CUMPLEAÑOS

31.05.2007

Aprovechando que’l conveniu reconozme díes particulares, garré ún pal cumpleaños. Nací (emplegando’l verbu cabalmente como transitivu) a les 8 la mañana y propunxome la muyer recibir un masaxe metamórficu a eses hores. Ye evidente que nun diba llegar a tiempu al tayu así que dicho y fecho. El día de nacencia de ún ye bien misterioso, si abres les entendederes y el terapéuta que te fai el masaxe ye competente. La cosa ye que nesi intre rememores el fin del vínculu orgánico cola má y l’aniciu de l’autonomía aeróbico. Ye entóncenes cuando entama a desendolcar l’articuláu del contratu que traes pa la vida y yá nun hai reculu posible. Si tienes la suerte de tener un terapéuta sensible y competente algames cierta información que te va confortar. Y la información inclui espurrir l’entendimientu de ciertos sucesos que na vida cotidiano nun tienen fácil desplicación. Cierto que pués enanchar eses entendederes a güelpes d’esperiencia vital pero cuido que ye meyor, y menos estresante, facelo cómodo nun diván, cama o sillón. Por exemplu, siempre fui mui severu pa con mio má por contemplar abondo a mio hermanu piqueñu. Facíaseme empruno pescanciar el porqué toleraba los munchos problemes que-y daba, desdexos, rebexíos y aventonos. Yo-y dicía que nun podía vivir la vida de los fíos, que tenía que dexar que la vida lu posare, que lu acallantare a base d’esperiencies y sucesos que, masque doliosos, ensiñaben más qu’un llibru abiertu o los milenta conseyos que-y daba de continu y que-y esvariaben como agua de lluvia. Mio má escuchábame, cierto, pero siguía a la llabor atapando furacos económicos y recibiendo, masque nunca me lo dixo esplícito, cierta violencia físico y psicolóxico del pequeñu dictator. Cuando los hermanos, fartos, dexemos de lláu al piqueñu, mio má siguió aneciando nesi llabor que, víase claramente, nun diva valir pa “rexeneralu” social o familiarmente. Ausente agora mio má, el menor sigui pel mesmu camín y non duldo que lo que tanto-y encamenté a l’autora de los mios díes yera melecina amayoso. Mas agora, pescancio la razón de ser de mio má pa cola oveya negro del suqueru. Solo l’amor d’una má tien fuerza abondo como pa facer ausente lo que de sigo rescampla per dayures. Ella sabía perbien lo que yo-y dicía, y que la melecina que-y recetaba pa mio hermanu yera razonable y afayaízo pero, ¿cómo superar l’amor incondicional d’una má pal so fíu pequeñu, el más necesitáu de comprensión, el más esgarrapetáu de nós? Si dalguna vez tuvi de buscar un exemplu d’amor incondicional, un amor de duración illimitao y puro como agua cristalino, nun ncecesité acudir a relixón rebelao dalguno, a filosofía antropolóxico o secta humanisto. Nun tuvi de faceme ‘l llistu o dir en cata d’otru argumentariu que nun fuere l’exemplu de mio má. Teníalu en casa y tardé en decatame d’ello. Camín del mediu sieglu, tovía toi en delda con esi amor qu’inda nun alcontré tan concentráu, puru y sanu notru sitiu que nun fuera abellugáu en cuellu de mio má. Costante Alvarez