Talante

22-11-2007

SOBERBIOSOS

La “dómina” del presidente Aznar pueque mos truxera un ciertu intentu d’aggiormanentu na autoestima española pero, coses del poder, nin lo supo vender nin desapegase del síndrome autista qu’amala a cuantos cain nes garres del poder políticu añeráu nel palaciu de La Moncloa.

Siguiendo’l mesmu camín qu’aquél que denomen “facista” los neofacistes amazcaraos de facistes (pero bermeyonos, con banderes y modos totalitarios) el presidente Rodríguez, con esi aquél del bon cazurru-cazurru, refocila na soberbia de querer facer de los españoles xente cabalmente bonal. Franco mos quería imperiales, católicos y decentes. Rodríguez quier emponer otra cosa, la tolerancia y, superando al caudiellu gallegu, el tal Pachu Forquetu que cito, tamién otres virtúes: les teologales y les humanistes y les “bon-rollitoiste”... Arrodiáu de ministros pánfilos, babayos, soberbiosos y cientístes el camarote de los hemanos Marx nun pué tar meyor acorrompinao de "goods vibrations". Mas el síndrome autista sigui amalando a los mandamases españolos y Rodríguez quier disimulalo con esa hipocritez típica de quien se sabi superior (éticamente, claro) al otru.

Lo malo d’esti perdonavides, esti tolerante solo-de-lo-bono (o sía, de lo que yo camiento y digo, nun vaigas a pasate, nenín) ye que parez el perfeutu fíu que toa má quinxere tener, el meyor xenru, el meyor güelu.... En seyendo tan perfeutu, ¿cómo-y ñegar, siquier, el saludu? Mas, como tolos hipócrites políticos, ye más grande la peana que’l santu y, poro, l’analís más indulxente nun pué desfilar l’auténtica naturaleza (corrupia) del personaxe.

Duros tiempos estos. Pasemos de querer ser collacios del emperaor a ser enemigos (eso sí, progres y esquisitos) del imperialismu del emperaor (solo de boquina porque, nel fondu, ¡tan tan bones les hamburgueses del emperaor!). Duros porque d’aquello d’Aznar pasemos, sangre mediante y apedreamientos al gritu d’"aseisinos los del PP", al "buenismu" del café pa toos... pa tolos que nun sían del PP. Ye la tolerancia de los muertos.... de risa.

Pero si falamos de tolerancia y paz, daveres que nunca nun ví tanta tolerancia como nun campusantu. Eso sí que lo ye, y non lo que vendi esti Rodríguez que, por cierto ¿daquién sabi si trabayó por un salariu del mundu real con patrón y contratu precariu o por cuenta propio enantes de zucar del tetu presupuestariu? Como bon parásitu o sanixuela, sospecho que nun se-y conoz méritu dalgún pa ello, pa ser lo que ye, sacante cierta habilidá pa esguilar nel escalafón de parásitos y xente-bien que trai esta nueva democrácia orgánico (remedu franquista) que son eses empreses del votu y la corrupción llamaes partíos políticos "mayoritarios". Democracia, democracia ¿por qué tienes les patines tan curties, tanto como les mentires?

Lo dicho. Mientres los de La Moncloa mos envelenen con ideoloxía, xubilen col "trabayu" de 4 años n'escañu d’aristocracia partitocrática y vivin refocilando en privilexos y regalíes varies, el restu de mortales pena, paga y pidi, inútilmente, que mos dexen en paz y, tamién, de robamos metiéndonos les manes en bolsu sin permisu. Sobremanera, que dexen de robar.

Costante Álvarez.

PODER, DUCE AMARGUEZA MORTAL

21-11-2007

PODER, PODER. SIEMPRE Y MÁS...

Freud afitó lo sexual como motor del ánima (humana) pero cuido que, como yá dixi notra ocasión, ye otra cosa el motor d’esta especie animal, cruce ente lo dañible y lo prescindible.

La quintaesencia del ánima, esi elementu misteriosu que camuda plombu n’oru, curiosa sostancia, incoloro, ingoloro, incomible, intocable.. ¿insensible?.. nun ye la cosa sexual sinon el poder. Por redución, si se quier al absurdu, ye eso, poder, el poder en sensu latu. Too surde d’él y too vuelvi a él. Quien nun lu tien, lu allampia con prestura y en tristura, y quien lu alforxa, lu alministra atuñón, desconfiáu y sollerte pa evitar la perda.

Si ún camenta nesto, en realidá son les relaciones de poder, l’ausencia o presencia d’eso que los xuristes llamamos “imperium”, la posibilidá d’alministrar premios o castigos que van modular el comportamientu del otru (neto que lo del perru de Paulov) lo qu’amala, corrompe y “encáncana”, lo que trai perres, nomadía y miseria, l’éxitu y el fracasu, nivela les clases o les gradúa en pasera que va d’infiernu a párnasu, d’esclavu a siñor.

Los humanos acompasámonos al baltu del poder. De quiénes lu tienen, de quienes lu exercen, o lu sufren, o lu tarrecen... Piensa en cualuquier problema, personal o social, nun va importar el tiempu, el llugar, la cultura, la llingua, la economía que too reconduzse, reduzse, y concentra neso, nes manifestaciones del poder y de los sos molacinos.

El sueñu ácrata tien muncho de valoratible y inda más d’imposible daos los finxos nos qu’afita el sistema humano na so sobrevivencia. Nesti espolazaderu en que sapozamos y enmierdamos (por activa o por pasiva) parez una necesidá exercer y sufrir les dixebraes manifestaciones del poder. La potestas, l' imperium, l’antoxu soberanu...

Siéntate y alienda fondo. Pieslla los güeyos. Calma la mente. Si fais esto y entames a atendete, pero a atendete daveres, vas a ver la comedia del mundu, la llobada en tránsitu y la oveyada n’estociniu. Vas oyer el llantu d’esti mundu, el dolíu d’almes y música d’acabación. Nun importa que sías auditidivu, visual o sinestésicu pues per toles canales de conocimientu de lo esterior va a aportate el gran duelgu del mundu, ello ye, l’aciar collecha de l’andancia del PODER.

Y, por embargu, de magar lo duro de la esperiencia cotidiano, de contino renaz y renueva l’allegria de la vida, la gayola del ser espresándose nesta dura escuela, nesta imprescindible universidá que ye’la Tierra, tierra de promisión pa los escolinos que son les almes.

Que somos nós.

Costante Álvarez