Drosophiles

Drosophiles anuncien la seronda (primeres invitáes de la mayada), ------------------------------------------------------------- Sé que la seronda yá ta equí dende que l’arume de sidra del duernu perfuma mio casa. Trainla en botelles de plástico, de formes diverses y xebraes marques, cases, etiquetes, volúmenes y colores. Con o sin espluma, burbuxa o tapón. Y en viéndola sé que cumpliose un círculu espacial y especial: un añu, de fecha a fecha y un fechu, de vida a vida. Escuso el fecho y glorio de la fecha, paradigma d’acabación y collecha, de vuelta a nueches espurríes y sol en retirada. Pa dellos ye penible pasu de depresión psicolóxico, contestación a demanda de divorciu o anunciu de males de rema. Ye comeniente al home dixebrar la vida en fases, cachos de tiempu discreto, finxos y paseres. Éstes pa xubir la costaña de los años; aquéllos, pa mozquiar les estaciones de la vida, y, aquélles otres, pa disculpar perdes sentíes como avergoñantes. Como estratexa de sobrevivencia nun ta mal pero diz poco de lo muncho que pue traer una cabal comprensión d’esta estación añal solo padremuñu de ciertes rexones del planeta. Bríndamos la xeografía de la tierra del felechu cuatro ocasiones de sentir ferver el sangre de la vida. Cuatro que, bramente, nun lo son pues, ye valero dicilo, la vida nun s’escuende en cachos o faces sinon qu’espurre n’interminable continuum d’intres, numberables con procuru, cuando son doliosos o llaceriantes a alma, pero de fácil olvidu na gayola. Intres infinitos, cierto, pero con claro entamu nel amor de los pás que xuntaron carne y deséu pa encarnamos. Y asina, d’esta miente, espurriremos el tiempu personal como ‘l conxuntu de númberos naturales: con un entamu ciertu y un final, tamién ciertu pero infinitu na so infinita división d’intres bonos, regulares o malos. P’acabu, atopémonos cola matemática que, daveres, nun ye otra cosa qu’una clas de ruiu, una vibración, un orde que reflexa otru más poderosu y omnipresente, totipotente y lliberaor. Sirva esta reflesión sobre la seronda de curtiu cantu al incesante camudamientu, a la imparable rueda de la vida que mos trai les esperiencies necesaries pa xorrecer como lo que somos. Que caún-y mangue a esi “somos” el nome y/o axetivu que-y cuadre, pruya o mereza.