Entradas
Sigo, prestosu, dalgunos alderiques que veo pela rede. Normalmente s'entamen ente durmientes, y atópolos faltos del fondor esperable ente presuntos adultos qu'escuenden tres ordenadores, xente con cierta vida vivío y esperiencia vario. Grande error, pola mio parte, esperar cosa dixebrada d'esos durmiyosos. Masque nun soi quien pa xulgar saberes y dicires de xente circustancialmente anónimo, sí veo lo difícil que ye entamar, y siguir alderiques con xente que nun tien claro conceutos básicos, que fala d'oyíes o qu'afita verdaes que crée, que solo cree, pero que nun sabe. Y ye que, eso de tener la verdá n'esclusiva ye un deporte (nun se pue dicir otra cosa cuando nun se tien otres entendederes) mui espurríu ente munchos humanos. Selo porque tamién fui d'ellos. Durmiente, digo.
N'otres cultures, nel curriculum académicu, hai interesantes exercicios formativos que revivin el vieyu arte de la oratoria clásico. La cultura de la "disputatio" aplicada a la mauración de la personalidá crítico ye cosa interesante na casa del home pues, animales socioculturales, ello ye, de cultivu social, comeniente ye someter a crítica sano tolos productos humanos pa poder dixebrar paya de biltu. Masque, ye evidente, que de la "disputatio" nun tien porqué surdir una verdá (normalmente solo sal l'habilidá pa tapecela o vistila d'un mou amañoso y en porgüeyu de quien defende una postura suxeta a crítica) nun lo ye menos que'l músculu que cría 'l so exerciciu ye cosa valoratible y, a vueltes, granible cuando tamién ye evidente que nel caminar del home (sacante qu'ún vaiga pel camín del anacoreta) se van a atopar pilancos que dirimir en sana discusión con otros. Nun sé cómo lo dicir ensin que los durmientes s'ofendan pero lo cierto ye que la conclusión que me produz esperimentar el viaxe per foros y corripies d'opinión ye que na rede atopo poca xente que sepa "falar", escribir lo que fala o espresalo con coherencia porque parez que na tenyera-y añera la forgaya d'una vida brutalmente dixebrada del entendimientu, vida prisionero de la tópica valero, de la comeniencia incosciente o d'opinioes ayenes que nun se metabolicen cola crítica propio.
Duros tiempos, estos del XXI, pa la oratoria. Duros, pa la "disputatio" costuctivo. Duros, pa la conviviencia. Mas, si bien se camienta ¿van ser bramente duros? Cierto que'l mundu técnicu de la rede Internet, la cultura visual de xuegos virtuales y realidaes televisives, l'alienación nes relaciones interculturales y personales parez dexar amenorgáu espaciu pa la conversación fondero, la reflesión agudo y la busca de la muncha o poca verdá ínsito en toa afirmación. Cierto que la xente parez arrezquilar les intelixencies nun movimientu que, más que d'atuñáu, lo ye de babayez. Cierto que la falta de conocencia, ello ye, educación y entendederes culturales, arrequexa a la mayoría de la polación humano a la corripia de les oveyes (el famosu "silenciu de los corderinos" camín del mataderu). Too ello mui cierto, sí. Pero, por si dalgún lo quier ver en cosolancia, nun lo ye menos que, na historia de la casa del home, siempre fueron asina les coses. Si lo espresamos en términos ecolóxicos, socialmene los humanos formamos una pirámide neto que la trófica, una pirámide na que la pastia humano decanta, n'ascensión vertical, en "clases" sociales y éstes posen, pasu ente pasu, en grados de binomios predador-presa de progresiva eficacia y eficiencia hasta que se llega al altor, al picalín piramidal, ú reinen los grandes predadores sociales. Y nesti exemplu ye fácilmente pescanciable qu'una pirámide necesita una gran base de pininos sobre la qu'encumar unos pocos "sensatos".
Poro, masque presta lleer y opinar en dalgunos alderiques alrodiu la llibertá, inmi y emigrantes, la política de la cobardía acomodaticio socialisto, la intolerancia facciomusulmana, les dictadures (bones o males sigún la tintura qu'amuesen los falucaores), la corrupción... y tantos y tantos otros temes qu'estren la rede, acabes pescanciando que too ello nun ye otra cosa que xuéu d'andariques, xuéu de formigues, d'ácaros microscópicos que s'engarren nel inmensu corpus del gran predador al que malpenes fadien. Gran predador que los tolera porque cumplen el so papel ecolóxicu na escala social na que mueven y a la que pertenecen por prisión incosciente. Esi submundu ye'l que paga los impuestos y regalíes, tributos y hipoteques; el que paga, cola perda de la curtia vida propia que tien, la bona vida que se vivi nel picalín de la pirámide. Mientres andariques, o ácaros, neto que los dos moros camín de la Meca que montaron discutiniu sobre si los perros que diben comelos yeren galgos o podencos, vivin afogaos na tópica de la opinión y la esistencia, los del picalín pigacen pacetibles.
Cuanto más altu teas, l'aire tará más nidio, pueque meyor vas ver la puesta de sol y'l finxu'l cielu espurrirá más llueñe. Too son ventaxes.
Ya se sabi: la mierda va p'abaxo. Y, casi siempre, flota.
