. Y facíalo bien. Otros ganaríen más pieces pero élli teníales de mayor y meyor calidá y pesu. Non de baldre vistía galones disimulaos de capitán de l’Armija bosnia y respetábenlu dafechu. Pero ‘l castrón de Lemjs... Aquel mozacu quería-y moyar la oreya. Yera bonu pero descuidáu y chambón. Nun yera de los de so, profesionales del ocultamientu y la bona ocasión. “Un vulgar tiraor de feria, eso ye, pero reconozo que con mui bona suerte” asintió de mala gana.

Sacolu de l’autocomplacencia el xaréu que vinía de la cai. Sabía lo que significaba. Aportaba vitualla a los centros de repartu de víveres pa la población y la panadería de Mikhail Evstafiev yer ún d’ellos. La xente lloquero perdía ‘l respetu y la precaución. Aquellos serbios yeren pior que ganáu. Averó cuidosu a la furaca l’espeyín y vió un Scania con insiña de la ONU escoltáu por un par de blindaos, sobre ruedes, a la chisba. Material alemán con xente preparao pero mozo. “Esos nun vieren la guerra mas que en películes americanes” dixo divertíu. Sería mui fácil matalos pero nun convenía enemistase con ellos, por agora. El problema yeren los otros y había que los solucionar. Les órdenes taben clares. Esperó a que descargaren el material. Depués d’un cachu grande, marcharon y la cai quedó otra vuelta desierto. Agora entamaría la procesión de los que s’enteraren tarde de la noticia. Entamaba la fiesta.

IIII

El minicatalexu barría la cai una y otra vuelta. Tampoco salvaben d’ello caún de los furacos, lóxicos o ilóxicos, qu’empaxellaben el llóbrigu escenariu que yera l’avenida Dragomir cosía a bombes, morterazos y metralla. L’enemigu siempres taba presente y y la falta curiao siempres, (repitiose pa esconsoñar siempres(, cotizaba en campu santu. Matar sin ser visto nun yera fácil. Y elexir a quién, el cómo y el cuándo, un arte. Gustaba-y disparar al segundu d’una fila. Siempres hai un gallu la quintana que-y echa güevos a un asuntu pa que lu sigan pero en viendo que maten a quien lu sigui la xente piensalo dos veces. Pero na ciudá too yera más puerco. Más imprevisible. L’arte de la muerte selectivo cedía ante la bayura de preses. Una pena.

Vió pasar a una vieya. Un mocín. “Esi proyeutu de terrorista nun merez vivir” dixo. Y cayó rendondu, ensin gurgutar, cola cabeza españada por bala de carga fallico. La so sesame toa arreflundió la parea anegratada por fumu vieyo. Tres. Ya cobrare tres. Viento en popa diba acabar el día. Otra pieza más y podría dir chucase calentino.

Nun tardó n’aprucir un bultu nel corneyal de la cai Vrelo Bosne qu’empataba cola avenida. Garró ‘l catalexín y trató d’identificar al enemigu. Nun lu vía bien porque yá nun había llume abondo. Camentó que lo prudente diba ser dexalo pa prau pero refervía la idea de superar el númberu de pieces que, de xuro, diba traer Lemjs. Pero yera imposible acertar de xuro con aquelles solombres. Dexó l’arma y coles dos manes en catalexu, ensin otru enfotu que la curiosidá, aneció en identificar la pieza. Al bellume de delles llaparades adivinó formes redondes. Quien quiera que fuers, movíase rápido na so direición pa, finalmente, esapaicer nun portal desfechu. Pero sabía qu’ellí nun diba quedar. N’efeuto, el bultu salió de sotrucu pa, un par de metros más alantre, dir al suelu de capitón. Yera la so oportunidá pa ganar la pieza. Escentelláu garró la G22 y metió’l güeyu na mirilla. Fixó’l blancu y, deleitosu, acancalló ‘l gatíu. Pero daqué cosa saliose del guión milenta veces estudiáu. L’españíu inesperao d’una bengala traxo‘l día a la nueche y, pela óptica de la infame, contempló dos fondos, inacabables, y inquisidores al empar que perguapos güeyos, que lu miraben en desafíu incosciente y provocaor. Aquella visión xirpiolu tou. Un válamu fíxo-y perder puxu nel pulsu y malpenes foi a aguantar la mirilla énte la hipnótica visión de la cara d’aquella muyer que lu miraba direutu, fozando-y l’alma.

Aquello francía la regla d’oru del tiraor: nunca nun mires pa los güeyos de quien vas matar.

V

Depués d’aguantar les bromes de Lemjs, al día siguiente reservose’l mesmu llugar pa tirar. Mui bien podría camudar d’escenariu pero elixó, otra vuelta, la panadería. Pela nueche nun foi dormir bien pola mor ver la cara d’aquella moza de grandes güeyos fixos nél. Nun yera a quitala de la cabeza. Si la meyor forma de combatir un mal yera encaralu, quería volver a vela pa matala. Eso cumpliría el destín de tou perru serbiu. Y más nada.

Nun foi posar na mesma habitación. Un obús dexare la casa tan malo que menaciaba esbarrumbar. Tuvo de metese nun edificiu de pior condición y un pelín a tresmano de la panadería. Pero podía cubrir bien el campu tiru. Si aquella muyer volvía, de xuro que sería lo último que faría na vida. Fixo el ritual de siempres armando la G22. Y, como siempres, el primeru en cayer foi el segundu puntu d’una fila xente poco cuidosa. A les dos, cuando diba a llevantar la tienda, apaició la moza que lu remudare. Imposible confundila. Volvió a garrar l’arma y apuntó con más percuru del normal. Nun quería (sorrió pues, pa él y a aquella distancia, yera imposible) fallar.

Vistía un gruesu abrigu. Cubría la cabeza con un pañuelu escuru pero la cara, con aquellos güeyonos, rescamplaba como un faru illuminando tola avenida. Yera imposible quitar la mirada d’aquella cara. Ceguño un par de veces, como si-y molestare daqué cosa en güeyu, y tuvo de separtar la cara de la mirilla. Estazó los güeyos pa descansalos y volvió a poner na óptica el derechu. Contempló cómo aquella cara enllenaba tola mirilla con una sele tranquilidá que-y dió inesplicable sosiega. La guapura de la moza yera grande. L’aparente indiferencia qu’amosaba lu encandiló. Pero de sotrucu, como si toviere atoxigáu por gafa perlesía, disparó pa les piernes de la muyer errando’l tiru. Vió como echaba a correr y abellugaba tres un parapetu, llueñe d’un segundu disparu. Disparu que, daveres, yá nun tenía ganes de tirar.

VI

El fallu d’Ivek conociose rápido. Yera tou un acontecimientu na camareta pues nun se conocía eso del capitán de l’Armija. Poro, tuvo d’aguantar chancia, burlla y chifla. Una novedá na so llarga vida de tirador d’elite. La condición que punxo pa nun pagar rondes de caru llicor d’estraperlo foi traer les meyores cuentes de tola compañía tiradores. La disculpa foi la tensión. La mala alimentación. L’acosu de los francotiradores serbios, que tamién actuaben na zona. Y eses razones nun yeren cosa valero pues, ciertamente, naide de los fusileros podía dicir que nun fallase, polo menos, un par de veces al día na captura pieces. Los serbios siguíen activos pela zona magar tener sío, teóricamente, desaloxaos y los blindaos de la IFOR nun facilitaben el trabayu del tirador al guardar a la xente. Sí. A partir daquella fecha los fallos, pol cansanciu embalsao de tres años de sitiu y los combates pa francelu, diben aumentar.

VII

Esta vuelta, la moza apaició bien ceo. De xuro qu’allampiaría por comer el pan calentino d’ Evstafiev. Pensó nel pan fumeante que, de nenu, daba-y so má recién arroxáo. L’arume de la miga d’escanda calentino cuando furaba’l bollu y metía nél el trozu llonganiza corderu. Aquello agora paicía-y bien llueñe en tiempu y llugar y, por embargu, inda golía l’arume de la fariña, de la lleña amburando en fornu, de la masa lleldando. Recordó les manes remusties de so má, grandes p’amasar y cuidar de la muncha reciella, llevar la casa, la güerta, la vaquería...

Vio a la moza tan indiferente al peligru como ‘l día anterior. Eso nun yera bono pa naide y menos pa una muyer tan interesante. Corría munchu peligru y tenía decidío avisala. Si disparaba primero los otros francotiradores sabríen que taben hostigándola y la dexaríen en paz pa que élli pudiera cobrar la pieza. Fallar garantizaría-y, a lo menos, otru día de vida. Asina que gustosu recibió ‘l llampiazu de la culata del G22, que paició quexar por nun cumplir bien el so papel de guerra.

VIII

El ritu absurdu de decidir quién viviría y quien non, siguió infame. Unos pocos muertos enantes o depués acababa apareciendo la misteriosa moza de serena mirada y descuidáu pasu. Y el ritu de siempres lu repetía pa salvala de los collacios de caza. Fallar el tiru faciéndo españar la bala énte los sos pies. Y cada día, cabo’l ritu venía una estampa del pasáu non tan alloñáu, d’Ivek; una pincelada de collor humano que completaba un cuadru esistente, mas inoráu, por munches capes de dolor embalsao y fríu en alma.

¿Acaso toles muertes son iguales? El mal aprendiz de mal dios, Ivek, namoró d’aquella muyer ente sangre y sangre. Cumpliendo un trabayu irrevisgable, fíu de la dómina, del horror y la traxedia, tan víctima como victimariu, pudo semar el biltu del amor humano pa que frutiare l’amor amante de renuncia.

VIIII

Verdá ye que’l destín del home ye’l qu’elixe l’home. Pero, dacuando, ye’l destín quien t’elixe Por exemplu, en Saraxevu 95.

Costante Alvarez