Entradas
Dende hai un tiempu, razonablemente curtiu, per estes feches mango un cuentín n'Internet. Normalmente ye un trabayu cenciello y ensin otru enfotu que pasar el tiempu. Si con ello daquién reflesionaba al rodiu la esistencia humano, meyor que meyor. Pero esta vuelta voi rascuñar dalgo neses fondures que la ciencia diz nun ver pero que, por embargu, esmolecen a munchos magar creyan, namái dacuando, nesa relixón. Van ser pallabres de mio, cierto, pero la sabencia qu'hebia nelles, non. Tómola emprestada d'otros homes, d'otres almes, d'otros seres que, al fin, tamién soi yo. Y, tamién, vosotros.
LA FONDURA DE LA SABLERA
Nun s'enquivocar. Esto, equí y agora, fálase en fondura. Ye como les agües de los mares. Veamos.
Nesti tiempu d'estíu, les persones van a les sableres y tumben na so superficie, ello ye, permanecen per elles ensin otru enfotu que la estética del doráu que producirá'l sol sobre la piel lo cualo, en sigo mesmo, nun ye nin bono nin malo: solo un comportamientu superficial. Esti vezu nin siquier tien que concasar colo que se necesita o ye sano pues se sabi que'l sol, pal home, ye bono según la dosis de radiación que se tome, mas d'ello nun se cuida.
Sicasí, lo importante pa quien vivi nesa superficialidá ye'l tonu que garrará la piel pola esposición al sol ya que la mente fixa l'atención, como muncho, na costruición estético que tien muncho de ver col mercantilismu d'una industria de la guapura. Asina, aneciando incoscientemente nun comportamientu cuasi automáticu, esi vezu de la xente s'espeya, ente otres coses y causes, na compra de productos, ente ellos los amañosos p'algamar el tonu deseáu col menor riesgu; en mantener una piel, normalmente sano, hidratao y protexío de lo que nun se ve como una agresión sinón como un bien deseyable. Too ello, bramente, nun ye otra cosa que la vida pescanciada na superficialidá de la esistencia. Pero ¿a qué cuentu falar de superficialidá nesta consideración d'un comportamientu humanu habitual? Nun se trata de fadiar o fuñir, de menospreciar esi vezu sinón de sometelu a curtia reflesión.
La superficialidá de la que se fala equí añera na falta de consideración pa colo muncho de lo que mos arrodia nesi paisaxe braniegu que se cita. Por exemplu, pa col sol que, como muncho, se subsume nel esmolecimientu por ponemos la crema comercial que mos abellugará de la so aición y dará bon tiñe. O pa cola sable, na que espurriremos prestosos y que, como muncho, valoraráse como tumbona axeitoso o amañosu basureru en que dexar los resclavos del consumismu. Y si siguimos l'aición desendolcando'l filu de la comprendoria, veremos que la xente, na euforia de la superficialidá, calecío pola esposición al sol, se llanzará, pa enfrescar, nes agües d'una mar que, neto que la sablera o el sol, tampoco considerará.
Nun considerará esa xente que ye posible nalar y flotar na superficie de la mar gracies a munchos factores de la esistencia (tanto suxetivos como oxetivos) qu'esisten pa qu'ello seya asina. Poro, nel estrafullar, esbaticuayar o charlcoletiar d'eses agües, nel dir y venir, flotar o xugar ¿qué ye lo que se pescanciará?, ¿qué se valorará? Bramente, solo la superficialidá d'unes agües que se glorien nesi determináu intre. Y, por embargu: ¿eses agües tienen solo superficie o tan calteníes pol fondor de la mar?
Dixebremos, pues, que mentantu los dumientes vivin o mueven na superficie (consideramos les agües) de los mares nun se decaten de qu'eses espurríes superficies que glorien, y que tanta folixa y xinta dan, dafechu tan sofitaes pola fondura qu'hai embaxo d'elles pues ¿podría haber un mar que tuviera solo superficie? Parez claro que ye'l fondor el que percontia a la superficie en cuentes de ser tolo contrario.
Valoremos, pues, esti comportamientu que nun ye otro que la desconsideración. Con ella, la xente se baña. Con ella, camina les sableres. Con ella, entiña la piel al sol. Con desconsideración. Pero ¿qué pasaría si el mar, hipotéticamente, se volviera, tamién, desconsideráu? ¿Y si lo fixera'l sol? ¿Qué sería, entós, lo importante, la consideración o la desconsideración?
N'inocencia d'espíritu y sanidá d'enfotu, xulgo qu'una de les coses más importantes de la esistencia humano ye "'el considerar". Considerar la importancia de dir, de tar, de caltener y valorar la fondura. El vivir nel fondor o dende'l fondor. Criar caún, en sigo mesmu, la introspección puesto que la fundura sal de lo que na superficie se manifiesta.
Y más nada, por agora.
