Xente qu'anda perequí :-)

sábado, noviembre 17, 2007

GRÁNDOLA

16.11.2007

Grándola ¿úla?

Vilo.

Cabo 'l pasu a nivel, el tren de los Caminhos de Ferro do Norte movía llento, zarapicando, de la qu' esbrexaba trabayero sobre maliguaos carrilos afincaos en travieses de carbayu añoso. La máquina de gasóleu arrastraba vagones de tercera con della xente axitando banderes pertueses y otres, solo bermeyes. Esi 27 d’abril l’aire traía l’arume indefinible de llibertá mecío con esencies d’espigues en primordiu y arumes primerizos de florines de cuduxos, xesteres, xinestes y carquexes por españar.

Y vi puertes manuelines, a mármole carexo, abiertes de par en par en palacios (de Sintra y los sos alrodios), valeros de yeguada y servidume. Y el domingu, en Santa Apolonia, un mar bermeyu d’esperances al vientu saludaba la llibertá. Sobraben les armes énte los claveles revolucionarios.

El rescamplíu aquél, enfotos de xusticia y dotrina social y llista... ¿úlos? ¿Qué foi d’ello? De la nuechi al día la lluz daña mas, al tiempu, aveza, esmana y mui llueo (primero de pensalo) escampa la boriada que tolo mueve, mueya o podrigaña pa camudar... Pa camudar en nada.

¿Quién habita agora Grándola? ¿Quién camina pa la villa moreno, tierra de fraternidá?

Va tiempu que nun oyo firmes y acompasaes pisaes escuédigues sobre camín cascayero.

Suena Afonso nel mp3, cierto, pero nun ye lo mesmo.

Costante Álvarez.

viernes, noviembre 16, 2007

LLIBRU 3 D'EL GARRAPIELLU"

16-11-2007

PRESENTACIÓN DEL VOLUME 3

DE CUENTOS DE LA TERTULIA CULTURAL

"EL GARRAPIELLU"

Ayeri tuvi na llibrería "ALBORÁ" de Xixón pa la presentación del llibru recopilatoriu de los premios de la Tertulia Cultural “El Garrapiellu”. Tratábase del númberu 3, que recueye los premios dende l’añu 2003 al 2006. Tenía de tar porque, grandonismu mediante y sinceridá toa, soi ún de los premiaos, el primeru de toos por ser el del añu más vieyo.

Tuvi notros alcuentros d’esti calter y, tamién, d’El Garrapiellu lliterario mas reconozo qu’ésti foi el que más me prestó. Ún de diente encambrioláu diría que por ser de los premiaos pero non, n’home non, puesto que l’intre gozosu del premio (de cosiderase asina) vieno na cafetería d’El Café Xixón, allá alantrones del tiempu pasáu, nun fríu mes del 2003 cola entrega del (curtiu, pa qué lo negar) cheque n’€uros y el reconocimientu de la presidenta de la Tertulia.

Ayeri prestome porque taba l’impagable y polifacéticu criador de sigo mesmo y de la irrealidá cromático, Ánxel Nava. Esti nenu vistíu d’home, n’amor platónicu con mascota amortayada (y quiciabes alter-egu), la silente Mariquina la Galana, siempres que lu sentí (de sentimientu, non d’oyíu) tuvo l’aquél de plasmame cola so gayola de vivir. Almiro a esti creativu y xulgo que pena en sitiu xeográficu inxusto: notru pais taría encumáu nel particular Párnasu Nacional.

En fin, arrodiáu de xente, los más d’ellos conocíos, glorié de les pallabres del presentaor Chema Vega (peñáu a un estilu “siux” comedíu o de “marine” en prudente retirada), del editor del llibru (VTP) y del, anecio otra vuelta, impagable y xenial Ánxel Nava qu’espurrió, grande y agradablemente, na desplicación de les ilustraciones a pluma que fexo (parez que nello tamién ayudó Mariquina la Galana) y qu’acompanguen a los cuentos.

Nava fexo de desintenebraor de los arcanos, claves y “grafo-glifos” que mangare en cada retratu, neses auténtiques ventanes espirituales a les qu’asomar primero de llier el cuentu. Ventanes qu’abrin antoxana al conceutu y paisaxe del rellatu.

Y más nada. Taben los de siempre. Los necesarios. Los voluntarios de la llevadera esclavitú de la llingua. Los bonos. Los meyorables.

Toos yeren y, pémeque tamién, yeren toos.

Costante Álvarez