MOET

04.01.2007 MOET Veo l’anuncia d’una xampaña fraceso y decátome al puntu de que nunca nun van camudar los vezos publicitarios. En realidá trátase de xugar colos potentes istintos humanos y masuñar, hasta l’aburrición, les emociones primaries reptilianes. Lo que me maravía nun ye esa descarada falta d’imaxinción sinón el que, gastando perres asgaya el moet-chadón de turnu, los mesmos esquemes machistes y machistos s’espresen con tanta indulxencia. Indulxencia plenario, diría un creyolo. La marca xampañero merca la idea al creativu que, imaxinativu, xúncese (nel sentíu más agrícola y campesín del términu) al carru-moda del “bi”, mangando un “bi fabulius” con estrellina de llamada nel marxe superior isquierdu de la semeya, y amestando otru, “bi respónsibol” (supongo que colo de la inxesta d’alcol) al pié de la mesma. Unos “bis” que mui bien podríen espurrir notros munchos “bis”, mesmo hasta ‘l “bi babayu”. L’anuncia, evidentemente, nun va empobinao al ricuhome fartu de xampaña sinon al “probe” con enfotos de ricuhome. La composición fotográfico, enmarcao na puerta trasero derecho de potente y esclusivo xarré deportivo negro, con gran llanta (barrunto que de 16 pulgaes, cincu tuerques, duraluminiu y calzao con neumáticu de perfil baxu) amuesa l’iconu clásicu del deseséu heterosexual norteamericano esportáu yá per dayures con dobles moces en versión rubio y moreno, con ésta última en primer planu, llarga melena enmarcando cara cuadrao maquillao con povisa mesto marrono-beigué mui bien de tipu Black Glem de Giorgo Armani; güeyos con solombres con rescamplíos plateaos, posiblemente de Burjois y d’Estée Lauder, perfilaos por mázcara buxo escuro qu’enllarga les pistañes d’Eye Fly 16 de Givenchy y, p’acabu d’esta zona, llabios entullíos perfilaos por tatuaxe con aplique de lixero llustre sobre collor na gama del rosa. Visti traxe de nueche d’una pieza, minifalderu,, mui bien de saten collor burdeos que cruza les mamielles con drapeao per baxo les axiles, amosándo aquélles daqué breves más pingayoses, al puntu insinuante y revolvicu. Sentada la moza na banca trasera de la xarré, saca llarga pata afeitao a la cera, con pié calzao en zapatu de gala, blanco, de tacón de non menos de venti centímetros, abiertu con colgaxos doraos na tira qu’encinxa. La mandrecha, vistía con aniellu reventón, garra la botella pel gollete y la manzorga, con triple pulsera de piedra blanco engarzao n’oro (parez bisutería barato) caltién la puerta abierto, invitando a entrar. La moza rubio mira de lláu dende dientro, más vistía y enigmático. El conxunto ye previsible y anorésico. Trátase d’una anuncia invitando, esplícito, a un polvu. Lo cualo ta bien si eso ye lo que a ún-y prestaría. Pero cuido que ‘l probe que dexe los munchos ebros que cuesta una moet-chandon nun va catar eses vaques. Ente otres coses porque tienen aspeuto de tar bien estrincaes. Follar estos escalagüertos anorésicos podría ser interesante trabayu de campu pa un monxarratu “bonista” (esa xente que diz que “to er mundo e güeno”) de la secta del “cordon-bleu”. En fin, ya lo afita la llienda que pon l’anuncia perbaxo les moces: “camuda una salida nuna entrada”, por supuesto, faltaría más, na mui francesa llingua ingleso. El conteníu sexual ye mui evidente. Traducío al metallinguax del probe qu’aspira a ricuhome: en cuentes cascala pa correte solitariu, méte-yla hasta’l fondu. Almítense otres interpretaciones más intelestuales. Costante Alvarez