(UNA) INTERPRETACIÓN DEL FUTURU

07.05.2007

FUTURIBLES

Entrúgame una moza pola interpretación del futuru. Ye normal que en relaxaciones o, más frecuentemente, en meditaciones, ciertos individuos tengan revelaciones d’un hipotéticu futuru como reflexu funcional de cierta capacidá premonitorio residual que tolos humanos podemos añerar. Esto solo ye cosa misterioso pa quien lo ñega pero barrunto que va ser cosa normal d’equí a un tiempu. Les capacidaes celebrales humanes necesiten más tiempu pa desendolcar que les, digamos, puramente físiques, pues necesiten concasar con un planu enerxéticu superior. Pero esto merez otru tema, dixebráu dafechu del que planteábame la mocina. Porque élla falábame de lo que podemos arrevelar, y dicimos, del futuru previsible; de cómo lu describimos y los fallos que cometemos cuando, algamáu, nun concasa, nin pol forru, colo predicho por gurús y demás gandaya al usu.

La tema suscitose en viendo la película “Solaris”, d’Andréi Tarkovskiy, basada na novela homónimo d’ Stanislav Lem. Una clásica, cabo “2001 una odisea”.

El tema d’un futuru previsible ye prestoso al empar que curioso. Toos queremos adivinar cómo va a ser y puxamos por conocelo, siquier parcialmente, en base a lo único que se tien a manu: el presente. Ye fácil decatase de que con esta blima mala banastra se fai. Fuera de la condición premonitorio, el futuru ye daqué cosa incierto, escasamente previsible y, por definición, inalgamable. Tanto como ‘l pasáu, ta fuera de la esperiencia humano directo pues solo ye productu de la realidá material na que desendolcamos como condición arreyada al tipu de tiempu que (piscolóxicamente o non) se vivi. Ye’l tiempu “cronolóxico” o relativu. El componente temporal ye necesario nos sistemes “materiales” en cuanto poséen dimensiones mensurables dientru la matriz espaciu-temporal. Pero una cosa ye lo que ye y otra cómo anticipa la mente humano aquello que’l decurrir del fluxu temporal va (o pué) traer.

Les bones películes añoses que traten el futuru del home, neto que dalgunes publicaciones de los años 70, dicíen lo que diba ser l’añu 2000 con una seriedá plasmante. Alcuerdome de ver los fantásticos coches marca Ford que nel 2000 diben esnalar col gabitu de minimotores ñucleares llevando al ama de casa a mercar al “supermarket” con tol aspeutu y condicionamientu del ama de casa de la década de los 70 pues, sorprendentemente, la muyer diba de mesma traza y forma que l’amantísima esposa y má d’esos años. En “Solaris”, la estación espacial asitiada nel “océanu” d’esi planeta, recuerda una bocamina con muncha lluz fría y parés estraes de primitivos osciloscópios y muncha, muncha, pintura realista. Nel futuru de “2001” la muyer sigui siendo servil y floreru, ausente per dayures. Cosa, too ello “normal” pues ¿cómo imaxinar y, amás, atrevese a describir un futuru cuando siquier nun se tienen les pallabres, tamién futures, que lu describiríen cabalmente?

Poro ye que’l futuru que l’home imaxina (y que, a la llarga, quier forxar) nun ye más qu’una nueva versión del presente. Gracies al desendolcu teunolóxico, agora imaxinar el futuru reduzse a amestar al presente más y meyor téunica pero la semeya del futuru parezse siempre, sospechosa y infelizmente, al “imperfeutu” presente que lu cucha.

Describir un futuru razonable, o creíble, debería tamién adelantar el paradigma de lo social. Amestar cartón piedra de rescamplantes collores, cables lluminosos y voces d’ordenadores piquiñinos, con muncha realidá virtual y pocu cerebru nos caxellos humanos nun parez otra cosa que l’exerciciu creativu d’ún xueu de PlayStation o Nintendo. Nesi sen, lo bono de “Solaris” ye anticipar un futuru humanu poniendo énfasis nel propiu devenir moral del home, nes necesidaes y productos de la so propia psique, tolo cualo fai eo productu intemporal, irrelevante ‘l decoráu y les infantiles alfayes teunolóxiques (bien probres pa la dómina) que la novela y la película amuesen pa facer creíble esi futuru. A la escontra, “2001” pérdise en xuguetes y maquetes preciosistes arramplando al home la batuta del so propiu destín en “beneficiu” d’un supuestu ente superior qu’apurre negros finxos pel espaciu que semen la vida y intelixencia con enfotu inesplicable.

Desconfío por sistema de los sirviores de la relixón de lo futuro. Salvo que sían dioses menores (cosa que duldo muncho nesti intre), lo que traten de vendeme ye otra versión del presente, puéque dulzaplayo o más prestoso porque afalagarán baxos istintos y altes carencies. Por exemplu, una Asturies anticipada asina ye meyor que quede pa prau. Camudar una gocha por otra dexa igual de puerco la corripia. Quiciabes fuere meyor esbarrumbar la corripia pa que nun hebia ónde meté-los gochos.

Costante Alvarez