ARRIBA, COMO ABAXO.

Sé qu'esistíen. Víalos nos movientes (1) y nun me yeren especialmente tarrecibles. Inda nos fiestos (2) salíemos, guah.es d'aquella, a pidir por ellos, en cata de perres pa coles qu'aperiar bonos fines, ente otros, krishtianalos (3).

Ye lo que trai rellacionase con maracianos. De mano pacíficos hasta qu'un día ves nos movientes lo muncho malo que son, que si violen a les tos muyeres, que si la tienen más grande que la de nueso, que si les muyeres atochecen en cuantes que follen con ellos, que si atropen tolos puestos de trabayu... Too barata lliteratura y cosadielles que, pa qué lo negar. furrulen perbién ente la xente simplayo.

Lo cierto ye que nunca nun me fadiaren. Nunca nun los tratare, sacante a M-boix, ún d'ellos, pero krishtianizáu de nacencia por vinir de la colonia que la Patria tien naquél llugar. Nunca cuidé d'ellos. Nunca pensé n'atopalos en mio casa. Nunca, hasta qu'estos tiempos de dibilluriu y trafuelgu que vivo aportaron a la societas (4). Dicin que ye la fame, la falta futuru nesi planeta ermu d'agua. Dicin muncho, ente otres coses, qu'hai traficantes que vienden-yos un futuru fácil na nuesa casa y ellos, claro, créenlo como prubinos que son. La verdá ye qu'ha tenese valor pa xubir a eses naves gravitatories de teunoloxía barato y pocos medios. Valor pa pagar por una plaza nesos cagüercos esnalantes, esos traxes de madera fechos a martiellazos y poco más.

Sía como sía, la cosa ye qu'agora los maracianos viven en barriu. Vivin xunto con otra muncha xente estelar. Vineron pa quedar, y naide nun los invitó. Y nesto taba cuando conocí a Bab'l. Un maracianu señorín, d'esos de casa rico si por talo se tien poder comer casi tolos díes. Bona educación na escuela colonial. Trabayáu al serviciu del colonu terrestre, pueque de bona vida mas, ¿quién pue dicir lo que ye eso? Conocilu porque una moza, amiga d'una amiga y que conocía a un amigu col que quedemos pa fornicar, me lu presentó. Aquélla diba a casar col maracianu, un asuntu de permisos de residencia terrestre o eso paiciome oyer. Una basoria, creéime, la hipocresía d'importar mano d'obra barato pa que'l sistema económicu de nueso pueda siguir produciendo a bon preciu mientres la condición d'esclavu aumenta ente la raza humano alienada pol consumismu y la inmigración, ente otra, de los maracianos.

Si ye que pue dicise que los maracianos son persones to de dicir que Bab'l ye bona persona. Y cuando me cuntó la hestoria de cómo aterrizó na Patria, dexome ablucáu porque nun vieno de maguyu nes chalanes espaciales, como fain toos ellos, sinón en turbostélar (5), eso sí, con billete de segundu gráu. Prindolu la policía en cuantes asomó la piel naranxa pel departamentu-restaurante del inxeniu viaxante, pero ya nun podíen facer ná. A ver, esclariemos que ná en términos d'humanismu pues notres circunstancies, y notros tresportes, podríen tenelu esquitáu, eyectáu dafechu al espaciu, ensin munchu problema.

Depués d'indentificalu na estación de policía, cola tarxeta d'espulsión insertao na vidaya derecha, dexáronlu colar cola alvertencia de que la orde d'internamientu tardaría unos meses y que, poro, nun tendría de metese en problemes si nun quería acabar na colonia carcelario de la Lluna. ¡Vaya gallu esti Bab'l! De tener coyones diría que tendríen de ser cuadraos y bien grandes.

El mui castrón aferrose a una moza necesitao de cariño y sexu. Eso siempre convién. Convién a toos y nespecial a les moces de la Tierra que, en franca minoría reproductivo por cuenta de tantu manfloritu xenéticu, nun son a poder satisfacer la necesidá primera de sentise completes vaxinalmente. Pa eso los maracianos yeren bona comida. Tratelu un tiempu. Yera bon trabayaor y, ya lo dixi, meyor persona. Automáticamente, coses de les etiquetes, tolos maracianos qu'entamé a ver pasaron a gozar d'un estatus asemeyáu al de Bab'l. Pero non, nun tolos maracianos yeren Bab'l.

Hai unes selmanes vieno per casa un amigu de Bab'l. Wam'm, qu'esi ye'l so nome de maracianu probe, tien otra hestoria que cuntar y de xuro que nun vos la cuntará porque visti miéu y come dolor. Esti ye un superviviente. Ná de turbostélar o lasercaril (6). Esti ye de los de chalana (o meyor dicir, chatarra) espacial. Pasó diez meses terrestres a bordo d'una nave desahuciao, técnicamente falando, conociendo toles llúrigues espaciales que los radares estelares de defensa terrestre refuguen fondigonar porque naide, en sanu xuiciu mental, se metería nelles. Vio morrer a muchos collacios y tuvo de comer a munchos d'ellos pa sobrevivir hasta aportar a la Tierra. L'aciar frutu del viaxe ye un güeyu ensucho y fondes ferides per tol cuerpu qu'amuesen quién evito cayer na cazuela del desesperu y la sobrevivencia. Xúrovos qu'a min los maracianos nun m'importen. Podríen dir toos a tomar pel culu yá. Pero conocer la esperiencia del probe Wam'm púnxome en corazón compasión. Con esti home, pues por un igual lu tengo, diría al mesmu abisu infernal que vende Krishtian, y a elli solu tendría elexío pa lluchar pola propia vida a comuñes. Porque esos güeyos medio ensuchos (quiciabes de tantu lloru) y esa rocea, qu'atapa dignidá ensin medida, son medalles que pocos algamarán na puta esistencia universal. Pues de la xente que fue al infiernu y volvió quiero yo tener amigos.

NOTES (1) movientes = películes ellectróniques d'ampliu consumu

(2) fiestos = ciertos díes de folixa relixoso

(3) Krishtian = algoritmu moral cristalizáu en paradigma eticidante.

(4) societas = cadarma social en que desendolca la humanidá

(5) turbostélar = tresporte automatizáu d'entidaes biolóxiques

(6) lasercaril = tresporte discrecional multimaterial

Costante Álvarez