Entradas
SELMANA DE LES LLETRES ASTURIANES 2008
Debo dicilo mas, ¿cómo lo dicir? La pose ye la siguiente: hai qu'entrugase si paga la pena, si la verdá bramente llibera, si la indiferencia da, o non, esa estraña sosiega frutu de puntual y comeniente encarabecimientu de neurona. ¿Cómo lo dicir? Fácil: digámoslo con palabres.
Baxé del cercaníes a les siete y diez de la tardi cola muyer y el vieyu Antón, barba y cabellu ablancuxao, p'atopame col agua de mayu y la clamida de xente pola oficialidá d'ésto, sí, digo bien, ésto, l'ensame pallabres funcionales que críen espírtu, nación y pación d'una tribu humano arrequexao ente sablera y cumal. Y lo más prestoso foi conocese desconocíu énte aquel cardume d'húmedes banderes, asturines y pancartes, cartelos y propaganda. Cares nueves. Sangre anovao. Futuru encarnáu n'esperanza y, tamién, sirviores del pasáu aneyo que, testeronos vivin en mozos cuerpos pa desgracia d'aquel futuru.
Trenta años nun son nada. O venti. O quinci. El tiempu depende de la esperiencia personal. Los años nun alforxen en celebru. El camín que nunca nun s'andevo nun pesa na güesame. Tanta poesía pa descubrir cómo les mesmes zunes repítense una y otra vuelta. Pero, perriba la miseria inmediato, la gayola mediato redimía l'intre supremu de la pública confesión de fé y esperanza nel futuru granible qu'alguarda al combatiente armáu de roses y razones, felechu y flor que, cuala estatua estalinista, mira al llonxanu finxu'l cielu y sigui camín. Sigui, con despreciu de dolor propiu y propia sufrencia. Mitos varoniles y aquéllos otros d'amazóniques guardianes de lo femenino, tributario de Marte. Sollertes columnes, hidrófugos sofitos, pegollos imperiales en primordiu xerminal. Amor n'humor y fantasía. Toos xuntos, d'enriba a baxo, la cai Uría.
Siempre sobrarán razones. Hai tantes como tiestes pa les maxinar. Y namái el sabiu sabi selo cuando escueyes aquélles que s'abasten a sigo mesmes. Razones pa la esperanza. Y pa la llucha si cuadra. Pal respetu y l'auxiliu. Y pa la reconocencia de la ciencia de lo falsamente imposible.
Los venti minutos baxo la lluvia valieron pa sentime inda más vivu. Sentir que tres estes pallabres calteníes n'ellectrones cimblayonos hai más pallabres, más aliendu, y más gargüelos que pronuncien estes pallabres, qu'alienden esi aliendu que cristalicen la pallabra en mundu real. El mundu la la llingua asturiana que, momentáneamente, sobrevivi arrequexada ente falampernios de grandeza amorosamente curiaos por vieyos ciudadanos inorantes d'embullos del mundo y los sos pecaos, de política de salón y de dictadores del facismu socialista y español. Pa min son los santos sabios, vieyos resclavos qu'acolumbrar dende barcu que flunde, tremoses áscuares de potencia irredento, formientu n'espera de masa por yeldar, pértigues sollertes a dimir l'arbole de la bayura, l'alicornia de la normalidá social d'un pueblu grande qu'inda nun lo descubrió.
El camín dica 'l teatru Campuamor foi camín de cantares. Terapia de grupu. Albancia por nacer. Y prestome ambute. Sí. Prestome.
PD. Igual qu'hai sieglos, un nenín de teta ufría, inocente, periódicu comunistono. Otros, cartafueyos de sociedaes polítiques de repetición cronolóxico. Porque la estupidez repítese incansable y cada xeneración parez necesitar la mesma metralla pa decatase de lo ilusorio, lo invisible, lo prescindible. Nestos atopos de xente florien les asociaciones polítiques en cata la solución final, el buenismu humanisto, l'internacionalismu proletarizante... la babayura n'estáu prístino. La inocencia, a la llarga, culpable.
Costante Álvarez
Unos vidios del YouTube....
actu nel Teatru Campuamor: http://uk.youtube.com/watch?v=vlQ_Z2rTgOw
Manifestación http://uk.youtube.com/watch?v=EmOOf7AvKzk
