UNA Y OTRA VEZ...

29.04.2007 Oyo quexar xente alrodiu del salariu de los políticos. Fainlo por cuenta, y al calíu, de la comparecencia del Sr. Rajoy, (líder del PP, partíu conservador español) nun programa televisivu en que nun dixo lo que ganaba énte la entruga d’una pensionista que confesó ingresar por esi conceutu unos 300 €bros. La xente encabrona, de pasu, pola confesión d’ésti home “a posteriori”, (sinceridá mediante) na qu’afita percibir un salariu mensual d’8.000 €bros, cosa que nun reconoció, cuando la entruga, por vergoña al oyer lo que la pensionista cobraba. Oyer esti quexume xeneralizáu respective la desporporción ente lo que ganen los “nuesos” representantes políticos y el común de los mortales que, al fin, ye quie caltién (y sufre) el sistema económicu qu’alimenta a la bestia ye, pa min, vieya música. Llevo oyéndola va, polo menos, cinco mil años. Y si me punxera requisitu, dende l’entamu los tiempos. Y munchos más podríen decatase d’ello (de lo repetitivo del canciu) si miraren más allá de lo evidente. Una curtia reflexión ye comeniente (bona rima). Frente a Heráclitu y la so teoría del logos y la imposibilidá de bañase dos veces nel mesmu ríu, opongo la de la sustancial inmutabilidá de la condición y, poro, de la sociedá, humano durmiente. L’aparente realidá camudadora de los tiempos, lo transitorio o impermanente (Budha dixit) de la vida pescanciada en términos como economía, poder, ciencia, descubrimientos etc, concasa mal cola evidente repetición, testerono y cafiante, de comportamientos y vezos, de soluciones y problemes que configuren lo que llamamos “realidá social” pues, daveres, todo ye lo mesmo dende la caverna de Platón o del neandertal. Namái camuda la tramoya, repíntase l’escenariu, engranda o amenorga l’elencu d’actores, xube’l preciu de la butaca o del panchón pero la obra de teatru ye la mesma: interminable, divertía, horroroso, cruel, penible, lloroso... La condición gregario de la especie humano desixe xefes, caciques o gallos quintaneros cabo intermediarios de munchos dioses y diosecinos, too ello caltenío pola imensa masa oveyo que tien derecho a pensar primero na hipoteca, na xarré de dos tiros, na motocicleta de 1000 cc, nel circu o la comida diario. Nun toos (solo aparentemente) podemos nacer en families clientelares riques y poderoses, o na estirpe real, na fidalguía o noble condición. Esta pirámide social (que nun ye precisamente la de Kelsen), con unos pocos enriba y otros munchos embaxo, ye la mesma dende que, monos y nada guapos, baxemos del árbol. Poro, distribuyíu asina el mundu social, (lo que permite sucesivamente arriquese ún nel tiempu absolutu con múltiples esperiencies frutu de los diversos papeles actuaos na obra de teatru de la/les vida/es) pescánciase perbién el que too sía lo mesmo y que l’encabronamientu frente a la inxusticia sía crónico y recidivante na casa del home. Agora, anguaño, la obra de teatru tien munchos más collores, más estrebeyos teunolóxicos, más realidá virtual escasamente virtuoso, más comunicación qu’incomunica, más soníu pa sordos, más (y meyor) esclavitú. Esapaicieron les cadenes reales camudaes poles virtuales. Agora, el cacique nun visti piel de lleón o d’osu, pero marca la dixebra d’status con caru diseñu francés y/o zapatu italianu de manufechura d’esclavu chinu. El conde ya nun desixe ‘ l derechu de pernada porque te fodia (bien xodíu) vía salariu, conveniu coleutivu, estatutu de función pública y otres alfayes amañoses pa pisate la cabeza de la que te mete manu en bolsu o bragueta. Agora ‘ l Rei Sol sigui allumando na cume del poder al amparu de l’axencia tributaria de turnu y, como non, l’exércitu y la banca, la depositaria, tamién, de los cuartos del Rei. Agora viaxamos más rápido p’aportar, como siempre, a nengún lláu verdaderamente provechosu pal alma. Siguimos caleyando ‘l camín del burrín arreyáu a noria que xube l’agua que’l burru non bebi. Mas, como dixo aquél presocráticu, sigui siendo l’home la midía de too y el resto, daveres, son forgaxes. Too ye lo mesmo y Heráclito nun lo vio bien. Quedose colo evidente neto que l’invidente que, pa la so desgracia ciegu, desconoz el paisaxe pel que pasa. Y asina pasa la vida de los durmientes, repitiendo lo mesmo hasta que’l cuerpu calla... Ye bono nun tar cómodo na piel social qu’ún vivi. Ello invita a rascala y pueque col tiempu una piel nuevo te faiga más llevadero la obra de teatru. Costante Alvarez