Xente qu'anda perequí :-)

jueves, marzo 08, 2012

El conde astur, D. GONZALU PELÁIZ - 2 -

L'ENCUMAMIENTU AL PODER, DEL CONDE ASTUR.

L'ENCUMAMIENTU POLÍTICU DEL

CONDE GONZÁLU PELÁIZ.

(1126 - 1132)

Dende l’entamu del reináu d'Alfonsu VII, nel añu mil cientu ventiséis, y gracies, cimeramente, al rellatu de la "Crónica" d'esti rei, pué siguise con detalle, l'actuación del conde astur, prototípu de l'allevantada nobleza de la dómina, xénte xabáz y bravén. Gonzálu Peláiz va ser l'home cuyo taléntu político, y llistura guerrero, va a esmolecer, llargamente, al monarca asturlleonés.

Mesmo al entamu del reináu d'Alfonsu VII, unos díes dempués de coronáse na ilesia de Santa María de Lleón, amosó Gonzalu Peláiz falta de conformidá pa col nuévu rei. Sinón lo féxo a les clares, sí lo manifestó tácitamente.

Pero n'estos empicipios del reináu, l'actitú del conde astur nun ye daqué cosa esceicional, pues hai muncha hostilidá pa escontra el nuévu rei, por gran parte de los nobles de la dómina.

Dende la xúba al poder del monarca, va a ser muncha la nobleza lleoneso que va a mantenése en tientes, al aguarde y chisva, de futuros acontecimientos. Ún d'esos acontecimientos qu’esperaben, yera ver la solución que diba dar el rei a la revuelca entamáda polos alcaides de les torres de Lleón, quienes s'oponíen, dafechu y abiertamente, al nuévu rei dende la so xúba al trónu del reinu.

Los alcaides, negábense a rendir les torres al nuévu poder real, masquel monarca prometiéra recibilos pacíficamente, si entregaben les fortaleces. Solo cuando los nobles vieron que'l rei espugnaba les torres pola fuerza, y perdonaba magnánimamente a los alcaides allevantaos, quienes quedaron llibres y ensin castígu, los combalecháos y entarambanáos nobles del territóriu asturlleonés decidieron sometése al rei. Y ente ellos, atopábase Gonzalu Peláiz, qu’amás de siñor de tierres lleoneses asitiáes al sur de la cordal d'Asturies yera, acórdies colo que cúnta la Crónica d'Alfonsu VII, "dux, in pártibus Asturiárum", ye dicir, home principal, con puxu en parte del territoriu de l'Astúries d'aquélla dómina.

Polo tanto, l'acatamientu que fíxo Gonzalu Peláiz al nuéu rei tuvo, a les clares, condicionao pol cursu que llevaron los sucesos o, si se prefier, cómo'l rei remanó los acontecimientos

Nun podemos negar que'l rei foi llistu enforma. Recién xubíu al tronu, sabía que, primero, tenía de ganar sofítos ente la nobleza del reinu, pues nada podía o valía, un rei, ensin nobles que lu apercontiaren. Debemos pescanciar que, na dómina qu’estudiamos, el poder territorial ta en manes de los condes, quienes poseyendo castiellos y tropa, eshercíen un poder fácticu y personal, masque lo fixéran, formalmente, en nome del rei. La necesidá del rei de ganase a la nobleza pa llexitimáse nel poder del trónu yera evidente. Persabiéndolo, el rei entamó a apurrir honores y derechos a la nobleza, pues nada ye más prestoso a güéyos d'un posible enemigu qu’el vése afalagáu con regálos y prebendes. D’esti móu, el rei usó más del miel que del fel pa ganáse a los allevantaos, y repartió ente ellos favores y nomamientos. Y asina lo féxo, tamién, col conde astúr.

El nomamientu que recibió l’asturiánu del rei Alfonsu, como "cónsul, et ómnis milítiae deléctus", ye dicir, "el más gállu y preferíu de tolos militares", asina como otres gracies reales que-y apurrió más tarde, como la de ser elexíu delegáu real pa la negociación de les trégües d'Almazán, o el cárgu de, alférez real, too esto que dicimos, y que-y dió el rei,de xúro que fueron abondo como p'aselálu nestos primeros tiempos del reináu, lo cualo permitió que los dos personaxes caltuvieren ente ellos, bones rellaciones personales y polítiques.

Nesti periódu, del añu mil cientu ventiséis al trentaidós, Gonzálu Peláiz aparez faciendo los trabayos comunes a los nobles del reinu en tiempos de paz, ente otros, confirmando diplomes, tanto reales como particulares, cabo otros importantes magnates lleoneses y castellanos. Unes veces les cróniques lu citen ensín títulu nobiliáriu, y en otres, se diz, o se fai noticia, de la so tenencia o posesión del territoriu astur, au yera, ensin dulda dála, la másima autoridá, tanto política como militar.

La pacificación interior del reinu asturlleonés, cola sumisión, más o menos sincero de tola nobleza, permitió al monarca enfotáse na raya col reinu d'Aragón, ú varies places del reinu asturlleonés yeren fieles al rei aragonés, como la de Burgos. En mil cientu ventisiéte, Alfonsu VII la toma, desendolcando la reaición del rei aragonés, que se presentará colos de so, nel valle de Támara, en xunétu d'esi áñu. Nesti llugar, afletaráse una paz ente los reinos, que non finará coles tradicionales engarradielles fronterices ente dambos territorios. Y nesta situación de llucha ente reinos, vio el conde astur un intre amañoso pa facese valer éntel monarca alfonsín.

Como marcaba la tradición feudal, aquel tiémpu de guerra yera'l momentu afayaízo pa que tolos que recibieren primero honores del rei, manifestasen la llealtá pa con él, pues teníen la obligación d'acudir al so llamáu pa combatir. Yera un asuntu de pagar al rei les gracies y daos recibíos primero. Nesti contéstu, acudamos a la crónica de reináu d'Alfónsu.

L'autor de la llamada, Crónica Adefónsi Imperatóris, hostil al rei aragonés conocíu como, el Batallador, cuando quier reflexár la debilidá d'Alfónsu VII nesti moméntu del so reináu, xeneraliza les causes de les solevaciones nobiliares pa escontra'l monarca asturlleonés. Esti marcu de desgracia, valía pa engrandar la figura del rei pa cuando cuntáre la vitória, del monarca, sobre tolos pilancos que tenía d'enfrentar. Y, nesti contestu, diz el cronista, quel rei descuidaba la raya colos musulmanos por causa de les engarradielles que tenía col rei aragonés y porque, amás, nun-y sofitaben dellos nobles del reinu; nobles como'l conde castellánu, Pedro de Lara y el so hermanu, el conde Rodrígu González; y que tampoco tenía’l favor del conde astur, Gonzálu Peláiz.

Por si tanta desgracia fuera poco, l'autor cita a otros nobles allevantaos, como Pedro Díaz, que taba rebálbu en Valle, o el conde Ximeno Íñiguez, que lo taba en Coyanza, colocualo, daben mui mala vida al rei asturlleonés. Toa esta xente noble, diz el cronista, entaramingaba trabayos, y magullu, y amagostaben col rei aragonés pa combatir a Alfónsu VII.

Esto que diz el cronista, dende lluéu, ye daqué desaxeráo. Namái mos costa la rebeldiada y collaboración col rei aragonés, de los condes castellanos Pedro de Lara y el so hermánu, Rodrígu González, quienes xunto con Ximeno Íñiguez teníen acatao a Alfonsu VII, pero de magullu y con engañifa, pues taben más pol rei aragonés, con quien combalechaben y a quien seguíen dafechu, acórdies col cronista.

En cuantes a Gonzalu Peláiz, en pallabres del cronista,"dux Asturianórum", ye dicir, "gallu de les asturies"; sabemos que tuvo de dir n'aída del monarca asturlleonés cuando lu llamó a la guerra escontra l'aragonés pues, sinón, ésti nun lu tendría nomao como el so delegáu pa énte'l rei aragonés, col mandatu de negociar les trégües d'Almazán, en mil cientu ventióchu. Pa cumplir esta misión, dirá Gonzálu acompangáu pol, yá citáu, conde asturlleonés Suéru Bermúdiz, consideráu pol cronista como, "varón actívu nel conséyu, y guetaor de la verdá". La comparanza del comportamientu d'estos dos condes, a lo llargo del reináu d'Alfonsu VII, ufre induldables contrastes.

Desciénde'l conde Suéru, d'un destacáu llináxe, yá presente na corte d'Alfónsu Séstu, y se distinguirá, siempres, pola so costante fidelidá a la monarquía lleoneso. Nos primeros díes del reináu d'Alfónsu VII, y frente al movimientu d'oposición de munchos de los nobles lleoneses y asturianos, ente ellos, como sabemos, de Gonzalu Peláiz, Suéru distinguiráse pol acatamientu dafechu y al intre, y por ser fiel sofítu del rei, al que aidará na espurga de les torres de Lleón; destacando como ún de los sos más lleales vasallos.

Poro, y con esti antecedente, nun estraña gota la presencia del conde Suéru nel delicao oxetívu de negociar les paces d'Almazán. Mas, el fechu de que tea presente, tamién, el conde Gonzalu Peláiz nesta xera, diz muncho de que ésti yera home d'entera confianza del rei, xunto con Suéru, la más grande personalidá política y militar d'Asturies, ún de los más notables de tol reinu asturlleonés.

Nun finará equí la rellación ente dambos magnates que, como veremos más alantre, llegarán al enfrentamientu armáu ente ellos, siendo el conde Suéru quien, en nome del rei, intentará someter l'allevantamientu independentista de Gonzálu Peláiz.

El taléntu políticu y l'habilidá diplomático que, dempués, emplegará en porgüeyu própiu, nun yeren les úniques dotes y cualidaes de Gonzálu Peláiz; quien debía destacar, cimeramente, pol so xeniu militar. De xuro qu’ésto foi lo que lu llevó a ser nomáu alférez real, cargu qu'exerció, polo menos, ente xunetu del añu mil cientu trentaiún, a marzu del trentaidós.

-----------

Comentariu en PINGARATES DE SABENCIA >>