CUENTOS DE PEL BRANU 2007

19.07.2007

Procuro mangar un cuentiquín tolos branos. Aende va ún. Que vos preste. Cuentos de pel branu. 2007 ----------------------------------------

EL VIEYU SABIU

Yera d’aquella un home vieyu y sabiu. Vieyu porque yá facía tiempu que peñaba ñeve, y sabiu porque teníase por feliz poseedor de rempuestes a esperables entrugues. Y nesta iguadura taba l’home, asina pagáu de la so ciencia y poca sobeya, cuando un bon día nun quixo llevantar del catre. “Ya valió”, díxose con voz sele de la que desalendaba. Aquel aire espulsu talo paició sali-y del alma. Como había tiempu y tiempu que nun cuntaba’l tiempu nun sabía satamente cuántu tiempu de vida esfrutare. Y como viviere vida abondo nun yera a sátamente tolos fechos de la vida vivío. Tampoco fue a calcular la sabencia atiñazao na engurriada cabeza de grave pose. “Yá valió” repitio y dispúsose a dexase llevar polo que fuere que-y pudiere pasar. Entrín y non aportaba aquello que nun sabía qué podría ser, pela mente entamó a desenvolvese-y la vida y los sos frutos. Vio la infancia, l’adolescencia; vio la meyor y la pior edá, la inocencia, la concencia y conocencia. Mayestros, adivinos, muyeres y caminos. Munchos caminos y caleyes, y xornaes de pesar, gayola y desesperu. Nun xuasús atopose de vuelta na cama, encoyíu pol fríu tarazante d’un xunetu indecisu. Al cuntar colos baltos del corazón decatose de que nun pasare muncho tiempu na evocación. “Toa una vida nun parez muncho visto asina. Tantu tiempu vivío y en tan pocos baltos medío... Daqué escaezo y nun sé cualo” noxó consigo por cayer na cuenta del pocu pesu de tantu presuntu posu. “Pueque la vida namai sía esto, dir de la nada a l’olvidu”, razonó. Y un güelpe na puerta sacolu d’estos camientos. Dende había unes feches, cuando morría la tardi y yá taba en pulgueru, daquién vinía a picar na puerta. Y pa esi tiempu de dir chucar, de palmiar veles, el vieyu sabiu nun facía casu d’ello. “Yá volverá mañana”, y acuruxaba baxo sábana y mantes de llana grebo. Sabei, amiguinos, que’l vieyu sabiu sigui inda na cama. Tovía podríeis velu si enfiláreis pa Caborniu de les Careses, na Parroquia d’Ules, y entrugáreis pol vieyu sabiu. Naide sabi la edá que tien y tovía quexa de que-y piquen na puerta cuando nun son hores. El vieyu sabiu sigui remembrando la vida vivío, lo bono y malo de les colleches de tiempu que fexo. Y sigui noxentu porque barrunta que daqué se-y escaez cuando fai l’enésimu resume d’una espurría vida de serviciu y trabayu. Yo, que nun soi tan vieyu nin tan sabiu puedo dicívoslo. Ye que’l vieyu sabiu ye inmortal y nun lo sabi. Tolos díes pasa la carabiella pela puerta. Pica pa poder entrar, pues respeta les ñeves y la sabencia d’esi home y, como nun-y abri y tien munchu trabayu pa facer, cola pa volver al día siguiente. Y asina pasen los díes, selmanes, meses... Amás de poesía, ¿milagru?, entrugareisvos. Non. Cenciellamente que l’home sabiu escaeció, d’ente los recuerdos, la natural estación de l’acabación. Namái recuerda la vida y, como deberíemos saber, solo muerren aquellos que creen (y por tanto, críen) na muerte. Costante Alvarez