HIPNOSIS DIARIO

07.11.2007

Hipnosis diario

Parte de la hipnosis diario consiste na audicion, visión y asunción d’una mesma opinión, normalmente ayeno, qu’acaba sintiéndose como propio. Opinión gomitao polos medios de comunicación y piñerao por confesaes adscripciones ideolóxiques que busquen saldar cuentes pendientes o afitar privilexos. En realidá siento que na sociedá hai una llinia argumental de baxu perfil, un rux-rux seliquino que, perdayuri, lo calistra too, que tolo endientra, mueya y cubre. Trátase d’un enfotu implícitu, gaseosu, borrinosu, inconfesable mas operativu, qu’usa les artes de les baxes emociones pa l’algame de fines tamién baxos pero mui útiles pa quien los procura. Ye como una salmodia baxino, un canciu cafiante y repetitivu, un ruíu subaudible que, polo continuu que ye, parez esapaicer del mundu real pero que tá aende, desplegando plenos poderes hipnóticos sobre la sociedá durmiyoso.

Va tiempu que conceutos como el de solidaridá, el de bientar, el d’humanismu, amor, compasión y munchos otros más, conceutos qu’espresen sentimientos qu’espeyen en nobles emociones, nun formen bramente parte (sacante l’usu hipnóticu ideoloxizáu) del noble exerciciu de la xestión de la “res publica”. Tantu tiempu como el que media ente la dixebra d’algunos antropoides del grupu de monos homínidos y la criación de megapolis tertiomilenioristes. Podríemos aldericar sobre si aquéllos conceutos yeren dafechu operativos nos primeros homínidos pero prefiero pensar que, d’aquella, la vida emocional del home, polo cenciello y harmónico pa cola naturaleza, yera más sano y llibre (y nun falo de resucitar la tesis del noble selvaxe).

En fin, la imaxe del monu de la película “2001 una odisea del espaciu” arrevexando pal cielu, de refundiu, el güesu que valió pa machucar a otru monu, fai rescamplar (y si nun “e vero, e bene trovato”), esi supuestu momentu de la conquista del poder personal del home pa sobre los otros, poder esplicitao en violencia pa col otru miembru del clan. D’aende p’alantre, tola costrución humano sofita nel algame, usu y abusu de la droga del “poder” entendío colos axetivos social y, posteriormente, político. La importancia d’esa droga, d’esi velenu, ye tanto que podríemos, por reducionismu tachable d’absurdu, calificar tolo humano como llucha pol poder. Evidentemente equí menciono “poder” non como fuercia interior y, poro, personal, d’autodetermín, sinón como mecanismu de manipulación, remanéu y sometimientu del otru.

Darwin intuyó como mecanismu evolutivu de la vida la sobreviviencia del más fuerte que depués matízase con conceutos d’adautación, de meyor plasticidá al mediu natural y otros téunolóxicos como son los factores xenéticos de biodiversidá. Nel home, a esi mecanismu evolutivu sumaríase el de la llucha pol poder, la sobrevivencia del más arteru, el más castrono, el meyor adautáu a la violencia que naz del usu y abusu del poder, dientru de la tribu, la castra o clan. Esta evolución de raigañu etolóxico, esti factor llamáu por dellos “darwinismu social” ye mui evidente y, como dixi al entamu, calistralo too, trescala esencies, sentimientos y anicia baxes emociones, empuerca alma y espíritu humanos.

Nun vo calificalo de bono o malo. Cenciellamente esto que camento ye un resultáu indeseyable, un parásitu que zuca enerxíes que, emplegaes notres fasteres del ser humano, podríen producir sociedaes humanes más sólides dende’l puntu vista de la sanidá integral del home consigo mesmu y pa cola relación cola naturaleza, pa cola vivencia en plenu respetu del ecosistema y, en resume, d’un progresu planetario no bramente esencial a la vida.

Poro ye que ríome toles mañanes oyendo la radio (cada vegada óyola menos) o lliendo los diarios (a estes altures yá solo los gratuitos). La historia repítese. Parecíos paisaxes y, siempres, el mesmu paisanaxe. Los mesmos movimientos d’egoísmu y violencia. Los mesmos escenarios sociales de dolor, sufrencia, sometimientu, en resume, de quienes tienen poder (pocos), lo gocien y exercen y de quienes (los más) lo sufren.

Viendo los pantasmes del pasáu encarnando una y otra vuelta en siempres nuevos “nerones” amburadores, “atiles” esfarrapaores o “hitleres” cazatalentos parez que la sociedá nun ta dispuesto a salir d’eses hipnosis tanto extra como autosómiques que la determinen y esclavicen. Esi, como dixi, rux-rux qu’aliena. Eso que los inteleutuales llamen babayamente “sociedá civil” podría dicise que ye más una “brañada servil”. Mientres “evoluciónase” no teunolóxico la sostancia de lo social ye siempres lo mesmo. Poro, incumplimos la llei non escrito de pasar pol mundiu ensin someter (a otros) nin dexamos someter.

Con cierta perspeutiva reconozo que pal resultáu de la obra de la vida (que d’eso trátase, d’adeprender actuando nel fantásticu teatru d’ésta) ye bono la diversidá d’añedíos posibles al alimenticiu platu cotidianu d’eso que llamemos vivir. Pero cuido que por mui bono que sía un manxar, inda’l más pinchu farturcará de comelu a diariu.

Y equí el comentariu prescindible ayeno a lo universal. Nesti tiempu y nesti pais, da lo mesmo que los partíos políticos PSOE o PP anden en griesca o impostura. En realidá dambos, los dos y tolos que fain el coru d’adoradores col envís de ser lo que son ellos pero con otros nomes y notros llugares, anden en cata de lo mesmo: poder. Nesti casu, amás del fácticu el poder de remanar les perres qu’arrampuñen a la brañada durmiyoso, (eso que llamen pueblu) presuntamente necesitada de pastores qu’empobinen la indefensa oveyada. Y pa que nun se decate la sociedá alienao, hipnotizao, usen de la ideoloxía y les emociones. Críen inesistencies diferencies y usen valero discursu acorrompinao de gas durmiyante, guerracivilismu, progresía, republicanismu, monarquismu, laicismu, nación..... Y cuidense, abondo, de mencionar que de lo que se trata ye de controlar la pación. Exercer poder.

Costante Álvarez