LIBERTAS SUPREMA LEX

11.06.2007

“Libertas suprema lex esto” -------------------------------------------------------------------- Ye frecuente que me lleáis esta frase llatino que me presta pola vida. Arromendando a ún d’aquellos “decenviri” (puéque míticos) que fixeren la llei de les doce tables, (orixe y gloria del derechu consuetudinariu romanu que cristalizaría no que güei llamamos civil) ordeno a la llibertá como finxu cimeru del home. Pero ye curioso esto de la llibertá. Munchos enllenen la boca d’ella y encabronen escontra dictadures y otres istituciones polítiques que, presuntamente, esclavicen al home. Ya nun hai (tanta) xente como antanu. Xente, aquélla, que podía dar la vida propia pola llibertá de los otros, pero queden babayos que se manifiesten muncho, y ruxen inda más, y fain esparabanes milenta pa escontra la guerra en llonxanos sitios; pa escontra fame d’africanos sitios, y d’enceses sableres de la mauretania clásico o de selves amazóniques sapozando n’oru prieto y sangre roxo d’inditos espulsos del paraísu verdoliego. Ciertamente hai muncha poesía nesos movimientos de noble enfotu y presumible raigañu humanisto. Pero, pero, pero.... ¿Nun ye más cierto que vese meyor el paisaxe dende llueñe? ¡Qué guapo rispir pola llibertá de los otros tres pancartes, cartelos, ONG-“he.tes” y otros antroxos narcotizantes. Ven lo malo del mundu pero non el raigañu del mal pues el tueru que caltien la gran solombra de la ramascaya d’esi árbol de la inxusticia tá enforma prósimo. Sí. Nun ha dise mui llueñe pa ver ú entama esi “mal”. En términos hipócrites, muncho d’ési tá en nós. Cuando Eric Fromm espublizó aquel llibru entituláu “Miéu a la llibertá” cuido que nun se decató de que l’home, en realidá, nun tien miéu a ésta sinón a “descubrise” como ser non-llibre. Poro ye que la llibertá interprétase como daqué esterno al home, como situación oxetivo consistente n’exercer un garrapiellu derechos ensin torga nin pilancu. Pero si la llibertá forma parte de la sostancia del home ye, precisamente, porque funde los raigaños nel so propiu ser. Lo otro, la esternalización interesosa d’esa llibertá, ye un espeyu, una consecuencia, una engañifa “política”, un porgüeyu social cultiváu por quienes necesiten exercer control sobre vides y padremuños ayenos. Eso, y non otro, ye lo tarrecible de la llibertá: el descubrise ún mesmu esclavu d’una engañifa que vende, precisamente, llibertá y, cabo d’ello, un subproductu que llamen democracia. Más esto llevaríame a otra tópica. Prefiero quedame na casa interior. Aquellos que más ruxen pola llibertá de los pueblos, pola falta manifestación d’ésta na cultura o notres estayes del conocimientu humano, frecuentemente (por nun dicir nunca) nun se miren nel espeyu del yo-presente. Si lo fixeren veríense bien esclavos d’ideoloxíes o relixones (cuando non de porgüeyos inconfesables) que solo apurren xustificaciones pa narcotizar una situación personal desconocía. Mientres iguamos la casa del vecín (cosa mui d’agracecer) nun sabemos cómo tenemos la nuestra. Viviendo p’afuera sobrevivimos adientro. Nestos términos, nunca nun acabará la inxusticia. Nunca nun habrá llibertá abondo. Y, claro, siempre seremos necesarios pa rispir pola falta llibertá..... de los otros. ¿Nunca nun vos entrugasteis por qué, siempre, algamamos na vida cantidaes industriales de lo que nun queremos, de lo qu’arrenegamos, de lo que, en resume, mos fai infelices? A pesar de tantu puñu en altu, tanta manu llevantada, tanta sangre sementao, el mundu d’anguaño nun ye meyor que’l d’antanu. Cierto qu’agora mátase más, mátase meyor, mátase más rápido... Cierto que somos munchos más pero ¿somos más felices? Y ye que, como ‘l culu, toos tenemos una idea de lo que ye la llibertá y lo que facer por ella. Pero creyendo sabelo escaecemos que solo una persona que sabi y vivi la llibertá interior realizará la llibertá esterior. Si tas amaláu pola rensía, la envidia, l’odiu, el sectarismu... si yes un ensame contradiciones interiores lluchar pola llibertá de los otros ye una forma más d’establecer y emponer otra tiranía a los otros: la de les tos carencies. Costante Alvarez