Xente qu'anda perequí :-)

viernes, diciembre 26, 2008

IDEALES

La medida del home son los sos ideales. La so perdición, la ideoloxía. De xuro que tamién tien idées y, cómo non, dotrina, pero ye esi borrinosu conceutu qu'implica camín de perfeción hacia un fin noble el que lu elleva perriba la mondicia y basoria emocional y material en que-y presta esllamargar.

Los "Ideales", na posguerra incivil española, yeren una marca de tabacu malo, de picadura reciclao, que permitía calecer, brevemente, a quien lo fumaba. Frente a esi caldiu fuéu en refocilu, que ye'l tabacu, son los ideales combustible de mayor altor. Pero los ideales nun se críen albentestate, nun se merquen en rastru o centru comercial: hai que los afayar dientro d'ún entrugándose por aquéllo que paga la pena facer, amar, compartir... pa meyorar la condición y calidá humanes. De tan cenciello que ye, mete miéu.

La mayor parte de la xente tien rocéa a mirase dientro. Talo diríase que nun quieren mirar a esi degorriu que paecen llevar de compañeru y que, bramente, nun lo ye porque nin ye collaciu nin demoñu. Por mangá-y un nome, aquél ye solitú y ésti, desamor. Criamos los pantasmes que mos afueguen y arreyen a esperiencies dexastroses que, producíes, fain fuerte esi desamor cristalizáo en desesperanza y acabación. Pero la realidá ye más rico que tola teoría y collacios y corninos hailos en munches manifestaciones y calidaes. No diversable del alma humano enraigona la ESPERANZA, con lletres mayúscules por si un cegaratu nun ye a velo.

L'actual crisis económica, qu'anicia nel 2006 y espampana nel 2008, ye bona oportunidá pa tracamundiar conceutos y dotrines. Toles crisis que conocí y estudié valieron pa lo mesmo y toes traxeron daqué interesante pal home. Y digo bien, pal home, non pa la Tierra y los sos serviores naturales pues pal ecosistema terrestre los homes somos alieníxenes, malura corrupio y destructivo. La crisis de la que falo nun ye nada orixinal na so sustancia porque descansa na mesma naturaleza humano. Si miramos p'atrás daqué paecío se vivió cuando 'l llamáu Imperiu Romano colapsó económicamente. Siempre ye lo mesmo: egoísmu y fuñería, y estos biltos siempre rinden la mesma collecha: probitú y desigualdá. La diferencia ente les crisis siempre ye la mesma: el gráu tenolóxicu de la dómina pero los resultaos son, tamién, iguales porque un esclavu d'hai 2.000 años nun taba meyor (o, quiciabes, sí) qu'un esclavu (perdón, quinxi dicir trabayaor) por cuenta propia o ayena d'anguaño.

L'home repite los mesmos erros una y otra vuelta porque, parezme, nun mira dientro de sigo pa esmucir d'esa suerte d'esclavitú etno-xenético que parez afogalu. Nun lo facemos meyor que cuando adorábemos al ríu Nilo, navegábemos en barcos de "totora" pel imensu océanu Pacíficu o nos matábemos na llanada d' Olduwai.

Agora, igual que siempres, solo somos porque consumimos. Sé que ye murnio descubrilo, pero asina ye. Siempres consumimos. Consumimos ideoloxía, creencies, relixones... nun importa el nome que-y demos a eses "idées", a esa "comida" que, dende FUERA, adoptamos como solución, único y verdadero, pa tener una esistencia feliz. Y agora l'adobiu d'esa comida llámase "teunoloxía de la información", "llibre-comerciu", "globalización"...

Como vemos, conceutos toos "ex-trínsecos". Trátase de vivir FUERA de casa cuando ye dientro ú tenemos la foguera que mos calecerá güesos y espíritu. ¿Quién, pudiendo, fadría llumeral albentestate pa calecer n'ivernada teniendo dientro la so casa bon llar y fornu? Dende llueu, naide "normal". Mas, lo "normal", hai tiempu que nun lo ye na casa del home.

Poro, seyamos "anormales". Vaigamos en cata los ideales que lliberarán de la sufrencia al planeta y al home, como el so arrendatariu. Fundamos nel interior de caún p'atopar aquello que, evidente, ye.

Bones Navidaes, si ello significa daqué pa daquién.

Costante Álvarez

martes, diciembre 23, 2008

Aforrando Miseries

Anden (dalgunos) funcionarios del Principéu esmolecíos por nun tener esti añu la tradicional xinta de navidá que se facía'l vienres qu'antecedía a la fiesta de la (aproximao) muerte del iviernu. Esti añu la cosa yera dar exemplu, dixeron los políticos, pues consacaba mui mal la crisis económico cola folixa de los trabayaores de l'alministración autonómico. Ta bien.

Cuando 'l yá xubiláu Juan Morales, "co-equipier" del programa de RNE "No es un día cualquiera" tuvo la feliz idea de mangar nel portal internético d'esi programa la frase que dicin que dixo'l filósofu griegu ISÓCRATES de xuro que nun sabía 'l gran favor que facía a munchos que, diciendo lo mesmu qu'aquél gran gallu de la quintana inteleutual (espero) nun teníen la verba afayaízo pa espresalo. En realidá Isócrates pronostica la muerte de la democracia y esclaria les causes d'ello.

Yo, que nun tengo les lluces d'aquél, acordio col pronósticu y tengo l'atrevencia d'amestar otra: la hipocresía. Cierto qu'ella pue considerase como pecáu "minor" pero atopo que, mire a ú mire, ye la hipocresía'l sangre de la democracia. Y mesmo que la babayez, que cuando universaliza invisibiliza, asina alcuentro a la hipocresía y a los hipócrites perfeutamente ausentes, prima facie, de la sociedá. Y, por embargu, ye aquélla, y son éstos, los que mueven los filos del poder y los sos malfadiaos daos.

Cuando trabayaba nel Serviciu Públicu d''Emplegu del Principáu, una paisanina, que llaboraba como cocinera con contratos puntuales, daba gracies a les comíes de fin de navidá del Principéu pues, gracies a ella, el restaurante La Campana, ente otros, contratábala unes selmanes enantes d'elles pa preparar el convite. Los políticos, AGORA, cuando ven les oreyes del "llubu" del non-consumu, afalen a la xente pa comprar, mercar, gastar porque, claro, ello mueve'l rabil de la gran rueda económico.

L'Alministración ye un ente gastaor, nun cría riqueza solo la distribúi. Te quita les perres y, nel meyor de los casos, inviérteles o gástales en serviciu públicu. Pa min ta nidio que'l gastar l'Alministración unes poques perres nuna comida (más bien probe, curtia y manifiestamente meyorable) ye una forma de devolver a la sociedá parte de la plata que primero arrampuña n'impuestos, tases y precios públicos, y too ello en forma de salariu de cocineres, camareros y el comeniente beneficiu industrial del empresariu. Pero la hipocresía ye la hipocresía.

En realidá les males llingües (nun tengo dulda dala de que son les meyores llingües) dicin que'l curtiu aforru de nun facer eses comides nun ye otra cosa que dirixir eses perres a pagar los dineros del plus d'ALTU CARGU que-y dan a direutores xenerales y demás gandaya político de l'Alministración del Principéu que, polo visto, quexaron porque ciertos funcionarios, pola mor del pagu de lo que se llama "carrera profesional" (cosa que vien de lo que los políticos espeyaron na llei que s'entitula "Estatutu Básicu del Emplegáu Públicu") ganaben más qu'ellos. Probinos.

Un funcionariu, por parásitu que paeza, tiróse años preparando una oposición, presentándose a ella y aprobando. Cualquier ciudadanu pué presentase si tien ganes y enfotu. Esa persona tuvo d'enfrentase con otros ciudadanos y, en base a esfuerzu y méritu personal, ganar el puestu de trabayu. Por embargu, un direutor xeneral, un conseyeru, en resume, un políticu que remana un cargu de confianza, nun algama'l puestu de trabayu por méritu o capacidá y, muncho menos, n'igualdá d'oportunidaes. Ta aende por amigu, cliente o mafiosu, vaiga usté a saber, dependiendo del partíu políticu (que son, mayormente, sociedaes mercantiles clientelares nada democrátiques) que lu encuma al puestu.

En fin, Isócrates fala del fin de la democracia por causes tan válides entóncenes como agora pero pa min que ye la hipocresía'l sangre que. perdiéndose n'hemorraxa, lleva a la democracia al cagüercu. Y, sinón, al tiempu.

Costante Álvarez